ຈີນສ້າງ “ດວງຕາເວັນທຽມ” ຮ້ອນກວ່າດວງຕາເວັນຈິງ 6 ເທົ່າ

580 02 ກ.ລ. 2019 ຫົວຂໍ້ຂ່າວອື່ນໆ

    ສະ​ຖາ​ບັນ​ຟິ​ສິກ ແລະ ວິ­ທະ­ຍາ­ສາດ​ເມືອງ​ເຫີ​ເຟີຍ (China’s Hefei Institutes of Physical Science) ໄດ້​ເປິດ​ເຜີຍ​ຄວາມ​ສຳ­ເລັດ ໃນ​ການ​ທົດ​ລອງ​ເຕົາ​ປະ­ຕິ​ກອນ Experimental Advanced Superconducting Tokamak (EAST) ຫຼື ດວງ​ຕາ­ເວັນ​ທຽມ ຊຶ່ງ​ເປັນ​ເຕົາ​ປະ­ຕິ​ກອນ​ຟິວ​ຊັ່ນ ໂດຍ​ສາ­ມາດ​ເຮັດ​ໃຫ້​ເອ​ເລັກ​ຕຣອນ​ມີ​ອຸນ­ຫະ­ພູມ​ສູງ​ໄດ້​ເຖິງ 100 ລ້ານ​ອົງ­ສາ​ເຊ ເປັນ​ເວ­ລາ​ນານ 10 ວິ­ນາ­ທີ​ໄດ້​ເປັນ​ຄັ້ງ​ທຳ​ອິດ.

    ລາຍ​ງານ​ລະ­ບຸ​ວ່າ ເຕົາ​ປະ­ຕິ​ກອນ​ດວງ​ຕາ­ເວັນ​ທຽມ ມີ​ຂະ­ໜາດ​ຄວາມ​ສູງ 11 ແມັດ ເສັ້ນ​ຜ່າ​ສູນ​ກາງ 8 ແມັດ ແລະ ມີ​ນ້ຳ­ໜັກ​ກວ່າ 400 ໂຕນ ຕັ້ງ​ຢູ່​ໃນ​ມົນ­ທົນ​ອັນ​ຮຸຍ ສາ­ມາດ​ໃຫ້​ຄວາມ​ຮ້ອນ​ໄດ້​ສູງ​ກວ່າ​ດວງ​ຕາ­ເວັນ​ຈິງ​ທີ່​ມີ​ຄວາມ​ຮ້ອນ​ປະ­ມານ 15 ລ້ານ​ອົງ­ສາ​ເຊ ປະ­ມານ 6 ເທົ່າ.

    ທີມ​ນັກ​ວິ­ໄຈ​ໂຄງ­ການ​ດວງ​ຕາ­ເວັນ​ທຽມ ລະ­ບຸ​ວ່າ ພວກ​ເຂົາ​ຕ້ອງ­ການ​ສ້າງ​ສະ­ພາ­ວະ​ຈຳ­ລອງ​ອຸນ­ຫະ­ພູມ​ໃກ້​ແກນ​ກາງ​ດວງ​ຕາ­ເວັນ ເພື່ອ​ນຳ​ພະ­ລັງ­ງານ​ຄວາມ​ຮ້ອນ​ມາ​ໃຊ້​ປະ­ໂຫຍດ.

    ໂຄງ­ການ​ວິ­ໄຈ​ດວງ​ຕາ­ເວັນ​ທຽມ  ເປັນ​ສ່ວນ​ໜຶ່ງ​ໃນ​ຄວາມ​ພະ­ຍາ­ຍາມ​ສ້າງ​ພະ­ລັງ­ງານ​ນິວ​ເຄຼຍ​ຟິວ​ຊັ່ນ​ຂອງ​ຈີນ ຊຶ່ງ​ເປັນ​ທີ່​ມາ​ຂອງ​ພະ­ລັງ­ງານ​ຂອງ​ດວງ​ຕາ­ເວັນ ຊຶ່ງ​ຫາກ​ເຮັດ​ໄດ້​ສຳ­ເລັດ ກໍ​ຈະ​ສາ­ມາດ​ຜະ­ລິດ​ພະ­ລັງ­ງານ​ໄດ້​ຈຳ­ນວນ​ມະ­ຫາ­ສານ.

    ທ່ານ ວ່ານ ເປົ່າ​ໜຽນ ຜູ້­ອຳ­ນວຍ­ການ​ສະ​ຖາ​ບັນ​ຟິ​ສິກ ແລະ ວິ­ທະ­ຍາ­ສາດ​ເມືອງ​ເຫີ​ເຟີຍ ກ່າວ​ວ່າ: “ດວງ​ຕາ­ເວັນ​ທຽມ​ນີ້ ກໍ​ເໝືອນ​ກັບ​ເຕົາ​ອົບ ຢ່າງ­ໃດ​ກໍ​ດີ ການ​ຈະ​ສ້າງ​ພະ­ລັງ­ງານ​ຟິວ​ຊັ່ນ ຈຳ­ເປັນ​ຕ້ອງ​ເຮັດ​ໃຫ້​ເຕົາ​ປະ­ຕິ​ກອນ​ຮ້ອນ​ຂຶ້ນ ຫຼື​ເຮັດ​ໃຫ້​ລັງ­ສີ​ຄວາມ​ຮ້ອນ​ມີ​ຄວາມ​ໄວ​ຊ້າ​ລົງ”.

    ຈີນ ຊຶ່ງ​ເປັນ​ເຈົ້າ​ຕະ­ຫຼາດ​ພະ­ລັງ­ງານ​ລາຍ​ໃຫຍ່​ຂອງ​ໂລກ ກຳ­ລັງ​ຫັນ​ຈາກ “ພະ­ລັງ­ງານ​ຖ່ານ​ຫີນ” ທີ່​ຊ່ວຍ​ຂັບ​ເຄື່ອນ​ການ​ເຕີບ​ໂຕ​ທາງ​ເສດ­ຖະ­ກິດ​ມາ​ຫຼາຍ​ທົດ​ສະ​ວັດ ໄປ​ສູ່​ພະ­ລັງ­ງານ​ປະ­ເພດ​ອື່ນ​ທີ່​ສະ­ອາດ​ຫຼາຍ​ຂຶ້ນ ເນື່ອງ​ຈາກ​ຈີນ​ຕ້ອງ­ການ​ເອົາ​ຊະ­ນະ​ສົງ­ຄາມ “ມົນ​ລະ​ພິດ​ທາງ​ອາ­ກາດ” ຊຶ່ງ​ສ້າງ​ຄວາມ​ເສຍ​ຫາຍ​ຕໍ່​ສັງ­ຄົມ ແລະ ເສດ­ຖະ­ກິດ.

ຂ່າວທີ່ກ່ຽວຂ້ອງ