ຮອງເຈົ້າຄອງ ເນັ້ນແກ້ໄຂຂໍ້ຂັດແຍ່ງທີ່ດິນ ຕ້ອງດຳເນີນຕາມຫຼັກການຂອງກົດໝາຍ

1.153 14 ມິ.ຖ. 2019 ຂ່າວໜ້າ​ໜຶ່ງ
ຮອງເຈົ້າຄອງ ເນັ້ນແກ້ໄຂຂໍ້ຂັດແຍ່ງທີ່ດິນ ຕ້ອງດຳເນີນຕາມຫຼັກການຂອງກົດໝາຍ

    ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ເຄື່ອນ​ໄຫວ​ເຮັດ​ວຽກ ແລະ ພົບ​ປະ​ພະ­ນັກ­ງານ-ລັດ­ຖະ­ກອນ ພະ​ແນກ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ (ຊສ ນວ) ວັນ​ທີ 13 ມິ­ຖຸ­ນາ 2019 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ບຸນ​ທາມ ພຸດ​ທະ​ວົງ­ສາ ຫົວ­ໜ້າ​ພະ​ແນກ ຊສ ນວ ພ້ອມ​ດ້ວຍ​ຄະ­ນະ​ພະ​ແນກ​ຫ້ອງ­ການ ຊສ 9 ຕົວ​ເມືອງ ແລະ ພາກ­ສ່ວນ​ກ່ຽວ­ຂ້ອງ.

    ທ່ານ ບຸນ​ທາມ ພຸດ​ທະ​ວົງ­ສາ ກ່າວ​ວ່າ: ໂດຍ​ປະ­ຕິ­ບັດ​ຕາມ​ພາ­ລະ​ບົດ­ບາດ ແລະ ການ​ມອບ​ໝາຍ​ຂອງ​ຂັ້ນ​ເທິງ 5 ເດືອນ​ຜ່ານ​ມາ ພະ​ແນກ ຊສ ນວ ໄດ້​ເອົາ­ໃຈ­ໃສ່​ປະ­ຕິ­ບັດ​ໜ້າ­ທີ່​ຂອງ​ຕົນ​ຢ່າງ​ເຂັ້ມ​ງວດ ເພື່ອ​ເຮັດ​ໃຫ້­ການ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ໄດ້​ຕາມ​ແຜນ­ການ ເຊິ່ງ​ສາ­ມາດ​ສະ­ຫຼຸບ​ລາຍ​ຮັບ​ດ້ານ​ວິ­ຊາ​ການ​ທີ່​ພະ​ແນກ ຊສ ນວ ແລະ ຫ້ອງ­ການ ຊສ 9 ຕົວ​ເມືອງ​ຈັດ​ເກັບ​ໂດຍ​ກົງ ໃນ​ນີ້ ແຜນ­ການ​ປີ 2019 ມີ 2.882.383.000 ກີບ ແຕ່​ຕົວ​ເລກ​ເຄື່ອນ​ໄຫວ 1.218.089.000 ກີບ ປະ­ຕິ­ບັດ​ໄດ້ 1.440.529.531 ກີບ ເທົ່າ​ກັບ 49,98% ສຳ­ລັບ​ຈຸດ​ອ່ອນ ແລະ ຂໍ້­ຄົງ­ຄ້າງ​ທີ່​ຢາກ​ສະ­ເໜີ​ຕໍ່​ທ່ານ​ຮອງ​ເຈົ້າ​ຄອງ ເພື່ອ​ຂໍ​ທິດ​ຊີ້​ນຳ ແມ່ນ​ບັນ­ຫາ​ການ​ອອກ​ໃບ​ຕາ­ດິນ​ໃນ​ປັດ­ຈຸ­ບັນ ມີ​ຄວາມ​ຫຍຸ້ງ­ຍາກ​ສັບ­ສົນ ຍ້ອນ​ຂາດ​ອຸ­ປະ­ກອນ​ທີ່​ທັນ​ສະ­ໄໝ ແລະ ດ້ານ​ບຸ​ຄະ­ລາ​ກອນ​ຍັງ​ຈຳ­ກັດ ຄວາມ​ຕື່ນ​ຕົວ​ສະ­ໝັກ​ໃຈ​ຂອງ​ປະ­ຊາ­ຊົນ​ທີ່​ມີ​ຕໍ່​ການ​ຂຶ້ນ​ທະ­ບຽນ​ທີ່​ດິນ​ຍັງ​ບໍ່​ສູງ ນອກ​ນີ້​ຍັງ​ມີ​ບັນ­ຫາ​ຫາງ​ສຽງ​ຂອງ​ສັງ­ຄົມ​ໃນ​ການ​ຮັບ​ໃຊ້​ຂອງ​ພະ­ນັກ­ງານ​ກ່ຽວ­ຂ້ອງ ຍ້ອນ​ຄວາມ​ຜິດ­ພາດ​ຂອງ​ການ​ອອກ​ໃບ​ຕາ­ດິນ​ຊ້ຳ​ຊ້ອນ​ດ້ວຍ​ຫຼາຍ​ສາ­ເຫດ ການ​ຕິດ­ຕາມ​ວຽກ​ງານ​ກວດ­ກາ​ສິ່ງ­ແວ­ດລ້ອມ​ບໍ່​ທັນ​ເຂັ້ມ­ແຂງ ແລະ ບັນ­ຫາ​ອື່ນໆ ນອກ​ນີ້ ຂະ­ແໜງ­ການ​ທີ່​ດິນ ຂະ­ແໜງ­ການ​ສິ່ງ­ແວ­ດລ້ອມ ຫ້ອງ­ການ ຊສ ເມືອງ​ໄຊ​ເສດ​ຖາ ແລະ ເມືອງ​ຫາດ​ຊາຍ​ຟອງ ກໍ​ໄດ້​ລາຍ​ງານ​ສະ­ພາບ​ລວມ​ຂໍ້​ຫຍຸ້ງ­ຍາກ ແລະ ສິ່ງ​ທ້າ​ທາຍ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂອງ​ຕົນ ໃນ​ໄລ­ຍະ​ຜ່ານ​ມາ ກໍ​ຄື ປັດ­ຈຸ­ບັນ​ຕື່ມ​ອີກ.

    ທ່ານ​ຮອງ​ເຈົ້າ​ຄອງ ນວ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ພະ​ແນກ ຊສ ນວ ແລະ ຫ້ອງ­ການ​ກ່ຽວ­ຂ້ອງ​ທີ່​ໄດ້​ເອົາ­ໃຈ­ໃສ່​ປະ­ຕິ­ບັດ​ໜ້າ­ທີ່​ຂອງ​ຕົນ ຕາມ​ການ​ມອບ​ໝາຍ ພ້ອມ​ທັງ​ໄດ້​ເນັ້ນ​ໃຫ້​ພະ​ແນກ​ດັ່ງ­ກ່າວ ສືບ­ຕໍ່​ປັບ­ປຸງ​ກົນ​ໄກ​ເຂົ້າ​ສູ່​ການ​ພັດ­ທະ­ນາ​ຢ່າງ​ຕໍ່​ເນື່ອງ ກົນ​ໄກ​ການ​ປະ­ສານ​ງານ​ການ​ໄກ່​ເກ່ຍ​ກ່ຽວ​ກັບ​ຂໍ້​ຂັດ​ແຍ່ງ​ທີ່​ດິນ ໂດຍ​ໃຫ້​ປະ­ສານ​ງານ​ດ້ານ​ວິ­ຊາ​ສະ­ເພາະ​ກັບ​ຂະ­ແໜງ­ການ​ກົດ­ໝາຍ ຂະ­ແໜງ­ການ​ຂອງ​ຂັ້ນ​ເທິງ​ກັບ​ຂະ­ແໜງ​ຊັບ­ພະ­ຍາ­ກອນ ໂດຍ​ສະ­ເພາະ ຂະ­ແໜງ​ຍຸ­ຕິ​ທຳ ໃນ​ກົນ​ໄກ​ການ​ບໍ­ລິ­ຫານ ການ​ສະ­ໜອງ​ຂໍ້​ມູນ​ເຊິ່ງ​ກັນ ແລະ ກັນ ການ​ແກ້​ໄຂ​ຂໍ້​ຫຍຸ້ງ­ຍາກ​ດ້ານ​ທີ່​ດິນ​ຢູ່​ແຕ່​ລະ​ເມືອງ​ທີ່​ຕິດ​ພັນ​ກັບ​ປະ­ຊາ­ຊົນ ຕ້ອງ​ໄດ້​ປຶກ­ສາ​ຫາ­ລື​ກັບ​ພະ­ນັກ­ງານ​ຕົນ​ເອງ ໃຫ້​ແກ້​ເປັນ​ແຕ່​ລະ​ອັນ​ຕາມ​ລະ­ບຽບ​ການ ເພື່ອ​ບໍ່​ໃຫ້​ກະ­ທົບ​ແກ່­ຍາວ​ຕໍ່​ປະ­ຊາ­ຊົນ ສຳ­ລັບ​ຄາດ­ໝາຍ​ທີ່​ກຳ­ນົດ​ໃນ 10 ແຜນ​ງານ​ຂອງ​ພະ​ແນກ ຊສ ນວ ໃຫ້​ແບ່ງ​ຄວາມ​ຮັບ­ຜິດ­ຊອບ​ແຕ່​ລະ​ຂະ­ແໜງ­ການ ຈຶ່ງ​ຈະ​ສາ­ມາດ​ປະ​ເມີນ​ພະ­ນັກ­ງານ​ໄດ້ ແລະ ໃຫ້​ຖື​ເປັນ​ແຜນ​ງານ​ບຸ­ລິ­ມະ­ສິດ​ເພື່ອ​ແກ້​ໄຂ.

ຂ່າວທີ່ກ່ຽວຂ້ອງ