ທາງອອກທີ່ດີງາມ

    ເຄີຍ​ຂຽນ​ເລື່ອງ​ສື່​ສັງ­ຄົມ​ອອນ​ລາຍ​ມາ​ຫຼາຍ​ບົດ​ແລ້ວ ຂຽນ​ມາ​ແຕ່​ປີ 2014 ພຸ້ນ ໂດຍ​ຍົກ​ໃຫ້​ເຫັນ​ອັນ​ດີ ແລະ ອັນ​ອ່ອນ ກໍ​ຄື ໄພ​ອັນ­ຕະ­ລາຍ​ຈະ​ຕາມ​ມາ ຖ້າ​ບໍ່​ມີ​ການ​ຄຸ້ມ​ຄອງ ແລະ ເຂົ້າ​ສູ່​ລະ­ບຽບ​ກົດ­ໝາຍ ບັນ­ຫາ​ນີ້​ມີ​ທົ່ວ​ໂລກ ປະ­ເທດ​ໃຫຍ່ໆ​ກໍ​ມີ​ມາດ​ຕະ­ການ ເຊັ່ນ: ປະ­ເທດ​ສະ­ຫະ­ລັດ​ອາ​ເມ​ຣິ​ກາ ຖ້າ​ໃຜ​ຊິ​ວີ​ຊາ​ເຂົ້າ​ປະ­ເທດ​ເພິ່ນ​ຕ້ອງ​ແຈ້ງ​ໃຫ້​ຮູ້​ກ່ຽວ​ກັບ​ການ​ນຳ​ໃຊ້​ສື່​ອອນ​ລາຍ ໂດຍ​ສະ­ເພາະ ແມ່ນ Face Book ໃຫ້​ເພິ່ນ​ຮູ້​ໃນ​ໄລ­ຍະ 5 ປີ ຜ່ານ​ມາ ຢູ່​ປະ­ເທດ​ຣັດ​ເຊຍ​ໃຜ​ເຜີຍ­ແຜ່​ຂໍ້​ມູນ​ເປັນ​ຂ່າວ​ປອມ​ຈະ​ຖືກ​ປັບ​ໃໝ​ມູນ​ຄ່າ​ສູງ ປະ­ເທດ​ໃກ້​ຄຽງ​ເຮົາ​ເຊັ່ນ: ປະ­ເທດ​ໄທ ກໍ​ມີ​ຂ່າວ​ຟ້ອງ​ກັນ​ຂຶ້ນ​ໂຮງ​ຂຶ້ນ​ສານ​ບໍ່​ໜ້ອຍ​ຄະ­ດີ.

    ຢູ່​ປະ­ເທດ​ເຮົາ​ກໍ​ຕ້ອງ​ຍອມ­ຮັບ​ວ່າ​ມີ​ກໍ­ລະ­ນີ​ເກີດ​ຂຶ້ນ​ຄື​ເລົ່າ​ມາ​ຂ້າງ​ເທິງ​ເຊັ່ນ​ກັນ​ນັ້ນ​ຄື ເຈົ້າ​ໜ້າ­ທີ່​ເພິ່ນ​ຮຽກ­ຮ້ອງ​ໃຫ້​ລົງ­ທະ­ບຽນ​ຢ່າງ​ຖືກ­ຕ້ອງ​ຕາມ​ກົດ­ໝາຍ ໂດຍ​ສະ­ເພາະ ແມ່ນ​ຜູ້​ມີ­ໜ້າ​ອອນ​ລາຍ​ໃນ​ເຟ​ສ​ບຸກ​ທີ່​ມັກ​ສະ­ເໜີ​ຂ່າວ​ຕ່າງໆ​ຄື​ສຳ­ນັກ­ງານ​ຂ່າວ.

    ອີງ​ຕາມ​ແຫຼ່ງ​ຂ່າວ​ຈາກ ຂປລ ໃນ​ວັນ​ທີ 28/6/2019 ໃຫ້​ຮູ້​ວ່າ: (ຂປລ) ທ່ານ ປິ່ນ​ປາດ​ຖະ​ໜາ ພັນ­ທະ​ມາ­ລີ ຫົວ­ໜ້າ​ກົມ​ສື່​ມວນ​ຊົນ​ໄດ້​ແຈ້ງ​ໃຫ້​ສຳ­ນັກ​ຂ່າວ­ສານ​ປະ­ເທດ​ລາວ ຊາບ​ວ່າ: ບຸກ­ຄົນ ນິ­ຕິ­ບຸກ­ຄົນ ແລະ ການ­ຈັດ­ຕັ້ງ​ຕ່າງໆ​ທີ່​ຈະ​ມີ​ການ­ເຄື່ອນ­ໄຫວ​ສະ­ໜອງ ເຜີຍ­ແຜ່ ໂຄ­ສະ­ນາ ຂໍ້​ມູນ​ຂ່າວ­ສານ​ດ້ານ​ຕ່າງໆ (ຫຼື​ເອີ້ນ​ວ່າ ການ­ເຄື່ອນ­ໄຫວ​ວຽກ​ງານ​ສື່​ມວນ​ຊົນ) ໃຫ້​ແກ່​ມວນ​ຊົນ​ທັງ​ພາຍ​ໃນ ແລະ ຕ່າງ­ປະ­ເທດ ຜ່ານ​ພາ­ຫະ­ນະ​ສື່​ມວນ​ຊົນ​ທຸກ​ປະ­ເພດ (ລວມ​ທັງ​ສື່​ອອນ​ລາຍ​ທຸກ​ປະ­ເພດ) ຕ້ອງ​ໄດ້​ຮັບ​ອະ­ນຸ­ຍາດ​ຈາກ​ອົງ­ການ​ຄຸ້ມ​ຄອງ​ສື່​ມວນ​ຊົນ​ຈຶ່ງ​ເຄື່ອນ​ໄຫວ​ໄດ້.

    ຕໍ່​ວຽກ​ງານ​ສື່​ມວນ​ຊົນ​ນີ້ ລັດ­ຖະ­ບານ ແຫ່ງ ສປປ ລາວ ຄຸ້ມ​ຄອງ​ສື່​ມວນ​ຊົນ​ຢ່າງ​ລວມ​ສູນ ແລະ ເປັນ​ເອ­ກະ​ພາບ​ໃນ​ຂອບ​ເຂດ​ທົ່ວ​ປະ­ເທດ ໂດຍ​ມອບ​ໃຫ້​ກະ­ຊວງ ຖວ​ທ (ເຊິ່ງ​ມີ​ກົມ​ສື່​ມວນ​ຊົນ​ເປັນ​ເສ­ນາ​ທິ​ການ) ຮັບ­ຜິດ­ຊອບ​ໂດຍ​ກົງ ແລະ ເປັນ​ເຈົ້າ​ການ​ປະ­ສານ​ສົມ­ທົບ​ກັບ​ບັນ­ດາ​ກະ­ຊວງ ຂະ­ແໜງ​ອື່ນ ແລະ ອົງ­ການ​ປົກ­ຄອງ​ທ້ອງ­ຖິ່ນ.

    ໃນ​ວັນ​ທີ 27 ມິ­ຖຸ­ນາ 2019 ຜ່ານ​ມາ​ນີ້ ສຳ­ນັກ​ຂ່າວ­ສານ​ປະ­ເທດ​ລາວ ໄດ້​ອອກ​ຂ່າວ​ກ່ຽວ​ກັບ​ເຈົ້າ​ໜ້າ­ທີ່​ກົມ​ປະ­ຊາ­ສຳ­ພັນ ຫ້ອງ­ການ ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ແຈ້ງ​ໃຫ້​ຊາບ​ວ່າ: ໜ້າ​ຂ່າວ​ອອນ​ລາຍ​ໃນ​ເຟ​ສ​ບຸກ (Face Book) ທີ່​ໃສ່​ນາມ​ຕົນ​ເອງ​ວ່າ “Support Prime Minister Thongloun Sisoulith” ແມ່ນ​ບໍ່​ມີ​ສ່ວນ​ກ່ຽວ­ຂ້ອງ​ກັບ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ແຕ່​ປະ­ການ​ໃດ ໜ້າ​ຂ່າວ​ອອນ​ລາຍ Face Book ນີ້​ເຄື່ອນ​ໄຫວ​ໂດຍ​ບໍ່​ໄດ້​ຮັບ​ອະ­ນຸ­ຍາດ​ຢ່າງ​ຖືກ­ຕ້ອງ​ຕໍ່​ບັນ­ຫາ​ດັ່ງ­ກ່າວ​ນີ້ ທ່ານ ປິ່ນ​ປາດ​ຖະ​ໜາ ພັນ­ທະ​ມາ­ລີ ຫົວ­ໜ້າ​ກົມ​ສື່​ມວນ​ຊົນ ໃນ​ຖາ­ນະ​ຜູ້​ຄຸ້ມ​ຄອງ​ວຽກ​ງານ​ຖະ­ແຫຼງ​ຂ່າວ ແລະ ສື່​ມວນ​ຊົນ​ຂອງ​ກະ­ຊວງ ຖວ​ທ ໄດ້​ມີ​ຄຳ​ເຫັນ​ວ່າ: ຕາມ​ກົດ­ໝາຍ​ວ່າ​ດ້ວຍ​ສື່​ມວນ​ຊົນ (ສະ­ບັບ​ປັບ­ປຸງ) ປີ 2016 ໄດ້​ລະ­ບຸ​ຈະ­ແຈ້ງ ໃນ​ມາດ­ຕາ​ທີ 15 ວ່າ ພາ­ຫະ­ນະ​ສື່​ມວນ​ຊົນ​ມີ​ສອງ​ປະ­ເພດ ຄື: ສື່​ສິ່ງ​ພິມ ແລະ ສື່​ເອ​ເລັກ​ໂຕຣ​ນິກ ສ່ວນ​ສື່​ເອ​ເລັກ​ໂຕຣ​ນິກ ປະ­ກອບ​ມີ ວິ­ທະ­ຍຸ​ກະ­ຈາຍ­ສຽງ ໂທລະ­ພາບ ໂທລະ​ໂຄ່ງ ແລະ ສື່​ແບບ​ໃໝ່ (ເວບ​ໄຊ ເວບ​ເພດ ຫຼື ສື່​ອອນ​ລາຍ​ຕ່າງໆ).

    ຜ່ານ​ມາ​ໄດ້​ມີ​ການ­ຈັດ­ຕັ້ງ​ຕ່າງໆ ບຸກ­ຄົນ ແລະ ນິ­ຕິ­ບຸກ­ຄົນ ໄດ້​ສະ­ເໜີ​ສ້າງ­ຕັ້ງ​ສື່​ສິ່ງ​ພິມ ແລະ ສື່​ເອ​ເລັກ​ໂຕຣ​ນິກ ໃນ​ນັ້ນ ມີ​ທັງ​ເວບ​ໄຊ ເວບ​ເພດ ແລະ ສື່​ອອນ​ລາຍ​ປະ­ເພດ​ຕ່າງໆ ເຊັ່ນ: muan.la lao economic daily ແລະ ອື່ນໆ ເຊິ່ງ​ໄດ້​ເຄື່ອນ​ໄຫວ​ເຜີຍ­ແຜ່​ຂໍ້​ມູນ​ຂ່າວ­ສານ​ກ່ຽວ​ກັບ​ແນວ­ທາງ​ນະ­ໂຍ­ບາຍ ກົດ­ໝາຍ ແລະ ລະ­ບຽບ​ການ ຜົນ­ງານ​ການ​ສ້າງ­ສາ​ພັດ­ທະ­ນາ ແລະ ປົກ​ປັກ​ຮັກ​ປະ­ເທດ​ຊາດ ສ່ອງ​ແສງ​ວຽກ​ດີ​ຄົນ​ເດັ່ນ ທັງ​ເປີດ​ເວ­ທີ​ແລກ­ປ່ຽນ​ຄຳ​ຄິດ ຄຳ​ເຫັນ​ຂອງ​ມວນ​ຊົນ ແລະ ອື່ນໆ ແຕ່​ໃນ​ຂະ­ນະ​ດຽວ​ກັນ​ນີ້ ກໍ​ຍັງ​ມີ ເວບ​ໄຊ ເວບ​ເພດ ແລະ ສື່​ອອນ​ລາຍ​ຈຳ­ນວນ​ໜຶ່ງ ເຄື່ອນ​ໄຫວ​ເຜີຍ­ແຜ່​ຂໍ້​ມູນ​ຂ່າວ­ສານ​ໃຫ້​ມວນ​ຊົນ ໂດຍ​ບໍ່​ໄດ້​ຮັບ​ອະ­ນຸ­ຍາດ​ຢ່າງ​ຖືກ­ຕ້ອງ​ຕາມ​ກົດ­ໝາຍ ຍິ່ງ​ໄປ​ກວ່າ​ນັ້ນ ຍັງ​ມີ​ສື່​ອອນ​ລາຍ​ຈຳ­ນວນ​ບໍ່​ໜ້ອຍ​ໄດ້​ເຜີຍ­ແຜ່​ຂ່າວ​ປອມ ຂ່າວ​ປັ້ນ​ແຕ່ງ​ຂຶ້ນ ຂ່າວ​ຫຼອກ​ລວງ ຂ່າວ​ບິດ​ເບືອນ​ຄວາມ​ຈິງ ຂ່າວ​ລື ຂ່າວ​ອະ­ກຸ­ສົນ ຂ່າວ​ສຽດ​ສີ​ໃສ່​ຮ້າຍ​ປ້າຍ​ສີ​ຕ່າງໆ​ນາໆ ອັນ​ໄດ້​ສ້າງ​ຄວາມ​ເສຍ​ຫາຍ​ໃຫ້​ແກ່​ບຸກ­ຄົນ ນິ­ຕິ­ບຸກ­ຄົນ ແລະ ການ­ຈັດ­ຕັ້ງ​ຕ່າງໆ ທັງ​ສ້າງ​ຄວາມ​ສັບ­ສົນ​ໃນ​ສັງ­ຄົມ.

    ທ່ານ​ກ່າວ​ຢ້ຳ​ໃນ​ຕອນ​ທ້າຍ​ວ່າ: ສະ­ນັ້ນ ເພື່ອ​ສົ່ງ­ເສີມ​ບົດ­ບາດ​ຂອງ​ສື່​ມວນ​ຊົນ ແລະ ສະ­ກັດ​ກັ້ນ​ປາ­ກົດ­ການ​ຫຍໍ້­ທໍ້​ທີ່​ເກີດ​ຜ່ານ​ມາ ຈຶ່ງ​ຮຽກ­ຮ້ອງ​ໃຫ້​ບຸກ­ຄົນ ນິ­ຕິ­ບຸກ­ຄົນ ແລະ ການ­ຈັດ­ຕັ້ງ​ທີ່​ໄດ້​ເຄື່ອນ ໄຫວ​ວຽກ​ງານ​ສື່​ມວນ​ຊົນ​ທີ່​ບໍ່​ຖືກ­ຕ້ອງ​ຕາມ​ກົດ­ໝາຍ ຈົ່ງ​ໄດ້​ຮີບ​ຮ້ອນ​ມາ​ສະ­ເໜີ​ຂໍ­ອະ­ນຸ­ຍາດ​ເຄື່ອນ​ໄຫວ​ຕາມ​ກົດ­ໝາຍ ແລະ ລະ­ບຽບ​ການ​ຢູ່​ທີ່​ກົມ​ສື່​ມວນ​ຊົນ ກະ­ຊວງ ຖວ​ທ ສ່ວນ​ບຸກ­ຄົນ ແລະ ການ­ຈັດ­ຕັ້ງ​ທີ່­ຢູ່​ທ້ອງ­ຖິ່ນ​ກໍ​ໃຫ້​ພົວ­ພັນ​ກັບ​ພະ​ແນກ ຖວ​ທ ແຂວງ ແລະ ນະ­ຄອນ­ຫຼວງ.

    ສະ­ນັ້ນ ຜູ້​ເຄື່ອນ​ໄຫວ​ກໍ​ຄວນ​ປະ­ຕິ­ບັດ​ຕາມ​ເພິ່ນ ເຂົ້າ​ໄປ​ພົວ­ພັນ​ແຈ້ງ ແລະ ອະ­ທິ­ບາຍ​ບັນ­ຫາ​ຈະ​ດີ​ທີ່​ສຸດ...ຫາກ​ຍັງ​ເຄື່ອນ​ໄຫວ​ດ້ວຍ​ການ​ລົງ​ພິມ​ຂ່າວ​ຢູ່​ຕໍ່​ໄປ ແນ່­ນອນ​ການ­ຈັດ­ຕັ້ງ​ເພິ່ນ​ກໍ​ຈະ​ມີ​ມາດ​ຕະ­ການ​ອື່ນ​ຕາມ​ລະ­ບຽບ​ກົດ­ໝາຍ ໝົດ​ທຸກ​ຄົນ​ໃນ​ສັງ­ຄົມ​ຕ້ອງ​ຢູ່​ພາຍ​ໃຕ້​ກົດ­ໝາຍ​ນໍ ?.

    ຂໍ​ໃຫ້​ເຂົ້າ­ໃຈ​ວ່າ ເພິ່ນ​ຮຽກ­ຮ້ອງ​ໃຫ້​ໄປ​ລົງ ທະ­ບຽນ ບໍ່​ແມ່ນ​ເພິ່ນ​ສັ່ງ​ປິດ... ຫາກ​ມີ​ການ­ເຄື່ອນ­ໄຫວ​ສ້າງ​ກະ­ແສ​ວ່າ ຖືກ​ສັ່ງ​ປິດ​ນັ້ນ ມັນ​ຈະ​ລາມ​ປາມ​ໄປ​ເປັນ​ເລື່ອງ​ໃໝ່​ເນີ ! ຂໍ​ສະ­ເໜີ​ແລກ­ປ່ຽນ.