ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 20-06-2019

1.100 20 ມິ.ຖ. 2019 ຫົວຂໍ້ຂ່າວອື່ນໆ

   3 ເລື່ອງ​ທີ່​ສັນ​ຫາ​ມາ​ເລົ່າ​ມື້ນີ້ ມີ​ເລື່ອງ ​ສປ ຈີນ ປາບ​ປາກ​ຂະ​ບວນ​ການ​ຄ້າ​ມະນຸດ ໃນ​ຮູບ​ການ​ແຕ່ງດອງ ເລື່ອງ​ຜູ້​ເຖົ້າ​ເຂົ້າ​ຮຽນ​ຢ້ອນ​ອາຍຸ ແລະ ປິດ​ທ້າຍ​ກັບ​ມາດ​ຕະການ​ຫ້າມ​ສູບຢາ​ຢູ່​ສະຖານທີ່ ສາທາລະນະ​ກາງແຈ້ງ ທີ່​ປະເທດ​ຊູ​ແອັດ.

    ທີ່ ​ສປ ຈີນ: ມີ​ຂ່າວ​ດັງ​ອອກ​ມາ​ຈາກ​ນະຄອນ​ກຸ້ຍ​ຫຼິນ ສະຖານທີ່​ຍອດ​ນິຍົມ​ໜຶ່ງ​ຂອງ​ນັກ​ທ່ອງ​ທ່ຽວ​ພາຍ​ໃນ ຈີນ ແລະ ຕ່າງປະເທດ ວ່າ: ກຳລັງ​ຕຳຫຼວດ​ຂອງ​ນະຄອນ​ນີ້ ໄດ້​ຮັບ​ຜົນສຳເລັດ​ໃນ​ການ​ເລີກ​ຮື້​ຄະດີ​ຫຼອກ​ລວງ​ການ ແຕ່ງດອງ​ຂ້າມ​ຊາດ ເຊິ່ງ​ຖື​ວ່າ​ເປັນ​ຮູບ​ການ​ຄ້າ​ມະນຸດ ທີ່​ສ້າງ​ຜົນ​ກຳໄລ​ເປັນ​ຈຳນວນ​ມະຫາສານ ໃຫ້​ກຸ່ມ​ແກ້ງ​ທີ່​ກ່ຽວ ຂ້ອງ ຜູ້​ທີ່​ຕົກ​ເປັນ​ເຫຍື່ອ​ຂອງ​ຮູບ​ການ​ຫຼອກ​ລວງ​ນີ້ ສ່ວນ​ໃຫຍ່​ແມ່ນ​ຍິງ​ສາວ​ຈາກ​ບັນດາ​ປະເທດ​ໃກ້​ຄຽງ ການ​ປະຕິບັດ ງານ​ເລີກ​ຮື້​ຄັ້ງ​ນີ້ ແມ່ນ​ເປັນ​ໄປ​ຕາມ​ແຜນການ​ຂອງ​ກະຊວງ​ປ້ອງ​ກັນ​ຄວາມ​ສະຫງົບ​ຈີນ ໃນ​ການ​ປາບ​ປາມ​ອາ​ຊະ​ຍາ​ກຳ​ຄ້າ​ມະນຸດ​ດ້ວຍ​ຮູບ​ການ​ຫຼອກ​ລວງ​ນີ້ ຄະດີ​ທີ່​ມ້າງ​ໄດ້​ໃນ​ຄັ້ງ​ນີ້ ໄດ້​ຜ່ານ​ການ​ສອບ​ສວນ​ດົນ​ເຖິງ 9 ເດືອນ ຈຶ່ງ​ສາ ມາດ​ຈັບ​ກຸມ​ຜູ້​ຕ້ອງ​ສົງໄສ​ໄດ້​ຈຳນວນ 15 ຄົນ ແລະ ມ້າງ​ຄະດີ​ໄດ້ 21 ເລື່ອງ ເຊິ່ງ​ເປັນ​ຄະດີ​ຕ່ອງ​ໂສ້​ພົວພັນ​ກັບ 7 ນະຄອນ ຂອງ 7 ເຂດ ແລະ ແຂວງ ເຊິ່ງ​ມີ​ມູນ​ຄ່າ​ໃນ​ວົງ​ເງິນ​ສູງ​ກວ່າ 1.200.000 ຢວນ.

    ທີ່​ປະເທດ​ໄທ: ມີ​ຂ່າວ​ເກົ່າໆ ແຕ່​ໜ້າ​ສົນໃຈ​ຈາກ​ໄທ  ໃນ​ທ້າຍ​ເດືອນ​ມັງກອນ ປີ​ນີ້ (Nation 30 ມັງກອນ 2019) ກ່ຽວ​ກັບ​ບັນດາ​ນັກຮຽນ​ເຖົ້າ ຢູ່​ເມືອງ​ຫົວ​ຫີນ ແຂວງ​ປະຈວບ​ສີ​ລິ​ຂັນ ທີ່​ມີ​ຄວາມ​ກະ​ຕື​ລື​ລົ້ນ​ໃນ​ການ​ສຶກ​ສາ ຮ່ຳຮຽນ ໂດຍ​ຢຶດ​ຖື​ຄຳ​ຂວັນ​ອຳ​ມະຕະ​ທີ່​ວ່າ: “ບໍ່​ມີ​ໃຜ​ແກ່​ກາຍ​ຮຽນ ຂ່າວ​ບອກ​ວ່າ: ທາງ​ການ​ຂອງ​ເມືອງ​ນີ້​ໄດ້​ຈັດ​ຕັ້ງ ໂຮງຮຽນ​ພິເສດ ເພື່ອ​ຮັບ​ເອົາ​ນັກຮຽນ​ຜູ້​ເຖົ້າ​ເຂົ້າ​ຮຽນ​ໃນ​ຫຼາຍ​ສາຂາ​ວິຊາ ເຊັ່ນ: ຄວາມ​ຮູ້​ດ້ານ​ກົດໝາຍ ວິຊາ​ຊີບ ຄວາມ​ຮູ້​ກ່ຽວ​ກັບ​ກົນ​ໄກ​ປະສານ​ງານ​ກັບ​ສຳນັກງານ​ອົງການ​ຂອງ​ລັດ ວິຊາ​ທຳ​ມະ ແລະ ພາສາ​ອັງກິດ ນອກຈາກ​ນັ້ນ ຍັງ​ມີ​ວິຊາ​ທີ່​ຈຳເປັນ​ທີ່​ສຸດ​ສຳລັບ​ຜູ້​ອາຍຸ​ສູງ​ນັ້ນ ກໍ​ຄື: ວິທີ​ຮັກສາ​ສຸຂະພາບ ແລະ ການ​ນຳ​ໃຊ້​ໂທລະສັບ​ມື​ຖື​ລ້ຳ​ຍຸກ ໃນ​ປັດຈຸບັນ ເພື່ອ​ໃຫ້​ຜູ້​ເຖົ້າ​ສາມາດ​ເຂົ້າ​ເຖິງ​ຄວາມ​ກ້າວໜ້າ​ຂອງ​ເຕັກ​ໂນ​ໂລ​ຊີ​ສື່ສານ​ສະໄໝ​ໃໝ່.

ຈຸດປະສົງ​ຕົ້ນຕໍ​ຂອງ​ໂຄງການ ໂຮງຮຽນ​ສຳລັບ​ພວກ​ຜູ້​ເຖົ້າ​ນັ້ນ ແມ່ນ​ເພື່ອ​ໃຫ້​ພວກ​ເພິ່ນ​ມີ​ວຽກ​ເຮັດ​ທີ່​ເປັນ​ປະ ໂຫຍດ​ໃນ​ເວລາ​ວ່າງ ແລະ ເພື່ອ​ນຳ​ໃຊ້​ຄວາມ​ສາມາດ​ຂອງ​ພວກ​ເພິ່ນ​ໃຫ້​ໄດ້​ຫຼາຍ​ທີ່​ສຸດ.

ຂ່າວ​ບອກ​ວ່າ: ການ​ຮຽນ​ການ​ສອນ​ນັ້ນ​ຈັດ​ໃສ່​ທຸກໆ​ວັນ​ພຸດ ແລະ ດຳເນີນ​ໄປ​ເປັນ​ເວລາ 4 ເດືອນ ສຳລັບ ແຕ່​ລະ​ຊຸດ ໂຄງການ​ສຶກ​ສາ​ສຳລັບ​ຜູ້​ເຖົ້າ​ນີ້ ດຳເນີນ​ມາ​ແຕ່​ປີ 2016 ໃນ​ເບື້ອງ​ຕົ້ນ ມີ​ນັກຮຽນ​ຜູ້​ເຖົ້າ​ເຂົ້າ​ຮຽນ​ຈຳນວນ 200 ຄົນ ສຳລັບ​ຊຸດ​ທີ 2 ເພີ່ມ​ຂຶ້ນ​ເປັນ 230 ຄົນ ສ່ວນ​ຊຸດ​ທີ 3 (ເລີ່ມ​ແຕ່​ທ້າຍ​ເດືອນ​ມັງກອນ 2019 ນີ້ ຈຳນວນ​ຜູ້​ເຂົ້າ​ຮ່ວມ​ເພີ່ມ​ຂຶ້ນ​ເປັນ 250 ຄົນ.

ຂ່າວ​ໄດ້​ມ້ວນທ້າຍ​ວ່າ: ໂຄງການ​ນີ້​ຈັດ​ຕັ້ງ​ຂຶ້ນ​ເພື່ອ​ຊ່ວຍ​ໃຫ້​ຄົນ​ອາຍຸ​ສູງ ມີ​ກຽດ​ສັກ​ສີ​ເປັນ​ເງົາ​ຕາມ​ຈຳນວນ ອາຍຸ​ທີ່​ເພີ່ມ​ຂຶ້ນ​ເລື້ອຍໆ.

    ທີ່​ຊູ​ແອດ: ມີ​ຂ່າວ​ສັ້ນ​ຈາກ​ປະເທດ​ຊູ​ແອັດ ວ່າ​ກົດໝາຍ​ຫ້າມ​ສູບຢາ​ໃນ​ພື້ນ​ທີ່​ສາທາລະນະ​ກາງແຈ້ງ​ຈະ​ເລີ່ມ​ມີ​ຜົນ​ສັກສິດ ນັບ​ແຕ່​ວັນ​ທີ 1 ເດືອນ​ກໍລະກົດ​ນີ້​ເປັນຕົ້ນ​ໄປ ສະຖານທີ່​ກາງແຈ້ງ​ທີ່​ວ່າ​ນັ້ນ ກວມ​ເອົາ​ເຂດ​ທີ່​ໃຫ້​ບໍລິການ​ກາງແຈ້ງ (ເດິ່ນ) ຂອງ​ຮ້ານ​ກາເຟ ຮ້ານ​ອາຫານ ສະຖານີ​ລົດເມ ສະຖານີ​ລົດໄຟ ສະໜາມ​ກີລາ ສວນ​ສາ​ທາ ລະນະ ແລະ ຕາມ​ບໍລິເວນ​ທາງ​ເຂົ້າ​ຕຶກ​ອາຄານ​ຕ່າງໆ.

 

ຂ່າວທີ່ກ່ຽວຂ້ອງ