ດາວມະຍຸລີ ຊະນະຄະແນນນັກມວຍຝຣັ່ງ

1.561 02 ກ.ລ. 2019 ວົງຈອນກີລາ
ດາວມະຍຸລີ ຊະນະຄະແນນນັກມວຍຝຣັ່ງ

    ດາວ​ມະ­ຍຸ­ລີ ຈັນ​ທິ​ລາດ ຫຼື ດີ້ ສາວ​ລາວ ຍິງ​ແກ່ນ​ຈາກ ສປປ ລາວ ແຊັມ​ໂລກ​ມວຍ​ໄທ​ອາ­ຊີບ ເມື່ອ​ກາງ​ເດືອນ​ມີ­ນາ 2019 ຜ່ານ​ມາ ກັບ​ມາ​ສ້າງ​ຜົນ­ງານ​ເດັ່ນ​ອີກ​ຄັ້ງ ໃນ​ການ​ແຂ່ງ­ຂັນ​ມວຍ​ສາ­ກົນ​ອາ­ຊີບ ລາຍ­ການ Evolution Fight Series ທີ່​ພັດ​ທະ​ຍາ ປະ­ເທດ​ໄທ ໃນ​ວັນ​ທີ 30 ມິ­ຖຸ­ນາ 2019 ເຊິ່ງ ດີ້ ສາວ​ລາວ ລົງ​ແຂ່ງ​ປະ­ເພດ​ຍິງ ຮຸ່ນ Light Flyweight 49 ກິ​ໂລ ພົບ​ກັບ Clothilde Bonnal ນັກ​ມວຍ​ຮຸ່ນ​ເອື້ອຍ ຈາກ​ຝຣັ່ງ ອາ­ຍຸ 31 ປີ ຕະ­ຫຼອດ​ການ​ແຂ່ງ­ຂັນ ດີ້ ສາວ​ລາວ ເປັນ​ຝ່າຍ​ທີ່​ອອກ​ໝັດ​ເຂົ້າ​ເປົ້າ​ກວ່າ ເອົາ​ຊະ­ນະ​ຄະ­ແນນ Clothilde Bonnal.

    ເຖິງ​ແມ່ນ​ວ່າ​ກ່ອນ​ໜ້າ​ນີ້ ໃນ​ທ້າຍ​ເດືອນ​ເມ­ສາ 2019 ຜ່ານ​ມາ ດີ້ ສາວ​ລາວ ຈະ​ຜິດ​ຫວັງ​ຕົກ​ຮອບ 8 ຄົນ​ສຸດ​ທ້າຍ ການ​ແຂ່ງ­ຂັນ​ມວຍ​ສາ­ກົນ​ນາໆຊາດ ທີ່​ບາງ­ກອກ ປະ­ເທດ​ໄທ ແຕ່​ໃນ​ວັນ​ທີ 11-15 ມີ­ນາ 2019 ດີ້ ສາວ​ລາວ ໄວ 21 ປີ ໄດ້​ສ້າງ​ຊື່​ສຽງ ແລະ ຄວາມ​ປະ​ທັບ​ໃຈ​ຈາກ​ປະ­ຊາ­ຊົນ​ລາວ ດ້ວຍ​ການ​ຄວ້າ​ແຊັມ​ໂລກ​ມວຍ​ໄທ​ອາ­ຊີບ ລາຍ­ການ​ເສິກ​ຊິງ​ແຊັມ​ມວຍ​ໄທ​ໂລກ ຄັ້ງ​ທີ 2 (The 2nd Pro-Am World Championship) ທີ່​ນະ­ຄອນ​ຣາ​ຊະ​ສີ­ມາ ປະ­ເທດ​ໄທ ເອົາ​ຊະ­ນະ​ນັອກ ນັກ​ມວຍ​ຊາວ​ເມັກ​ຊິ​ໂກ.

    ສຳ­ລັບ ດາວ​ມະ­ຍຸ­ລີ ຈັນ​ທິ​ລາດ ເປັນ​ນັກ​ມວຍ​ແບບ​ຄົບ​ເຄື່ອງ​ດ້ານ​ກີ­ລາ​ຕໍ່­ສູ້ ທັງ​ເທ​ຄວັນ​ໂດ ຄາ​ຣາ​ເຕ​ໂດ ມວຍ​ລາວ ມວຍ​ສາ­ກົນ ມວຍ​ປ້ຳ ແລະ ອື່ນໆ ເປັນ​ນັກ­ກີ­ລາ​ໜຸ່ມ​ນ້ອຍ​ທີ່​ໜ້າ​ຕິດ­ຕາມ ເພາະ​ເປັນ​ນັກ­ກີ­ລາ​ທີ່​ມີ​ລະ­ບຽບ ມີ​ຄວາມ​ມາ­ນະ​ອົດ­ທົນ​ໃນ​ການ​ເຝິກ­ຊ້ອມ ແລະ ທຸ້ມ­ເທ​ກັບ​ສິ່ງ​ທີ່​ມັກ ເຊື່ອ​ແນ່​ວ່າ​ຖ້າ​ສືບ­ຕໍ່​ຝຶກ​ຝົນ​ຫຼໍ່​ຫຼອມ​ຕົນ​ເອງ​ຕໍ່​ໄປ ແລະ ໃຫ້​ໂອ­ກາດ​ໃຫ້​ນັກ­ກີ­ລາ​ໄດ້​ມີ​ການ­ເຄື່ອນ­ໄຫວ​ຢ່າງ​ຕໍ່​ເນື່ອງ​ທັງ​ພາຍ​ໃນ ແລະ ຕ່າງ­ປະ­ເທດ ຈະ​ກາຍ­ເປັນ​ນັກ­ກີ­ລາ​ທີ່​ມີ​ຊື່​ສຽງ​ຢ່າງ​ແນ່­ນອນ.

ຂ່າວທີ່ກ່ຽວຂ້ອງ