ລາວ-ຝຣັ່ງ ຫາລືການຮ່ວມມືໃນໄລຍະຜ່ານມາ

588 18 ມິ.ຖ. 2019 ຂ່າວໜ້າ​ໜຶ່ງ
ລາວ-ຝຣັ່ງ ຫາລືການຮ່ວມມືໃນໄລຍະຜ່ານມາ

    ກອງ​ປະ­ຊຸມ​ທົບ​ທວນ​ການ​ຮ່ວມ​ມື​ລະ­ຫວ່າງ​ລັດ­ຖະ­ບານ​ລາວ ແລະ ລັດ­ຖະ­ບານ​ຝຣັ່ງ​ປະ­ຈຳ​ປີ 2019 ຈັດ​ຂຶ້ນ​ວັນ​ທີ 14 ມິ­ຖຸ­ນາ 2019 ທີ່​ກະ­ຊວງ​ແຜນ­ການ ແລະ ການ​ລົງ­ທຶນ ເປັນ​ປະ­ທານ​ຮ່ວມ​ຂອງ​ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ແລະ ທ່ານ​ນາງ​ໂຟຼ​ຮອງ ຊອງ​ບຼອງ ຣິ​ສ​ເລີ ເອກ​ອັກ​ຄະ​ລັດ​ຖະ​ທູດ​ຝຣັ່ງ ປະ­ຈຳ​ລາວ ມີ​ບັນ­ດາ​ຫົວ­ໜ້າ​ກົມ ຮອງ​ກົມ ຜູ້­ຕາງ­ໜ້າ​ຈາກ​ກະ­ຊວງ​ກ່ຽວ­ຂ້ອງ ແລະ ຄູ່​ຮ່ວມ​ພັດ­ທະ­ນາ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ສອງ​ຝ່າຍ​ໄດ້​ພ້ອມ​ກັນ​ທົບ​ທວນ­ຄືນ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ງານ​ໂຄງ­ການ​ຮ່ວມ​ມື​ລາວ-ຝຣັ່ງ ປີ 2016 ແລະ ວາງ​ທິດ​ທາງ​ຮ່ວມ​ມື​ໃນ­ຕໍ່­ໜ້າ ພ້ອມ​ນັ້ນ ໄດ້​ປຶກ­ສາ​ຫາ­ລື​ກັນ​ຢ່າງ​ກົງ​ໄປ​ກົງ​ມາ ເພື່ອ​ຊອກ​ຫາ​ຊ່ອງ​ທາງ​ໃນ​ການ​ແກ້​ໄຂ​ຂໍ້­ຄົງ­ຄ້າງ ແລະ ຂໍ້​ສະ­ເໜີ​ຕ່າງໆ ເພື່ອ​ເຮັດ​ໃຫ້​ແຜນ​ງານ​ໂຄງ­ການ​ທີ່​ໄດ້​ຮັບ​ການ​ສະ­ໜັບ­ສະ­ໜູນ​ຊ່ວຍ­ເຫຼືອ​ຈາກ​ລັດ­ຖະ­ບານ​ຝຣັ່ງ​ມີ​ປະ​ສິດ­ທິ​ຜົນ.

    ໂອ­ກາດ​ນີ້ ທ່ານ​ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ໄດ້​ສະ­ແດງ​ຄວາມ​ຍ້ອງ­ຍໍ ແລະ ຊົມ­ເຊີຍ​ຕໍ່​ການ​ສະ­ໜັບ­ສະ­ໜູນ​ຂອງ​ລັດ­ຖະ­ບານ ກໍ​ຄື ປະ­ຊາ­ຊົນ​ຝຣັ່ງ​ທີ່​ໄດ້​ໃຫ້­ການ​ຮ່ວມ​ມື​ພ້ອມ​ທັງ​ຊ່ວຍ­ເຫຼືອ​ໃນ​ຫຼາຍ​ຂົງ­ເຂດ​ວຽກ​ງານ​ເຊັ່ນ: ຂະ­ແໜງ​ກະ­ສິ­ກຳ ແລະ ພັດ­ທະ­ນາ​ຊົນ­ນະ­ບົດ ການ​ພັດ­ທະ­ນາ​ຕົວ​ເມືອງ ວັດ­ທະ­ນະ­ທຳ-ສັງ­ຄົມ ດ້ານ​ສິ່ງ­ແວ­ດລ້ອມ ການ​ສຶກ​ສາ ແລະ ສາ­ທາ­ລະ­ນະ​ສຸກ​ໃນ​ໄລ­ຍະ​ຜ່ານ​ມາ ເຊິ່ງ​ການ​ຊ່ວຍ­ເຫຼືອ​ດັ່ງ­ກ່າວ ແມ່ນ​ສອດ­ຄ່ອງ​ກັບ​ເປົ້າ​ໝາຍ​ຂອງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ​ຂອງ​ລາວ ໃນ​ແຕ່​ລະ​ໄລ­ຍະ ແລະ ຫວັງ​ວ່າ​ລັດ­ຖະ­ບານ ແລະ ປະ­ຊາ­ຊົນ​ຝຣັ່ງ ຈະ​ສືບ­ຕໍ່​ໃຫ້­ການ​ຊ່ວຍ­ເຫຼືອ​ລາວ​ຕື່ມ​ອີກ​ຫຼາຍ​ໂຄງ­ການ​ໃນ­ຕໍ່­ໜ້າ.

ຂ່າວທີ່ກ່ຽວຂ້ອງ