ຂ່າວຫຼ້າສຸດ

UNICEF ແຈ້ງ​ເຕືອນ​ກ່ຽວ​ກັບ​ການ​ດູ​ແລ​ສຸຂະພາບ​ຂອງ​ຜູ້​ເປັນ​ແມ່ ແລະ ​ເດັກ​ຢູ່​ໃນ​ເຢ​ແມນ

571 20 ມິ.ຖ. 2019 ຂ່າວຕ່າງປະເທດ
UNICEF ແຈ້ງ​ເຕືອນ​ກ່ຽວ​ກັບ​ການ​ດູ​ແລ​ສຸຂະພາບ​ຂອງ​ຜູ້​ເປັນ​ແມ່ ແລະ ​ເດັກ​ຢູ່​ໃນ​ເຢ​ແມນ

   ອົງການ​ກອງ​ທຶນ​ສຳລັບ​ເດັກນ້ອຍ​ຂອງ​ສະຫະ​ປະຊາ​ຊາດ (UNICEF) ມີ​ຄຳ​ແຈ້ງ​ເຕືອນ​ອອກ​ມາ​ເມື່ອ​ວັນ​ທີ 16 ມິຖຸນາ​ນີ້​ວ່າ ຫ່າງ​ຈາກ​ເວລາ 2 ຊົ່ວໂມງ​ໃດ ແມ່ນ​ມີ​ຜູ້​ເປັນ​ແມ່ 1 ຄົນ ແລະ​ເດັກນ້ອຍ 6 ຄົນ ເສຍ​ຊີວິດ ຍ້ອນ​ເກີດ​ການ​ປ່ຽນແປງ​ອາການ ໃນ​ເວລາ​ທີ່​ຖືພາ​ມານ ຫຼື​ໃນ​ເວລາ​ທີ່​ໃຫ້​ກຳເນີດ​ລູກ ຢູ່​ໃນ​ປະເທດ​ເຢ​ແມນ. ຫຼັງ​ຈາກ​ທີ່​ເກີດ​ການ​ພິພາດ ມາ​ເປັນ​ເວລາ 4 ປີ​ກວ່າ​ນັ້ນ ວຽກ​ງານ​ການ​ດູ​ແລ​ສຸຂະພາບ​ຜູ້​ເປັນ​ແມ່ ແລະ​ເດັກ​ເກີດ​ໃໝ່​ຢູ່​ໃນ​ເຢ​ແມນ ພວມ “ງອຍ​ຢູ່​ໃນ​ປາກ​ເຫວ​ແຫ່ງ​ຄວາມ​ຫຼົ້ມຈົມ.”

     UNICEF ມີ​ຄຳ​ແຈ້ງ​ເຕືອນ​ດັ່ງກ່າວ​ອອກ​ມາ ຢູ່​ໃນ​ບົດ​ລາຍ​ງານ​ສະບັບ​ໜຶ່ງ ທີ່​ໃສ່​ຫົວຂໍ້​ວ່າ “ເກີດ​ລູກ ແລະ​ ລ້ຽງ​ລູກ ຢູ່​ໃນ​ເຂດ​ເກີດ​ການ​ສູ້​ຮົບ” ໃນ​ນັ້ນ​ໄດ້​ຍົກ​ໃຫ້​ເຫັນ​ເຖິງ​ຄວາມ​ຫຍຸ້ງຍາກ ທີ່​ຜູ້​ເປັນ​ແມ່​ພົບພໍ້ ໃນ​ລະຫວ່າງ​ທີ່​ເກີດ ແລະ​ລ້ຽງ​ລູກ ຢູ່​ໃນ​ເຢ​ແມນ.

     UNICEF  ໃຫ້​ຮູ້​ວ່າການ​ຕໍ່ສູ້​ຢູ່​ໃນ​ເຢ​ແມນ ທີ່​ແກ່ຍາວ​ມາ​ເປັນ​ລາ​ຫຼາຍ​ປີ ເປັນ​ສາເຫດ​ປະການ​ໜຶ່ງ ທີ່​ເຮັດ​ໃຫ້​ແມ່ຍິງ​ຖືພາ​ມານ ຍາກ​ທີ່​ຈະ​ເຂົ້າ​ຫາ​ພື້ນຖານ​ການ​ດູ​ແລ​ສຸຂະພາບ ຊຶ່ງ​ຕາມ​ນັ້ນແລ້ວ​ກໍ​ແມ່ນ ການ​ເກີດ​ລູກ 10 ລາຍ​ໃດ ແມ່ນ​ມີ​ພຽງ 3 ລາຍ ໄດ້​ຮັບ​ການ​ປະຕິບັດ​ຢູ່​ໃນ​ພື້ນຖານ​ການ​ແພດ​ທຳ​ມະ​ດາ​ສາມັນ.

     UNICEF ເນັ້ນ​ໜັກ​ວ່າ ຜູ້​ເປັນ​ແມ່ ແລະ​ ເດັກນ້ອຍ​ເກີດ​ໃໝ່ ນອນ​ຢູ່​ໃນ​ບັນດາ​ເປົ້າ​ໝາຍ​ທີ່​ຮັບ​ຄວາມ​ເສຍ​ຫາຍ​ໄດ້​ງ່າຍ​ທີ່​ສຸດ​ຢູ່​ໃນ​ເຢ​ແມນ ຊຶ່ງ​ຕາມ​ນັ້ນແລ້ວ​ກໍ​ແມ່ນ ເດັກນ້ອຍ​ເກີດ​ໃໝ່ 37 ຄົນ​ໃດ ແມ່ນ​ມີ 1 ຄົນ ເສຍ​ຊີວິດ​ໃນ​ເດືອນ​ທຳ​ອິດ​ທີ່​ມືນ​ຕາ​ຂຶ້ນ​ມາ​ມອງ​ໂລກ ແລະ ​ຜູ້​ເປັນ​ແມ່ 260 ຄົນ​ໃດ ແມ່ນ​ມີ 1 ຄົນ ເສຍ​ຊີວິດ​ໃນ​ເວລາ​ຖືພາ​ມານ ຫຼື​ໃນ​ເວລາ​ທີ່​ເກີດ​ລູກ.

     UNICEF ແຈ້ງ​ເຕືອນ​ວ່າ ມີ​ພື້ນຖານ​ການ​ແພດ​ຢູ່​ໃນ​ເຢ​ແມນ ພຽງ 51% ເທົ່າ​ນັ້ນ ທີ່​ເຄື່ອນ​ໄຫວ​ພຽບ​ພ້ອມ​ໄປ​ດ້ວຍ​ພາລະ​ບົດບາດ ແຕ່​ວ່າ​ພື້ນຖານ​ເຫຼົ່າ​ນີ້ ພັດ​ປະ​ເຊີນ​ກັບ​ຄວາມ​ສ່ຽງ​ຂາດແຄນ​ຢາ​ປົວ​ພະຍາດ ອຸປະກອນ​ການ​ແພດ ແລະ ​ພະນັກງານ ອັນ​ເປັນ​ການ​ຄຸກ​ຄາມ​ຕໍ່​ການ​ມີ​ຊີວິດ​ລອດ​ຂອງ​ຜູ້​ເປັນ​ແມ່ ແລະ ​ເດັກນ້ອຍ​ເກີດ​ໃໝ່.

ຂ່າວທີ່ກ່ຽວຂ້ອງ