ໄອດີ ກາເດັ້ນ ສະຖານທີ່ທ່ອງທ່ຽວແຫ່ງໃໝ່ ທີ່ຊວນໃຫ້ທ່ານມາສຳຜັດ

951 14 ມິ.ຖ. 2019 ຂ່າວໜ້າ​ໜຶ່ງ
ໄອດີ ກາເດັ້ນ ສະຖານທີ່ທ່ອງທ່ຽວແຫ່ງໃໝ່ ທີ່ຊວນໃຫ້ທ່ານມາສຳຜັດ

    ສວນ​ໄອ​ດີ­ກາ​ເດັ້ນ ສະ­ຖານ­ທີ່​ທ່ອງ​ທ່ຽວ​ຮູບ​ແບບ​ໃໝ່​ໃນ​ນະ­ຄອນ­ຫຼວງ​ວຽງ​ຈັນ ທີ່​ມີ​ທິວ​ທັດ​ທຳ​ມະ​ຊາດ​ສວຍ​ງາມ ຕິດ​ກັບ​ແຄມ​ແມ່­ນ້ຳ​ຂອງ ພ້ອມ​ດ້ວຍ​ການ​ບໍ­ລິ­ການ​ທີ່​ໜ້າ​ປະ​ທັບ​ໃຈ ໄດ້​ເລີ່ມ​ໄຂ​ໃຫ້­ການ​ບໍ­ລິ­ການ​ສັງ­ຄົມ​ແຕ່​ເດືອນ​ມີ­ນາ 2019 ເປັນ­ຕົ້ນ​ມາ ແລະ ໄດ້​ຮັບ​ການ​ຕອບ-ຮັບ​ຈາກ​ສັງ­ຄົມ​ເປັນ​ຢ່າງ​ດີ.

    ທ່ານ ດາ­ລາ​ສິນ ສຸດ­ທິ​ພົງ ເຈົ້າ​ຂອງ​ສວນ​ໄອ​ດີ­ກາ​ເດັ້ນ ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ວ່າ: ຕົນ​ເປັນ​ຄົນ​ໜຶ່ງ​ທີ່​ມັກ​ເດີນ­ທາງ​ສະ­ແຫວງ­ຫາ​ບ່ອນ​ທີ່​ມີ​ທຳ​ມະ​ຊາດ ໂດຍ​ອີງ­ໃສ່​ເງື່ອນ­ໄຂ ແລະ ເນື້ອ­ທີ່ 2 ໄລ່​ກວ່າ ຕິດ​ແຄມ​ຂອງ ຈຶ່ງ​ເກີດ​ມີ​ແນວ​ຄວາມ​ຄິດ​ສ້າງ​ເປັນ​ສວນ ເພື່ອ​ໃຫ້​ເປັນ​ສະ­ຖານ­ທີ່​ທ່ອງ​ທ່ຽວ​ຮູບ​ແບບ​ໃໝ່ ທີ່​ບໍ່​ເຄີຍ​ມີ​ມາ​ກ່ອນ​ໃນ​ນະ­ຄອນ­ຫຼວງ​ວຽງ​ຈັນ ແນ­ໃສ່​ໃຫ້​ເປັນ​ສະ­ຖານ­ທີ່­ພັກ­ຜ່ອນ​ບຸກ­ຄົນ​ທົ່ວ​ໄປ ກໍ​ຄື ປະ­ຊາ­ຊົນ ແລະ ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ ໃຫ້​ໄດ້​ຮັບ​ອາ­ກາດ​ບໍ­ລິ­ສຸດ ປອດ­ໂປ່ງ ເຊິ່ງ​ມີ​ທີ່​ຕັ້ງ​ຢູ່​ບ້ານ​ຫ້ວຍ​ຫ້ອມ ເມືອງ​ສີ​ໂຄດ​ຕະ­ບອງ ຫ່າງ​ຈາກ​ເທ­ສະ​ບານ​ນະ­ຄອນ­ຫຼວງ​ວຽງ​ຈັນ 18 ກິ­ໂລ­ແມັດ ຫ່າງ​ຈາກ​ວັດ​ຖ້ຳ​ພະ ປະ­ມານ 400 ແມັດ.

    ສຳ­ລັບ​ການ​ບໍ­ລິ­ການ​ຂອງ​ສວນ​ໄອ​ດີ­ກາ​ເດັ້ນ ແມ່ນ​ໃຫ້­ການ​ບໍ­ລິ­ການ​ເປັນ​ສະ­ຖານ­ທີ່­ພັກ­ຜ່ອນ​ແບບ​ແຄັມ​ປິ້ງ ໂດຍ​ມີ​ການ​ບໍ­ລິ­ການ​ເຕັ້ນ​ເປັນ​ກະ­ໂຈມ ມີ​ຜ້າ​ເຊື່ອ ຜ້າ­ຫົ່ມ ໝອນ ໂຕະ ແລະ ພັດ​ລົມ ເພື່ອ​ໄວ້​ບໍ­ລິ­ການ​ແກ່​ລູກ​ຄ້າ ສ່ວນ​ອາ­ຫານ​ການ​ກິນ​ຕ່າງໆ​ແມ່ນ​ລູກ​ຄ້າ​ເປັນ​ຄົນ​ກະ­ກຽມ​ໄປ​ເອງ ສວນ​ຈະ​ມີ​ເຮືອນ­ຄົວ ເຕົາ​ປີ້ງ ແລະ ເຕົາ​ແກັດ​ໄວ້​ໃຫ້​ລູກ​ຄ້າ​ທີ່​ມັກ​ຂົ້ວ-ຈືນ ນອກ­ຈາກ​ນີ້​ຍັງ​ມີ​ຖ້ວຍ ບ່ວງ ມີດ ທີ່​ຄົບ​ຊຸດ​ໃນ​ການ​ແຕ່ງ­ກິນ​ໃຫ້​ເຊົ່າ ຊຸດ​ລະ 20.000 ກີບ ລາ­ຄາ​ເຊົ່າ​ເຕັ້ນ 80.000-200.000 ກີບ​ຕໍ່​ຄືນ​ຕໍ່​ເຕັ້ນ ສ່ວນ​ລູກ​ຄ້າ​ທີ່​ເອົາ​ເຕັ້ນ​ມາ​ກາງ​ເອງ ຈະ​ໄດ້​ເສຍ​ຄ່າ​ສະ­ຖານ­ທີ່ 50.000 ກີບ​ຕໍ່​ຄືນ.

    ຜ່ານ​ການ​ໄຂ​ໃຫ້​ບໍ­ລິ­ການ 3 ເດືອນ​ຜ່ານ​ມາ ແມ່ນ​ໄດ້​ການ​ຕອບ​ຮັບ​ເປັນ​ຢ່າງ​ດີ ໃນ​ນີ້ ລູກ​ຄ້າ​ສ່ວນ​ໃຫຍ່​ຈະ​ມາ​ແບບ​ຄອບ­ຄົວ ແລະ ໝູ່​ເພື່ອນ ໂດຍ​ອີງ­ໃສ່​ສະ­ຖານ­ທີ່​ມີ​ຈຳ­ນວນ​ຈຳ­ກັດ ຖ້າ​ລູກ​ຄ້າ​ທ່ານ​ໃດ​ທີ່​ຈະ​ມາ​ພັກ­ຜ່ອນ​ຖ້າ​ເປັນ​ກຸ່ມ​ໃຫຍ່ ຕ້ອງ​ໄດ້​ສັ່ງ​ຈອງ​ໄວ້​ທີ່​ເຟ​ສ​ບຸກ​ໄອ​ດີ­ກາ​ເດັ້ນ ຫຼື ໂທ 55512299.

ຂ່າວທີ່ກ່ຽວຂ້ອງ