ຮັບຮອງຮ່າງກົດໝາຍໃໝ່ວ່າດ້ວຍອາກອນຊົມໃຊ້

833 20 ມິ.ຖ. 2019 ຂ່າວໜ້າ​ໜຶ່ງ
ຮັບຮອງຮ່າງກົດໝາຍໃໝ່ວ່າດ້ວຍອາກອນຊົມໃຊ້

    ກອງ​ປະ­ຊຸມ​ສະ­ພາ​ແຫ່ງ​ຊາດ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ​ຊຸດ​ທີ VIII ວັນ​ທີ 19 ມິ­ຖຸ­ນາ 2019 ທີ່​ສະ­ພາ​ແຫ່ງ​ຊາດ ໄດ້​ຮັບ​ຟັງ​ການ​ສະ­ເໜີ​ຮ່າງ​ກົດ­ໝາຍ​ວ່າ​ດ້ວຍ​ອາ­ກອນ​ຊົມ­ໃຊ້ ເປັນ​ປະ­ທານ​ຂອງ​ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ມີ​ຄະ­ນະ​ກຳ­ມະ­ການ​ຮ່າງ​ກົດ­ໝາຍ ແລະ ສະ­ມາ­ຊິກ​ສະ­ພາ​ແຫ່ງ​ຊາດ​ເຂົ້າ​ຮ່ວມ.

    ໃນ​ກອງ​ປະ­ຊຸມ ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ໄດ້​ຂຶ້ນ​ສະ­ເໜີ​ການ​ຄົ້ນ­ຄວ້າ​ສ້າງ​ຮ່າງ​ກົດ­ໝາຍ​ວ່າ​ດ້ວຍ​ອາ­ກອນ​ຊົມ­ໃຊ້​ວ່າ: ການ​ສ້າງ​ຮ່າງ​ກົດ­ໝາຍ​ດັ່ງ­ກ່າວ​ໄດ້​ດຳ­ເນີນ​ການ​ຄົ້ນ­ຄວ້າ ແລະ ກະ­ກຽມ​ມາ​ພ້ອມ​ກັບ​ຮ່າງ​ກົດ­ໝາຍ​ວ່າ​ດ້ວຍ​ການ​ຄຸ້ມ​ຄອງ​ສ່ວຍ​ສາ​ອາ­ກອນ ເຊິ່ງ​ເຫດ­ຜົນ ແລະ ຄວາມ​ຈຳ­ເປັນ​ໃນ​ການ​ຄົ້ນ­ຄວ້າ​ສ້າງ​ຮ່າງ​ກົດ­ໝາຍ​ສະ­ບັບ​ນີ້ ເນື່ອງ​ຈາກ​ອາ­ກອນ​ຊົມ­ໃຊ້​ແມ່ນ​ປະ­ເພດ​ອາ­ກອນ​ທາງ​ອ້ອມ​ທີ່​ກຳ­ນົດ​ໃນ​ພາກ​ທີ 3 ໝວດ​ທີ 2 ຂອງ​ກົດ­ໝາຍ​ວ່າ​ດ້ວຍ​ສ່ວຍ​ສາ​ອາ­ກອນ​ສະ­ບັບ​ນຳ​ໃຊ້​ປັດ­ຈຸ­ບັນ ຜ່ານ​ການ­ຈັດ­ຕັ້ງ​ປະ­ຕິ­ບັດ​ອາ­ກອນ​ຊົມ­ໃຊ້​ເຫັນ​ວ່າ: ອາ­ກອນ​ຊົມ­ໃຊ້​ໄດ້​ຖືກ​ກຳ­ນົດ​ຢູ່​ໃນ​ກົດ­ໝາຍ​ວ່າ​ດ້ວຍ​ສ່ວຍ​ສາ​ອາ­ກອນ ເຫັນ​ວ່າ​ເນື້ອ​ໃນ​ຍັງ​ຈຳ­ກັດ​ເກີນ​ໄປ ການ​ກຳ­ນົດ​ອັດ­ຕາ​ບາງ​ລາຍ­ການ​ສິນ­ຄ້າ ການ​ບໍ­ລິ­ການ​ທີ່​ຖືກ­ເສຍ​ອາ­ກອນ​ຊົມ­ໃຊ້​ຍັງ​ບໍ່​ທັນ​ສອດ­ຄ່ອງ​ກັບ​ຫຼັກ­ການ​ສາ­ກົນ ວິ­ທີ​ຄິດ­ໄລ່​ການ​ເກັບ​ອາ ກອນ​ຊົມ­ໃຊ້​ບາງ​ປະ­ເພດ​ສິນ­ຄ້າ​ຫຼັກ ຍັງ​ບໍ່​ທັນ​ສອດ­ຄ່ອງ​ກັບ​ຕົວ​ຈິງ​ລະ­ຫວ່າງ​ສິນ­ຄ້າ​ທີ່​ນຳ​ເຂົ້າ​ຈາກ​ພາຍ​ນອກ ແລະ ການ​ເກັບ​ຈາກ​ຜູ້​ຜະ­ລິດ​ພາຍ​ໃນ ເຊິ່ງ​ອາດ​ຈະ​ສົ່ງ​ຜົນ​ກະ­ທົບ​ຕໍ່​ຜູ້​ຜະ­ລິດ​ພາຍ​ໃນ​ປະ­ເທດ ພາ­ໃຫ້​ເກີດ​ການ​ຫຼົບ​ຫຼີກ​ເຊື່ອງ­ອຳ​ອາ­ກອນ ແລະ ກະ­ທົບ​ຕໍ່​ຄວາມ​ຍືນ​ຍົງ​ຂອງ​ຖານ​ລາຍ​ຮັບ​ໃນ​ອະ­ນາ­ຄົດ ສະ­ນັ້ນ ເພື່ອ​ແກ້​ໄຂ​ບັນ­ຫາ​ດັ່ງ­ກ່າວ​ຈຶ່ງ​ມີ​ຄວາມ​ຈຳ­ເປັນ​ຕ້ອງ​ໄດ້​ສ້າງ​ກົດ­ໝາຍ​ວ່າ​ດ້ວຍ​ອາ­ກອນ​ຊົມ­ໃຊ້ ໂດຍ​ແຍກ​ອອກ​ຈາກ​ກົດ­ໝາຍ​ວ່າ​ດ້ວຍ​ສ່ວຍ​ສາ​ອາ­ກອນ​ສະ­ບັບ​ນຳ​ໃຊ້​ປັດ­ຈຸ­ບັນ ມາ​ເປັນ​ກົດ­ໝາຍ​ສະ­ເພາະ ປະ­ກອບ​ມີ 8 ພາກ 4 ໝວດ ແລະ 51 ມາດ­ຕາ.

    ຈາກ​ນັ້ນ ສສຊ ໄດ້​ຜັດ­ປ່ຽນ​ກັນ​ປະ­ກອບ​ຄຳ​ຄິດ​ເຫັນ​ຢ່າງ​ກົງ​ໄປ​ກົງ​ມາ ໂດຍ​ສ່ວນ​ໃຫຍ່​ເຫັນ​ດີ​ກັບ​ເນື້ອ​ໃນ​ຂອງ​ແຕ່​ລະ​ມາດ­ຕາ ທີ່​ໄດ້​ກຳ­ນົດ​ຢູ່​ໃນ​ຮ່າງ​ກົດ­ໝາຍ​ວ່າ​ດ້ວຍ​ອາ­ກອນ​ຊົມ­ໃຊ້ ແຕ່​ຍັງ​ມີ​ບາງ​ຈຸດ ແລະ ບາງ​ມາດ­ຕາ​ທີ່​ຈະ​ຕ້ອງ​ໄດ້​ປັບ­ປຸງ​ຕື່ມ ເປັນ­ຕົ້ນ ການ​ຕີ​ຄວາມ​ໝາຍ​ຂອງ​ກ້ອງ​ວົງ​ຈອນ​ປິດ ໃຫ້​ເບິ່ງ​ຄືນ​ການ​ກຳ­ນົດ​ອາ­ກອນ​ຜູ້​ຊົມ­ໃຊ້  ການ​ປົກ​ປ້ອງ​ສຸ­ຂະ­ພາບ​ຂອງ​ພົນ­ລະ­ເມືອງ ແລະ ການ​ດັດ­ສົມ​ການ​ຊົມ­ໃຊ້​ໃຫ້​ໃສ່​ສິນ­ຄ້າ ຫຼື ສິ່ງ​ຂອງ ມາດ­ຕາ 11 ໃຫ້​ໝາຍ​ຫົວ­ຂໍ້​ເປັນ​ອັນ​ລະ­ອຽດ ເນື່ອງ​ຈາກ​ເຫັນ​ວ່າ​ປົນ​ເປ​ກັນ ເຮັດ​ໃຫ້​ເກີດ​ຄວາມ​ສັບ­ສົນ ການ​ບໍ­ລິ­ການ​ອິນ​ເຕີ​ເນັດ​ບໍ່​ໃຫ້​ເກັບ​ອາ­ກອນ​ຊົມ­ໃຊ້ ເພື່ອ​ສົ່ງ­ເສີມ​ໃຫ້​ນັກ­ຮຽນ​ເຂົ້າ​ເຖິງ​ຄວາມ​ສີ­ວິ­ໄລ ນອກ​ນີ້ ການ​ບໍ­ລິ­ການ​ສະ­ຖານ­ທີ່​ທ່ອງ​ທ່ຽວ​ຈະ​ເກັບ​ຫຼື​ບໍ່​ເກັບ ຖ້າ​ເກັບ​ຈະ​ເກັບ​ໃນ​ລັກ­ສະ­ນະ​ສົ່ງ­ເສີມ​ແນວ­ໃດ ແລະ ມາດ­ຕາ 22 ການ​ພົວ­ພັນ​ວຽກ​ງານ​ເກັບ​ອາ­ກອນ​ຊົມ­ໃຊ້​ໃຫ້​ລະ­ບຸ​ຂໍ້​ມູນ​ລະ­ອຽດ ແນ­ໃສ່​ເຮັດ​ໃຫ້​ຮ່າງ​ກົດ­ໝາຍ​ສະ­ບັບ​ດັ່ງ­ກ່າວ​ມີ​ເນື້ອ​ໃນ​ຄົບ​ຖ້ວນ ຮັດ­ກຸມ ແລະ ສາ­ມາດ​ຈັດ​ຕັ້ງ​ປະ­ຕິ­ບັດ​ໄດ້ ເຊິ່ງ​ຜ່ານ​ການ​ຄົ້ນ­ຄວ້າ​ປະ­ກອບ​ຄຳ​ຄິດ​ເຫັນ​ຢ່າງ​ກົງ​ໄປ​ກົງ​ມາ​ອັນ​ໄດ້​ເຮັດ​ໃຫ້​ເນື້ອ​ໃນ​ມີ​ຄວາມ​ສົມ­ບູນ​ແບບ ແລະ ສຸດ​ທ້າຍ ສສຊ ໄດ້​ພ້ອມ​ກັນ​ລົງ​ຄະ­ແນນ​ສຽງ​ຮັບ­ຮອງ​ເອົາ​ຮ່າງ​ກົດ­ໝາຍ​ສະ­ບັບ​ດັ່ງ­ກ່າວ​ດ້ວຍ​ຄະ­ແນນ​ສຽງ​ເປັນ​ສ່ວນ​ຫຼາຍ.

ຂ່າວທີ່ກ່ຽວຂ້ອງ