ຂ່າວຫຼ້າສຸດ

ເວ​ເນ​ຊູ​ເອ​ລາ ຮັບ​ເຄື່ອງ​ຊ່ວຍເຫຼືອ​ຈາກ​ຄະນະ​ກຳມະການ​ກາແດງ​ສາກົນ

551 20 ມິ.ຖ. 2019 ຂ່າວຕ່າງປະເທດ
ເວ​ເນ​ຊູ​ເອ​ລາ ຮັບ​ເຄື່ອງ​ຊ່ວຍເຫຼືອ​ຈາກ​ຄະນະ​ກຳມະການ​ກາແດງ​ສາກົນ

     ເມື່ອ​ວັນ​ທີ 17 ມິຖຸນາ​ນີ້ ເວ​ເນ​ຊູ​ເອ​ລາ ໄດ້​ຮັບ​ເຄື່ອງ​ຊ່ວຍເຫຼືອ​ມະນຸດສະທຳ ເປັນ​ຖ້ຽວ​ທີ​ສອງ ຈາກ​ຄະນະ​ກຳມະການ​ກາແດງ​ສາກົນ ທີ່​ປະກອບ​ມີ​ເຄື່ອງມື​ການ​ແພດ ແລະ​ ຈັກ​ກຳເນີດ​ໄຟຟ້າ ລວມ​ນ້ຳໜັກ 24 ໂຕນ ໂດຍ​ແມ່ນ​ປາ​ນາ​ມາ ສະໜອງ​ໃຫ້.

     ຂ່າວ​ແຈ້ງວ່າ ເຄື່ອງ​ຊ່ວຍເຫຼືອ​ດັ່ງກ່າວ ຈະ​ໄດ້​ແຈກ​ຢາຍ​ໄປ​ໃຫ້​ໂຮງໝໍ​ແຫ່ງ​ຕ່າງໆ ເພື່ອ​ຊ່ວຍເຫຼືອ​ແກ້​ໄຂ​ວິ​ກິດ​ການ​ດ້ານ​ການ​ແພດ ຢູ່​ໃນ​ເວ​ເນ​ຊູ​ເອ​ລາ. ຄະນະ​ກຳມະການ​ກາແດງ ຂອງ​ເວ​ເນ​ຊູ​ເອ​ລາ ກໍ​ໃຫ້​ຮູ້​ວ່າ  ຈະ​ແຈກ​ຢາຍ​ເຄື່ອງ​ຊ່ວຍເຫຼືອ​ນັ້ນ ໄປ​ຍັງ​ໂຮງໝໍ​ແຫ່ງ​ຕ່າງໆ ໃນ​ທົ່ວ​ປະເທດ​ເວ​ເນ​ຊູ​ເອ​ລາ ຊຶ່ງ​ໃນ​ຂະນະ​ນີ້​ພວມ​ຂາດແຄນ​ເຄື່ອງມື ແລະ​ ອຸປະກອນ​ການ​ແພດ ຢ່າງ​ຮ້າຍ​ແຮງ ທີ່​ເກີດ​ຈາກ​ວິ​ກິດ​ການ​ທາງ​ດ້ານ​ການເມືອງ ແລະ​ເສດຖະກິດ.

     ຄາດ​ວ່າ ຄະນະ​ກຳມະການ​ກາແດງ​ສາກົນ ຈະ​ເພີ່ມ​ງົບປະມານ​ຂຶ້ນ​ເກືອບ 3 ເທົ່າ ເພື່ອ​ຊ່ວຍເຫຼືອ​ເວ​ເນ​ຊູ​ເອ​ລາ ໂດຍ​ເພີ່ມ​ຂຶ້ນ​ຈາກ 9 ລ້ານ​ໂດ​ລາ​ສະຫະລັດ ເປັນ 24,6 ລ້ານ​ໂດ​ລາ​ສະຫະລັດ ເພື່ອ​ເປີດ​ກວ້າງ​ການເຄື່ອນໄຫວ​ຢູ່​ໃນ 4 ຂົງເຂດ​ດ້ານ​ມະນຸດສະທຳ ຢູ່​ໃນ​ເວ​ເນ​ຊູ​ເອ​ລາ ອັນ​ປະກອບ​ດ້ວຍ ຜູ້​ຍ້າຍ​ຖິ່ນ​ຖານ ການ​ດູ​ແລ​ດ້ານ​ການ​ແພດ ນ້ຳ​ສະອາດ-ອະນາໄມ ແລະ ​ແກ້​ໄຂ​ເງື່ອນໄຂ​ຢູ່​ໃນ​ພື້ນຖານ​ການ​ກັກ​ຂັງ.

     ທາງ​ດ້ານ​ອົງການ​ສະຫະ​ປະຊາ​ຊາດ ໃຫ້​ຮູ້​ວ່າ ປະມານ 25% ຈາກ​ຍອດ​ຈຳນວນ​ປະຊາກອນ 30 ລ້ານ​ຄົນ ຢູ່​ໃນ​ເວ​ເນ​ຊູ​ເອ​ລາ ພວມ​ຕ້ອງການ​ຄວາມ​ຊ່ວຍເຫຼືອ​ສຸກ​ເສີນ.

ຂ່າວທີ່ກ່ຽວຂ້ອງ