ຮັບຮອງເອົາຮ່າງກົດໝາຍວ່າດ້ວຍປ່າໄມ້ ສະບັບປັບປຸງ

1.245 14 ມິ.ຖ. 2019 ຂ່າວໜ້າ​ໜຶ່ງ
ຮັບຮອງເອົາຮ່າງກົດໝາຍວ່າດ້ວຍປ່າໄມ້ ສະບັບປັບປຸງ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ດຳ­ເນີນ​ຮອດ​ວັນ​ທີ 13 ມິ­ຖຸ­ນາ 2019 ຢູ່​ສະ­ພາ​ແຫ່ງ​ຊາດ (ຫຼັກ 6) ໂດຍ​ເປັນ​ປະ­ທານ​ຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ບັນ­ດາ​ລັດ­ຖະ­ມົນ­ຕີ​ກະ­ຊວງ​ກ່ຽວ­ຂ້ອງ ແລະ ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ປະ­ຈຳ​ເຂດ​ເລືອກ​ຕັ້ງ​ຕ່າງໆ​ເຂົ້າ​ຮ່ວມ.   

    ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ສະ­ເໜີ​ຮ່າງ​ກົດ­ໝາຍ​ວ່າ​ດ້ວຍ​ປ່າ­ໄມ້ (ສະ­ບັບ​ປັບ­ປຸງ) ວ່າ: ກົດ­ໝາຍ​ວ່າ​ດ້ວຍ​ປ່າ­ໄມ້ ໄດ້​ຖືກ​ຮັບ­ຮອງ ແລະ ປະ­ກາດ​ນຳ​ໃຊ້​ໃນ​ປີ 2007 ຜ່ານ​ການ­ຈັດ­ຕັ້ງ​ປະ­ຕິ­ບັດ​ໄລ­ຍະ​ຜ່ານ​ມາ ກົດ­ໝາຍ​ສະ­ບັບ​ນີ້ ໄດ້​ເປັນ​ເຄື່ອງ­ມື​ມະ­ຫາ​ພາກ ເປັນ​ນິ­ຕິ​ກຳ​ພື້ນ­ຖານ​ສຳ­ລັບ​ການ​ຄຸ້ມ​ຄອງ ປົກ​ປັກ​ຮັກ­ສາ ແລະ ພັດ­ທະ­ນາ​ປ່າ­ໄມ້ ຄຽງ​ຄູ່​ກັນ​ນີ້​ກົດ­ໝາຍ​ດັ່ງ­ກ່າວ ຍັງ​ມີ​ຫຼາຍ​ດ້ານ​ບໍ່​ທັນ​ສອດ­ຄ່ອງ​ກັບ​ຄວາມ​ຕ້ອງ­ການ​ຂອງ​ການ​ຄຸ້ມ​ຄອງ​ປົກ​ປັກ​ຮັກ­ສາ ພັດ­ທະ­ນາ ສົ່ງ­ເສີມ​ທົ່ວ​ປວງ​ຊົນ​ເຂົ້າ​ຮ່ວມ​ຢ່າງ​ຫ້າວ­ຫັນ ແລະ ນຳ​ໃຊ້​ຢ່າງ​ມີ​ປະ​ສິດ­ທິ​ຜົນ ບໍ່​ທັນ​ສອດ­ຄ່ອງ​ກັບ​ການ​ຮ່ວມ​ມື​ກັບ​ສາ­ກົນ​ໃນ​ໄລ­ຍະ​ໃໝ່ ເຊິ່ງ​ຮ່າງ​ກົດ­ໝາຍ​ວ່າ​ດ້ວຍ​ປ່າ­ໄມ້​ສະ­ບັບ​ເກົ່າ ປະ­ກອບ​ມີ 12 ພາກ 13 ໝວດ 130 ມາດ­ຕາ ສຳ­ລັບ​ຮ່າງ​ສະ­ບັບ​ປັບ­ປຸງ ມີ 15 ພາກ 16 ໝວດ 175 ມາດ­ຕາ ໃນ​ນີ້ ປັບ­ປຸງ 90 ມາດ­ຕາ ເພີ່ມ​ໃໝ່ 56 ມາດ­ຕາ ຮັກ­ສາ​ໄວ້ 29 ມາດ­ຕາ ເຫດ­ຜົນ ແລະ ຄວາມ​ຈຳ­ເປັນ​ໃນ​ການ​ປັບ­ປຸງ ເພື່ອ​ຫັນ­ປ່ຽນ​ໄປ​ສູ່​ການ​ຄຸ້ມ​ຄອງ ປົກ​ປັກ​ຮັກ­ສາ ແລະ ສົ່ງ­ເສີມ​ການ​ປູກ​ໄມ້​ເປັນ­ຕົ້ນ​ຕໍ ສອດ­ຄ່ອງ​ກັບ​ແນວ­ທາງ​ນະ­ໂຍ­ບາຍ​ຂອງ​ພັກ​ໃນ​ໄລ­ຍະ​ໃໝ່ ຕາມ​ທິດ​ການ​ພັດ­ທະ­ນາ​ສີ­ຂຽວ ແລະ ຍືນ​ຍົງ ຕິດ​ພັນ​ກັບ​ການ​ພັດ­ທະ­ນາ​ຊົນ­ນະ­ບົດ ແກ້​ໄຂ​ຄວາມ­ທຸກ​ຍາກ​ຕາມ​ທິດ 3 ສ້າງ ແລະ ສອດ­ຄ່ອງ​ກັບ​ສົນ­ທິ­ສັນ­ຍາ​ສາ­ກົນ ທີ່​ລາວ​ເປັນ​ພາ­ຄີ.

    ພາຍ­ຫຼັງ​ປະ­ທານ​ກອງ​ປະ­ຊຸມ ໄດ້​ມີ​ຄຳ​ຖາມ​ເຈາະ​ຈີ້ມ ສສຊ ກໍ​ໄດ້​ຜັດ­ປ່ຽນ​ກັນ​ປະ­ກອບ​ຄຳ​ເຫັນ​ຢ່າງ​ກົງ​ໄປ​ກົງ​ມາ​ໃສ່​ຮ່າງ​ກົດ­ໝາຍ​ດັ່ງ­ກ່າວ ໂດຍ​ສະ­ເພາະ ກຳ­ມະ­ສິດ​ກ່ຽວ​ກັບ​ປ່າ­ໄມ້ ທີ່​ດິນ​ປ່າ­ໄມ້ ຍຸດ​ທະ​ສາດ​ປ່າ ແລະ ການ​ສົ່ງ­ເສີມ​ການ​ປູກ​ປ່າ­ໄມ້​ຂອງ​ລັດ ທີ່​ກຳ­ນົດ​ຢູ່​ໃນ​ບາງ​ພາກ ໝວດ ແລະ ມາດ­ຕາ ທີ່​ມີ​ຄວາມ​ຈຳ­ເປັນ​ຕ້ອງ​ໄດ້​ມີ​ການ​ປັບ­ປຸງ​ເນື້ອ​ໃນ​ໃຫ້​ມີ​ຄວາມ​ຖືກ­ຕ້ອງ​ສອດ­ຄ່ອງ ແລະ ມີ​ຄວາມ​ຮັດ­ກຸມ ຄົບ​ຖ້ວນ ແລະ ສົມ­ບູນ​ຂຶ້ນ ໃນ​ນີ້ ທ່ານ ສົມ​ໃຈ ເພັດ​ສີ​ນວນ ສສຊ ເຂດ​ເລືອກ​ຕັ້ງ​ທີ 12 ແຂວງ​ຄຳ​ມ່ວນ ໄດ້​ມີ​ຄຳ​ເຫັນ​ຕໍ່​ມາດ­ຕາ 24 ໂດຍ​ສະ­ເພາະ ກຳ­ນົດ​ກ່ຽວ​ກັບ​ການ​ສຳ​ຫຼວດ ເພື່ອ​ຂຸດ​ຄົ້ນ​ໃນ​ເຂດ​ຫັນ­ປ່ຽນ​ທີ່​ດິນ​ປ່າ­ໄມ້ ໄດ້​ສະ­ເໜີ​ໃຫ້​ຕື່ມ​ຊື່​ຂອງ​ປະ­ເພດ​ປ່າ­ໄມ້​ເຊັ່ນ: ປ່າ​ຜະ­ລິດ ປ່າ​ຊົມ­ໃຊ້ ແລະ ປ່າ​ປະ­ເພດ​ອື່ນໆ ໃຫ້​ມີ​ການ​ກຳ­ນົດ​ຈະ­ແຈ້ງ ມາດ­ຕາ 62 ການ​ຊົມ­ໃຊ້​ປ່າ­ໄມ້​ໃນ​ເຂດ​ທ້ອງ­ຖິ່ນ​ບ້ານ ສະ­ເໜີ​ໃຫ້​ຂຽນ​ໃສ່​ຕື່ມ​ບາງ​ຄຳ​ສັບ​ໃນ​ການ​ກຳ­ນົດ​ນຳ​ໃຊ້​ໄມ້ ເພື່ອ​ປະ­ໂຫຍດ​ຕ່າງໆ​ເຊັ່ນ: ການ​ສ້າງ​ວັດ ສ້າງ​ຂົວ ແລະ ການ​ນຳ​ໃຊ້​ສ້າງ​ເຮືອນ ທ່ານ ບຸນ​ໄທ ສີ​ເທບ ສສຊ ເຂດ​ເລືອກ​ຕັ້ງ​ທີ 7 ແຂວງ​ໄຊ​ຍະ​ບູ​ລີ ໄດ້​ປະ­ກອບ​ຄຳ​ເຫັນ​ໃສ່​ມາດ­ຕາ 81 45 48 52 ແລະ 53 ສະ­ເພາະ​ມາດ­ຕາ 48 ການ​ປົກ​ປັກ​ຮັກ­ສາ​ປ່າ​ສະ­ຫງວນ ທ່ານ​ໄດ້​ສະ­ເໜີ​ໃຫ້​ປະ­ຊາ­ຊົນ​ທີ່­ຢູ່​ຕິດ​ເຂດ​ປ່າ​ສະ­ຫງວນ ຄວນ​ກຳ­ນົດ​ລະ­ອຽດ​ກ່ຽວ​ກັບ​ການ​ມີ​ສ່ວນ​ຮ່ວມ​ການ​ປົກ​ປັກ​ຮັກ­ສາ ແລະ ປະ­ຊາ­ຊົນ​ຢູ່​ເຂດ​ນັ້ນ ຈະ​ນຳ​ໃຊ້​ໄມ້ ຫຼື​ເນື້ອ­ທີ່​ປ່າ­ໄມ້​ໃນ​ຮູບ​ການ​ໃດ ສະ­ເໜີ​ໃຫ້​ຂຽນ​ກຳ­ນົດ​ເພີ່ມ​ຕື່ມ​ຢ່າງ​ລະ­ອຽດ ແລະ ຂໍ້​ກຳ­ນົດ​ໃນ​ການ​ມີ​ສ່ວນ​ຮ່ວມ​ສະ­ກັດ​ກັ້ນ​ໄຟ​ໄໝ້​ລາມ​ປ່າ ເພາະ​ໃນ​ຮ່າງ​ກົດ­ໝາຍ​ຍັງ​ຂຽນ​ໜ້ອຍ​ບໍ່​ທັນ​ຮັດ­ກຸມ​ເທົ່າ​ທີ່​ຄວນ ຕ້ອງ​ມີ​ມາດ​ຕະ­ການ​ເດັດ­ຂາດ​ຕໍ່​ບຸກ­ຄົນ​ຈູດ​ປ່າ ແລະ ຕ້ອງ​ໃຫ້​ມວນ​ຊົນ​ຮ່ວມ​ກັນ​ໃນ​ການ​ສະ­ກັດ​ກັ້ນ ແລະ ອື່ນໆ ຈາກ​ນັ້ນ ກໍ​ໄດ້​ລົງ​ຄະ­ແນນ​ສຽງ​ຮັບ­ຮອງ​ເອົາ​ຮ່າງ​ກົດ­ໝາຍ​ວ່າ​ດ້ວຍ​ປ່າ­ໄມ້​ສະ­ບັບ​ປັບ­ປຸງ ດ້ວຍ​ຄະ­ແນນ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ