ຂ່າວຫຼ້າສຸດ

ສສຊ ຮັບຮອງກົດໝາຍວ່າດ້ວຍການຄຸ້ມຄອງສ່ວຍສາອາກອນ

1.147 18 ມິ.ຖ. 2019 ຂ່າວໜ້າ​ໜຶ່ງ
ສສຊ ຮັບຮອງກົດໝາຍວ່າດ້ວຍການຄຸ້ມຄອງສ່ວຍສາອາກອນ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ວັນ​ທີ 17 ມິ­ຖຸ­ນາ 2019 ຢູ່​ສະ­ພາ​ແຫ່ງ​ຊາດ (ຫຼັກ 6) ໂດຍ​ເປັນ​ປະ­ທານ​ຂອງ​ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ໃນ​ກອງ​ປະ­ຊຸມ ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ໄດ້​ຂຶ້ນ​ຜ່ານ​ຮ່າງ​ກົດ­ໝາຍ​ວ່າ​ດ້ວຍ​ການ​ຄຸ້ມ​ຄອງ​ສ່ວຍ​ສາ​ອາ­ກອນ (ສະ­ບັບ​ປັບ­ປຸງ) ມີ​ສະ­ມາ­ຊິກ​ສະ­ພາ​ແຫ່ງ​ຊາດ​ທຸກ​ເຂດ​ເລືອກ​ຕັ້ງ​ເຂົ້າ​ຮ່ວມ.

    ທ່ານ ສົມ​ດີ ດວງ​ດີ ກ່າວ​ວ່າ: ກົດ­ໝາຍ​ວ່າ​ດ້ວຍ​ການ​ຄຸ້ມ​ຄອງ​ສ່ວຍ​ສາ​ອາ­ກອນ ໄດ້​ປັບ­ປຸງ​ມາ​ແລ້ວ 5 ຄັ້ງ​ຄື: ປີ 2001 ປີ 2002 ປີ 2005 ປີ 2011 ແລະ ປີ 2015 ເຊິ່ງ​ເປັນ​ສະ­ບັບ​ທີ່​ນຳ​ໃຊ້​ໃນ​ປັດ­ຈຸ­ບັນ ປະ­ກອບ​ມີ 12 ພາກ 11 ໝວດ ແລະ 100 ມາດ­ຕາ ເຊິ່ງ​ມັນ​ໄດ້​ກວມ​ເອົາ​ຫຼາຍ​ອາ­ກອນ ເປັນ­ຕົ້ນ ອາ­ກອນ​ຊົມ­ໃຊ້ ອາ­ກອນ​ກຳ­ໄລ ອາ­ກອນ​ລາຍ​ໄດ້ ອາ­ກອນ​ມອບ​ເໝົາ ອາ­ກອນ​ສິ່ງ­ແວ­ດລ້ອມ ຄ່າ​ທຳ­ນຽມ ຄ່າ​ບໍ­ລິ­ການ ແລະ ໄດ້​ແຍກ​ອາ­ກອນ​ມູນ​ຄ່າ​ເພີ່ມ​ມາ​ເປັນ​ກົດ­ໝາຍ ສະ­ເພາະ​ປີ 2006 ແລະ ໄດ້​ຖືກ​ປັບ­ປຸງ 2 ຄັ້ງ​ຄື: ປີ 2014 ແລະ ປີ 2018 ຜ່ານ​ການ­ຈັດ­ຕັ້ງ​ປະ­ຕິ­ບັດ​ເຫັນ​ວ່າ​ກົດ­ໝາຍ​ສະ­ບັບ​ນີ້ ເປັນ​ເຄື່ອງ­ມື​ທີ່​ສຳ­ຄັນ​ໃນ​ການ​ຄຸ້ມ​ຄອງ​ການ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ແຫ່ງ​ລັດ ສາ­ມາດ​ລະ­ດົມ​ແຫຼ່ງ​ລາຍ​ຮັບ​ເຂົ້າ​ງົບ­ປະ­ມານ​ຂອງ​ລັດ​ຢ່າງ​ຕໍ່​ເນື່ອງ ເພື່ອ​ສະ­ໜອງ​ດ້ານ​ທຶນ­ຮອນ​ເຂົ້າ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃນ​ແຕ່​ລະ​ໄລ­ຍະ ເຖິງ​ຢ່າງ­ໃດ​ກໍ​ຕາມ​ທຽບ­ໃສ່​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃນ​ປັດ­ຈຸ­ບັນ ແລະ ຫຼັກ­ການ​ສາ­ກົນ​ເຫັນ​ວ່າ​ກົດ­ໝາຍ​ສະ­ບັບ​ນີ້ ຍັງ​ມີ​ບາງ​ບັນ­ຫາ​ທີ່​ມີ​ຂໍ້​ຈຳ­ກັດ​ດ້ານ​ການ​ຄຸ້ມ​ຄອງ ແລະ ຈັດ​ຕັ້ງ​ປະ­ຕິ­ບັດ​ວຽກ​ງານ​ສ່ວຍ​ສາ​ອາ­ກອນ ສະ­ນັ້ນ​ເຫດ­ຜົນ ແລະ ຄວາມ​ຈຳ­ເປັນ​ໃນ​ການ​ປັບ­ປຸງ​ສ້າງ​ຮ່າງ​ກົດ­ໝາຍ ແມ່ນ​ເພື່ອ​ແນ­ໃສ່​ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ແຫ່ງ​ລັດ​ແຕ່​ລະ​ໄລ­ຍະ​ໃຫ້​ມີ​ປະ​ສິດ­ທິ​ຜົນ ທັງ​ປະ­ຕິ­ບັດ​ຕາມ​ທິດ​ຂອງ​ລັດ­ຖະ­ບານ ໃນ​ການ​ປະ­ຕິ​ຮູບ​ການ​ເງິນ​ແຫ່ງ​ລັດ ແລະ ເຂັ້ມ​ງວດ​ໃນ​ການ​ປະ­ຕິ­ບັດ​ລັດ​ຖະ​ທຳ​ມະ­ນູນ ກົດ­ໝາຍ ແລະ ນິ­ຕິ​ກຳ​ທີ່​ກ່ຽວ­ຂ້ອງ ແກ້​ໄຂ​ບັນ­ຫາ​ທີ່​ບໍ່​ສາ­ມາດ​ຈັດ​ຕັ້ງ​ປະ­ຕິ­ບັດ​ໄດ້​ໃນ​ໄລ­ຍະ​ທີ່​ຜ່ານ​ມາ ໃນ​ການ​ປັບ­ປຸງ​ກົດ­ໝາຍ​ສ່ວຍ​ສາ​ອາ­ກອນ​ສະ­ບັບ​ນຳ​ໃຊ້​ໃນ​ປັດ­ຈຸ­ບັນ ມາ​ເປັນ​ກົດ­ໝາຍ​ວ່າ​ດ້ວຍ​ການ​ຄຸ້ມ​ຄອງ​ສ່ວຍ​ສາ​ອາ­ກອນ ສຳ­ລັບ​ກົດ­ໝາຍ​ວ່າ​ດ້ວຍ​ການ​ຄຸ້ມ​ຄອງ​ສ່ວຍ​ສາ​ອາ­ກອນ (ສະ­ບັບ​ປັບ­ປຸງ) ໃໝ່​ນີ້ ປະ­ກອບ​ມີ 12 ພາກ 13 ໝວດ ແລະ 93 ມາດ­ຕາ.

    ໂອ­ກາດ​ນີ້ ບັນ­ດາ ສສຊ ໄດ້​ຜັດ­ປ່ຽນ​ກັນ​ຂຶ້ນ​ປະ­ກອບ​ຄຳ​ຄິດ​ເຫັນ​ຢ່າງ​ກົງ​ໄປ​ກົງ​ມາ​ຢູ່​ບາງ​ມາດ­ຕາ ເພື່ອ​ເຮັດ​ໃຫ້​ເນື້ອ​ໃນ​ມີ​ຄວາມ​ສົມ­ບູນ ແລະ ຄົບ​ຖ້ວນ​ຂຶ້ນ​ຕື່ມ ໃນ​ນັ້ນ ມີ​ມາດ­ຕາ 4 ນະ­ໂຍ­ບາຍ​ຂອງ​ລັດ​ກ່ຽວ​ກັບ​ວຽກ​ງານ​ຄຸ້ມ​ຄອງ​ສ່ວຍ​ສາ​ອາ­ກອນ ມາດ­ຕາ 5 ການ​ຍົກ­ເວັ້ນ ຫຼື ຫຼຸດ­ຜ່ອນ​ພັນ­ທະ​ສ່ວຍ​ສາ​ອາ­ກອນ​ຕໍ່​ນະ­ໂຍ­ບາຍ​ການ​ສົ່ງ­ເສີມ​ພິ­ເສດ ທາງ​ດ້ານ​ອາ­ກອນ​ຕໍ່​ໂຄງ­ການ​ລົງ­ທຶນ​ຂອງ​ລັດ ທີ່​ເປັນ​ບຸ­ລິ­ມະ­ສິດ​ຂອງ​ລັດ­ຖະ­ບານ ເປັນ­ຕົ້ນ ເຂດ​ເສດ­ຖະ­ກິດ​ພິ­ເສດ ຂະ​ແໝງ​ວິ​ສາ​ຫະ​ກິດ ຂະ​ໝາດ​ນ້ອຍ ແລະ ກາງ ເພື່ອ​ຮັບ​ໃຊ້​ສາ​ທາ​ລະ​ນຸ​ປະ­ໂຫຍດ ແລະ ສາ​ທາ​ລະ​ນຸ​ປະ​ໂພກ ມາດ­ຕາ 8 ການ​ຫັນ​ວຽກ​ງານ​ຄຸ້ມ​ຄອງ​ສ່ວຍ​ສາ​ອາ­ກອນ​ເປັນ​ທັນ​ສະ­ໄໝ ພາກ​ທີ III ລະ­ບົບ​ສ່ວຍ​ສາ​ອາ­ກອນ ມາດ­ຕາ 28 ວິ­ທີ​ການ​ແຈ້ງ​ເສຍ​ອາ­ກອນ ມາດ­ຕາ 31 ກຳ­ນົດ​ເວ­ລາ​ການ​ມອບ​ອາ­ກອນ ພ້ອມ​ທັງ​ອະ­ທິ­ບາຍ​ຄຳ​ສັບ​ຢູ່​ບາງ​ມາດ­ຕາ​ໃຫ້​ມີ​ຄວາມ​ສອດ­ຄ່ອງ ແລະ ລະ­ອຽດ​ຂຶ້ນ​ຕື່ມ ຈາກ​ນັ້ນ ສສຊ ໄດ້​ລົງ​ຄະ­ແນນ​ສຽງ​ເພື່ອ​ຮັບ­ຮອງ​ເອົາ​ກົດ­ໝາຍ​ສະ­ບັບ​ນີ້ ດ້ວຍ​ຄະ­ແນນ​ສຽງ​ເປັນ​ສ່ວນ​ຫຼາຍ.

ຂ່າວທີ່ກ່ຽວຂ້ອງ