ສສຊ ຮັບຮອງຮ່າງກົດໝາຍອາກອນລາຍໄດ້

863 19 ມິ.ຖ. 2019 ຂ່າວໜ້າ​ໜຶ່ງ
ສສຊ ຮັບຮອງຮ່າງກົດໝາຍອາກອນລາຍໄດ້

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ​ຊຸດ​ທີ VIII ວັນ​ທີ 18 ມິ­ຖຸ­ນາ 2019 ທີ່​ສະ­ພາ​ແຫ່ງ​ຊາດ ເປັນ​ປະ­ທານ​ຂອງ​ທ່ານ ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ ລັດ​ຖະ ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ພ້ອມ​ດ້ວຍ​ຄະ­ນະ​ປະ­ຈຳ​ສະ­ພາ​ແຫ່ງ​ຊາດ ແລະ ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ເຂົ້າ​ຮ່ວມ.

    ທ່ານ ສົມ​ດີ ດວງ​ດີ ໄດ້​ຂຶ້ນ​ຜ່ານ​ຮ່າງ​ກົດ­ໝາຍ​ວ່າ​ດ້ວຍ​ອາ­ກອນ​ລາຍ​ໄດ້​ວ່າ: ຮ່າງ​ກົດ­ໝາຍ​ວ່າ​ດ້ວຍ​ອາ­ກອນ​ລາຍ​ໄດ້ ໄດ້​ກຳ­ນົດ​ຫຼັກ­ການ ລະ­ບຽບ​ການ ວິ­ທີ​ການ ແລະ ມາດ​ຕະ­ການ​ກ່ຽວ​ກັບ​ຄຸ້ມ​ຄອງ ແລະ ຕິດ­ຕາມ​ວຽກ​ງານ​ອາ­ກອນ​ລາຍ​ໄດ້ ເພື່ອ​ເຮັດ​ໃຫ້​ວຽກ​ງານ​ດັ່ງ­ກ່າວ​ມີ​ປະ­ສິດ­ທິ­ພາບ ແລະ ປະ​ສິດ­ທິ​ຜົນ ຊຸກ­ຍູ້​ສົ່ງ­ເສີມ​ການ​ດຳ­ເນີນ​ທຸ­ລະ​ກິດ​ໃຫ້​ມີ​ການ​ຂະ­ຫຍາຍ­ຕົວ​ຢ່າງ​ແຂງ­ແຮງ ດັດ­ສົມ​ລາຍ​ໄດ້​ໃນ​ສັງ­ຄົມ ແນ­ໃສ່​ເກັບ​ລາຍ​ຮັບ​ເຂົ້າ​ງົບ­ປະ­ມານ​ແຫ່ງ​ລັດ​ໃຫ້​ຖືກ­ຕ້ອງ ຄົບ​ຖ້ວນ ໂປ່ງ​ໃສ ແລະ ຍຸ­ຕິ​ທຳ ສ້າງ​ເງື່ອນ­ໄຂ​ໃຫ້​ແກ່​ການ​ເຊື່ອມ​ໂຍງ​ເຂົ້າ​ກັບ​ພາກ​ພື້ນ ແລະ ສາ­ກົນ ປະ­ກອບ­ສ່ວນ​ເຂົ້າ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຊາດ ເຊິ່ງ​ອາ­ກອນ​ລາຍ​ໄດ້​ແມ່ນ​ອາ­ກອນ​ທີ່​ເກັບ​ຈາກ​ບຸກ­ຄົນ ນິ­ຕິ­ບຸກ­ຄົນ ຫຼື​ການ­ຈັດ­ຕັ້ງ​ທີ່​ມີ​ລາຍ​ໄດ້ ອາ­ກອນ​ລາຍ​ໄດ້​ປະ­ກອບ​ດ້ວຍ: ອາ­ກອນ​ລາຍ​ໄດ້​ວິ​ສາ​ຫະ​ກິດ ແລະ ອາ­ກອນ​ລາຍ​ໄດ້​ບຸກ­ຄົນ​ຮ່າງ​ກົດ­ໝາຍ​ວ່າ​ດ້ວຍ​ອາ­ກອນ​ລາຍ​ໄດ້​ສະ­ບັບ​ນີ້​ປະ­ກອບ​ດ້ວຍ IX ພາກ 6 ໝວດ ແລະ 76 ມາດ­ຕາ.

    ສຳ­ລັບ​ພື້ນ­ຖານ​ຄິດ­ໄລ່​ອາ­ກອນ​ລາຍ​ໄດ້​ແມ່ນ​ລາຍ​ໄດ້​ຈາກ​ເງິນ­ເດືອນ ຄ່າ​ແຮງ​ງານ ເງິນ​ເພີ່ມ​ໂມງ ເງິນ​ລ່ວງ​ເວ­ລາ ເງິນ​ຕຳ­ແໜ່ງ ເງິນ​ໜ້າ­ທີ່ ເງິນ​ບຳ​ເນັດ ເບັ້ຍ­ລ້ຽງ​ປະ­ຊຸມ​ສະ­ພາ​ບໍ­ລິ­ຫານ ຫຼື ສະ­ພາ​ຜູ້­ອຳ­ນວຍ­ການ ແລະ ຜົນ​ປະ­ໂຫຍດ​ອື່ນໆ ເປັນ​ເງິນ ຫຼື ວັດ­ຖຸ​ແມ່ນ​ຈຳ­ນວນ​ເງິນ­ສົດ​ທີ່​ໄດ້​ຮັບ ມູນ​ຄ່າ​ວັດ­ຖຸ ຫຼື ຜົນ​ປະ­ໂຫຍດ​ອື່ນໆ​ທັງ​ໝົດ ໂດຍ​ຕີ​ມູນ​ຄ່າ​ເປັນ​ເງິນ​ທີ່​ໄດ້​ຮັບ​ຕາມ​ສັນ­ຍາ​ລາຍ​ໄດ້​ຈາກ​ການ​ປະ­ກອບ​ອາ­ຊີບ​ອິດ­ສະ­ຫຼະ​ທີ່​ບໍ່​ໄດ້​ຂຶ້ນ​ທະ­ບຽນ​ວິ​ສາ​ຫະ​ກິດ ແມ່ນ​ລາຍ​ໄດ້​ທັງ​ໝົດ​ທີ່​ໄດ້​ຮັບ​ລາຍ​ໄດ້​ຈາກ​ການ​ຊື້​ຂາຍ​ອອນ​ລາຍ​ແມ່ນ​ລາຍ​ໄດ້​ຈາກ​ການ​ຊື້​ຂາຍ ລາຍ​ໄດ້​ຈາກ​ເງິນ​ເປັນ​ປັນ​ຜົນ​ກຳ­ໄລ ຫຼື ຜົນ​ປະ­ໂຫຍດ​ອື່ນໆ​ໃຫ້​ແກ່​ຂາ​ຮຸ້ນ ຫຼື ຜູ້​ຖື​ຮຸ້ນ​ແມ່ນ​ຈຳ­ນວນ​ເງິນ​ທີ່​ໄດ້​ຮັບ ຫຼື​ຜົນ​ປະ­ໂຫຍດ​ອື່ນ​ທັງ​ໝົດ​ໂດຍ​ຕີ​ມູນ​ຄ່າ​ເປັນ​ເງິນ ລາຍ​ໄດ້​ຈາກ​ການ​ຂາຍ ຫຼື ໂອນ​ຮຸ້ນ​ຂອງ​ບຸກ­ຄົນ ຫຼື ນິ­ຕິ­ບຸກ­ຄົນ​ແມ່ນ​ຈຳ­ນວນ​ເງິນ​ມູນ​ຄ່າ​ຂາຍ ຫຼື ໂອນ​ຮຸ້ນ​ທັງ​ໝົດ ລາຍ​ໄດ້​ຈາກ​ດອກ​ເບັ້ຍ​ເງິນ​ໃຫ້​ກູ້​ຢຶມ​ນອກ​ລະ­ບົບ​ທະ­ນາ­ຄານ ລາຍ​ໄດ້​ຈາກ​ການ​ຄ້ຳ­ປະ­ກັນ​ຕາມ​ສັນ­ຍາ ຫຼື​ຂໍ້​ຜູກ​ພັນ​ອື່ນໆ​ແມ່ນ​ຈຳ­ນວນ​ເງິນ​ດອກ​ເບ້ຍ ຈຳ­ນວນ​ເງິນ​ທີ່​ໄດ້​ຮັບ​ຈາກ​ການ​ຄ້ຳ­ປະ­ກັນ​ຕາມ​ສັນ­ຍາ ຫຼື​ຂໍ້​ຜູກ​ພັນ​ອື່ນໆ ລາຍ​ໄດ້​ຈາກ​ການ​ຖືກ​ຫວຍ​ເປັນ​ເງິນ ຫຼື​ວັດ­ຖຸ ແມ່ນ​ຈຳ­ນວນ​ເງິນ​ລາ­ງວັນ​ຖືກ​ຫວຍ ຫຼື​ມູນ​ຄ່າ​ວັດ­ຖຸ ລາຍ​ໄດ້​ຂອງ­ຂວັນ​ເປັນ​ເງິນ ຫຼື ວັດ­ຖຸ ແມ່ນ​ຈຳ­ນວນ​ເງິນ ຫຼື ມູນ​ຄ່າ​ຂອງ​ວັດ­ຖຸ​ຕາມ​ທີ່​ໄດ້​ກຳ­ນົດ​ໄວ້​ໃນ​ກົດ­ໝາຍ ແລະ ລະ­ບຽບ​ການ ລາຍ​ໄດ້​ຈາກ​ການ​ໃຫ້​ເຊົ່າ ລາຍ​ໄດ້​ຈາກ​ຊັບ​ສິນ​ທາງ​ປັນ­ຍາ ລາຍ​ໄດ້​ຈາກ​ການ​ຊື້​ຂາຍ ຫຼື​ໂອນ​ກຳ­ມະ­ສິດ​ທີ່​ດິນ ສິ່ງ​ປຸກ​ສ້າງ ຫຼື​ທີ່​ດິນ​ພ້ອມ​ສິ່ງ​ປຸກ​ສ້າງ ລາຍ​ໄດ້​ຈາກ​ການ­ເຄື່ອນ­ໄຫວ​ກິດ­ຈະ­ກຳ​ທີ່​ບໍ່​ແມ່ນ​ທຸ­ລະ​ກິດ​ຂອງ​ອົງ​ການ­ຈັດ­ຕັ້ງ​ຂອງ​ລັດ ແລະ​ສັງ­ຄົມ ລາຍ​ໄດ້​ຈາກ​ການ​ສືບ​ທອດ​ມໍ­ລະ­ດົກ​ຈາກ​ຜູ້​ທີ່​ບໍ່​ແມ່ນ​ຍາດ​ສາຍ​ຕັ້ງ​ດ້ວຍ​ກັນ​ແມ່ນ​ມູນ​ຄ່າ​ຂອງ​ມໍ­ລະ­ດົກ​ທີ່​ໄດ້​ຮັບ ສ່ວນ​ອັດ­ຕາ​ອາ­ກອນ​ລາຍ​ໄດ້​ກຳ­ນົດ​ຄື: ອັດ­ຕາ​ທະ­ວີ­ຄູນ​ແຕ່ 0-28% ແຕ່ 1,3 ລ້ານ​ກີບ​ລົງ​ມາ (0%) ເກີນ 1,3 ລ້ານ​ກີບ ຫາ 5 ລ້ານ​ກີບ (5%) ເກີນ 5-15 ລ້ານ​ກີບ (10%) ເກີນ 15-25 ລ້ານ​ກີບ (15%) ເກີນ 25-45 ລ້ານ​ກີບ (20%) ເກີນ 45 ລ້ານ​ກີບ (28%).

    ພາຍ­ຫຼັງ​ຮັບ​ຟັງ​ຮ່າງ​ກົດ­ໝາຍ​ສະ­ບັບ​ນີ້ ສສຊ ໄດ້​ພ້ອມ​ກັນ​ປະ­ກອບ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ​ໃສ່​ເນື້ອ​ໃນ ແລະ ບາງ​ມາດ­ຕາ​ໃນ​ກົດ­ໝາຍ​ສະ­ບັບ​ດັ່ງ­ກ່າວ​ເພື່ອ​ໃຫ້​ມີ​ເນື້ອ​ໃນ​ຄົບ​ຖ້ວນ​ສົມ­ບູນ ແລະ ໃຫ້​ສາ­ມາດ​ນຳ​ໃຊ້​ໄດ້ ເຊິ່ງ​ຜ່ານ​ການ​ປະ­ກອບ​ຄຳ​ເຫັນ ສສຊ ໄດ້​ເຫັນ​ດີ​ຮັບ­ຮອງ​ເອົາ​ກົດ­ໝາຍ​ວ່າ​ດ້ວຍ​ອາ­ກອນ​ລາຍ​ໄດ້​ດ້ວຍ​ຄະ­ແນນ​ສຽງ​ສ່ວຍ​ຫຼາຍ.

ຂ່າວທີ່ກ່ຽວຂ້ອງ