ລາວ-ອັງກິດ ຮ່ວມມືສົ່ງເສີມການສຶກສາ ສ້າງບຸຄະລາກອນ

826 20 ມິ.ຖ. 2019 ຂ່າວໜ້າ​ໜຶ່ງ
ລາວ-ອັງກິດ ຮ່ວມມືສົ່ງເສີມການສຶກສາ ສ້າງບຸຄະລາກອນ

    ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ວ່າ​ດ້ວຍ​ການ​ຮ່ວມ​ມື​ດ້ານ​ການ​ສຶກ​ສາ​ລະ­ຫວ່າງ​ລັດ­ຖະ­ບານ​ລາວ ຕາງ­ໜ້າ​ໂດຍ​ກະ­ຊວງ​ສຶກ​ສາ​ທິ​ການ ແລະ ກີ­ລາ ກັບ​ລັດ­ຖະ­ບານ​ແຫ່ງ​ຣາ​ຊະ​ອາ­ນາ­ຈັກ​ອັງ­ກິດ ແລະ ອຽກ​ລັງ​ເໜືອ ຕາງ­ໜ້າ​ໂດຍ​ສະ­ຖານ­ທູດ​ອັງ­ກິດ​ປະ​ຈາ​ລາວ ຈັດ​ຂຶ້ນ​ວັນ​ທີ 18 ມິ­ຖຸ­ນາ 2019 ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ໂດຍ​ການ​ລົງ​ນາມ​ຂອງ​ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ແລະ ທ່ານ ຮູຈ໌ ອີ​ວານສ໌ ເອກ​ອັກ​ຄະ​ຣາ​ຊະ​ທູດ​ອັງ­ກິດ​ປະ­ຈຳ​ລາວ ມີ​ທ່ານ​ນາງ ບຸບ­ຜາ ເຄນ​ວົງ​ດາ­ລາ ຮອງ​ຫົວ­ໜ້າ​ຫ້ອງ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ພ້ອມ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ນັບ​ແຕ່​ເປີດ​ສະ­ຖານ­ທູດ​ອັງ­ກິດ​ປະ­ຈຳ​ລາວ​ອີກ​ຄັ້ງ ປີ 2012 ລັດ­ຖະ­ບານ​ອັງ­ກິດ​ໄດ້​ຖື​ເອົາ​ວຽກ​ງານ​ການ​ສຶກ​ສາ ​ເປັນ​ວຽກ​ງານ​ແກນ​ກາງ​ໃນ​ການ​ສ້າງ​ສາຍ​ພົວ­ພັນ​ກັບ​ລາວ ​ດ້ວຍ​ເປົ້າ​ໝາຍ​ທີ່​ກວມ​ເອົາ​ການ​ເສີມ​ສ້າງ​ຕົ້ນ​ທຶນ​ທີ່​ເປັນ​ບຸ​ຄະ­ລາ​ກອນ ແລະ ຍົກ​ລະ­ດັບ​ກຳ­ລັງ​ແຮງ​ງານ​ທີ່​ໄດ້​ຮັບ​ການ​ພັດ­ທະ­ນາ ລັດ­ຖະ­ບານ​ອັງ­ກິດ​ໄດ້​ລົງ­ທຶນ​ເປັນ​ຈຳ­ນວນ​ຫຼາຍ​ໃນ​ລະ­ດັບ​ການ​ສຶກ​ສາ​ຊັ້ນ​ສູງ ການ​ເຝິກ­ອົບ­ຮົມ​ພາ­ສາ​ອັງ­ກິດ ແລະ ວິ­ຊາ​ຊີບ​ຢູ່​ໃນ​ລາວ ໃນ​ນີ້ ຍັງ​ລວມ​ເອົາ​ການ​ໃຫ້​ທຶນ​ການ​ສຶກ​ສາ​ລະ­ດັບ​ປະ­ລິນ­ຍາ​ໂທ ໂດຍ​ຜ່ານ​ການ​ສຶກ​ສາ​ເຊ​ເວັນ​ນິງ ໃຫ້​ທຶນ​ການ​ເຝິກ­ອົບ­ຮົມ​ພາ­ສາ​ອັງ­ກິດ​ແກ່​ຄູ-ອາ­ຈານ​ທີ່​ເປັນ​ຄົນ​ລາວ ຊຸກ­ຍູ້​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ​ເດີນ­ທາງ​ໄປ​ຮ່ວມ​ສຳ​ມະ​ນາ​ກ່ຽວ​ກັບ​ການ​ສຶກ​ສາ​ໂລກ​ທີ່​ຈັດ​ຂຶ້ນ​ຢູ່​ນະ­ຄອນ­ຫຼວງ​ລອນ​ດອນ​ໃນ​ແຕ່​ລະ​ປີ ຈັດ­ການ​ຄົ້ນ­ຄວ້າ​ກ່ຽວ​ກັບ​ວຽກ​ງານ​ການ​ສຶກ​ສາ​ທີ່​ນຳ­ພາ​ໂດຍ​ຊ່ຽວ­ຊານ​ຄົນ​ອັງ­ກິດ ກິດ­ຈະ­ກຳ​ແລກ­ປ່ຽນ​ການ​ຮຽນ-ການ​ສອນ​ລະ­ຫວ່າງ​ຄູ​ສອນ​ທີ່​ເປັນ​ຄົນ​ລາວ ແລະ ຄົນ​ອັງ­ກິດ​ໃນ​ຮູບ​ແບບ​ການ​ເຝິກ­ອົບ­ຮົມ​ທີ່​ວິ­ທະ­ຍາ­ໄລ​ຄູ​ບ້ານ​ເກີນ ແລະ ວິ­ທະ­ຍາ­ໄລ​ຄູ​ແຂວງ​ຫຼວງ​ພະ​ບາງ ເຊິ່ງ​ບົດ​ບັນ­ທຶກ​ຄວາມ​ເຂົ້າ­ໃຈ​ສະ­ບັບ​ນີ້ ຈະ​ສ້າງ​ຄວາມ​ສຳ­ເລັດ​ໃຫ້​ແກ່​ກິດ­ຈະ­ກຳ​ດັ່ງ­ກ່າວ ແລະ ຈະ​ເປັນ​ຮາກ​ຖານ​ຄວາມ​ສຳ­ເລັດ​ຂອງ​ການ​ຮ່ວມ​ມື​ໃນ​ອະ­ນາ­ຄົດ.

    ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ກ່າວ​ວ່າ: ການ​ຮ່ວມ​ມື​ດ້ານ​ການ​ສຶກ​ສາ​ຄັ້ງ​ນີ້​ເປັນ​ຂີດ​ໝາຍ​ສຳ­ຄັນ​ໃນ​ການ​ເສີມ​ຂະ­ຫຍາຍ ແລະ ຮັດ​ແໜ້ນ​ສາຍ​ພົວ­ພັນ​ການ​ຮ່ວມ​ມື​ລະ­ຫວ່າງ​ລາວ ແລະ ອັງ­ກິດ ພ້ອມ​ນັ້ນ ຍັງ​ເປັນ​ທ່າ­ແຮງ​ໃຫ້​ແກ່​ການ​ສ້າງ​ຊັບ­ພະ­ຍາ­ກອນ​ມະ­ນຸດ ໂດຍ​ຖື​ເອົາ​ຂະ­ແໜງ­ການ​ສຶກ​ສາ ແລະ ກີ­ລາ ເປັນ­ໃຈ​ກາງ​ໃນ​ການ­ຈັດ­ຕັ້ງ​ປະ­ຕິ­ບັດ ເປັນ​ການ​ຊຸກ­ຍູ້​ສົ່ງ­ເສີມ​ໃຫ້​ສອງ​ຝ່າຍ​ໄດ້​ເຮັດ​ວຽກ​ຮ່ວມ​ກັນ​ຢ່າງ​ໃກ້­ຊິດ​ຫຼາຍ​ຂຶ້ນ ໃນ​ການ​ປັບ­ປຸງ​ຄຸ­ນະ­ພາບ​ການ​ສຶກ​ສາ​ຂອງ​ລາວ​ໃຫ້​ທຽບ​ເທົ່າ​ກັບ​ພາກ​ພື້ນ ແລະ ສາ­ກົນ​ໃນ​ແຕ່​ລະ​ກ້າວ ເຊິ່ງ​ເປັນ​ການ​ສ້າງ​ເງື່ອນ­ໄຂ​ໃຫ້​ແຕ່​ລະ​ຝ່າຍ​ໄດ້​ມີ​ກິດ­ຈະ­ກຳ​ຮ່ວມ​ກັນ​ເຊັ່ນ: ຊຸກ­ຍູ້​ສົ່ງ­ເສີມ​ການ​ແລກ­ປ່ຽນ​ທາງ​ດ້ານ​ວິ­ຊາ​ການ​ລະ­ຫວ່າງ​ອົງ​ກອນ​ກັບ​ອົງ​ກອນ ສະ​ຖາ​ບັນ​ກັບ​ສະ​ຖາ​ບັນ ບຸກ­ຄົນ​ກັບ​ບຸກ­ຄົນ ກໍ​ຄື ການ​ໃຫ້​ທຶນ​ການ​ສຶກ​ສາ ຊຸກ­ຍູ້​ຈັດ​ສຳ​ມະ​ນາ ແລະ ວິ­ຊາ​ການ​ໃນ​ຂົງ­ເຂດ​ການ​ສຶກ​ສາ​ໃຫ້​ບັນ­ລຸ​ເປົ້າ​ໝາຍ​ຮ່ວມ​ກັນ.

ຂ່າວທີ່ກ່ຽວຂ້ອງ