ແລ່ນ-ລານ ແລະ ປັນຈັກສີລັດ ຫວັງຫຼຽນໃນງານກີລານັກຮຽນອາຊຽນ

778 08 ກ.ລ. 2019 ວົງຈອນກີລາ
ແລ່ນ-ລານ ແລະ ປັນຈັກສີລັດ ຫວັງຫຼຽນໃນງານກີລານັກຮຽນອາຊຽນ

    ທ່ານ ບຸນ​ສຸກ ທິ​ລະ​ສັກ ຫົວ­ໜ້າ​ກົມ​ກີ­ລາ​ພະ­ລະ ແລະ ສິ­ລະ​ປະ​ສຶກ​ສາ ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ທັງ​ເປັນ​ຮອງ​ປະ­ທານ​ສະ­ຫະ­ພັນ​ກີ­ລາ​ນັກ­ຮຽນ​ສາ­ມັນ​ລາວ ໃຫ້​ສຳ­ພາດ​ວັນ​ທີ 4 ກໍ­ລະ­ກົດ 2019 ວ່າ: ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ XI ຫຼື “ASEAN School Games” ທີ່​ປະ­ເທດ​ອິນ​ໂດ​ເນ​ເຊຍ​ເປັນ​ເຈົ້າ­ພາບ ຈັດ​ຂຶ້ນ​ວັນ​ທີ 17-25 ກໍ­ລະ­ກົດ 2019 ລາວ​ເຮົາ​ຈະ​ສົ່ງ​ຄະ­ນະ​ຮັບ­ຜິດ­ຊອບ 13 ທ່ານ ຍິງ 1 ທ່ານ ຄະ­ນະ​ຄູ​ເຝິກ 15 ທ່ານ ຍິງ 3 ທ່ານ ກຳ­ມະ­ການ​ຕັດ­ສິນ 1 ທ່ານ ແລະ ນັກ­ກີ­ລາ 51 ຄົນ ຍິງ 16 ຄົນ ລວມ​ທັງ​ໝົດ 80 ຄົນ ເຂົ້າ​ຮ່ວມ​ແຂ່ງ­ຂັນ​ໃນ 5 ປະ­ເພດ ຄື: ແລ່ນ-ລານ ລອຍ­ນ້ຳ ດອກ​ປີກ​ໄກ່ ກະ­ຕໍ້ ແລະ ປັນ​ຈັກ​ສີ​ລັດ ພ້ອມ​ຕັ້ງ​ເປົ້າ​ຈະ​ພະ­ຍາ­ຍາມ​ສູ້​ຊົນ​ຍາດ​ໃຫ້​ໄດ້​ຫຼຽນ​ຫຼາຍ​ກວ່າ 5 ຄັ້ງ ໂດຍ​ກີ­ລາ​ຄວາມ​ຫວັງ​ຫຼຽນ​ແມ່ນ​ຝາກ​ໄວ້​ນຳ​ແລ່ນ-ລານ ແລະ ປັນ​ຈັກ​ສີ​ລັດ.

    ສຳ­ລັບ​ຜົນ­ງານ​ຂອງ​ນັກ­ກີ­ລາ​ນັກ­ຮຽນ​ລາວ ໃນ​ການ​ເຂົ້າ​ຮ່ວມ​ກີ­ລາ​ນັກ­ຮຽນ​ອາ​ຊຽນ 5 ຄັ້ງ ສາ­ມາດ​ຍາດ​ມາ​ໄດ້​ທັງ​ໝົດ 5 ຫຼຽນ​ເງິນ ແລະ 19 ຫຼຽນ​ທອງ ລວມ 24 ຫຼຽນ ໃນ​ນັ້ນ ຄັ້ງ​ທີ 1 ທີ່ ຫວຽດ­ນາມ ເປັນ​ເຈົ້າ­ພາບ ປີ 2014 ຍາດ​ໄດ້ 3 ຫຼຽນ​ເງິນ 5 ຫຼຽນ​ທອງ ລວມ 8 ຫຼຽນ ຈັດ​ຢູ່​ໃນ​ອັນ​ດັບ 6 ຈາກ 8 ປະ­ເທດ​ເຂົ້າ​ຮ່ວມ ຄັ້ງ​ທີ 2 ທີ່​ປະ­ເທດ​ບຣູ​ໄນ ເປັນ​ເຈົ້າ­ພາບ ປີ 2015 ຍາດ​ໄດ້ 1 ຫຼຽນ​ເງິນ ແລະ 2 ຫຼຽນ​ທອງ ລວມ 3 ຫຼຽນ ຈັດ​ຢູ່​ອັນ​ດັບ 8 ຈາກ 8 ປະ­ເທດ​ເຂົ້າ​ຮ່ວມ ຄັ້ງ​ທີ 3 ທີ່​ປະ­ເທດ​ໄທ ເປັນ​ເຈົ້າ­ພາບ ປີ 2016 ຍາດ​ໄດ້ 1 ຫຼຽນ​ເງິນ ແລະ 7 ຫຼຽນ​ທອງ ລວມ 8 ຫຼຽນ ຈັດ​ຢູ່​ອັນ​ດັບ 6 ຈາກ 8 ປະ­ເທດ​ເຂົ້າ​ຮ່ວມ ຄັ້ງ​ທີ 4 ທີ່​ປະ­ເທດ​ສິງ­ກະ­ໂປ ເປັນ​ເຈົ້າ­ພາບ ປີ 2017 ຍາດ​ໄດ້ 2 ຫຼຽນ​ທອງ ຈັດ​ຢູ່​ອັນ​ດັບ 8 ຈາກ 10 ປະ­ເທດ​ເຂົ້າ​ຮ່ວມ ຄັ້ງ​ທີ 5 ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ ປີ 2018 ຍາດ​ໄດ້ 3 ຫຼຽນ​ທອງ ຈັດ​ຢູ່​ອັນ​ດັບ 8 ຈາກ 10 ປະ­ເທດ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ