ຂ່າວຫຼ້າສຸດ

ທຳລາຍຢາສູບໄຟຟ້າ-ຊີກາທີ່ນຳເຂົ້າບໍ່ຖືກຕ້ອງ

548 17 ມິ.ຖ. 2019 ຂ່າວໜ້າ​ໜຶ່ງ
ທຳລາຍຢາສູບໄຟຟ້າ-ຊີກາທີ່ນຳເຂົ້າບໍ່ຖືກຕ້ອງ

    ວັນ​ທີ 14 ມິ­ຖຸ­ນາ 2019 ພະ​ແນກ​ກວດ­ກາ ແລະ ຄວບ​ຄຸມ​ຢາ​ເສບ​ຕິດ ສົມ­ທົບ​ກັບ​ພະ​ແນກ​ສາ­ທາ­ລະ­ນະ​ສຸກ ແລະ ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນະ­ຄອນ­ຫຼວງ​ວຽງ​ຈັນ (ນວ) ໄດ້​ຈັດ​ພິ­ທີ​ທຳ­ລາຍ​ຢາ­ສູບ​ໄຟ­ຟ້າ-ຊີ​ກາ ພ້ອມ​ດ້ວຍ​ນ້ຳ​ຢາ ຈຳ­ນວນ 25 ແກັດ ແລະ 5 ຖົງ ຢູ່​ສະ­ຖານ­ທີ່​ສະ­ໜາມ​ຂີ້​ເຫຍື້ອ ຫຼັກ 32 ເມືອງ​ໄຊ​ທາ­ນີ ມີ​ທ່ານ ປາ­ນີ ວົງ​ປະ­ດິດ ຮອງ​ຫົວ­ໜ້າ​ຂະ­ແໜງ​ອະ­ນາ­ໄມ ແລະ ສົ່ງ­ເສີມ​ສຸ­ຂະ­ພາບ ພະ​ແນກ​ສາ­ທາ­ລະ­ນະ​ສຸກ ນວ ທ່ານ ພັນ​ໂທ ແສງ​ທອງ ເກື້ອ​ບຸນ​ລ່ຳ ຮອງ​ຫົວ­ໜ້າ​ຫ້ອງ​ຕຳ­ຫຼວດ ກອງ​ບັນ­ຊາ​ການ​ປ້ອງ​ກັນ​ຄວາມ​ສະ­ຫງົບ ນວ ຜູ້­ຕາງ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນວ ພ້ອມ​ດ້ວຍ​ເຈົ້າ​ໜ້າ­ທີ່​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ປາ­ນີ ວົງ​ປະ­ດິດ ໄດ້​ໃຫ້​ຮູ້​ວ່າ: ຜະ­ລິດ​ຕະ​ພັນ​ຢາ­ສູບ​ໄຟ­ຟ້າ-ຊີ​ກາ ພ້ອມ​ດ້ວຍ​ນ້ຳ​ຢາ​ທີ່​ມາ​ທຳ­ລາຍ​ດ້ວຍ​ການ ຝັງ​ລົງ​ດິນ​ຄັ້ງ​ນີ້ ແມ່ນ​ເປັນ​ສິນ­ຄ້າ​ນຳ​ເຂົ້າ​ຈາກ​ຕ່າງ­ປະ­ເທດ​ທີ່​ຢຶດ​ໄດ້​ໃນ​ຄັ້ງ​ວັນ​ທີ 7 ມິ­ຖຸ­ນາ 2019 ທີ່​ສາມ​ພາກ­ສ່ວນ​ໄດ້​ລົງ​ກວດ­ກາ​ຢູ່​ບັນ­ດາ​ຮ້ານ​ຂາຍ​ຢາ­ສູບ​ໄຟ ຟ້າ-ຊີ​ກາ​ໃນ​ເຂດ​ບ້ານ​ດົງ​ໂດກ ເມືອງ​ໄຊ​ທາ­ນີ ເຊິ່ງ​ຢາ­ສູບ​ຊະ­ນິດ​ນີ້​ແມ່ນ​ເປັນ​ອັນ ຕະ​ລາຍ​ຕໍ່​ສຸ­ຂະ­ພາບ​ຂອງ​ຄົນ​ເຮົາ ກໍ​ຄື ຜູ້​ສູບ ແລະ ຜູ້​ທີ່​ໄດ້​ຮັບ​ຄວັນ​ຢາ­ສູບ​ຈາກ​ການ​ຢູ່​ໃກ້​ຜູ້​ສູບ​ທີ່​ກໍ່­ໃຫ້­ເກີດ​ພະ­ຍາດ​ຕ່າງໆ​ຕໍ່​ຮ່າງ­ກາຍ ເປັນ­ຕົ້ນ ອາ­ການ​ໄລ­ຍະ​ສັ້ນ​ຈະ​ມີ​ອາ­ການ ເຄືອງ​ຕາ ອາ­ການ​ແສບ​ຕາ ແໜ້ນ​ໜ້າ​ເອິກ ຫັນ​ໃຈ​ບໍ່​ໄດ້  ແລະ ອາ­ການ​ໄລ­ຍະ​ຍາວ​ຈະ​ເຮັດ​ໃຫ້​ຄົນ​ເຮົາ​ສາ­ມາດ​ເປັນ​ມະ​ເຮັງ​ໄດ້ ໂດຍ​ສະ­ເພາະ ເປັນ​ມະ​ເຮັງ​ຜົ້ງ​ປາກ ຫຼອດ​ສຽງ ຫຼອດ​ອາ­ຫານ ປອດ  ແລະ ອື່ນໆ ໂດຍ​ລວມ​ແລ້ວ​ຢາ­ສູບ​ມັນ​ສາ­ມາດ​ເຮັດ​ໃຫ້​ທຸກ​ພາກ­ສ່ວນ​ຂອງ​ຮ່າງ­ກາຍ​ຄົນ​ເຮົາ​ເປັນ ພະ­ຍາດ​ໄດ້​ໝົດ ຄື​ແມ່­ຍິງ​ຖື­ພາ​ຖ້າ​ໄດ້­ຜົນ​ກະ­ທົບ​ຈາກ​ຄວັນ​ຢາ­ສູບ​ຈະ​ເຮັດ​ໃຫ້​ລູກ​ເກີດ​ມາ​ນ້ຳ­ໜັກ​ຕ່ຳ ເຊິ່ງ​ຢູ່​ໃນ​ມາດ​ຕະ ການ​ຂອງ​ພວກ​ເຮົາ​ກໍ​ໄດ້​ຄວບ​ຄຸມ​ຢາ­ສູບ​ໂດຍ​ອີງ­ໃສ່​ດຳ­ລັດ​ວ່າ​ດ້ວຍ​ການ​ປັບ​ໃໝ ແລະ ການ​ນຳ​ໃຊ້​ມາດ​ຕະ­ການ​ອື່ນໆ ຕໍ່​ການ​ລະ­ເມີດ​ກົດ­ໝາຍ ແລະ ລະ­ບຽບ​ກ່ຽວ​ກັບ​ການ​ຄວບ​ຄຸມ​ຢາ­ສູບ​ທີ່​ຫາ​ກໍ​ອອກ​ມາ​ປີ 2019 ໂດຍ​ອີງ­ໃສ່​ກົດ­ໝາຍ​ນີ້​ທີ່​ນຳ­ໄປ​ເຜີຍ­ແຜ່​ໃຫ້​ພາກ­ສ່ວນ​ກ່ຽວ­ຂ້ອງ ແລະ ພະ­ແນກ­ການ​ຕ່າງໆ ຕະ­ຫຼອດ​ຮອດ​ປະ­ຊາ­ຊົນ ໂດຍ​ໄດ້​ເອົາ­ໃຈ­ໃສ່​ລົງ​ກວດ­ກາ​ຕາມ​ຮ້ານ​ຂາຍ​ຢາ­ສູບ​ເພື່ອ​ກວດ­ກາ​ສິນ­ຄ້າ​ນຳ​ເຂົ້າ​ຈາກ​ຕ່າງ­ປະ­ເທດ ທີ່​ບໍ່​ຖືກ­ຕ້ອງ​ຕາມ​ກົດ­ໝາຍ ຖ້າ​ພົບ​ເຫັນ​ກໍ​ຈະ​ໄດ້​ຢຶດ​ທ້ອນ­ໂຮມ​ໄວ້​ເພື່ອ​ຈະ​ໄປ​ທຳ­ລາຍ​ຖິ້ມ.

ຂ່າວທີ່ກ່ຽວຂ້ອງ