ການທ່ອງທ່ຽວ (CLMV) ມີທ່າອ່ຽງຂະຫຍາຍຕົວຢ່າງຕໍ່ເນື່ອງ

1.361 17 ມິ.ຖ. 2019 ຂ່າວໜ້າ​ໜຶ່ງ

    ວັນ​ທີ 13 ມິ­ຖຸ­ນາ 2019 ທີ່​ແຂວງ​ຊຽງ​ຣາຍ ຣາ​ຊະ​ອາ­ນາ­ຈັກ​ໄທ ໄດ້​ຈັດ​ໃຫ້​ມີ​ກອງ​ປະ­ຊຸມ​ລັດ­ຖະ­ມົນ­ຕີ​ທ່ອງ​ທ່ຽວ​ແອັກ​ແມັກ ຄັ້ງ​ທີ 4 ແລະ ກອງ​ປະ­ຊຸມ​ລັດ­ຖະ­ມົນ­ຕີ​ທ່ອງ​ທ່ຽວ ກຳ­ປູ­ເຈຍ-ລາວ-ມຽນ​ມາ-ຫວຽດ­ນາມ ຄັ້ງ​ທີ 5 ເຂົ້າ​ຮ່ວມ​ຂອງ​ກອງ​ປະ­ຊຸມ​ດັ່ງ­ກ່າວ ໂດຍ​ມີ​ບັນ­ດາ​ປະ­ເທດ​ສະ­ມາ­ຊິກ ກຳ­ປູ­ເຈຍ ລາວ ມຽນ​ມາ ຫວຽດ­ນາມ ແລະ ໄທ.

    ກອງ​ປະ­ຊຸມ​ຄັ້ງ​ນີ້ ໄດ້​ສະ­ແດງ​ຄວາມ​ເພິ່ງ​ພໍ­ໃຈ​ຕໍ່​ຜົນ­ສຳ­ເລັດ ໃນ​ການ­ຈັດ­ຕັ້ງ​ປະ­ຕິ­ບັດ​ແຜນ​ງານ​ຮ່ວມ​ມື​ດ້ານ​ການ​ທ່ອງ ທ່ຽວ​ໃນ​ປີ­ຜ່ານ­ມາ ເປັນ­ຕົ້ນ ວຽກ​ງານ​ການ​ອຳ­ນວຍ​ຄວາມ​ສະ­ດວກ​ດ້ານ​ການ­ທ່ອງ­ທ່ຽວ ການ​ສ້າງ​ຜະ­ລິດ​ຕະ​ພັນ​ການ ທ່ອງ​ທ່ຽວ ການ​ບໍ­ລິ­ການ ການ​ພັດ­ທະ­ນາ​ບຸ​ຄະ­ລາ​ກອນ ການ​ໂຄ­ສະ­ນາ​ສົ່ງ­ເສີມ​ການ​ຕະ­ຫຼາດ ການ­ທ່ອງ­ທ່ຽວ​ສົ່ງ­ເສີມ​ການ​ປຸງ​ແຕ່ງ­ອາ­ຫານ ໃນ​ປີ 2018 ມີ​ນັກ​ທ່ອງ​ທ່ຽວ​ສາ­ກົນ​ມາ​ທ່ຽວ​ໃນ​ຂົງ­ເຂດ​ແອັກ​ແມັກ ທັງ​ໝົດ 67,71 ລ້ານ​ເທື່ອ​ຄົນ ເພີ່ມ​ຂຶ້ນ 10,67% ທຽບ­ໃສ່​ປີ 2017 ໃນ​ນັ້ນ ການ​ເດີນ­ທາງ​ທ່ອງ​ທ່ຽວ​ພາຍ​ໃນ​ປະ­ເທດ​ສະ­ມາ­ຊິກ​ຂົງ­ເຂດ​ແອັກ​ແມັກ​ນີ້ ບັນ­ລຸ​ເຖິງ 9,55 ລ້ານ​ຄົນ ເພີ່ມ​ຂຶ້ນ 14,1% ສ້າງ​ລາຍ​ຮັບ 96 ຕື້​ໂດ​ລາ​ສະ­ຫະ­ລັດ.

    ສ່ວນ​ຂອບ​ການ​ຮ່ວມ​ມື ດ້ານ​ທ່ອງ​ທ່ຽວ ກຳ­ປູ­ເຈຍ-ລາວ-ມຽນ​ມາ-ຫວຽດ­ນາມ (CLMV) ກໍ​ມີ​ທ່າ​ອ່ຽງ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ຊຶ່ງ​ໃນ​ປີ 2018 ມີ​ນັກ​ທ່ອງ​ທ່ຽວ​ສາ­ກົນ ມາ​ທ່ຽວ​ໃນ​ຂົງ­ເຂດ CLMV ທັງ​ໝົດ 29.433.308 ເທື່ອ​ຄົນ ເພີ່ມ​ຂຶ້ນ 13,96% ທຽບ­ໃສ່​ປີ 2017 ພ້ອມ​ດຽວ​ກັນ​ນີ້ ກອງ​ປະ­ຊຸມ​ຍັງ​ໄດ້​ຮ່ວມ​ກັນ​ກຳ­ນົດ​ແຜນ​ດຳ­ເນີນ​ງານ​ດ້ານ​ການ­ທ່ອງ­ທ່ຽວ 5 ປີ 2019-2023 ໃນ​ຂົງ­ເຂດ​ແອັກ​ແມັກ ແລະ ແຜນ​ດຳ­ເນີນ​ງານ​ດ້ານ​ການ­ທ່ອງ­ທ່ຽວ 2019-2021 ໃນ​ຂົງ­ເຂດ CLMV ແລະ ສືບ­ຕໍ່​ຮ່ວມ​ມື​ກັນ​ຢ່າງ​ແໜ້ນ​ແຟ້ນ ສຸມ​ໃສ່​ສ້າງ​ຜະ­ລິດ​ຕະ​ພັນ​ໃຫ້​ຫຼາກ​ຫຼາຍ ການ​ແລກ­ປ່ຽນ​ຂໍ້​ມູນ​ຂ່າວ­ສານ​ການ­ທ່ອງ­ທ່ຽວ​ຮັບ­ປະ­ກັນ​ຄວາມ​ປອດ​ໄພ ຊຸກ­ຍູ້​ໃຫ້​ມີ​ເສັ້ນ­ທາງ​ເຊື່ອມ​ຕໍ່​ທາງ­ບົກ ແລະ ສາຍ​ການ­ບິນ​ໂດຍ​ກົງ​ໄປ​ຫາ​ເມືອງ​ທ່ອງ​ທ່ຽວ ທີ່​ສຳ­ຄັນ​ສົ່ງ­ເສີມ​ການ​ເດີນ­ທາງ​ທ່ອງ​ທ່ຽວ ໄປ­ມາ­ຫາ­ສູ່​ກັນ​ພາຍ​ໃນ​ປະ­ເທດ​ສະ­ມາ­ຊິກ​ໃຫ້​ຫຼາຍ​ຂຶ້ນ ເພີ່ມ​ທະ­ວີ​ການ​ຮ່ວມ​ມື​ພາກ​ລັດ ພາກ​ເອ­ກະ​ຊົນ ແລະ ພາກ­ສ່ວນ​ທີ່​ກ່ຽວ­ຂ້ອງ ແນ­ໃສ່​ເຮັດ​ໃຫ້​ເກີດ​ຜົນ​ປະ­ໂຫຍດ​ສູງ​ສຸດ ແລະ ພັດ­ທະ­ນາ​ແບບ​ຍືນ​ຍົງ.

ຂ່າວທີ່ກ່ຽວຂ້ອງ