ຂ່າວຫຼ້າສຸດ

ບູລະພາພິວັດ

3.219 05 ກ.ລ. 2019 ນານາສາລະ

    ການ​ຮູ້​ເພື່ອ​ໃຫ້​ເຂົ້າ­ໃຈ​ແຈ້ງ​ຂອງ​ແງ່​ວິ­ຊາ​ການ​ນັ້ນ​ຄື ຈື່​ໃຫ້​ແມ້ນ ເຊັ່ນ: ເຮົາ​ຈື່​ວ່າ​ໂລ­ກາ​ພິ​ວັດ​ເປັນ​ແນວ­ໃດ? ລະ­ຫວ່າງ​ຕາ­ເວັນ­ຕົກ ແລະ ຕາ­ເວັນ​ອອກ​ໃຜ​ໄດ້​ປຽບ ແລະ ເສຍ­ປຽບ ເຊັ່ນ​ດຽວ​ກັບ​ຄຳ​ວ່າ ບູ­ລະ­ພາ​ພິ​ວັດ ຄື​ການ​ປ່ຽນ­ແປງ​ຂອງ​ໂລກ​ຕາ­ເວັນ​ອອກ ເຊິ່ງ​ມີ​ນັກ­ວິ­ຊາ­ການ​ຫຼາຍ​ທ່ານ​ໄດ້​ຂຽນ​ໜັງ­ສື​ວິ­ເຄາະ​ໄວ້ ເຖິງ​ຂະ­ໜາດ​ໃຫຍ່​ຂອງ​ພູ­ມີ­ພາກ ແລະ ກຳ­ລັງ​ຂອງ​ເສດ­ຖະ­ກິດ ຫຼື ລວມ​ເຖິງ​ຈຳ­ນວນ​ຂອງ​ປະ­ຊາ­ກອນ​ທີ່​ອາ­ຊີ​ເຮົາ​ມີ​ຫຼາຍ​ກວ່າ​ຕາ­ເວັນ­ຕົກ.

    ເຖິງ​ແມ່ນ​ວ່າ​ມີ​ນັກ­ວິ­ຊາ­ການ​ຫຼາຍ​ທ່ານ ໄດ້​ປຽບ­ທຽບ​ທ່າ​ໄດ້​ປຽບ​ຂອງ​ຕາ­ເວັນ​ອອກ​ທີ່​ຈະ​ແຊງ​ໜ້າ​ຕາ­ເວັນ­ຕົກ ແຕ່​ກໍ​ຍັງ​ມີ​ບາງ​ດ້ານ​ທີ່​ຫຼາຍ​ຄົນ​ບໍ່​ຄ່ອນ​ຢິບ​ຍົກ​ຂຶ້ນ​ມາ ເວົ້າ​ແລກ­ປ່ຽນ​ກັນ​ນັ້ນ​ຄື ພູມ​ປັນ­ຍາ​ຂອງ​ຕາ­ເວັນ​ອອກ​ທີ່​ຍັງ​ບໍ່​ສາ­ມາດ​ຕ້ານ­ທານ​ອິດ​ທິ​ພົນ ຄວາມ​ຄິດ​ຂອງ​ຕາ­ເວັນ­ຕົກ ເຊິ່ງ​ເຫັນ​ໄດ້​ຈາກ​ຜູ້​ມີ​ການ​ສຶກ​ສາ​ມາ​ແຕ່​ຕ່າງ­ປະ­ເທດ ມັກ​ຈະ​ຍົກ​ເອົາ​ແຕ່​ພູມ​ປັນ­ຍາ​ຕາ­ເວັນ­ຕົກ​ມາ​ອ້າງ​ຢ່າງ​ດຽວ ແຕ່​ຂາດ​ພູມ​ປັນ­ຍາ​ທີ່​ເປັນ​ຂອງ​ບັນ­ພະ­ບຸ­ລຸດ ຫຼື ບາງ​ຄົນ​ເຖິງ​ຂະ­ໜາດ​ຫຼົງ​ຄິດ​ວ່າ ບັນ­ພະ­ບຸ­ລຸດ​ຕົນ​ບໍ່​ໄດ້​ສ້າງ​ພູມ​ປັນ­ຍາ ເນື່ອງ​ຈາກ​ສະ­ໝອງ​ທີ່​ເຂົາ​ມີ​ຖືກ​ບັນ­ຈຸ​ໃຫ້​ເຕັມ​ແຕ່​ພູມ​ປັນ­ຍາ​ຕ່າງ­ປະ­ເທດ​ດ້ານ​ດຽວ.

    ເວົ້າ​ມາ​ໃຫ້​ໃກ້​ໂຕ​ເຂົ້າ​ອີກ ກໍ​ຄື ພູມ​ປັນ­ຍາ​ຂອງ​ຊາດ​ເຮົາ​ເອງ​ທີ່​ກຳ­ລັງ​ຖືກ​ລະ­ເລີຍ ແລະ ຫຼົງ​ລືມ​ບໍ່​ໄດ້ ຄົ້ນ​ຄິດ ຫຼື ຄົ້ນ­ຄວ້າ​ໃຫ້​ເປັນ​ຮາກ​ເຫງົ້າ​ທີ່​ມາ​ຂອງ​ຕົນ ຍິ່ງ​ປັດ­ຈຸ­ບັນ​ທີ່​ກະ­ແສ​ບໍ­ລິ­ໂພກ​ນິ­ຍົມ​ຈາກ​ຕາ­ເວັນ­ຕົກ​ແຊງ​ໜ້າ​ມາ​ໄກ​ແລ້ວ ເປັນ​ຫຍັງ​ຜູ້​ຂຽນ​ຈຶ່ງ​ຢິບ​ປະ­ເດັນ​ນີ້​ຂຶ້ນ​ມາ​ຂຽນ ເພາະ­ວ່າ​ໄດ້​ຟັງ​ຄຳ​ເຫັນ​ຂອງ​ເພື່ອນ​ຜູ້​ອ່ານ​ຫຼາຍ​ທ່ານ ຢາກ​ໃຫ້​ກະ​ຕຸ້ນ​ໃຫ້​ສັງ­ຄົມ​ໄດ້​ຮັບ​ຮູ້​ເຖິງ​ຮາກ​ເຫງົ້າ​ວັດ­ທະ­ນະ­ທຳ​ຂອງ​ຕົນ ເຊັ່ນ: ພູມ​ປັນ­ຍາ​ຂອງ​ບັນ­ພະ­ບຸ­ລຸດ​ລາວ​ເຮົາ ຈະ​ຖືກ​ບັນ­ທຶກ​ໄວ້​ໃນ​ວັນ­ນະ­ຄະ­ດີ​ປະ­ຫວັດ­ສາດ ແລະ ບູ­ຮານ​ວັດ­ຖຸ​ທີ່​ຫຼາຍ​ບ່ອນ​ໄດ້​ຄົງ​ທົນ​ຖາ­ວອນ ມາ​ຮອດ​ທຸກ​ມື້​ກໍ​ຍ້ອນ​ຄວາມ​ຮູ້​ຂອງ​ບັນ­ພະ­ບຸ­ລຸດ​ນັ້ນ​ສູງ​ສົ່ງ ຕົວ­ຢ່າງ: ພູມ​ປັນ­ຍາ​ໃນ​ໜັງ­ສື​ສຽວ­ສະ­ຫວາດ ເຫວດ​ສັນ​ດອນ ສັງ​ສິນ​ໄຊ ຮີດ 12 ຄອງ 14...

    ພູມ​ປັນ­ຍາ​ທີ່​ຝັງ​ແໜ້ນ​ໃນ​ບູ­ຮານ​ວັດ­ຖຸ ເຊັ່ນ: ພະ​ທາດ­ຫຼວງ​ທີ່​ມີ​ປາ­ລະ­ມີ 30 ປະ­ການ ອ້ອມ​ທາດ​ໄວ້​ໃຫ້​ຄົນ​ລາວ​ໄດ້​ສຶກ​ສາ ຫຼື ຢູ່​ໃນ​ຕຳ­ລາ​ກໍ​ຕາມ ຖ້າ​ບໍ່​ມີ​ຜູ້​ກະ­ຕຸກ​ຊຸກ­ຍູ້ ຂາດ​ຜູ້​ເຊີດ​ຊູ ຫຼື ເຫັນ​ຄຸນ­ຄ່າ​ພຽງ​ແຕ່​ດ້ານ​ປາກ​ທ້ອງ ຄົງ​ຈະ​ບໍ່​ຕ່າງ​ຫຍັງ​ກັບ​ການ​ຖິ້ມ​ເພັດ​ໄວ້​ໃນ​ຂີ້­ຕົມ.

ຂ່າວທີ່ກ່ຽວຂ້ອງ