ອາລິອັນ ສືບຕໍ່ໂຄງການ Allianz Explorer Camp 2019

1.005 03 ກ.ລ. 2019 ວົງຈອນກີລາ
ອາລິອັນ ສືບຕໍ່ໂຄງການ Allianz Explorer Camp 2019

    ພິ­ທີ​ຖະ­ແຫຼງ​ຂ່າວ​ເພື່ອ​ເປີດ​ຮັບ​ສະ­ມັກ​ເຍົາ­ວະ​ຊົນ​ລາວ ທີ່​ມີ​ອາ­ຍຸ​ລະ­ຫວ່າງ 14-16 ປີ ຈັດ​ຂຶ້ນ​ວັນ​ທີ 2 ກໍ­ລະ­ກົດ 2019 ຢູ່​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ມີ​ທ່ານ​ນາງ ກັນ­ຍາ ແກ້ວ​ມະ­ນີ ເລ­ຂາ­ທິ­ການ​ສະ­ຫະ­ພັນ​ບານ­ເຕະ​ແຫ່ງ​ຊາດ ທ່ານ ບຸນ​ຖົມ ລໍ​ມະ­ນີ ຮອງ​ຜູ້­ອຳ­ນວຍ­ການ​ບໍ­ລິ­ສັດ ອາ​ລິ​ອັນ ປະ­ກັນ​ໄພ​ລາວ ບັນ­ດາ​ວິ­ຊາ​ການ ແລະ ເຕັກ­ນິກ​ຈາກ​ສະ­ຫະ­ພັນ ແລະ ບໍ­ລິ­ສັດ ອາ​ລິ​ອັນສ໌​ປະ­ກັນ​ໄພ​ລາວ ເຂົ້າ​ຮ່ວມ.

    ທ່ານ ບຸນ​ຖົມ ລໍ​ມະ­ນີ ກ່າວ​ວ່າ: ໂຄງ­ການ Allianz Explorer Camp 2019 ເປັນ​ກິດ­ຈະ­ກຳ​ທີ່​ເປັນ​ກຸ່ມ​ບໍ­ລິ­ສັດ ອາ​ລິ​ອັນ ຈັດ​ຂຶ້ນ​ເພື່ອ​ສົ່ງ­ເສີມ​ໃຫ້​ເຍົາ­ວະ​ຊົນ​ມີ​ຄວາມ​ກ້າ​ທີ່​ຈະ​ສະ­ແຫວງ­ຫາ​ທັກ​ສະ ປະ­ສົບ​ການ​ໃໝ່ ແລະ ມີ​ຄວາມ​ໝັ້ນ​ໃຈ​ໃນ​ການ​ຄົ້ນ​ພົບ​ສິ່ງ​ທີ່​ຕົນ​ເອງ​ໄຝ່​ຝັນ ໂຄງ­ການ​ຖືກ​ຈັດ​ຂຶ້ນ​ຢ່າງ​ຕໍ່​ເນື່ອງ​ປີ​ນີ້​ເປັນ​ປີ​ທີ 11 ໂດຍ​ການ​ຮ່ວມ​ມື​ກັບ​ສະ­ໂມ­ສອນ​ບາ​ເຢີນ​ມິວ​ນິກ ເພື່ອ​ຄັດ​ເລືອກ​ເອົາ​ເຍົາ­ວະ​ຊົນ​ຄວາມ​ມັກ ແລະ ມີ​ພອນ​ສະ­ຫວັນ​ໃນ​ກີ­ລາ​ບານ­ເຕະ​ໃນ​ຂົງ­ເຂດ​ທົ່ວ​ໂລກ ທີ່​ມີ​ບໍ­ລິ­ສັດ ອາ​ລິ​ອັນ ດຳ­ເນີນ​ທຸ­ລະ​ກິດ​ຢູ່​ໄປ​ເຂົ້າ​ຄ້າຍ​ເຝິກ­ຊ້ອມ​ບານ­ເຕະ​ກັບ​ນັກ​ເຕະ ແລະ ຄູ​ເຝິກ​ຂອງ​ສະ­ໂມ­ສອນ​ບາ​ເຢີນ​ມິວ​ນີກ​ທີ່​ປະ­ເທດ​ເຢຍ​ລະ​ມັນ ແລະ ໃນ​ຂົງ­ເຂດ​ອາ­ຊີ-ປາ​ຊີ​ຟິກ ປະ­ເທດ​ທີ່​ມີ​ເຄືອ​ຂ່າຍ​ຂອງ​ກຸ່ມ​ບໍ­ລິ­ສັດ​ອາ​ລິ​ອັນ ປະ­ກອບ​ມີ: ຈີນ ອິນ​ໂດ​ເນ​ເຊຍ ມາ​ເລ​ເຊຍ ລາວ ໄທ ສິງ­ກະ­ໂປ ສີ​ລັງ­ກາ ໄຕ້​ຫວັນ ແລະ ຟີ​ລິບ​ປິນ.

    ໂຄງ­ການ​ນີ້​ຈະ​ແບ່ງ​ອອກ​ເປັນ 2 ຄ້າຍ​ເຝິກ­ຊ້ອມ​ຄື: Allianz Explorer Asia Camp 2019 ຈະ​ປະ­ກອບ​ມີ​ເຍົາ­ວະ​ຊົນ​ຈາກ​ຂົງ­ເຂດ​ປະ­ເທດ​ອາ­ຊີ-ປາ​ຊີ​ຟີກ ຈະ​ຈັດ​ຂຶ້ນ​ວັນ​ທີ 23-26 ກໍ­ລະ­ກົດ 2019 ປະ­ເທດ​ສິງ­ກະ­ໂປ ແລະ ຄ້າຍ​ເຝິກ­ຊ້ອມ Allianz Explorer Global Camp 2019 ທີ່​ຈະ​ໄດ້​ຄັດ​ເລືອກ​ເອົາ​ຜູ້​ຊະ­ນະ​ຂອງ​ແຕ່​ລະ​ປະ­ເທດ​ໃນ Asia Camp ໄປ​ຮ່ວມ​ເຂົ້າ​ເຝິກ­ຊ້ອມ​ທີ່​ເມືອງ​ມິວ​ນີກ ປະ­ເທດ​ເຢຍ​ລະ​ມັນ ໃນ​ວັນ​ທີ 22-27 ສິງ­ຫາ 2019.

    ບໍ­ລິ­ສັດ ອາ​ລິ​ອັນ ສືບ­ຕໍ່​ສານ​ຝັນ​ສຳ­ລັບ​ເຍົາ­ວະ​ຊົນ​ລາວ ໂດຍ​ຈັດ​ໃຫ້​ມີ​ໂຄງ­ການ​ອາ​ລິ​ອັນ​ຂຶ້ນ​ໃນ​ລາວ ເຊິ່ງ​ປີ​ນີ້​ເປັນ​ປີ​ທີ 3 ເປີດ​ກວ້າງ​ຮັບ​ສະ­ໝັກ​ເຍົາ­ວະ​ຊົນ​ລາວ ຜູ້​ທີ່​ມັກ​ຮັກ​ໃນ​ການ​ກີ­ລາ​ບານ­ເຕະ ທັງ​ເພດ​ຍິງ ແລະ ເພດ​ຊາຍ ຈາກ​ທົ່ວ​ປະ­ເທດ ເຂົ້າ​ທົດ​ສອບ​ສະ­ມັດ​ຕະ​ພາບ ແລະ ທັກ​ສະ​ໃນ​ການ​ເຕະ­ບານ​ຂອງ​ຕົນ​ເອງ ໃນ​ວັນ​ທີ 6 ກໍ­ລະ­ກົດ 2019 ຢູ່ ສຕລ ບ້ານ​ຫ້ວຍ​ຫົງ ເມືອງ​ຈັນ­ທະ​ບູ​ລີ ຈະ​ຄັດ​ເລືອກ​ເອົາ 2 ຄົນ​ທີ່​ຊະ­ນະ​ເລີດ​ເປັນ​ຕົວ​ແທນ​ລາວ​ເຂົ້າ​ຮ່ວມ​ໂຄງ­ການ ແລະ ພິ­ເສດ​ທີ່​ສຸດ​ແມ່ນ​ໜຶ່ງ​ໃນ​ສອງ​ຄົນ​ນີ້ ຈະ​ມີ​ໂອ­ກາດ​ໄປ​ຮ່ວມ​ຄ້າຍ​ເຝິກ­ຊ້ອມ​ກັບ​ສະ­ໂມ­ສອນ​ບາ​ເຢີນ​ມິວ​ນີກ ປະ­ເທດ​ເຢຍ​ລະ​ມັນ.

    ສຳ­ລັບ​ເງື່ອນ­ໄຂ ແລະ ລາຍ​ລະ­ອຽດ​ການ​ສະ­ໝັກ​ຜູ້​ທີ່​ມີ​ອາ­ຍຸ 14–16 ປີ ບໍ່​ຈຳ­ກັດ​ເພດ​ມີ​ສັນ­ຊາດ​ລາວ ທັກ​ສະ­ພາ​ສາ​ອັງ­ກິດ​ລະ­ດັບ​ເລີ່ມ​ຕົ້ນ ສຳ​ເນົາ​ບັດ­ປະ­ຈຳ­ຕົວ ແລະ ປື້ມ​ສຳ­ມະ­ໂນ​ຄົວ ຫຼື ເອ­ກະ­ສານ​ອື່ນໆ ທີ່​ສາ­ມາດ​ຢັ້ງ­ຢືນ​ການ​ເກີດ​ໄດ້ ຊ່ອງ​ທາງ ແລະ ວີ​ທີ​ການ​ສະ­ໝັກ​ສຳ­ລັບ​ຜູ້​ທີ່​ສົນ­ໃຈ ເຂົ້າ​ຮ່ວມ​ຄັດ​ເລືອກ​ສາ­ມາດ​ລົງ­ທະ­ບຽນ​ໄດ້​ລ່ວງ​ໜ້າ ເພື່ອ​ກວດ​ສອບ​ເອ­ກະ­ສານ​ກ່ອນ​ຜ່ານ​ທີ່​ເຟ​ສ​ບຸກ​ຂອງ​ບໍ­ລິ­ສັດ ອາ​ລິ​ອັນ​ປະ­ກັນ​ໄພ​ລາວ ໂດຍ​ພິມ @agl.allianz ຫຼື ສາ­ມາດ​ມາ​ລົງ­ທະ­ບຽນ​ມື້​ຄັດ​ເລືອກ​ເລີຍ​ກໍ​ໄດ້.

ຂ່າວທີ່ກ່ຽວຂ້ອງ