ອີ-ສະປອດລາວ ສົ່ງທີມຮ່ວມແຂ່ງຂັນຊີງແຊັມອາຊຽນ

1.588 21 ມິ.ຖ. 2019 ວົງຈອນກີລາ
ອີ-ສະປອດລາວ ສົ່ງທີມຮ່ວມແຂ່ງຂັນຊີງແຊັມອາຊຽນ

    ສະ­ຫະ­ພັນ​ກີ­ລາ​ອີ-ສະ­ປອດ​ແຫ່ງ​ຊາດ​ລາວ​ສົ່ງ​ທີມ WAWA Gaming King (ຈອມ​ລາ­ຊາ) ຕົວ​ແທນ​ລາວ ປະ­ເພດ​ເກມ Mobile Legends ເຂົ້າ​ຮ່ວມ​ການ​ແຂ່ງ­ຂັນ​ກີ­ລາ​ອີ-ສະ­ປອດ ຊີງ​ແຊັມ​ອາ​ຊຽນ​ປະ­ຈຳ​ປີ 2019 (MSC 2019) ທີ່​ນະ­ຄອນ­ຫຼວງ​ມະ­ນິ­ລາ ປະ­ເທດ​ຟີ​ລິບ​ປິນ ເປັນ​ເຈົ້າ­ພາບ​ໃນ​ອາ­ທິດ​ນີ້.

    ວັນ​ທີ 17 ມິ­ຖຸ­ນາ 2019 ທີ່​ສະ­ໜາມ​ບິນ​ສາ­ກົນ​ວັດ​ໄຕ ນະ­ຄອນ­ຫຼວງ​ວຽງ​ຈັນ ທ່ານ ໂຈ​ນາ​ທານ ສີ​ຣິ​ສັກ­ດາ ປະ­ທານ​ສະ­ຫະ­ພັນ​ກິ­ລາ​ອີ?ສະ­ປອດ​ແຫ່ງ​ຊາດ​ລາວ ໄດ້​ເດີນ­ທາງ​ມາ​ໃຫ້​ກຳ­ລັງ​ໃຈ ແລະ ໂອ້​ລົມ​ນັກ­ກີ­ລາ​ທີມ WAWA Gaming King ກ່ອນ​ອອກ​ເດີນ­ທາງ​ໄປ​ເຂົ້າ​ຮ່ວມ​ການ​ແຂ່ງ­ຂັນ​ລາຍ­ການ​ດັ່ງ­ກ່າວ​ຈັດ​ຂຶ້ນ​ວັນ​ທີ 20-25 ມິ­ຖຸ­ນາ 2019 ການ​ເຂົ້າ​ຮ່ວມ​ຄັ້ງ​ນີ້​ຈະ​ລົງ​ແຂ່ງ­ຂັນ​ປະ­ເພດ​ເກມ Mobile Legends ໂດຍ​ທີມ WAWA Gaming King ປະ­ກອບ​ມີ: ທ້າວ ນິ­ຕິ​ພົນ ໄຊ​ຍະ​ວົງ​ສອນ (ຊື່​ແຂ່ງ­ຂັນ Chubby x Star) ທ້າວ ພຸດ​ຕະ​ວັນ ຈັນ​ທິ​ລາດ (ຊື່​ແຂ່ງ­ຂັນ  Prince.Kob) ທ້າວ ວັນ­ນະ​ວົງ ສີ​ລັດ­ຕະ­ນາ (ຊື່​ແຂ່ງ­ຂັນ EpzilorNz) ທ້າວ ພຸດ​ສົມ​ພອນ ບຸດ​ຕະ​ວົງ (ຊື່​ແຂ່ງ­ຂັນ AiY) ທ້າວ ໄຊ​ສົມ​ພອນ ວິ­ໄລ​ວົງ (ຊື່​ແຂ່ງ­ຂັນ Rambo) ແລະ ທ້າວ ຄ້ຳ​ຕະ­ກູນ ບຸນ​ພາ­ນິດ (ຊື່​ແຂ່ງ­ຂັນ​ແມ່ນ BiE).

    ການ​ແຂ່ງ­ຂັນ​ຄັ້ງ​ນີ້​ມີ​ທັງ​ໝົດ 12 ທີມ ຈາກ 9 ປະ­ເທດ​ເຂົ້າ​ຮ່ວມ​ຄື: ອິນ​ໂດ​ເນ​ເຊຍ ມຽນ​ມາ ແລະ ຟີ​ລິບ​ປິນ ປະ­ເທດ​ລະ 2 ທີມ ສ່ວນ​ມາ​ເລ​ເຊຍ ສິງ­ກະ­ໂປ ກຳ­ປູ­ເຈຍ ລາວ ໄທ ແລະ ຫວຽດ­ນາມ ປະ­ເທດ​ລະ 1 ທີມ ໂດຍ​ຮອບ​ທຳ​ອິດ​ຈະ​ແບ່ງ​ເປັນ 4 ກຸ່ມ ກຸ່ມ​ລະ 3 ທີມ ເຊິ່ງ​ທີມ​ຕົວ​ແທນ​ຈາກ​ລາວ​ຖືກ​ຈັດ​ຢູ່​ກຸ່ມ D ຮ່ວມ​ກັບ Onic Esport ຈາກ​ອິນ​ໂດ​ເນ​ເຊຍ ແລະ Burmese Ghouls ຈາກ​ມຽນ​ມາ.

    ສຳ­ລັບ​ຜົນ­ງານ​ຂອງ​ທີມ WAWA Gaming King ຜ່ານ​ມາ​ໄດ້​ເຂົ້າ​ຮ່ວມ​ການ​ແຂ່ງ­ຂັນ​ກີ­ລາ​ອີ-ສະ­ປອດ ທີ່​ປະ­ເທດ​ໄທ​ໃນ​ວັນ​ທີ 26 ພຶດ­ສະ­ພາ 2019 ກັບ ທີມ 100 Sopz ເຊິ່ງ​ເປັນ 2 ທີມ​ຈາກ ລາວ ສົ່ງ​ເຂົ້າ​ຮ່ວມ ຜ່ານ​ການ​ແຂ່ງ­ຂັນ​ຜົນ​ປະ­ກົດ​ວ່າ ທີມ WAWA Gaming King ສາ­ມາດ​ຄວ້າ​ແຊັມ​ໃນ​ຮອບ​ຄັດ​ເລືອກ ພ້ອມ​ຮັບ​ເງິນ​ລາ­ງວັນ 21 ລ້ານ​ກີບ ແລະ ໄດ້​ສິດ​ເຂົ້າ​ຮ່ວມ​ການ​ແຂ່ງ­ຂັນ​ຮອບ​ຕໍ່​ໄປ ເພື່ອ​ຊີງ​ເງິນ​ລາ­ງວັນ​ລວມ​ມູນ​ຄ່າ 120.000 ໂດ​ລາ​ສະ­ຫະ­ລັດ ຫຼື ປະ­ມານ 1,1 ຕື້​ກີບ.

ຂ່າວທີ່ກ່ຽວຂ້ອງ