ຮອງເຈົ້າຄອງ ລົງຊຸກຍູ້ແຜນພັດທະນາເສດຖະກິດເມືອງສັງທອງ

662 19 ມິ.ຖ. 2019 ຂ່າວໜ້າ​ໜຶ່ງ
ຮອງເຈົ້າຄອງ ລົງຊຸກຍູ້ແຜນພັດທະນາເສດຖະກິດເມືອງສັງທອງ

    ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໄດ້​ລົງ​ເຄື່ອນ​ໄຫວ​ຊຸກ­ຍູ້ ແລະ ຕິດ­ຕາມ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຢູ່​ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ວັນ​ທີ 14 ມີ​ຖຸ​ນາ ຜ່ານ​ມາ ຖືກ​ຕ້ອນ­ຮັບ​ໂດຍ​ທ່ານ ດາວ​ເພັດ ອາ​ລຸນ ເຈົ້າ­ເມືອງ​ສັງ​ທອງ ພ້ອມ​ດ້ວຍ​ຄະ­ນະ​ປະ­ຈຳ​ພັກ ຄະ­ນະ​ພັກ ຫົວ­ໜ້າ​ຫ້ອງ­ການ ແລະ ຕາງ­ໜ້າ​ກຸ່ມ​ຜະ­ລິດ​ທົ່ວ​ເມືອງ​ສັງ​ທອງ.

    ທ່ານ ດາວ​ເພັດ ອາ​ລຸນ ໄດ້​ລາຍ​ງານ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໂດຍ​ຫຍໍ້​ວ່າ: ເມືອງ​ສັງ​ທອງ​ມີ​ເນື້ອ­ທີ່​ກະ­ສິ­ກຳ​ກວ້າງ­ຂວາງ ມີ​ນ້ຳ­ຂອງ ນ້ຳ​ສັງ ນ້ຳ​ຕອນ ເຊິ່ງ​ເໝາະ​ແກ່​ການ​ປູກ­ຝັງ ແລະ ລ້ຽງ­ສັດ ລະ­ບົບ​ພື້ນ­ຖານ​ໂຄງ​ລ່າງ​ມີ​ການ​ຂະ­ຫຍາຍ­ຕົວ​ສະ­ດວກ​ໃຫ້​ແກ່​ການ​ຜະ­ລິດ ແລະ ການ​ບໍ­ລິ­ການ​ດ້ານ​ຕ່າງໆ ມີ​ບໍ່​ຄຳ ບໍ່​ກົ່ວ ບໍ່​ຫີນ ແລະ ແຮ່​ຊາຍ ທີ່​ເປັນ​ພື້ນ­ຖານ​ໃຫ້​ແກ່​ການ​ພັດ­ທະ­ນາ​ເມືອງ​ສັງ​ທອງ ໂດຍ​ປະ­ຕິ­ບັດ​ຕາມ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ VI ຂອງ​ອົງ­ຄະ​ນະ​ພັກ​ເມືອງ ຄາດ­ໝາຍ​ສູ້​ຊົນ​ໃນ​ປີ 2020 ລວມ​ຍອດ​ຜະ­ລິດ​ຕະ​ພັນ​ບັນ­ລຸ​ໄດ້ 574,08 ຕື້​ກີບ ສະ­ເລ່ຍ​ລາຍ​ໄດ້​ຕໍ່​ຫົວ​ຄົນ 16,58 ລ້ານ​ກີບ ເທົ່າ​ກັບ 2.073 ໂດ​ລາ​ຕໍ່​ຄົນ​ຕໍ່​ປີ ໃນ​ປີ 2018 ຜ່ານ​ການ­ຈັດ­ຕັ້ງ​ປະ­ຕິ­ບັດ​ເກັບ​ລາຍ​ຮັບ​ປະ­ຕິ­ບັດ​ໄດ້ 120,27% ທັງ​ໝົດ​ແມ່ນ 6,8 ຕື້​ກີບ ຕາມ​ແຜນ 5,7 ຕື້​ກີບ ຄາດ­ໝາຍ​ສູ້​ຊົນ​ໃນ​ປີ 2019 ທີ່​ນະ­ຄອນ­ຫຼວງ​ວຽງ​ຈັນ​ໄດ້​ວາງ​ຄາດ­ໝາຍ​ໄວ້​ໃຫ້ 7,5 ຕື້​ກີບ ມາ​ຮອດ​ປັດ­ຈຸ­ບັນ 6 ເດືອນ​ຕົ້ນ​ປີ​ສາ­ມາດ​ເກັບ​ລາຍ​ຮັບ​ໄດ້ 2,8 ຕື້​ກີບ ການ​ຂຸດ​ຄົ້ນ​ແຫຼ່ງ​ລາຍ​ຮັບ​ສ່ວນ​ໃຫຍ່​ໄດ້​ມາ​ຈາກ​ການ​ເກັບ​ອາ­ກອນ ແລະ ຊັບ​ສິນ.

    ໂອ­ກາດ​ນີ້ ທ່ານ ຮອງ​ເຈົ້າ​ຄອງ ໄດ້​ໃຫ້​ທິດ​ຊີ້​ນຳ​ຕໍ່​ອຳ­ນາດ​ການ​ປົກ­ຄອງ​ເມືອງ​ສັງ​ທອງ ໂດຍ​ໃຫ້​ຖື​ເອົາ​ວຽກ​ງານ ປກຊ-ປກສ ເປັນ​ບຸ­ລິ­ມະ­ສິດ​ສຳ­ຄັນ ເພື່ອ​ແກ້​ໄຂ​ບັນ­ຫາ​ປາ­ກົດ­ການ​ຫຍໍ້­ທໍ້​ຕ່າງໆ ເພາະ​ເປັນ​ເມືອງ​ຊາຍ​ແດນ ພ້ອມ​ນັ້ນ ໃຫ້​ເອົາ­ໃຈ­ໃສ່​ວຽກ​ງານ​ພະ­ນັກ­ງານ ສະ­ມາ­ຊິກ​ພັກ​ໃຫ້​ມີ​ຄວາມ​ໜັກ​ແໜ້ນ​ຕໍ່­ໜ້າ​ທີ່ ແລະ ເປັນ​ແບບ­ຢ່າງ​ທີ່​ດີ ເອົາ­ໃຈ­ໃສ່​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ​ເປັນ​ບຸ­ລິ­ມະ­ສິດ​ສຳ­ຄັນ ເຮັດ​ໃຫ້​ເຂົາ­ເຈົ້າ​ມີ​ຢູ່​ມີ​ກິນ ໄດ້​ເຂົ້າ​ເຖິງ​ການ​ບໍ­ລິ­ການ​ດ້ານ​ສາ​ທາ ລະ­ນະ​ສຸກ​ຢ່າງ​ທົ່ວ​ເຖິງ ສ່ວນ​ອົງ­ການ​ປົກ­ຄອງ​ບ້ານ​ຕ້ອງ​ເອົາ­ໃຈ­ໃສ່​ຊຸກ­ຍູ້​ຕິດ­ຕາມ​ນຳ​ເອົາ​ລະ­ບຽບ​ຫຼັກ­ການ​ລົງ​ສູ່​ປະ­ຊາ­ຊົນ ແລະ ການ​ຂຸດ​ຄົ້ນ​ນຳ​ໃຊ້​ໄມ້­ປ່ອງ​ຕ້ອງ​ໃຫ້​ມີ​ຄວາມ​ຍືນ​ຍົງ ກຳ­ນົດ​ເຂດ​ປູກ ເຂດ​ທີ່​ຕັດ​ຂາຍ​ເປັນ​ສິນ­ຄ້າ ເພື່ອ​ຮັກ­ສາ​ໄມ້­ປ່ອງ​ໃຫ້​ມີ​ຄວາມ​ສົມ­ບູນ.

ຂ່າວທີ່ກ່ຽວຂ້ອງ