ຂ່າວຫຼ້າສຸດ

ລັດຖະບານລາວ ມອບສິ່ງເສດເຫຼືອຂອງທະຫານອາເມຣິກາ

1.014 18 ມິ.ຖ. 2019 ຂ່າວໜ້າ​ໜຶ່ງ
ລັດຖະບານລາວ ມອບສິ່ງເສດເຫຼືອຂອງທະຫານອາເມຣິກາ

    ວັນ​ທີ 17 ມິ­ຖຸ­ນາ 2019 ທີ່​ສະ­ໜາມ​ບິນ​ສາ­ກົນ​ວັດ​ໄຕ ນະ­ຄອນ­ຫຼວງ​ວຽງ​ຈັນ ໄດ້​ມີ​ການ​ຈັດ​ພິ­ທີ​ມອບ-ຮັບ​ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ເຊິ່ງ​ສິ່ງ​ເສດ​ເຫຼືອ​ດັ່ງ­ກ່າວ ແມ່ນ​ຜົນ­ສຳ­ເລັດ​ທີ່​ໄດ້​ຮັບ​ຈາກ​ການ​ປະ­ຕິ­ບັດ​ງານ​ຮ່ວມ ຢູ່​ພາກ​ສະ­ໜາມ​ຂອງ​ຄະ­ນະ​ວິ­ຊາ​ການ​ລາວ-ອາ​ເມ​ຣິ​ກາ ໃນ​ການ​ສຳ​ຫຼວດ ແລະ ຂຸດ​ຄົ້ນ​ເພື່ອ​ຊອກ​ຫາ​ຮ່ອງ­ຮອຍ ແລະ ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ​ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ (MIA) ຄັ້ງ​ທີ 4 ປະ­ຈຳ​ປີ 2018-2019 ເພື່ອ​ສືບ­ຕໍ່​ຕອບ​ສະ­ໜອງ​ຄຳ​ຮ້ອງ​ຂໍ​ຂອງ​ລັດ­ຖະ­ບານ​ອາ​ເມ​ຣິ​ກາ ແລະ ຕາມ​ນະ­ໂຍ­ບາຍ​ດ້ານ​ມະ­ນຸດ­ສະ­ທຳ​ຂອງ​ລັດ­ຖະ­ບານ​ລາວ​ທີ່​ມີ​ຕໍ່​ລັດ­ຖະ­ບານ ກໍ​ຄື ຄອບ­ຄົວ ແລະ ຍາດ​ພີ່­ນ້ອງ​ຂອງ​ບັນ­ດາ​ທະ­ຫານ​ອາ​ເມ​ຣິ​ກາ​ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ຕາງ­ໜ້າ​ລັດ­ຖະ­ບານ​ລາວ​ມອບ​ໂດຍ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ ກະ­ຊວງ​ການ​ຕ່າງ­ປະ­ເທດ ຜູ້​ຊີ້​ນຳ​ວຽກ​ງານ​ສຳ​ຫຼວດ ແລະ ຂຸດ​ຄົ້ນ ເພື່ອ​ຊອກ​ຫາ​ຮ່ອງ­ຮອຍ ແລະ ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ​ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ແລະ ຕາງ­ໜ້າ​ໃຫ້​ລັດ­ຖະ­ບານ​ອາ​ເມ​ຣິ​ກາ ກ່າວ​ຮັບ​ໂດຍ​ທ່ານ​ນາງ Rena Bitter ເອກ​ອັກ​ຄະ​ລັດ​ຖະ​ທູດ​ອາ​ເມ​ຣິ​ກາ ປະ­ຈຳ​ລາວ ມີ​ເຈົ້າ​ໜ້າ­ທີ່​ກະ­ຊວງ​ການ​ຕ່າງ­ປະ­ເທດ ກະ­ຊວງ​ປ້ອງ​ກັນ​ປະ­ເທດ ແລະ ນະ­ຄອນ­ຫຼວງ​ວຽງ​ຈັນ ພະ­ນັກ­ງານ​ວິ­ຊາ​ການ​ສອງ​ຝ່າຍ​ລາວ-ອາ​ເມ​ຣິ​ກາ​ທີ່​ເຮັດ​ວຽກ​ຕົວ​ຈິງ ໃນ​ພາກ​ສະ­ໜາມ​ຈຳ­ນວນ​ໜຶ່ງ​ເຂົ້າ​ຮ່ວມ.

    ການ​ສຳ​ຫຼວດ ແລະ ຂຸດ​ຄົ້ນ​ຄັ້ງ​ນີ້ ໄດ້​ຄົ້ນ​ພົບ​ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ​ຢູ່​ໃນ 3 ກໍ­ລະ­ນີ​ຄື: ຢູ່​ເຂດ​ບ້ານ​ໜອງ​ມ້າ ເມືອງ​ບົວ­ລະ­ພາ ແຂວງ​ຄຳ​ມ່ວນ 2 ກໍ­ລະ­ນີ ແລະ ເຂດ​ບ້ານ​ກົກ​ໝາກ ເມືອງ​ວິ­ລະ​ບູ​ລີ ແຂວງ​ສະ­ຫວັນ​ນະ​ເຂດ 1 ກໍ­ລະ­ນີ ເຊິ່ງ​ຕະ­ຫຼອດ​ໄລ­ຍະ​ເວ­ລາ 30 ກວ່າ​ປີ ແຫ່ງ​ການ​ຮ່ວມ​ມື​ສອງ​ຝ່າຍ​ລາວ-ອາ​ເມ​ຣິ​ກາ ໃນ​ການ​ດຳ­ເນີນ​ວຽກ​ງານ​ສຳ​ຫຼວດ ແລະ ຂຸດ​ຄົ້ນ​ເພື່ອ​ຊອກ​ຫາ​ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ​ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ລັດ­ຖະ­ບານ​ລາວ ກໍ​ຄື ປະ­ຊາ­ຊົນ​ລາວ​ບັນ­ດາ­ເຜົ່າ ໄດ້​ໃຫ້­ການ​ຮ່ວມ​ມື​ທີ່​ດີ​ທີ່​ສຸດ​ເທົ່າ​ທີ່​ຈະ​ເປັນ​ໄປ​ໄດ້​ຕາມ​ເງື່ອນ­ໄຂ ແລະ ຄວາມ​ອາດ​ສາ­ມາດ​ຕົວ​ຈິງ ບົນ​ພື້ນ­ຖານ​ນະ­ໂຍ­ບາຍ​ດ້ານ​ມະ­ນຸດ­ສະ­ທຳ​ອັນ​ສະ­ເໝີ​ຕົ້ນ​ສະ­ເໝີ​ປາຍ​ຂອງ​ພັກ ແລະ ລັດ­ຖະ­ບານ​ລາວ ອັນ​ໄດ້​ເຮັດ​ໃຫ້­ການ​ປະ­ຕິ­ບັດ​ງານ​ຮ່ວມ​ສອງ​ຝ່າຍ (JFAs) ໄດ້​ຮັບ​ຜົນ­ສຳ­ເລັດ​ທີ່​ເປັນ​ໜ້າ​ເພິ່ງ​ພໍ­ໃຈ​ຕະ­ຫຼອດ​ມາ ຫວັງ​ວ່າ​ຝ່າຍ​ອາ​ເມ​ຣິ​ກາ​ຈະ​ສືບ­ຕໍ່​ຄວາມ​ພະ­ຍາ­ຍາມ​ຮ່ວມ​ກັນ​ເພີ່ມ​ຂຶ້ນ​ບົນ​ຈິດ­ໃຈ​ແຫ່ງ​ການ​ຮ່ວມ​ມື ແລະ ການ​ເປັນ​ຄູ່​ຮ່ວມ​ມື​ແບບ​ກວມ​ລວມ​ອັນ​ແທ້​ຈິງ ແລະ ຈິງ​ໃຈ ເພື່ອ​ເຮັດ​ໃຫ້­ການ​ປະ­ຕິ­ບັດ​ງານ​ຮ່ວມ​ກັນ​ດັ່ງ­ກ່າວ ບັນ­ລຸ​ເປົ້າ​ໝາຍ​ທີ່​ວາງ​ໄວ້ ເພື່ອ​ຜົນ​ປະ­ໂຫຍດ​ຂອງ​ປະ­ຊາ­ຊົນ​ສອງ​ຊາດ​ລາວ ແລະ ອາ​ເມ​ຣິ​ກາ.

ຂ່າວທີ່ກ່ຽວຂ້ອງ