ຂ່າວຫຼ້າສຸດ

ປີ 2019 ຫວຽດນາມ ສືບຕໍ່​ໃຫ້ການ​ຊ່ວຍເຫຼືອ​ລາວ 711 ຕື້​ດົງ

876 26 ມິ.ຖ. 2019 ຂ່າວໜ້າ​ໜຶ່ງ
ປີ 2019 ຫວຽດນາມ ສືບຕໍ່​ໃຫ້ການ​ຊ່ວຍເຫຼືອ​ລາວ 711 ຕື້​ດົງ

     ທ່ານ ຈິງ ດິງ ຢຸງ ຮອງ​ນາຍົກລັດຖະມົນຕີ ​ສສ ຫວຽດນາມ ພ້ອມ​ຄະນະ ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ວັນ​ທີ 24-25 ມິຖຸນາ 2019 ເພື່ອ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ຄວາມ​ສາ ມັກ​ຄີ​ແບບ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ ສອງ​ພັກ ສອງ​ລັດ ແລະ ປະຊາຊົນ​ສອງ​ຊາດ ລາວ-ຫວຽດນາມ ໃຫ້​ນັບ​ມື້​ແໜ້ນ​ແຟ້ນ​ຍິ່ງໆ​ຂຶ້ນ.

    ພິທີ​ພົບ​ປະ​ສອງ​ຝ່າຍ ຈັດ​ຂຶ້ນ​ວັນ​ທີ 24 ມິຖຸນາ 2019 ຢູ່​ຫໍ​ປະຊຸມ​ແຫ່ງ​ຊາດ ເຊິ່ງ​ຝ່າຍ​ລາວ​ນຳ​ໂດຍ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ​ສປປ ລາວ ຝ່າຍ​ຫວຽດນາມ ນຳ​ໂດຍ​ທ່ານ ຈິງ ດິງ ຢຸງ.

    ທ່ານ ສອນ​ໄຊ ສີ​ພັນ​ດອນ ໄດ້​ຕີ​ລາຄາ​ສູງ​ຕໍ່​ການ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ຂອງ​ທ່ານ ຈິງ ດິງ ຢຸງ ພ້ອມ​ຄະນະ ເຊິ່ງ​ໄດ້​ປະກອບສ່ວນ​ສຳຄັນ​ໃນ​ການ​ເພີ່ມ​ທະວີ ແລະ ເສີມ​ຂະຫຍາຍ​ມູນເຊື້ອ​ອັນ​ດີງາມ​ແຫ່ງ​ສາຍ​ພົວພັນ​ມິດຕະພາບ​ອັນ​ຍິ່ງ​ໃຫຍ່ ຄວາມ​ສາມັກຄີ​ແບບ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ​ສອງ​ພັກ ສອງ​ລັດ ແລະ ປະຊາຊົນ​ສອງ​ຊາດ ລາວ-ຫວຽດນາມ ທີ່​ມີ​ມາ​ແຕ່​ດົນ​ນານ ໃຫ້​ມີ​ຄວາມ​ແໜ້ນ​ແຟ້ນ ແລະ ມີ​ປະ​ສິດທິ​ຜົນ​ສູງ​ກວ່າ​ເກົ່າ ພ້ອມ​ນີ້ ສອງ​ຝ່າຍ​ຍັງ​ໄດ້​ຕີ​ລາຄາ​ຄືນ​ໝາກຜົນ​ການ​ຮ່ວມ​ມື ລາວ-ຫວຽດນາມ ໃນ​ໄລຍະ​ຜ່ານ​ມາ ປຶກສາ​ຫາລື​ແຜນການ​ຮ່ວມ​ມື​ໃນຕໍ່ໜ້າ ເຊິ່ງ​ການ​ພົວພັນ​ຮ່ວມ​ມື​ດ້ານ​ການເມືອງ​ແມ່ນ​ຢູ່​ໃນ​ລະດັບ​ສູງ​ສຸດ ສະແດງ​ອອກ​ການ​ນຳ​ສູງ​ສຸດ ພັກ-ລັດ​ສອງ​ປະເທດ ໄດ້​ມີ​ການ​ໄປ-ມາ​ຫາ​ສູ່​ກັນ​ຢ່າງ​ເປັນ​ປົກກະຕິ ສອງ​ຝ່າຍ​ໄດ້​ຕີ​ລາຄາ​ສູງ​ຕໍ່​ພັກ-ລັດຖະບານ​ຂອງ​ສອງ​ປະເທດ ທີ່​ໄດ້​ເອົາໃຈໃສ່​ຊຸກຍູ້​ການ​ພົວພັນ​ຮ່ວມ​ມື​ດ້ານ​ເສດຖະກິດ ໂດຍ​ສະເພາະ ການຈັດຕັ້ງ​ປະຕິບັດ​ຂໍ້​ຕົກລົງ​ການ​ຮ່ວມ​ມື​ຕ່າງໆ ໃນ​ບົດ​ບັນທຶກ​ຄວາມ​ເຂົ້າໃຈ​ຂອງ​ສອງ​ກົມ​ການເມືອງ ບົດ​ບັນທຶກ​ຂອງ​ກອງ​ປະຊຸມ ຄັ້ງ​ທີ 41 ຂອງ​ສອງ​ຄະນະ​ກຳມະການ​ຮ່ວມ​ມື ລາວ-ຫວຽດນາມ ກໍ​ຄື ຂໍ້​ຕົກລົງ​ຮ່ວມ​ມື ປະຈຳ​ປີ 2019 ແລະ ເອກະສານ​ຮ່ວມ​ມື​ອື່ນໆ​ທີ່​ສອງ​ຝ່າຍ​ໄດ້​ມີ​ການ​ຕົກລົງ​ຮ່ວມ​ກັນ.

    ດ້ານ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ ໄດ້​ສືບຕໍ່​ຮ່ວມ​ມື​ກັນ​ຢ່າງ​ແໜ້ນ​ແຟ້ນ ເພື່ອ​ປົກ​ປັກ​ຮັກສາ​ຜືນ​ແຜ່ນດິນ​ອັນ​ຄົບ​ຖ້ວນ ແລະ ແນວທາງ​ການ​ພັດທະນາ​ຂອງ​ແຕ່​ລະ​ປະເທດ ແນໃສ່​ສ້າງ​ເສັ້ນ​ຊາຍ​ແດນ​ໃຫ້​ເປັນ​ເສັ້ນ​ຊາຍ​ແດນ​ແຫ່ງ​ສັນຕິພາບ ແລະ ມີ​ການ​ພັດທະນາ​ແບບ​ຍືນ​ຍົງ ເຮັດ​ໃຫ້​ມູນ​ຄ່າ​ການ​ຄ້າ​ສອງ​ຝ່າຍ​ເພີ່ມ 13,24% ໃນ 5 ເດືອນ​ຕົ້ນ​ປີ 2019 ແລະ ໄດ້​ຊຸກຍູ້​ໃຫ້​ມີ​ການ​ຮ່ວມ​ມື​ກັນ​ຫຼາຍ​ຂຶ້ນ​ດ້ານ​ພະລັງງານ​ໄຟຟ້າ ເພື່ອ​ໃຫ້​ສາມາດ​ບັນລຸ​ໄດ້​ຕາມ​ເປົ້າ​ໝາຍ ປີ 2018 ການ​ຄ້າ​ສອງ​ຝ່າຍ ບັນລຸ​ໄດ້ 1 ຕື້​ໂດ​ລາ​ສະຫະລັດ ຫວຽດນາມ ຈັດ​ຢູ່​ອັນ​ດັບ 3 ຂອງ​ການ​ລົງທຶນ​ຕ່າງປະເທດ​ຢູ່​ລາວ ນັບ​ແຕ່​ປີ 1989 ເປັນຕົ້ນ​ມາ ມີ 413 ໂຄງການ ມູນ​ຄ່າ​ຫຼາຍ​ກວ່າ 4,1 ຕື້​ໂດ​ລາ​ສະຫະລັດ ຫວຽດນາມ​ໄດ້​ສືບຕໍ່​ໃຫ້ການ​ຊ່ວຍເຫຼືອ​ລາວ ສະເພາະ​ປີ 2019 ມີ​ມູນ​ຄ່າ 711 ຕື້​ດົງ ເຊິ່ງ​ໄດ້​ຖືກ​ນຳ​ໃຊ້​ໃນ​ການຈັດຕັ້ງ​ປະຕິບັດ​ວຽກ​ງານ​ໃນ​ໂຄງການ​ຕ່າງໆ​ຢ່າງ​ມີ​ຈຸດ​ສຸມ ຮັບປະກັນ​ຄຸນ​ນະ ພາບ ແລະ ມີ​ຄວາມ​ຄືບ​ໜ້າ ປັດຈຸບັນ​ໂຄງການ​ກໍ່ສ້າງ​ຫໍ​ສະພາ​ແຫ່ງ​ຊາດ​ລາວ​ຫຼັງ​ໃໝ່ ມູນ​ຄ່າ 111,75 ລ້ານ​ໂດ​ລາ​ສະຫະລັດ ມີ​ຄວາມ​ຄືບ​ໜ້າ​ເລື້ອຍໆ ໂຄງການ​ກໍ່ສ້າງ​ໂຮງໝໍ​ແຂວງ​ຊຽງ​ຂວາງ ແລະ ໂຮງໝໍ​ແຂວງ​ຫົວພັນ ຄາດ​ວ່າ​ຈະ​ສຳເລັດ​ໄວໆ​ນີ້ ສຳລັບ​ໂຄງການ​ກໍ່ສ້າງ​ສະໜາມ​ບິນ​ໜອງ​ຄ້າງ ຄືບ​ໜ້າ​ປະມານ 75% ແລະ ສະເໜີ​ໃຫ້​ສືບຕໍ່​ຊຸກຍູ້​ໃຫ້​ສຳເລັດ​ຕາມ​ກຳນົດ​ເວລາ.

ຂ່າວທີ່ກ່ຽວຂ້ອງ