ສະເຫຼີມສະຫຼອງວັນໄຂ້ຍຸງລາຍອາຊຽນ ແລະ ສັບປະດາປ່ອຍປາຫາງນົກຍູງ

711 25 ມິ.ຖ. 2019 ຂ່າວໜ້າ​ໜຶ່ງ
ສະເຫຼີມສະຫຼອງວັນໄຂ້ຍຸງລາຍອາຊຽນ ແລະ ສັບປະດາປ່ອຍປາຫາງນົກຍູງ

     ພະແນກສາທາລະນະສຸກ ນະຄອນຫຼວງວຽງຈັນ ຮ່ວມກັບກະຊວງສາທາລະນະສຸກ ຈັດພິທີສະເຫຼີມສະຫຼອງວັນໄຂ້ຍຸງລາຍອາຊຽນ ແລະ ວັນສັບປະດາປ່ອຍປາຫາງນົກຍູງ ວັນທີ 22 ມິຖຸນາ 2019 ທີ່ສູນການຄ້າໄອເຕັກມໍ ໂດຍເປັນປະທານຮ່ວມຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ມີບັນດາຫົວໜ້າພະແນກການອ້ອມຂ້າງ ເຈົ້າເມືອງ ຫ້ອງການສາທາລະນະສຸກ ອາສາສະໝັກປະຈຳບ້ານ 9 ຕົວເມືອງ ແລະ ອົງການຈັດຕັ້ງສາກົນກ່ຽວຂ້ອງເຂົ້າຮ່ວມ.

    ວັນໄຂ້ຍຸງລາຍອາຊຽນແມ່ນຮັບຮູ້ກັນວ່າເປັນງານປະຈຳປີຂອງທຸກໆປີ ເພື່ອຈາລຶກໃຫ້ມີການຈົດຈຳບັນດາປະເທດສະມາຊິກອາຊຽນ ໄດ້ຮັບຮູ້ເຖິງຄວາມຮ້າຍແຮງຂອງພະຍາດດັ່ງກ່າວ ແຕ່ເຖິງຢ່າງໃດກໍຕາມ ພະຍາດໄຂ້ຍຸງລາຍຍັງເປັນສິ່ງທ້າທາຍຂອງທົ່ວໂລກ ບໍ່ສະເພາະແຕ່ອາຊຽນ ແລະ ທຸກໆປີພວກເຮົາຮັບຮູ້ວ່າວັນໄຂ້ຍຸງລາຍອາຊຽນແມ່ນເພື່ອເປັນການເຕົ້າໂຮມບັນດາຜູ້ນຳທີ່ມີແຜນນະໂຍບາຍດ້ານເຕັກນິກວິຊາການ ແລະ ອຳນາດການປົກຄອງໃຫ້ມີຄວາມເປັນອັນໜຶ່ງອັນດຽວກັນໃນການແກ້ໄຂບັນຫາພະຍາດໄຂ້ຍຸງລາຍ ໃນແຕ່ລະທ້ອງຖິ່ນ ປີ 2019 ວັນໄຂ້ຍຸງລາຍອາຊຽນໄດ້ຫວນກັບຄືນມາອີກຄັ້ງໜຶ່ງ ເຊິ່ງເປັນວັນຂອງຊຸມຊົນຊາວນະຄອນຫຼວງວຽງຈັນທີ່ຈະໄດ້ພ້ອມກັນຮ່ວມແຮງຮ່ວມໃຈຕ້ານໄຂ້ຍຸງລາຍທີ່ເປັນໄພຄຸກຄາມຕໍ່ສຸຂະພາບ ແລະ ຊັບສິນຂອງປະຊາຊົນ.

    ບັນດາປະເທດອາຊຽນໄດ້ຖືເອົາພະຍາດໄຂ້ຍຸງລາຍເປັນພະຍາດບົ່ມຊ້ອນ ແລະ ເປັນພະຍາດທີ່ມີການແຜ່ກະຈາຍຢ່າງວ່ອງໄວ ຍ້ອນຍຸງລາຍເປັນຕົວນຳເຊື້ອ ດັ່ງນັ້ນ ບັນດາການນຳ ລັດຖະບານ ກໍຄື ອຳນາດການປົກຄອງແມ່ນໃຫ້້ຄວາມສຳຄັນໃນການປະຕິບັດມາດຕະການປ້ອງກັນ ແລະ ຄວບຄຸມການແຜ່ລະບາດຂອງພະຍາດໄຂ້ຍຸງລາຍ ດ້ວຍການປະຕິບັດມາດຕະການຕ່າງໆ ເພື່ອເຮັດໃຫ້ສາເຫດຂອງການເຈັບເປັນ ແລະ ການຕາຍຈາກພະຍາດໄຂ້ຍຸງລາຍໃຫ້ຫຼຸດໜ້ອຍຖອຍລົງ.

ຂ່າວທີ່ກ່ຽວຂ້ອງ