ມວຍສາກົນລາວ ຫວັງຄວ້າຫຼຽນຄຳຊີເກມ

1.491 21 ມິ.ຖ. 2019 ວົງຈອນກີລາ
ມວຍສາກົນລາວ ຫວັງຄວ້າຫຼຽນຄຳຊີເກມ

    ທ້າວ ຄຳ​ພູ­ທອນ ຄຳ​ສະ­ທອນ ນັກ­ຊົກ­ມວຍ​ສາ­ກົນ​ທີມ​ຊາດ​ລາວ ໃຫ້​ສຳ­ພາດ​ວັນ​ທີ 18 ມິ­ຖຸ­ນາ 2019 ວ່າ: ຕະ­ຫຼອດ​ໄລ­ຍະ​ຜ່ານ​ມາ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ບັນ­ດາ​ພາກ­ສ່ວນ​ຕ່າງໆ ໂດຍ​ສະ­ເພາະ​ສະ­ຫະ­ພັນ​ມວຍ​ສາ­ກົນ​ແຫ່ງ​ຊາດ​ລາວ​ໄດ້​ສົ່ງ­ເສີມ ແລະ ໃຫ້​ໂອ­ກາດ​ຂ້າ­ພະ­ເຈົ້າ​ສົ່ງ​ເຂົ້າ​ຮ່ວມ​ເກັບ​ຕົວ​ເຝິກ­ຊ້ອມ ແລະ ແຂ່ງ­ຂັນ​ລາຍ­ການ​ຕ່າງໆ ໄດ້​ສ້າງ​ປະ­ສົບ​ການ​ໃຫ້ ມີ​ບົດ­ຮຽນ ແລະ ມີ​ຄວາມ​ສາ­ມາດ ພ້ອມ​ທັງ​ມີ​ການ​ພັດ­ທະ­ນາ​ສູງ​ຂຶ້ນ ຫຼັງ​ປະ­ສົບ​ຜົນ­ສຳ­ເລັດ​ໃນ​ການ​ເຂົ້າ​ຮ່ວມ​ແຂ່ງ­ຂັນ​ມວຍ​ສາ­ກົນ​ຊີງ​ແຊັມ​ອາ­ຊີ​ທີ່​ປະ­ເທດ​ໄທ​ເປັນ​ເຈົ້າ­ພາບ​ເມື່ອ​ບໍ່​ດົນ​ມາ​ນີ້ ໃນ​ນັ້ນ​ຜົນ­ງານ​ກໍ​ສາ­ມາດ​ເອົາ​ຊະ­ນະ​ນັກ­ກີ­ລາ​ມວຍ​ຈາກ​ຈີນ ແລະ ຊະ­ນະ​ນັກ​ມວຍ​ເນ​ປານ ຜ່ານ​ເຂົ້າ​ຮອບ 8 ຄົນ​ສຸດ​ທ້າຍ ຊີງ​ຫຼຽນ​ທອງ ແຕ່​ໜ້າ​ເສຍ­ດາຍ​ໄປ​ເສຍ​ໃຫ້​ນັກ­ກີ­ລາ​ຈາກ​ປະ­ເທດ​ອູ​ສະ​ເບັກ​ກິ​ສ​ຖານ ຕົກ​ຮອບ​ໄປ​ຕາມ​ລະ­ບຽບ.

    ຫຼັງ​ຈາກ​ນັ້ນ ບໍ່​ປະ­ສົບ​ຜົນ­ສຳ­ເລັດ​ໃນ​ງານ​ດັ່ງ­ກ່າວ ແຕ່​ກໍ​ບໍ່​ໄດ້​ເຮັດ​ໃຫ້​ຕົນ​ເອງ​ໝົດ​ກຳ­ລັງ​ໃຈ​ຍັງ​ພໍ​ມີ​ຫວັງ ທີ່​ຈະ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ອື່ນໆ ໂດຍ​ສະ­ເພາະ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ XXX ທີ່​ປະ­ເທດ​ຟີ​ລິບ​ປິນ ຮັບ​ກຽດ​ເປັນ​ເຈົ້າ­ພາບ​ໃນ​ທ້າຍ​ປີ​ນີ້ ສະ­ນັ້ນ​ຂ້າ­ພະ­ເຈົ້າ​ສືບ­ຕໍ່​ຕັ້ງ­ໃຈ​ເຝິກ­ແອບ​ໃຫ້​ໜັກ​ຂຶ້ນ​ກວ່າ​ເກົ່າ ຢູ່​ສະ­ໂມ­ສອນ​ມວຍ​ຂອງ​ກະ­ຊວງ​ປ້ອງ​ກັນ​ປະ­ເທດ ເຊິ່ງ​ມີ​ພໍ່​ທີ່​ເຄີຍ​ເປັນ​ອະ­ດີດ​ນັກ­ຊົກ­ມວຍ​ສາ ກົນ​ທີມ​ຊາດ ເປັນ​ຜູ້​ຖ່າຍ​ທອດ​ຄວາມ​ຮູ້​ຄວາມ​ສາ­ມາດ​ໃຫ້​ເນັ້ນ​ເຝິກ­ຊ້ອມ​ໃຫ້​ໄດ້​ວັນ​ລະ 3?4 ຊົ່ວ­ໂມງ ໃນ​ນັ້ນ​ໄດ້​ເຝິກ­ຊ້ອມ​ເອົາ​ພະ­ລະ​ກຳ­ລັງ ຊ້ອມ​ອອກ​ໝັດ ແລະ ຕີ​ເປົ້າ​ໝາຍ ຊ້ອມ​ໃຊ້​ສາຍ­ຕາ​ຫຼີກ​ຄູ່​ແຂ່ງ­ຂັນ ແລະ ພະ­ຍາ­ຍາມ​ຊອກ​ຫາ​ຄູ່​ແຂ່ງ­ຂັນ​ຜູ້​ມີ​ປະ­ສົບ​ການ​ເພື່ອ​ລົງ​ນວມ​ທົດ​ສອບ​ຄວາມ​ສາ­ມາດ​ຂອງ​ທຸກ​ຄັ້ງ.

    ເພື່ອ​ເປັນ​ການ​ກຽມ​ຄວາມ​ພ້ອມ​ເຂົ້າ​ຮ່ວມ​ງານ​ກີ­ລາ​ຊີ­ເກມ​ໃນ​ທ້າຍ​ປີ​ນີ້ ສະ­ຫະ­ພັນ​ມວຍ​ສາ­ກົນ​ແຫ່ງ​ຊາດ​ລາວ ຈະ​ໄດ້​ມີ​ການ​ຈັດ​ແຂ່ງ­ຂັນ ເພື່ອ​ຄັດ​ເລືອກ​ນັກ­ກີ­ລາ​ພອນ​ສະ­ຫວັນ​ດີ­ເດັ່ນ​ມາ​ຮັບ​ໃຊ້​ທີມ​ຊາດ ແລະ ຂ້າ­ພະ­ເຈົ້າ​ກໍ​ຈະ​ໄດ້​ຮ່ວມ​ຄັດ​ເລືອກ ແຕ່​ເຊື່ອ​ໝັ້ນ​ວ່າ​ຈະ​ສາ­ມາດ​ຜ່ານ​ການ​ທົດ​ສອບ​ຄັ້ງ​ນີ້​ໄດ້ ແລະ ໃນ​ຂະ­ນະ​ດຽວ​ກັນ​ກໍ​ຈະ​ບໍ່​ປະ­ໝາດ​ຢ່າງ​ເດັດ­ຂາດ ເພາະ​ຍັງ​ມີ​ນັກ​ຊົກ​ນ້ອງ​ໃໝ່​ອີກ​ຫຼາຍ​ຄົນ​ຈະ​ກ້າວ​ຂຶ້ນ​ແທນ​ໃນ​ຮຸ່ນ​ນີ້​ໄດ້ ຖ້າ​ຫາກ​ຂ້າ­ພະ­ເຈົ້າ​ໄດ້​ເປັນ​ຕົວ​ແທນ​ໃຫ້​ທີມ​ຊາດ​ໄດ້​ຕັ້ງ​ເປົ້າ​ໝາຍ​ຈະ​ສູ້​ຊົນ​ໃຫ້​ຜ່ານ​ເຂົ້າ​ຮອບ​ຊີງ​ຊະ­ນະ​ເລີດ ເພື່ອ​ຫວັງ​ສ້າງ​ປະ­ຫວັດ­ສາດ​ຄວ້າ​ຫຼຽນ​ຄຳ​ໃນ​ງານ​ຊີ­ເກມ.

ຂ່າວທີ່ກ່ຽວຂ້ອງ