ແຕ່ງຕັ້ງຄະນະບໍລິຫານງານ ສະໂມສອນລອຍນ້ຳຄົນພິການ ນວ

1.455 19 ມິ.ຖ. 2019 ວົງຈອນກີລາ
ແຕ່ງຕັ້ງຄະນະບໍລິຫານງານ ສະໂມສອນລອຍນ້ຳຄົນພິການ ນວ

    ພິ­ທີ​ປະ­ກາດ​ແຕ່ງ­ຕັ້ງ​ຄະ­ນະ​ບໍ­ລິ­ຫານ​ງານ ສະ­ໂມ­ສອນ​ລອຍ­ນ້ຳ​ຄົນ​ພິ­ການ ນະ­ຄອນ­ຫຼວງ​ວຽງ​ຈັນ (ນວ) ໄດ້​ຈັດ​ຂຶ້ນ​ໃນ​ວັນ​ທີ 14 ມິ­ຖຸ­ນາ 2019 ຜ່ານ​ມາ ຢູ່​ຫ້ອງ​ປະ­ຊຸມ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ໂດຍ​ມີ​ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ມີ​ທ່ານ ຄຳ​ສະ­ຫວັນ ໂຄດ​ໄຊ ຮອງ​ເຈົ້າ­ເມືອງ​ໄຊ​ເຊດ​ຖາ ທັງ​ເປັນ​ປະ­ທານ​ສະ­ໂມ­ສອນ​ລອຍ­ນ້ຳ​ຄົນ​ພິ­ການ ນວ ພ້ອມ​ດ້ວຍ​ຄະ­ນະ ພະ­ນັກ­ງານ​ທີ່​ກ່ຽວ­ຂ້ອງ ແລະ ສື່​ມວນ​ຊົນ.

    ໂອ­ກາດ​ນີ້ ທ່ານ ຄຳ​ສະ­ຫວັນ ໂຄດ​ໄຊ ກ່າວ​ວ່າ: ເພື່ອ​ເປັນ​ການ​ພັດ­ທະ­ນາ​ກີ­ລາ-ກາຍ­ຍະ­ກຳ ແລະ ສົ່ງ­ເສີມ​ໃຫ້​ນັກ­ກີ­ລາ​ຄົນ​ພິ­ການ​ໄດ້​ຫັນ​ມາ​ອອກ­ກຳ­ລັງ​ກາຍ​ຫຼິ້ນ​ກີ­ລາ ແລະ ເຂົ້າ​ຮ່ວມ​ຂະ​ບວນ​ການ­ເຄື່ອນ­ໄຫວ​ກິດ­ຈະ­ກຳ​ການ​ແຂ່ງ­ຂັນ​ກີ­ລາ​ຄົນ​ພິ­ການ​ປະ­ເພດ​ຕ່າງໆ ແລະ ໄດ້​ເຝິກ­ແອບ​ໃຫ້​ຖືກ​ລະ­ບົບ​ຕໍ່​ເນື່ອງ ສາ­ມາດ​ຄັດ​ເລືອກ​ເອົາ​ນັກ­ກີ­ລາ​ຜູ້​ທີ່​ມີ​ຄວາມ​ສາ­ມາດ​ມີ​ພອນ​ສະ­ຫວັນ​ດີ­ເດັ່ນ ເປັນ​ຕົວ​ແທນ​ໃຫ້​ແກ່​ສະ­ໂມ­ສອນ​ກີ­ລາ​ຄົນ​ພິ­ການ ນວ ເຂົ້າ​ຮ່ວມ​ແຂ່ງ­ຂັນ​ກີ­ລາ​ຄົນ​ພິ­ການ​ແຫ່ງ​ຊາດ ຄັ້ງ​ທີ 3 ໃນ​ກາງ​ປີ 2020 ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ ແລະ ແຂ່ງ­ຂັນ​ປະ­ຈຳ​ປີ​ຂອງ​ຄົນ​ພິ­ການ​ແຫ່ງ​ຊາດ ແລະ ຄົນ​ພິ­ການ​ສາ­ກົນ.

    ສະ­ໂມ­ສອນ​ລອຍ­ນ້ຳ​ຄົນ​ພິ­ການ ນວ ຈຶ່ງ​ມີ​ແຜນ­ການ­ເຄື່ອນ­ໄຫວ ໂດຍ​ຈະ​ລົງ​ເກັບ​ກຳ​ຂໍ້​ມູນ​ຕົວ​ຈິງ​ນຳ​ສູນ ສະ­ມາ­ຄົມ​ຄົນ​ພິ­ການ 9 ຕົວ​ເມືອງ ຈະ​ເລີ່ມ​ເຝິກ­ແອບ​ລະ­ບົບ​ຕໍ່​ເນື່ອງ ກະ­ກຽມ​ການ​ຈັດ​ເຝິກ­ອົບ­ຮົມ​ລອຍ­ນ້ຳ ໂດຍ​ປະ­ສານ​ສົມ­ທົບ​ກັບ​ສະ­ມາ­ຄົມ ສູນ ສະ­ໂມ­ສອນ​ພາຍ​ໃນ​ນະ­ຄອນ­ຫຼວງ ທັງ​ພາກ​ທິດ​ສະ​ດີ ແລະ ພາກ​ປະ­ຕິ­ບັດ​ຕົວ​ຈິງ ຈະ​ຈັດ­ການ​ແຂ່ງ­ຂັນ​ຊີງ​ຂັນ​ຄະ­ນະ​ບໍ­ລິ­ຫານ​ງານ​ສະ­ໂມ­ສອນ​ລອຍ­ນ້ຳ​ຄົນ​ພິ­ການ ນວ ປະ​ເມີນ​ນັກ­ກີ­ລາ​ລອຍ­ນ້ຳ​ຄົນ​ພິ­ການ ແລະ ກຳ­ນົດ​ລາຍ​ຊື່​ນັກ­ກີ­ລາ​ແຕ່­ລະ­ຄົນ ທີ່​ຈະ​ເຂົ້າ​ຮ່ວມ​ການ​ແຂ່ງ­ຂັນ​ກີ­ລາ​ຄົນ​ພິ­ການ​ແຫ່ງ​ຊາດ ຄັ້ງ​ທີ 3 ທີ່​ແຂວງ​ຊຽງ​ຂວາງ ເຂົ້າ​ສູນ​ເຝິກ­ຊ້ອມ​ກີ­ລາ​ລອຍ­ນ້ຳ​ຢ່າງ​ປົກ­ກະ­ຕິ ແລະ ແຂ່ງ­ຂັນ​ໄປ​ພ້ອມ​ໃນ​ທຸກໆ​ທ້າຍ​ເດືອນ​ແຕ່​ລະ​ປະ­ເພດ​ຕ່າງໆ ອີກ​ຕາມ​ເງື່ອນ­ໄຂ​ຕົວ​ຈິງ.

    ສຳ­ລັບ​ຄະ­ນະ​ບໍ­ລິ­ຫານ​ງານ​ສະ­ໂມ­ສອນ​ລອຍ­ນ້ຳ​ຄົນ​ພິ­ການ ນວ ຊຸດ​ນີ້ ປະ­ກອບ​ມີ: ທ່ານ ຄຳ​ສະ­ຫວັນ ໂຄດ​ໄຊ ເປັນ​ປະ­ທານ ທ່ານ ຄຳ​ປະ­ສົງ ຈັນ­ທາ​ຈະ­ເລີນ ປະ­ທານ​ບໍ­ລິ­ສັດ ຄຳ​ປະ­ສົງ ການ​ຄ້າ ແລະ ທ່ານ ອິນ​ແປງ ພັນ­ທະ​ວີ​ໄຊ ຜູ້­ອຳ­ນວຍ­ການ​ບໍ­ລິ­ສັດ ກໍ່­ສ້າງ ແລະ ຂົວ​ທາງ ເປັນ​ຮອງ​ປະ­ທານ ນອກ­ຈາກ​ນັ້ນ ຍັງ​ມີ​ເລ­ຂາ­ທິ­ການ ແລະ ຮອງ​ເລ­ຂາ­ທິ­ການ ຄັງ​ເງິນ ຄູ​ເຝິກ ແລະ ຄະ­ນະ​ກຳ­ມະ­ການ ອີກ 16 ທ່ານ.

ຂ່າວທີ່ກ່ຽວຂ້ອງ