ບຸນມີ ແຕ່ກຳບັງ

    ເນື່ອງ​ຈາກ​ໄດ້​ຮັບ​ຟັງ​ຄຳ​ເຫັນ​ຈາກ​ຄົນ​ອ້ອມ​ຂ້າງ ທີ່​ຢາກ​ໃຫ້​ຂຽນ​ເລື່ອງ​ກຳ​ທີ່​ສົ່ງ​ຜົນ​ຕໍ່​ຊີ­ວິດ ທັງ​ກຳ​ດີ ແລະ ກຳ​ຊົ່ວ ຫຼື ຈະ​ເປັນ​ເວນ​ກຳ​ກໍ​ຕາມ ເຊິ່ງ​ທັງ​ໝົດ​ນັ້ນ ກໍ​ຄື ການ​ກະ­ທຳ​ທີ່​ທຸກ​ຄົນ​ບໍ່​ອາດ​ສາ­ມາດ ໜີ​ມົ້ມ​ຈາກ​ຜົນ​ກຳ​ທີ່​ຕົນ​ໄດ້​ສ້າງ​ໄວ້ ແຕ່​ຍາມ​ໃດ​ກໍ​ຕາມ​ທີ່​ກຳ​ຂອງ​ຜູ້­ກ່ຽວ​ຍັງ​ບໍ່​ສົ່ງ​ຜົນ ຄົນ​ທີ່​ສ້າງ​ກຳ​ຊົ່ວ​ກໍ​ຈະ​ດີ­ໃຈ​ວ່າ​ບາບ​ບຸນ­ຄຸນ​ໂທດ​ບໍ່​ມີ​ຈິງ.

    ພະ­ພຸດ­ທະ­ເຈົ້າ​ໄດ້​ສອນ​ໄວ້​ຢ່າງ​ກົງ​ໄປ​ກົງ​ມາ​ວ່າ: ບຸກ­ຄົນ​ຫວ່ານ​ພືດ​ເຊັ່ນ​ໃດ ຍ່ອມ​ໄດ້​ຮັບ​ຜົນ​ເຊັ່ນ​ນັ້ນ ເຊິ່ງ​ໝາຍ​ຄວາມ​ວ່າ​ເຮັດ​ດີ​ຍ່ອມ​ໄດ້​ດີ​ຄື​ຜົນ​ຂອງ​ການ​ສ້າງ​ກຳ​ດີ ກໍ​ຄື ຄວາມ­ສຸກ​ຈະ​ຕາມ​ມາ ເຊິ່ງ​ຕ່າງ​ກັບ​ຜູ້​ສ້າງ​ກຳ​ຊົ່ວ ເຊິ່ງ​ຈະ​ໄດ້­ຜົນ​ຄື ຄວາມ­ທຸກ​ທັງ​ກາຍ ແລະ ໃຈ ເຖິງ​ແມ່ນ​ວ່າ​ບາງ​ຄົນ​ຈະ​ນອນ​ຢູ່​ເຮືອນ​ຫຼັງ​ໃຫຍ່​ຂີ່​ລົດ​ຄັນ​ງາມ ແຕ່​ຊີ­ວິດ​ກໍ​ຂາດ​ຄວາມ­ສຸກ ເພາະ​ຈິດ­ໃຈ​ເປັນ​ກັງ­ວົນ​ກັບ​ພຶດ­ຕິ​ກຳ​ຊົ່ວ​ຂອງ​ຕົນ​ທີ່​ສ້າງ​ໄວ້​ກັບ​ຄົນ​ອື່ນ ຫຼື ສັງ­ຄົມ ແລະ ບາງ​ກໍ­ລະ­ນີ​ຖ້າ​ຢູ່​ໃນ​ລະ­ດັບ​ເສຍ​ຫາຍ​ໃຫຍ່​ຫຼວງ ສັງ­ຄົມ​ເຂົາ​ກໍ​ນຳ​ເອົາ​ໄປ​ຊຸບ​ຊິບ​ນິນ­ທາ ຮອດ​ຕອນ​ຍ່າງ​ເຂົ້າ​ຕະ­ຫຼາດ​ແມ່​ຄ້າ​ເຂົາ​ກໍ​ນິນ­ທາ​ກັນ ເຖິງ​ພຶດ­ຕິ​ກຳ​ສໍ້​ໂກງ ຫຼື ທຸດ­ຈະ­ລິດ... ດັ່ງ­ນັ້ນ ຈຶ່ງ​ເຫັນ​ໄດ້​ວ່າ​ເລື່ອງ​ຂອງ​ກຳ ຫຼື ກົດ​ແຫ່ງ​ກຳ​ບໍ່​ມີ​ໃຜ​ສາ­ມາດ​ໜີ​ມົ້ມ​ໄດ້ ແນ່­ນອນ​ບໍ່​ໄວ​ກໍ​ຊ້າ ຄົນ​ເຮົາ​ກໍ​ຍ່ອມ​ໄດ້​ຮັບ​ຜົນ​ຂອງ​ກຳ​ທີ່​ຕົນ​ສ້າງ​ໄວ້.

    ເວົ້າ​ເລື່ອງ​ກຳ​ຄື​ການ​ກະ­ທຳ ພຸດ​ທະ​ສາ­ສະ­ໜາ​ໄດ້​ສອນ​ໄວ້​ລະ­ອຽດ ເຊັ່ນ: ກຳ​ເກົ່າ ແລະ ກຳ​ໃຫມ່​ຄື ໝາຍ​ຄວາມ​ວ່າ​ບາງ​ຄົນ​ເກີດ​ມາ​ດີ ກຳ​ເກົ່າ​ກໍ​ດີ ແຕ່​ຊີ­ວິດ​ເລືອກ​ທາງ​ຜິດ​ຈຶ່ງ​ສ້າງ​ກຳ​ຊົ່ວ​ໃໝ່​ເກີດ​ຂຶ້ນ ແນ່­ນອນ​ຜູ້­ກ່ຽວ​ຕ້ອງ​ໄດ້​ຮັບ​ຜົນ​ຂອງ​ກຳ​ນັ້ນ ແລະ ບາງ​ຄົນ​ໃນ​ອະ­ດີດ​ເຄີຍ​ສ້າງ​ກຳ​ເກົ່າ​ບໍ່​ດີ​ໄວ້​ພໍ ຕົກ​ມາ​ຊາດ​ປັດ­ຈຸ­ບັນ ກໍ​ຍັງ​ສ້າງ​ກຳ​ຊົ່ວ​ໜັກ​ເຂົ້າ​ຕື່ມ​ອີກ ຊີ­ວິດ​ຈຶ່ງ​ໄດ້​ຮັບ​ຜົນ​ຂອງ​ກຳ​ຊົ່ວ​ນັ້ນ​ຢ່າງ​ໄວ­ວາ ເພາະ​ບຸນ​ເກົ່າ​ບໍ່​ມີ​ຈະ​ມາ​ຊ່ວຍ​ຄ້ຳ​ໜູນ​ໄວ້​ໄດ້ !.

    ບາງ​ຄົນ​ເພື່ອ​ຄວາມ­ສຸກ​ສຳ­ລານ​ໃນ​ຊີ­ວິດ ຍ່ອມ​ເຮັດ​ກຳ​ຊົ່ວ ຜິດ​ສິນ​ລະ​ທຳ ແລະ ຜິດ​ກົດ­ໝາຍ ຊີ­ວິດ​ໄດ້​ແຕ່​ຫຼົບໆ​ຊ້ອນໆ​ຢູ່​ບໍ່​ເປັນ​ສຸກ ຢ້ານ​ເຂົາ​ຈັບ​ໄດ້​ໄລ່​ທັນ ແຕ່​ບາງ​ກໍ­ລະ­ນີ​ຖືກ​ຄູ່​ກໍ­ລະ­ນີ​ຈັບ​ໄດ້​ໄລ່​ທັນ ຖືກ​ຟ້ອງ​ຮ້ອງ​ຕົກ​ຕຳ­ແໜ່ງ​ໜ້າ­ທີ່ ຫຼື ບາງ​ກໍ­ລະ­ນີ​ກໍ​ຖືກ​ຄູ່​ກໍ­ລະ­ນີ​ທຸບ​ຕີ​ແກ້­ແຄ້ນ ຈົນ​ກາຍ­ເປັນ​ການ​ລ້າງ​ແຄ້ນ​ຈອງ­ເວນ​ຈອງ​ກຳ​ກັນ​ໄປ​ກໍ​ມີ ດ້ວຍ​ເຫດ​ນີ້​ສຳ­ລັບ​ຜູ້​ທີ່​ຍັງ​ບໍ່​ເຫັນ​ຜົນ​ຂອງ​ກຳ​ຊົ່ວ​ຈຶ່ງ​ຍັງ​ຄິດ​ດີ­ໃຈ​ວ່າ: ນາ­ລົກ​ສະ­ຫວັນ​ບໍ່​ມີ​ດອກ ມີ​ແຕ່​ສຸກ​ກັບ​ທຸກ ຫຼື ລວຍ​ກັບ​ຈົນ ເຊິ່ງ​ຄິດ​ແບບ​ນັ້ນ​ເປັນ​ພຽງ​ການ​ຄິດ​ປອບ​ໃຈ​ຕົນ​ເອງ​ເທົ່າ​ນັ້ນ ເພາະ​ຖ້າ­ວ່າ​ໃຜ​ທີ່​ສ້າງ​ກຳ​ຊົ່ວ​ໄວ້​ແລ້ວ ເຖິງ​ຈະ​ບິນ​ໜີ​ກໍ​ບໍ່​ມົ້ມ ເວນ​ກຳ​ຈະ​ຕາມ​ມາ​ແນ່­ນອນ.

ດັ້ນກີບເມກ