ເຈົ້າ­ແຂວງ ​ແຂວງ​ເປຣດ ສີ​ຫາ​ນຸ ລາ​ອອກ​ຈາກ​ຕຳ­ແໜ່ງ ຫຼັງ​ເກີດ​ເຫດ​ອາ­ຄານ​ພັງ​ຖະ​ຫຼົ່ມ

906 26 ມິ.ຖ. 2019 ຂ່າວຕ່າງປະເທດ
ເຈົ້າ­ແຂວງ ​ແຂວງ​ເປຣດ ສີ​ຫາ​ນຸ ລາ​ອອກ​ຈາກ​ຕຳ­ແໜ່ງ ຫຼັງ​ເກີດ​ເຫດ​ອາ­ຄານ​ພັງ​ຖະ​ຫຼົ່ມ

     ໜັງ­ສື­ພິມ ພະ­ນົມ​ເປັນ ໂພ​ສ ຂອງ​ກຳ­ປູ­ເຈຍ ແຈ້ງ​ໃຫ້​ຮູ້­ເມື່ອ​ວັນ​ທີ 24 ມິ­ຖຸ­ນາ​ນີ້​ວ່າ ນາ­ຍົກ­ລັດ­ຖະ­ມົນ­ຕີ​ກຳ­ປູ­ເຈຍ ຮຸນ​ແຊນ ໄດ້​ເຫັນ​ດີ​ກັບ​ຄຳ​ຮ້ອງ​ຂໍ​ລາ​ອອກ​ຈາກ​ຕຳ­ແໜ່ງ​ຂອງ​ທ່ານ ຢຸນ​ມິນ ເຈົ້າ­ແຂວງ ​ແຂວງ ເປຣດ ສີ​ຫາ​ນຸ ນັ້ນ­ແລ້ວ ຫຼັງ​ຈາກ​ເກີດ​ເຫດ­ການ​ອາ­ຄານ 7 ຊັ້ນ​ພັງ​ຖະ​ຫຼົ່ມ ຢູ່​ໃນ​ແຂວງ​ດັ່ງ­ກ່າວ ທີ່​ໄດ້​ສົ່ງ​ຜົນ​ໃຫ້​ມີ​ຜູ້​ເສຍ​ຊີ­ວິດ 25 ຄົນ ແລະ​ບາດ­ເຈັບ​ອີກ 24 ຄົນ.

    ນາ­ຍົກ­ລັດ­ຖະ­ມົນ­ຕີ ຮຸນ​ແຊນ ລົງ​ພິມ​ຂໍ້­ຄວາມ​ຜ່ານ​ສື່​ສັງ­ຄົມ Facebook ເມື່ອ​ວັນ​ທີ 24 ມິ­ຖຸ­ນາ​ນີ້​ວ່າ ທ່ານ​ໄດ້​ເຫັນ​ດີ ໃຫ້​ທ່ານ​ຢຸນ​ມິນ ລາ​ອອກ​ຈາກ​ຕຳ­ແໜ່ງ ພ້ອມ​ທັງ​ໃຫ້​ຮູ້​ວ່າ ທ່ານ​ພວມ​ປຶກ­ສາ​ຫາ­ລື​ກັບ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ກ່ຽວ​ກັບ​ການ​ໃຫ້​ທ່ານ ກຸກ ຈຳ​ເຣີນ ເຈົ້າ­ແຂວງ​ແຂວງ ກຳ​ປົງ​ຈາມ ເຂົ້າ​ແທນ​ທີ່​ທ່ານ ຢຸນ​ມິນ.

     ໃນ​ວັນ​ທີ 24 ມິ­ຖຸ­ນາ​ນີ້​ເຊັ່ນ​ກັນ ນາ­ຍົກ­ລັດ­ຖະ­ມົນ­ຕີ ຮຸນ​ແຊນ ໄດ້​ແຈ້ງ​ໃຫ້​ຮູ້​ເຖິງ​ການ​ປົດ​ທ່ານ ຍິມ​ວັນ​ດາ ອອກ​ຈາກ​ຕຳ­ແໜ່ງ​ຮອງ​ປະ­ທານ​ຜູ້​ທີ​ໜຶ່ງ ຂອງ​ຄະ­ນະ​ກຳ­ມະ­ການ​ແຫ່ງ​ຊາດ ກ່ຽວ​ກັບ​ການ​ຮອງ​ຮັບ​ໄພ­ພິ­ບັດ ຫຼັງ​ຈາກ​ທີ່​ທ່ານ ຍິມ​ວັນ​ດາ ຖືກ​ກ່າວ​ຫາ​ວ່າ​ຂາດ​ຄວາມ​ຮັບ­ຜິດ­ຊອບ ແລະ ​ເວົ້າ​ຂີ້​ຕົວະ ກ່ຽວ​ກັບ​ທາດ​ແທ້​ຂອງ​ກໍ­ລະ­ນີ​ເກີດ​ອຸ­ບັດ­ເຫດ​ຢູ່​ໃນ​ແຂວງ ເປຣດ ສີ​ຫາ​ນຸ ນັ້ນ.

ຂ່າວທີ່ກ່ຽວຂ້ອງ