ຮອງ​ລັດ­ຖະ­ມົນ­ຕີ​ກະ­ສິ­ກຳ ແລະ​ ຊົນ­ນະ­ບົດ​ຈີນ ໄດ້​ຮັບ​ເລືອກ​ຕັ້ງ​ເປັນ​ຜູ້­ອຳ­ນວຍ­ການ​ໃຫຍ່​ອົງ­ການ FAO

946 26 ມິ.ຖ. 2019 ຂ່າວຕ່າງປະເທດ
ຮອງ​ລັດ­ຖະ­ມົນ­ຕີ​ກະ­ສິ­ກຳ ແລະ​ ຊົນ­ນະ­ບົດ​ຈີນ ໄດ້​ຮັບ​ເລືອກ​ຕັ້ງ​ເປັນ​ຜູ້­ອຳ­ນວຍ­ການ​ໃຫຍ່​ອົງ­ການ FAO

      ໃນ​ກອງ​ປະ­ຊຸມ​ຄັ້ງ​ທີ 41 ຂອງ​ອົງ­ການ​ອາ­ຫານ ແລະ​ການ​ກະ­ເສດ​ໂລກ (FAO) ຂອງ​ອົງ­ການ​ສະ­ຫະ​ປະ­ຊາ​ຊາດ (ສປຊ) ທີ່​ຈັດ​ຂຶ້ນ​ຢູ່​ນະ­ຄອນ­ຫຼວງ​ໂຣມ ຂອງ​ປະ­ເທດ​ອີ​ຕາ​ລີ ເມື່ອ​ວັນ​ທີ 23 ມິ­ຖຸ­ນາ​ນີ້ ທ່ານ ຊະ​ວີ​ຕົງ​ຢີວ (Qu Dongyu)  ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ​ຊົນ­ນະ­ບົດ ຂອງ​ຈີນ ໄດ້​ຮັບ​ໄຊ­ຊະ­ນະ​ໃນ​ການ​ເລືອກ​ຕັ້ງ​ຮອບ​ທຳ​ອິດ ແລະ ໄດ້​ຮັບ​ເລືອກ​ຕັ້ງ​ເປັນ​ຜູ້­ອຳ­ນວຍ­ການ​ໃຫຍ່​ຊຸດ​ທີ 9 ຂອງ FAO ແລະ ກໍ​ເປັນ​ຄົນ​ຈີນ​ຜູ້​ທຳ​ອິດ​ທີ່​ໄດ້​ຮັບ​ເລືອກ​ຕັ້ງ​ເປັນ​ຜູ້­ອຳ­ນວຍ­ການ​ໃຫຍ່​ຂອງ​ອົງ­ການ​ດັ່ງ­ກ່າວ​ໃນ​ປະ­ຫວັດ­ສາດ.

        ກອງ​ປະ­ຊຸມ​ອົງ­ການ FAO ຄັ້ງ​ທີ 41 ໄດ້​ຈັດ​ຂຶ້ນ​ຢູ່​ນະ­ຄອນ­ຫຼວງ​ໂຣມ ແຕ່​ວັນ​ທີ 22-29 ມິ­ຖຸ­ນາ​ນີ້. ໃນ​ກອງ​ປະ­ຊຸມ​ດັ່ງ­ກ່າວ ໜຶ່ງ​ໃນ​ວາ­ລະ​ປະ­ຊຸມ​ທີ່​ສຳ­ຄັນ​ແມ່ນ​ບັນ­ດາ​ປະ­ເທດ​ສະ­ມາ­ຊິກ​ລົງ​ຄະ­ແນນ​ສຽງ​ແບບ​ປິດ​ລັບ ເພື່ອ​ເລືອກ​ຕັ້ງ​ຜູ້­ອຳ­ນວຍ­ການ​ໃຫຍ່​ຊຸດ​ໃໝ່. ຕອນ​ບ່າຍ​ວັນ​ທີ 23 ມິ­ຖຸ­ນາ​ນີ້ ເມື່ອ​ໄດ້​ລົງ​ຄະ­ແນນ​ສຽງ ແລະ​ໃນ​ທີ່​ສຸດ ທ່ານ​ເອນ​ໂຊ ເບ​ເນ​ສ ປະ­ທານ​ກອງ​ປະ­ຊຸມ ໄດ້​ປະ­ກາດ​ວ່າ ທ່ານ ຊະ​ວີ​ຕົງ​ຢີວ ຜູ້​ສະ­ໝັກ​ຮັບ​ເລືອກ​ຕັ້ງ​ທີ່​ມາ​ຈາກ​ປະ­ເທດ​ຈີນ ໄດ້​ຮັບ​ຄະ­ແນນ​ສຽງ​ສະ­ໜັບ­ສະ­ໜູນ 108 ສຽງ ຈາກ​ຈຳ­ນວນ 191 ສຽງ ແລະ​ໄດ້​ຮັບ​ໄຊ­ຊະ­ນະ​ໃນ​ການ​ເລືອກ​ຕັ້ງ​ໃນ​ຮອບ​ທຳ​ອິດ ກາຍ­ເປັນ​ຜູ້­ອຳ­ນວຍ­ການ​ໃຫຍ່​ອົງ­ການ FAO.

       ທ່ານ ຊະ​ວີ​ຕົງ​ຢີວ (ອາ­ຍຸ 56 ປີ) ຈະ​ເຂົ້າ​ຮັບ​ຕຳ­ແໜ່ງ​ຜູ້­ອຳ­ນວຍ­ການ​ໃຫຍ່ FAO ໃນ​ວັນ​ທີ 1 ສິງ­ຫາ​ໜ້າ​ນີ້ ແທນ​ທ່ານ ກຣາ​ເຊຍ​ໂນ ດາ ຊີ​ລວ­າ. ບຸ­ລິ­ມະ­ສິດ​ຂອງ​ທ່ານ ຊະ​ວີ​ຕົງ​ຢີວ  ໃນ­ຕໍ່­ໜ້າ​ແມ່ນ​ຈະ​ສຸມ​ໃສ່ ການ​ແກ້​ໄຂ​ສະ­ພາບ​ງົບ­ປະ­ມານ​ຂອງ FAO ທີ່​ນັບ​ມື້​ນັບ​ແຄບ​ເຂົ້າ​ນັ້ນ ພ້ອມ​ທັງ​ເພີ່ມ​ທະ­ວີ​ແນວ​ຄວາມ​ຄິດ​ລິ​ເລີ່ມ ໃນ​ການ​ພັດ­ທະ­ນາ​ກະ­ສິ­ກຳ ແລະ​ ກໍ່­ສ້າງ​ການ​ສະ­ໜອງ ສະ­ບຽງ​ອາ­ຫານ ຢູ່​ໃນ​ບັນ­ດາ​ປະ­ເທດ​ສະ­ມາ­ຊິກ ກໍ​ຄື​ຊຸກ­ຍູ້​ຄວາມ​ພະ­ຍາ­ຍາມ​ຂອງ​ທົ່ວ​ໂລກ  ກ່ຽວ​ກັບ​ການ​ລຶ­ບລ້າງ​ຄວາມ­ທຸກ​ຍາກ ປະ­ກອບ­ສ່ວນ​ຜັນ​ຂະ­ຫຍາຍ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ຂອງ ສປຊ ພາຍ​ໃນ​ປີ 2030 ໃຫ້​ສຳ­ເລັດ​ຜົນ.

ຂ່າວທີ່ກ່ຽວຂ້ອງ