ລາວ ແລະ ແຂວງຢຸນນານ ຮັດແໜ້ນການຮ່ວມມື

794 20 ມິ.ຖ. 2019 ຂ່າວໜ້າ​ໜຶ່ງ
ລາວ ແລະ ແຂວງຢຸນນານ ຮັດແໜ້ນການຮ່ວມມື

    ໂດຍ​ຕອບ​ສະ­ໜອງ​ຕາມ​ການ​ເຊື້ອ​ເຊີນ​ຂອງ​ທ່ານ Chen Hao ເລ­ຂາ​ພັກ​ແຂວງ ແຂວງ​ຢຸນ​ນານ ສປ ຈີນ ທ່ານ ສະ­ເຫຼີມ​ໄຊ ກົມ​ມະ​ສິດ ກຳ­ມະ­ການ​ສູນ​ກາງ​ພັກ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ພ້ອມ​ຄະ­ນະ ໄດ້​ເດີນ­ທາງ​ຢ້ຽມ­ຢາມ ແລະ ເຮັດ​ວຽກ​ກັບ​ການ​ນຳ ແລະ ອຳ­ນາດ​ການ​ປົກ­ຄອງ​ແຂວງ​ຢຸນ​ນານ ໃນ​ວັນ​ທີ 17-19 ມິ­ຖຸ­ນາ 2019 ເພື່ອ​ສົ່ງ­ເສີມ​ການ​ພົວ­ພັນ​ຮ່ວມ​ມື​ສອງ​ຝ່າຍ​ລະ­ຫວ່າງ​ສອງ​ປະ­ເທດ ລາວ-ຈີນ.

    ການ​ຢ້ຽມ­ຢາມ​ຄັ້ງ​ນີ້ ທ່ານ ສະ­ເຫຼີມ​ໄຊ ກົມ​ມະ​ສິດ ພ້ອມ​ຄະ­ນະ​ໄດ້​ພົບ​ປະ ແລະ ເຮັດ​ວຽກ​ກັບ​ທ່ານ Chen Hao ເຊິ່ງ​ການ​ພົບ​ປະ​ຄັ້ງ​ນີ້​ສອງ​ຝ່າຍ​ໄດ້​ແຈ້ງ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ​ຂອງ​ກັນ ແລະ ກັນ​ທີ່​ໄດ້​ມີ​ການ​ພັດ­ທະ­ນາ​ເປັນ​ກ້າວໆ​ມາ ທ່ານ​ລັດ­ຖະ­ມົນ­ຕີ​ໄດ້​ສະ­ແດງ​ຄວາມ​ຂອບ­ໃຈ​ຕໍ່​ການ​ຕ້ອນ­ຮັບ ແລະ ຮູ້­ສຶກ​ເປັນ​ກຽດ​ຢ່າງ​ສູງ​ຕໍ່​ການ​ເຊື້ອ​ເຊີນ​ຄະ­ນະ​ຜູ້​ແທນ​ກະ­ຊວງ​ການ​ຕ່າງ­ປະ­ເທດ​ລາວ ພ້ອມ​ຄະ­ນະ ເຊິ່ງ​ການ​ຢ້ຽມ­ຢາມ​ຄັ້ງ​ນີ້​ເປັນ​ການ​ປະ­ກອບ­ສ່ວນ​ອັນ​ສຳ­ຄັນ​ເຂົ້າ​ໃນ​ການ​ສົ່ງ­ເສີມ​ຊຸກ­ຍູ້​ການ​ພົວ­ພັນ​ຮ່ວມ​ມື​ລະ­ຫວ່າງ​ສອງ​ປະ­ເທດ ລາວ ແລະ ຈີນ ເວົ້າ​ລວມ ເວົ້າ​ສະ­ເພາະ​ການ​ພົວ­ພັນ​ລະ­ຫວ່າງ​ລາວ ແລະ ແຂວງ​ຢຸນ​ນານ ທັງ​ສອງ​ຝ່າຍ​ໄດ້​ຕີ​ລາ­ຄາ​ສູງ​ຕໍ່​ການ​ພົວ­ພັນ​ຮ່ວມ​ມື​ລາວ-ຈີນ ແບບ​ຄູ່​ຮ່ວມ​ມື​ຍຸດ​ທະ​ສາດ​ຮອບ­ດ້ານ ໝັ້ນ­ຄົງ ຍາວ​ນານ​ຕາມ​ທິດ 4 ດີ (ເພື່ອນ​ທີ່​ດີ ສະ­ຫາຍ​ທີ່​ດີ ຄູ່​ຮ່ວມ​ມື​ທີ່​ດີ ບ້ານ​ໃກ້​ເຮືອນ​ຄຽງ​ທີ່​ດີ) ແລະ ຄູ່​ຮ່ວມ​ຊາ­ຕາ­ກຳ​ລາວ-ຈີນ ທີ່​ສອງ​ຜູ້­ນຳ​ສູງ​ສຸດ​ຂອງ​ສອງ​ປະ­ເທດ​ໄດ້​ຕົກ­ລົງ​ກັນ​ໃນ​ທ້າຍ​ເດືອນ​ເມ­ສາ 2019.

    ສປປ ລາວ ຢືນ­ຢັນ​ສືບ­ຕໍ່​ສະ­ແດງ​ການ​ສະ­ໜັບ­ສະ­ໜູນ​ຂໍ້​ລິ​ເລີ່ມ “ໜຶ່ງ​ແລວ ໜຶ່ງ​ເສັ້ນ­ທາງ”ຂອງ​ຈີນ ເຊິ່ງ​ມີ​ນະ­ໂຍ­ບາຍ​ເສີມ​ຂະ­ຫຍາຍ ແລະ ຮັດ​ແໜ້ນ​ການ​ເຊື່ອມ​ຈອດ​ໃນ​ພາກ​ພື້ນ ກໍ​ຄື ສາ­ກົນ ສອງ​ຝ່າຍ​ຕົກ­ລົງ​ສືບ­ຕໍ່​ເອົາ­ໃຈ­ໃສ່​ປະ­ສານ​ສົມ­ທົບ​ກັນ​ໃຫ້​ລະ­ອຽດ​ເລິກ­ເຊິ່ງ ແລະ ທັນ​ການ​ຂຶ້ນ​ກວ່າ​ເກົ່າ ເພື່ອ​ຮັບ­ປະ­ກັນ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ຮ່ວມ​ມື​ກໍ່­ສ້າງ​ເສັ້ນ­ທາງ​ລົດ­ໄຟ​ລາວ-ຈີນ ໃຫ້​ສຳ­ເລັດ​ຕາມ​ຄາດ­ໝາຍ​ທີ່​ວາງ​ໄວ້ ຝ່າຍ​ລາວ​ໄດ້​ສະ­ເໜີ​ໃຫ້​ຈີນ​ສືບ­ຕໍ່​ຊຸກ­ຍູ້​ນັກ​ລົງ­ທຶນ​ຈີນ​ໄປ​ລົງ­ທຶນ​ຢູ່​ລາວ​ໃຫ້​ຫຼາຍ​ຂຶ້ນ ແລະ ພ້ອມ​ນັ້ນ​ສອງ​ຝ່າຍ​ຍັງ​ໄດ້​ປຶກ­ສາ​ຫາ­ລື​ແຜນ­ການ​ຮ່ວມ​ມື​ໃນ​ອະ­ນາ­ຄົດ​ຂອງ​ກະ­ຊວງ​ການ​ຕ່າງ­ປະ­ເທດ​ກັບ​ແຂວງ ຢຸນ​ນານ ຫຼັງ​ຈາກ​ພົບ​ປະ​ແລ້ວ​ສອງ​ຝ່າຍ​ຍັງ​ໄດ້​ເປັນ​ສັກ­ຂີ​ພິ­ຍານ​ໃນ​ພິ­ທີ​ລົງ​ນາມ​ເອ­ກະ­ສານ​ບົດ​ບັນ­ທຶກ​ການ​ຮ່ວມ​ມື​ມິດ­ຕະ­ພາບ ລະ­ຫວ່າງ​ຫ້ອງ­ການ​ກະ­ຊວງ​ການ​ຕ່າງ­ປະ­ເທດ ແລະ ຫ້ອງ­ການ​ພົວ­ພັນ​ຕ່າງ­ປະ­ເທດ​ແຂວງ​ຢຸນ​ນານ.

ຂ່າວທີ່ກ່ຽວຂ້ອງ