ເສັ້ນທາງ ເພຍລາດ-ເຕົາໄຫ ມີຄວາມຄືບໜ້າເກືອບ 50%

1.909 20 ມິ.ຖ. 2019 ຂ່າວໜ້າ​ໜຶ່ງ
ເສັ້ນທາງ ເພຍລາດ-ເຕົາໄຫ ມີຄວາມຄືບໜ້າເກືອບ 50%

    ທ່ານ ຫຼຸມ​ຄຳ ຈັນ­ທະ​ປັນ­ຍາ ຫົວ­ໜ້າ​ຫ້ອງ­ການ ໂຍ­ທາ​ທິ​ການ ແລະ ຂົນ­ສົ່ງ ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ໄດ້​ລາຍ​ງານ​ໃຫ້​ຮູ້​ໃນ​ກາງ​ເດືອນ  ມີ​ຖຸ​ນາ ນີ້ ວ່າ: ການ­ຈັດ­ຕັ້ງ​ປະ­ຕິ­ບັດ​ກໍ່­ສ້າງ​ສ້ອມ­ແປງ​ເສັ້ນ­ທາງ ແຕ່​ເພຍ​ລາດ-ເຕົາ​ໄຫ ເຊິ່ງ​ໄດ້​ເລີ່ມ​ລົງ­ມື​ຈັດ​ຕັ້ງ​ປະ­ຕິ­ບັດ​ມາ​ແຕ່​ວັນ​ທີ 9 ພຶດ­ສະ­ພາ 2019 ເຊີ່ງ​ແມ່ນ​ບໍ­ລິ­ສັດ ຈັນ​ມີ​ໄຊ​ກໍ່­ສ້າງ​ຄົບ​ວົງ​ຈອນ​ຈຳ­ກັດ​ຜູ້​ດຽວ ເປັນ​ຜູ້​ຮັບ​ເໝົາ​ກໍ່­ສ້າງ ເຊິ່ງ​ມີ​ຄວາມ​ຍາວ​ທັງ​ໜົດ 14.700 ແມັດ ກວ້າງ 7 ແມັດ ປູ​ດ້ວຍ​ຫີນ ເບ​ສ​ຄອດ​ອັດ​ແໜ້ນ ເຊິ່ງ​ໂຄງ­ການ​ດັ່ງ­ກ່າວ ໄດ້​ຮັບ​ງົບ­ປະ­ມານ​ຈາກ​ເງິນ​ກອງ​ທຶນ​ພະ​ແນກ ຍທຂ ນະ­ຄອນ­ຫຼວງ​ວຽງ​ຈັນ ແລະ ເງິນ​ກອງ​ທຶນ​ພັດ­ທະ­ນາ​ເມືອງ​ສັງ​ທອງ​ລວມ​ມູນ​ຄ່າ 2 ຕື້​ກວ່າ​ກີບ ນອກ­ຈາກ​ນັ້ນ ປະ­ຊາ­ຊົນ ຍັງ​ໄດ້​ມີ​ສ່ວນ​ຮ່ວນ​ປະ­ກອບ­ສ່ວນ​ຊື້ ແລະ ວາງ​ທໍ່​ລະ­ບາຍ​ນ້ຳ​ໃສ່​ທາງ​ເຂົ້າ​ເຮືອນ​ຂອງ​ໃຜ­ລາວ​ຕື່ມ​ອີກ ເຊິ່ງ​ມາ​ຮອດ​ປັດ­ຈຸ­ບັນ​ການ​ກໍ່­ສ້າງ​ເສັ້ນ­ທາງ​ແຕ່ ເພຍ​ລາດ-ເຕົາ​ໄຫ ແມ່ນ​ໄດ້​ສຳ­ເລັດ​ໄປ​ແລ້ວ 35% ແລະ ຄາດ​ຄະ­ເນ​ວ່າ ຈະ​ໃຫ້​ສຳ­ເລັດ 100% ພາຍ​ໃນ​ເດືອນ 7/2019 ນີ້.

    ທ່ານ ຫົວ­ໜ້າ​ຫ້ອງ­ການ ຍທຂ ເມືອງ​ສັງ​ທອງ ຍັງ​ໃຫ້​ຮູ້​ຕື່ມ​ອີ​ກວ່າ: ນອກ­ຈາກ​ການ​ສ້ອມ­ແປງ​ເສັ້ນ­ທາງ​ແຕ່ ເພຍ​ລາດ-ເຕົາ​ໄຫ​ແລ້ວ​ຍັງ​ໄດ້​ສ້ອມ­ແປງ​ເສັ້ນ­ທາງ​ອີກ​ຈຳ­ນວນ​ໜຶ່ງ​ທີ່​ເປ່​ເພ​ໂດຍ​ສະ­ເພາະ​ແມ່ນ​ເສັ້ນ­ທາງ​ແຕ່​ບ້ານ​ນາ​ປໍ-ບ້ານ​ໃຫຍ່​ນາ​ຈະ­ເລີນ ແລະ ບ້ານ​ນາ​ຫອຍ-ບ້ານ​ໂຄກ​ເພີງ ຕື່ມ​ອີກ.

    ທັງ​ນີ້ ກໍ່​ເພື່ອ​ເຮັດ​ໃຫ້­ການ​ໄປ​ມາ​ຂອງ​ພໍ່​ແມ່​ປະ­ຊາ­ຊົນ​ພາຍ​ໃນ​ເມືອງ​ສັງ​ທອງ​ມີ​ຄວາມ​ສະ­ດວກ​ສະ­ບາຍ ແລະ ສາ­ມາດ ທຽວ​ໄດ້ 2 ລະ­ດູ ຄື: ລະ­ດູ­ແລ້ງ ແລະ ລະ­ດູ­ຝົນ ທັງ​ເປັນ​ການ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ກອງ​ປະ­ຊຸມ​ໃຫຍ່ ຄັ້ງ​ທີ V ຂອງ​ອົງ­ຄະ​ນະ​ພັກ​ເມືອງ​ສັງ​ທອງ ທີ່​ຈະ​ຈັດ​ຂຶ້ນ​ໄວໆ​ນີ້.

ຂ່າວທີ່ກ່ຽວຂ້ອງ