ຂ່າວຫຼ້າສຸດ

ດູ​ມາ​ແຫ່ງ​ຊາດ​ຣັດ​ເຊຍ ຮັບຮອງ​ຮ່າງ​ກົດໝາຍ​ວ່າ​ດ້ວຍ​ການ​ງົດ​ສົນທິສັນຍາ INF

577 20 ມິ.ຖ. 2019 ຂ່າວຕ່າງປະເທດ
ດູ​ມາ​ແຫ່ງ​ຊາດ​ຣັດ​ເຊຍ ຮັບຮອງ​ຮ່າງ​ກົດໝາຍ​ວ່າ​ດ້ວຍ​ການ​ງົດ​ສົນທິສັນຍາ INF

      ວັນ​ທີ 18 ມິຖຸນາ​ນີ້ ດູ​ມາ​ແຫ່ງ​ຊາດ (ສະພາ​ຕ່ຳ) ຣັດ​ເຊຍ ໄດ້​ຮັບຮອງ​ຮ່າງ​ກົດໝາຍ ວ່າ​ດ້ວຍ​ການ​ງົດ​ປະຕິບັດ​ສົນທິສັນຍາ​ກອງ​ກຳລັງ​ນີວ​ເຄລຍ​ຂະໜາດ​ກາງ (INF).

     ທ່ານ ເວຍ​ເຈ​ສລາບ ໂວ​ໂລ​ດິນ ປະທານ​ສະພາ​ຕ່ຳ​ຣັດ​ເຊຍ ກ່າວ​ຫຼັງ​ຈາກ​ການ​ຮັບຮອງ ຮ່າງ​ກົດໝາຍ​ດັ່ງກ່າວ​ຢູ່​ໃນ​ສະພາ​ຕ່ຳ ວ່າ​ພວກ​ເຮົາ​ຮັບຮອງ​ຮ່າງ​ກົດໝາຍ​ນີ້ ແມ່ນ​ເລີ່ມ​ຈາກ​ຄວາມ ຈຳເປັນ ໃນ​ການ​ປົກ​ປ້ອງ​ຜົນ​ປະໂຫຍດ​ຂອງ​ຊາດ. ການ​ທີ່ ສ ອາ​ເມ​ຣິ​ກາ ຮັບຮອງ​ຂໍ້​ຕົກລົງ ກ່ຽວ​ກັບ​ການ​ງົດ​ສົນທິສັນຍາ INF ນັ້ນ​ໄດ້​ເປັນ​ການ​ຄຸກ​ຄາມ​ຕໍ່​ທົ່ວ​ທັງ​ລະບົບ​ຄວາມ​ໝັ້ນຄົງ ໃນ​ທົ່ວ​ໂລກ.

     ໃນ​ຂະນະ​ດຽວ​ກັນ ທ່ານ ແຊກ​ເກ ເຊ​ກອບ ສະມາຊິກ​ສະພາ​ສູງ​ຣັດ​ເຊຍ ເວົ້າ​ວ່າ ສະພາ​ສູງ​ຣັດ​ເຊຍ ຈະ​ປຶກ​ສຶກ​ສາ​ຫາລື​ກ່ຽວ​ກັບ​ຮ່າງ​ກົດໝາຍ​ດັ່ງກ່າວ ໃນ​ວັນ​ທີ 26 ມິຖຸນາ​ນີ້ ແລະ​ວ່າ​ມີ​ຄວາມ​ເປັນ​ໄປ​ໄດ້​ຫຼາຍ ທີ່​ບັນດາ​ສະມາຊິກ​ລັດ​ຖະ​ສະພາ ຈະ​ໃຫ້ການ​ສະໜັບສະໜູນ ຕໍ່​ເອກະສານ​ນີ້.

    ສ ອາ​ເມ​ຣິ​ກາ ໄດ້​ງົດ​ພັນທະ​ຂອງ​ຕົນ​ຢູ່​ໃນ​ສົນທິສັນຍາ INF ມາ​ຕັ້ງແຕ່​ວັນ​ທີ 2 ກຸມພາ​ທີ່​ຜ່ານ​ມາ ໂດຍ​ກ່າວ​ຫາ​ວ່າ​ຣັດ​ເຊຍ​ລະເມີດ​ສົນທິສັນຍາ​ນີ້ ພ້ອມ​ທັງ​ເລີ່ມ​ປະຕິບັດ​ຂະ​ບວນ​ການ ຖອນ​ອອກ​ຈາກ INF ທີ່​ແກ່ຍາວ​ເປັນ​ເວລາ 6 ເດືອນ.

     ຣັດ​ເຊຍ​ໄດ້​ປະຕິເສດ​ຕໍ່​ການ​ກ່າວ​ຫາ​ດັ່ງກ່າວ ໂດຍ​ເຫັນ​ວ່າ ສ ອາ​ເມ​ຣິ​ກາ ນັ້ນ​ເອງ​ທີ່​ເປັນ​ຝ່າຍ ລະເມີດ​ສົນທິສັນຍາ​ດັ່ງກ່າວ. ເມື່ອ​ວັນ​ທີ 4 ມີນາ​ທີ່​ຜ່ານ​ມາ ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ໄດ້​ລົງ​ນາມ​ລັດ​ຖະ​ດຳລັດ ກ່ຽວ​ກັບ​ເລື່ອງ​ຣັດ​ເຊຍ ງົດ​ການ​ເຂົ້າ​ຮ່ວມ​ສົນທິສັນຍາ INF.

     ສ ອາ​ເມ​ຣິ​ກາ ແລະ ສ ໂຊ​ວຽດ ໄດ້​ຮ່ວມ​ກັນ​ລົງ​ນາມ​ສົນທິສັນຍາ INF ເມື່ອ​ວັນ​ທີ 8 ທັນວາ ປີ 1987 ແລະ ​ໄດ້​ມີ​ຜົນ​ບັງຄັບ​ໃຊ້​ນັບ​ແຕ່​ວັນ​ທີ 1 ມິຖຸນາ ປີ 1988 ເປັນຕົ້ນ​ມາ. ຕາມ​ສົນທິສັນຍາ​ດັ່ງກ່າວ​ແລ້ວ ສອງ​ຝ່າຍ​ໃຫ້​ສັນຍາ​ໄວ້​ວ່າ ບໍ່​ຜະລິດ ບໍ່​ທົດ​ລອງ ບໍ່​ຜັນ​ຂະຫຍາຍ ບັນດາ​ລູກ​ສອນ​ໄຟ​ນຳ​ວິຖີ ແລະ​ ລູກ​ສອນ​ໄຟ​ເຄື່ອນ​ທີ່ຢູ່​ເທິງ​ໜ້າດິນ ໃນ​ຂະໜາດ​ກາງ ແລະ ​ຂະໜາດ​ໃກ້ (ແຕ່ 500-5.500​ກມ).

ຂ່າວທີ່ກ່ຽວຂ້ອງ