ຂ່າວຫຼ້າສຸດ

ຈະກວດກາຄືນລົດຕຳແໜ່ງຂັ້ນລັດຖະມົນຕີ

514 05 ກ.ລ. 2019 ຂ່າວໜ້າ​ໜຶ່ງ

    ເພື່ອ​ເຮັດ​ໃຫ້​ລາຍ​ຈ່າຍ​ງົບ­ປະ­ມານ​ຂອງ​ລັດ​ແຕ່​ລະ​ປີ​ຫຼຸດ​ໜ່ອຍ​ລົງ ເພື່ອ​ຈະ​ໄດ້​ມີ​ທຶນ­ຮອນ​ມາ​ແກ້​ໄຂ​ໜີ້​ສິນ​ທີ່​ລັດ​ຕິດ​ໜີ້ ບັນ­ດາ​ຫົວ­ໜ່ວຍ​ທຸ­ລະ​ກິດ​ທີ່​ຮັບ​ເໝົາ​ກໍ່­ສ້າງ ໂຄງ­ການ​ຂອງ​ລັດ​ສຳ­ເລັດ​ຖືກ­ຕ້ອງ​ຕາມ​ກົດ­ໝາຍ ເຊິ່ງ​ໜຶ່ງ​ໃນ​ໂຄງ­ການ​ປະ­ຢັດ​ນັ້ນ ລັດ­ຖະ­ບານ​ໄດ້​ປະ­ມູນ​ຂາຍ​ລົດ​ການ​ນຳ​ຂັ້ນ​ສູງ ແລະ ຜ່ານ​ການ­ຈັດ­ຕັ້ງ​ປະ­ຕິ­ບັດ​ສຳ­ເລັດ​ໄປ​ຂັ້ນ​ຕອນ​ໜຶ່ງ ແລະ ຍັງ​ຈະ​ສືບ­ຕໍ່​ໄປ​ເລື້ອຍໆ​ໃນ​ຂັ້ນ​ຕຳ­ແໜ່ງ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ຂັ້ນ​ວິ­ຊາ​ການ ແລະ ຂັ້ນ​ແຂວງ​ທົ່ວ​ປະ­ເທດ.

    ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ​ໃຫ້​ສຳ­ພາດ ວັນ​ທີ 28 ມິ­ຖຸ­ນາ 2019 ວ່າ: ການ­ຈັດ­ຕັ້ງ​ປະ­ຕິ­ບັດ​ການ​ປະ­ຢັດ​ຂອງ​ລັດ­ຖະ­ບານ ພວກ​ເຮົາ​ໄດ້​ເອົາ­ໃຈ­ໃສ່​ພາຍ­ຫຼັງ​ທີ່​ມີ​ຄຳ​ສັ່ງ​ຂອງ​ທ່ານ​ນາ­ຍົກ ເລກ​ທີ 09 ວ່າ​ດ້ວຍ​ການ​ປະ­ຢັດ ກໍ​ໄດ້​ມາ​ຄົ້ນ­ຄວ້າ​ປັບ­ປຸງ​ນິ­ຕິ​ກຳ​ຈຳ­ນວນ​ໜຶ່ງ ເປັນ­ຕົ້ນ ໄດ້​ສ້າງ​ນິ­ຕິ​ກຳ­ຈັດ​ຊື້​ຈັດ​ຈ້າງ​ທີ່​ປະ­ກາດ​ໃຊ້​ແລ້ວ ບົດ​ແນະ­ນຳ​ການ­ຈັດ­ຕັ້ງ​ປະ­ຕິ­ບັດ​ການ​ຈັດ​ຊື້​ຈັດ​ຈ້າງ​ວັດ­ຖຸ​ອຸ­ປະ­ກອນ​ຕ່າງໆ​ຂອງ​ລັດ ຕ້ອງ​ໄດ້​ປະ­ຕິ­ບັດ​ຕາມ​ລະ­ບຽບ​ການ ເພື່ອ​ເຮັດ​ໃຫ້​ມູນ​ຄ່າ​ໂຄງ­ການ ມູນ​ຄ່າ​ວັດ­ຖຸ​ສິ່ງ​ຂອງ​ທີ່​ເຮົາ​ຈັດ​ຊື້​ຈັດ​ຈ້າງ ມີ​ການ​ປະ­ມູນ​ມີ​ການ​ແຂ່ງ­ຂັນ​ກັນ ເຮັດ​ໃຫ້​ມີ​ລັກ­ສະ­ນະ​ໂປ່ງ​ໃສ ພາ­ໃຫ້​ສາ­ມາດ​ປະ­ຢັດ​ລາຍ​ຈ່າຍ​ຂອງ​ລັດ​ເຮົາ​ລົງ​ໄດ້ ນອກ​ນັ້ນ ຍັງ​ໄດ້​ມີ​ການ​ປັບ­ປຸງ​ກ່ຽວ​ກັບ​ການ​ກຳ­ນົດ​ໝາຍ​ການ​ໃຊ້​ຈ່າຍ​ງົບ­ປະ­ມານ ໄດ້​ປັບ­ປຸງ​ອີງ­ໃສ່​ສະ­ພາບ​ຄວາມ​ເປັນ​ຈິງ ອີງ­ໃສ່​ສະ­ພາບ​ການ​ປະ­ຢັດ​ມັດ­ທະ­ຍັດ​ຕື່ມ ໄດ້​ແນະ­ນຳ​ບັນ­ດາ​ຂະ­ແໜງ­ການ​ຢູ່​ສຳ­ນັກ­ງານ ອົງ­ການ​ຕ່າງໆ ແລະ ທ້ອງ­ຖິ່ນ​ຈັດ​ຕັ້ງ​ປະ­ຕິ­ບັດ ສຳ­ລັບ​ກະ­ຊວງ​ການ​ເງິນ​ໄດ້​ອອກ​ຄຳ​ແນະ­ນຳ ໃນ​ປີ 2019 ວ່າ​ດ້ວຍ​ການ​ປະ­ຢັດ​ລາຍ​ຈ່າຍ​ງົບ­ປະ­ມານ​ບໍ­ລິ­ຫານ​ຂອງ​ກະ­ຊວງ​ການ​ເງິນ ເພື່ອ​ໃຫ້​ມີ​ການ​ປະ­ຢັດ ແລະ ຜ່ານ​ການ­ຈັດ­ຕັ້ງ​ປະ­ຕິ­ບັດ​ຍັງ​ຢູ່​ໃນ​ສັງ​ລວມ​ຕີ​ລາ​ຢູ່ ບັນ­ຫາ​ພາ­ຫະ­ນະ​ໄດ້​ມີ​ການ​ປັບ­ປຸງ​ລົດ​ປະ­ຈຳ​ຕຳ­ແໜ່ງ​ການ​ນຳ​ຂັ້ນ​ສູງ ປະ­ເພດ 1 ປະ­ເພດ 2 ແລະ ປະ­ເພດ 3 ເລີ່ມ​ປະ­ຕິ­ບັດ​ການ​ນຳ​ຂັ້ນ​ສູງ​ລົງ​ມາ ປັດ­ຈຸ­ບັນ ທ່ານ​ນາ­ຍົກ​ໄດ້​ແຕ່ງ­ຕັ້ງ​ຄະ­ນະ​ໃຫ້​ໄປ​ກວດ­ຄືນ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ​ວ່າ ແຕ່​ລະ​ທ່ານ​ມີ​ລົດ­ຈັກ​ຄັນ ຖືກ­ຕ້ອງ​ຕາມ​ລະ­ບຽບ​ບໍ ຖ້າ​ບໍ່​ຖືກ­ຕ້ອງ ລົດ​ຄັນ​ທີ່​ເຫຼືອ​ນັ້ນ​ໃຫ້​ເອົາ​ມາ​ສົ່ງ​ຄືນ ແຕ່​ຖ້າ​ຢາກ​ໄດ້​ລົດ​ຄັນ​ນີ້​ທີ່​ໃຊ້​ມາ​ດົນ​ແລ້ວ ກໍ​ໃຫ້​ຕີ​ລາ­ຄາ​ຊື້​ເອົາ ສ່ວນ​ຂັ້ນ​ແຂວງ​ເຫັນ​ວ່າ ກວ້າງ­ຂວາງ​ຍັງ​ບໍ່​ສາ­ມາດ​ຈັດ​ຕັ້ງ​ປະ­ຕິ­ບັດ​ໄດ້​ເທື່ອ ສຳ­ລັບ​ພະ­ນັກ­ງານ​ວິ­ຊາ​ການ​ຂັ້ນ​ກົມ​ກຳ­ລັງ​ຄົ້ນ­ຄວ້າ​ຢ່າງ​ລະ­ອຽດ​ຕື່ມ.

    ນອກ​ນີ້ ປັດ­ຈຸ­ບັນ​ຍັງ​ກຳ­ລັງ​ກະ­ກຽມ​ດຳ­ລັດ​ການ​ຄຸ້ມ​ຄອງ​ລົດ​ຂອງ​ລັດ​ທົ່ວ​ໄປ ທີ່​ຈະ​ໄດ້​ຈັດ​ຕັ້ງ​ປະ­ຕິ­ບັດ​ໃນ​ມໍ່ໆ​ນີ້ ລັດ­ຖະ­ບານ​ກຳ­ລັງ​ພິ­ຈາ­ລະ­ນາ​ການ­ຈັດ­ຕັ້ງ​ປະ­ຕິ­ບັດ 8 ມາດ​ຕະ­ການ ໃນ​ການ​ຊຸກ­ຍູ້​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ​ທີ່​ນາ­ຍົກ​ໄດ້​ປະ­ກາດ​ໃຊ້ ກະ­ຊວງ​ການ​ເງິນ​ກໍ​ມີ​ສ່ວນ​ຕິດ​ພັນ​ກັບ​ຫຼາຍ​ມາດ​ຕະ­ການ ອັນ​ຕົ້ນ­ຕໍ​ແມ່ນ ການ​ປັບ­ປຸງ​ສະ­ພາບ​ແວດ​ລ້ອມ ການ​ອຳ­ນວຍ​ຄວາມ​ສະ­ດວກ​ໃຫ້​ແກ່​ຫົວ­ໜ່ວຍ​ທຸ­ລະ​ກິດ ໄດ້​ມີ​ການ​ປະ­ສານ​ສົມ­ທົບ​ກັບ​ຂະ­ແໜງ­ການ​ທີ່​ກ່ຽວ­ຂ້ອງ ເປັນ­ຕົ້ນ ຂະ­ແໜງ​ອຸດ­ສາ­ຫະ­ກຳ ແລະ ການ​ຄ້າ ໃນ​ການ​ຂຶ້ນ​ທະ­ບຽນ​ອາ­ກອນ ຂຶ້ນ​ທະ­ບຽນ​ທຸ­ລະ​ກິດ ແລະ ການ​ອອກ​ຕົວ​ເລກ​ອາ­ກອນ​ພ້ອມ​ກັນ ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ມີ​ລະ­ບົບ​ແທກ​ດິດ ເວ­ລາ​ໄປ​ຂຶ້ນ​ທະ­ບຽນ​ທຸ­ລະ​ກິດ​ຈະ​ມີ​ຕົວ​ເລກ​ປະ­ຈຳ​ຕົວ​ຂອງ​ຜູ້​ເສຍ​ອາ­ກອນ​ເລີຍ ແລະ ອື່ນໆ ທີ່​ອຳ­ນວຍ​ຄວາມ​ສະ­ດວກ ແລະ ສ້າງ​ຄວາມ​ໂປ່ງ​ໃສ​ໃຫ້​ນັກ­ທຸ­ລະ­ກິດ ບັນ­ຫາ​ພາ­ສີ​ຕ້ອງ​ໄດ້​ປັບ­ປຸງ​ການ​ອະ­ນຸ­ຍາດ​ນຳ​ເຂົ້າ​ສົ່ງ​ອອກ​ສິນ­ຄ້າ​ໃນ​ຜ່ານ​ມາ ໄດ້​ໃຊ້​ເວ­ລາ​ຍາວ​ນານ​ສົມ­ຄວນ ປັດ­ຈຸ­ບັນ ໄດ້​ແບ່ງ​ຄວາມ​ຮັບ­ຜິດ­ຊອບ​ໃຫ້​ບັນ­ດາ​ດ່ານ ກອງ​ຄຸ້ມ​ຄອງ​ພາ­ສີ​ແຕ່​ລະ​ເຂດ​ໃຫ້​ເຂົາ­ເຈົ້າ​ສາ­ມາດ​ຕົກ­ລົງ ແລະ ອະ­ນຸ­ຍາດ​ໄດ້​ຕາມ​ລະ­ບຽບ​ກົດ­ໝາຍ.

ຂ່າວທີ່ກ່ຽວຂ້ອງ