ແຂ່ງຂັນດອກປີກໄກ່ ແບບມີສ່ວນຮ່ວມຂອງຄົນພິການ-ຄົນບໍ່ພິການ

1.039 02 ກ.ລ. 2019 ວົງຈອນກີລາ
ແຂ່ງຂັນດອກປີກໄກ່ ແບບມີສ່ວນຮ່ວມຂອງຄົນພິການ-ຄົນບໍ່ພິການ

    ຈັດ​ກິດ­ຈະ­ກຳ​ກິ­ລາ​ດອກ​ປີກ​ໄກ່​ຄົນ​ພິ­ການ ແບບ​ເປີດ​ກວ້າງ​ການ​ມີ​ສ່ວນ​ຮ່ວມ​ຂອງ​ຄົນ​ພິ­ການ ແລະ ຄົນ​ບໍ່​ພິ­ການ ໃນ​ຄັ້ງ​ນີ້ ໄດ້​ຈັດ​ຂຶ້ນ​ໃນ​ວັນ​ທີ 27 ມີ​ຖຸ​ນາ 2019 ຜ່ານ​ມາ ທີ່​ສະ­ໜາມ​ກີ­ລາ​ດອກ​ປີກ​ໄກ່ ບຶງ​ຂະ​ຫຍອງ ໂດຍ​ມີ​ທ່ານ ສີ­ທາດ ຈັນ­ທະ​ບູ​ລີ ຫົວ­ໜ້າ​ກົມ​ກີ­ລາ​ມວນ​ຊົນ ກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ ມິດ​ສຸ​ລຸ ໂອ​ກິ​ໂຊະ ຜູ້​ຊ່ຽວ­ຊານ​ກີ­ລາ​ຄົນ​ພິ­ການ ຈາກ​ປະ­ເທດ​ຍີ່­ປຸ່ນ ແລະ ທ່ານ ສົມ​ສະ­ແຫວງ ແສງ​ສີ​ລາ​ວົງ ຮອງ​ປະ­ທານ ແລະ ເລ­ຂາ­ທິ­ການ ສະ­ຫະ​ດອກ​ປີກ​ໄກ່​ແຫ່ງ​ຊາດ ມີ​ກຳ­ມະ­ການ​ຕັດ­ສິນ ຄູ​ເຝິກ ນັກ­ກີ­ລາ ແລະ ພາກ­ສ່ວນ​ທີ່​ກ່ຽວ­ຂ້ອງ ເຂົ້າ​ຮ່ວມ

    ທ່ານ ສີ­ທາດ ຈັນ­ທະ​ບູ​ລີ ກ່າວ​ວ່າ: ສຳ­ລັບ​ການ​ຈັດ​ກິດ­ຈະ­ກຳ​ຄັ້ງ​ນີ້ ແມ່ນ​ມີ​ຄວາມ​ສຳ­ຄັນ​ຫຼາຍ ແລະ ກໍ​ເປັນ​ຄັ້ງ​ທຳ​ອິດ ທີ່​ມີ​ຄະ­ນະ​ນຳ ກຳ­ມະ­ການ​ຕັດ­ສິນ ຄູ​ເຝິກ ແລະ ນັກ­ກີ­ລາ​ຄົນ​ພິ­ການ ແລະ ຄົນ​ບໍ່​ພິ­ການ ມາ​ຈາກ​ພາກ­ສ່ວນ​ຕ່າງໆ ໄດ້​ມີ​ສ່ວນ​ຮ່ວມ​ໃນ​ການ​ເຂົ້າ​ຮ່ວມ​ກິດ­ຈະ­ກຳ ຕະ­ຫຼອດ​ໄລ­ຍະ​ເວ­ລາ​ທີ່​ຜ່ານ​ມາ ພັກ-ລັດ­ຖະ­ບານ ໄດ້​ມີ​ນະ­ໂຍ­ບາຍ​ໃນ​ການ​ສົ່ງ­ເສີມ​ຟື້ນ​ຟູ​ຈິດ­ໃຈ​ຂອງ​ຄົນ​ພິ­ການ​ລາວ ແລະ ໄດ້​ເອົາ­ໃຈ­ໃສ່​ຊຸກ­ຍູ້​ນັກ­ກີ­ລາ​ຄົນ​ພິ­ການ ໃຫ້​ມີ​ການ​ປະ­ກອບ­ສ່ວນ ເພື່ອ​ເປັນ​ການ​ພັດ­ທະ­ນາ​ທາງ​ດ້ານ​ຮ່າງ­ກາຍ ຈິດ­ໃຈ ອາ­ລົມ ແລະ ສັງ­ຄົມ.

    ທັງ​ນີ້ ກໍ​ເພື່ອ​ເປັນ​ການ​ກຽມ​ຄວາມ​ພ້ອມ​ເຂົ້າ​ຮ່ວມ​ການ​ແຂ່ງ­ຂັນ​ກີ­ລາ​ຄົນ​ພິ­ການ ທັງ​ພາຍ​ໃນ ແລະ ຕ່າງ­ປະ­ເທດ ແນ­ໃສ່​ປະ­ກອບ­ສ່ວນ​ຢ່າງ​ຕັ້ງ­ໜ້າ ເຂົ້າ​ໃນ​ການ​ພັດ­ທະ­ນາ​ກີ­ລາ-ກາຍ­ຍະ­ກຳ​ຄົນ​ພິ­ການ​ລາວ ໃຫ້​ມີ​ທ່າ​ກ້າວ​ດີ​ຂຶ້ນ​ເລື້ອຍໆ ສ້າງ​ກຽດ ແລະ ຊື່​ສຽງ​ໃຫ້​ກັບ​ປະ­ເທດ​ຊາດ ໃນ​ເວ­ທີ​ພາກ​ພື້ນ ແລະ ສາ­ກົນ ໂດຍ​ສະ­ເພາະ​ໃນ​ປີ 2018 ຜ່ານ​ມາ ທັບ​ນັກ­ກີ­ລາ​ຄົນ​ພິ­ການ​ທີມ​ຊາດ​ລາວ ໄດ້​ເຂົ້າ​ຮ່ວມ​ແຂ່ງ­ຂັນ​ໃນ​ງານ​ກີ­ລາ​ອາ​ຊຽນ ພາ​ຣາ​ເກມ ຄັ້ງ​ທີ XII ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ສາ­ມາດ​ຍາດ​ໄດ້​ຫຼຽນ​ຄຳ​ປະ­ຫວັດ­ສາດ ໃຫ້​ກັບ ສປປ ລາວ ໄດ້​ສຳ­ເລັດ.

ຂ່າວທີ່ກ່ຽວຂ້ອງ