ຂ່າວຫຼ້າສຸດ

ພັນ​ລະ​ຍາ​ຂອງ​ນາຍົກລັດຖະມົນຕີ​ອິດ​ສະ​ຣາ​ແອນ ຖືກ​ກ່າວ​ໂທດ​ຍ້ອນ​ໃຊ້​ເງິນ​ຂອງ​ລັດ​ໄປ​ໃນ​ທາງ​ທີ່​ຜິດ

578 20 ມິ.ຖ. 2019 ຂ່າວຕ່າງປະເທດ
ພັນ​ລະ​ຍາ​ຂອງ​ນາຍົກລັດຖະມົນຕີ​ອິດ​ສະ​ຣາ​ແອນ ຖືກ​ກ່າວ​ໂທດ​ຍ້ອນ​ໃຊ້​ເງິນ​ຂອງ​ລັດ​ໄປ​ໃນ​ທາງ​ທີ່​ຜິດ

    ເມື່ອ​ວັນ​ທີ 16 ມິຖຸນາ​ນີ້ ສານ​ແຫ່ງ​ໜຶ່ງ​ຢູ່​ໃນ​ອິດ​ສະ​ຣາ​ແອນ ໄດ້​ກ່າວ​ໂທດ​ຕໍ່​ນາງ ຊາ​ຣາ ເນ​ຕັນ​ຢາ​ຮູ ພັນ​ລະ​ຍາ​ຂອງ​ນາຍົກລັດຖະມົນຕີ​ອິດ​ສະ​ຣາ​ແອນ ເບນ​ຈາ​ມິນ ເນ​ຕັນ​ຢາ​ຮູ ວ່າ​ໃຊ້​ເງິນ​ຂອງ​ລັດ ເພື່ອ​ຈ່າຍ​ໃຫ້​ແກ່​ຄ່າ​ອາຫານ​ຂອງ​ນາງ.

     ນາງ ຊາ​ຣາ ຖືກ​ກ່າວ​ໂທດ​ວ່າ​ສວາຍ​ໃຊ້​ຄວາມ​ຜິດ​ຂອງ​ຄົນ​ອື່ນ ໃນ​ຂະນະ​ທີ່​ໃຊ້​ເງິນ​ຂອງ​ລັດ ແລະ​ ນາງ​ກໍ​ຍິນ​ດີ​ຈ່າຍ​ທົດ​ແທນ​ຄືນ​ໃຫ້​ແກ່​ລັດ ຈຳນວນ 45.000 ເຊ​ເກລ (ເທົ່າ​ກັບ​ປະມານ 12.490 ໂດ​ລາ​ສະຫະລັດ) ພ້ອມ​ດ້ວຍ​ບ້ວງ​ເງິນ​ຄ່າ​ປັບ​ໃໝ ປະມານ  2.775 ໂດ​ລາ​ສະຫະລັດ.

ການ​ຕັດສິນ​ຂອງ​ສານ​ຄື​ດັ່ງກ່າວ ຖືກ​ນຳ​ອອກ​ມາ​ຕາມ​ການ​ຕົກລົງ​ຮັບ​ໂທດ ເປັນ​ການ​ຊ່ວຍ​ໃຫ້​ນາງ ຊາ​ຣາ ຫຼີກເວັ້ນ​ຕໍ່​ການ​ຖືກ​ຈຳ​ຄຸກ. ຂໍ້​ຕົກລົງ​ຍອມຮັບ​ໂທດ​ນັ້ນ ໄດ້​ຮັບ​ຄວາມ​ເຫັນ​ດີ​ຈາກ​ທ່ານ  ອາ​ວີ​ຕານ ເຈນ ຜູ້​ພິພາກສາ​ທີ່​ຂຶ້ນ​ກັບ​ສານ ເຈ​ຣູ​ຊາ​ແລມ.

    ການ​ສືບສວນ​ສອບ​ສວນ​ກ່ອນ​ໜ້າ​ນັ້ນ ຂອງ​ເຈົ້າ​ໜ້າທີ່​ອິດ​ສະ​ຣາ​ແອນ ເຫັນ​ວ່າ ນາງ ຊາ​ຣາ ແລະ​ ນາງ ເອ​ສຣາ ຊາຍ​​ດອຟ ອະດີດ​ຜູ້​ຄຸ້ມ​ຄອງ​ເຮືອນ​ພັກ​ຂອງ​ນາຍົກລັດຖະມົນຕີ ເບນ​ຈາ​ມິນ ເນ​ຕັນ​ຢາ​ຮູ ໄດ້​ສັ່ງ​ອາຫານ​ເຂົ້າ​ມາ​ໃນ​ເຮືອນ​ພັກ​ດັ່ງກ່າວ​ຫຼາຍ​ເທື່ອ. ຍອດ​ຈຳນວນ​ເງິນ​ໃນ​ໃບ​ບິນ​ຮັບ​ເງິນ ທີ່​ຜູ້​ສືບສວນ​ສອບ​ສວນ​ເກັບ​ກຳ​ໄດ້​ມາ ມີ​ມູນ​ຄ່າ​ປະມານ 175.000 ເຊ​ເກລ (ເທົ່າ​ກັບ​ເກືອບ 50.000 ໂດ​ລາ​ສະຫະລັດ). ເຖິງ​ວ່າ​ເງິນ​ດັ່ງກ່າວ​ເປັນ​ຈຳນວນ​ຫຼາຍ​ກໍ​ຕາມ ແຕ່​ແມ່ຍິງ​ສອງ​ຄົນ​ນີ້ ກໍ​ຍັງ​ຄົງ​ໃຊ້​ເງິນ​ຂອງ​ລັດ​ເພື່ອ​ຊຳລະ.

     ກົດໝາຍ​ຂອງ​ອິດ​ສະ​ຣາ​ແອນ ກຳນົດ​ໄວ້​ວ່າ ການ​ສັ່ງ​ອາຫານ ເຂົ້າ​ໄປ​ໃນ​ເຮືອນ​ພັກ​ຂອງ​ນາຍົກລັດຖະມົນຕີ ເປັນ​ເລື່ອງ​ທີ່​ບໍ່​ໄດ້​ຮັບ​ອະນຸຍາດ ທັງ​ນີ້​ກໍ​ເພາະວ່າ​ໄດ້​ມີ​ຜູ້​ປຸງ​ແຕ່ງອາຫານ​ຢູ່​ທີ່​ນັ້ນ ເພື່ອ​ຮັບ​ໃຊ້​ຄາບ​ເຂົ້າຂອງ​ນາຍົກລັດຖະມົນຕີ ເບນ​ຈາ​ມິນ ເນ​ຕັນ​ຢາ​ຮູ ພ້ອມ​ດ້ວຍ​ຄອບຄົວ ແລະ​ ແຂກ​ທີ່​ສຳຄັນ.

     ນີ້​ເປັນ​ເທື່ອ​ທຳ​ອິດ​ຢູ່​ໃນ​ອິດ​ສະ​ຣາ​ແອນ ແລະ​ ທັງ​ໃນ​ທົ່ວ​ໂລກ ທີ່​ພັນ​ລະ​ຍາ​ຂອງ​ຜູ້ນຳ​ທີ່​ຍັງ​ຢູ່​ໃນ​ໜ້າທີ່​ຕຳແໜ່ງ ຖືກ​ດຳເນີນ​ຄະດີ ກ່ຽວ​ກັບ​ເລື່ອງ​ອາຫານ​ການ​ກິນ.

ຂ່າວທີ່ກ່ຽວຂ້ອງ