ນວ ສືບຕໍ່ແກ້ໄຂຄົນຕ່າງປະເທດທີ່ມາເຄື່ອນໄຫວບໍ່ຖືກຕ້ອງ

144 08 ກ.ລ. 2019 ຂ່າວໜ້າ​ໜຶ່ງ

    ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນະ­ຄອນ­ຫຼວງ​ວຽງ​ຈັນ (ນວ) ຈັດ​ກອງ​ປະ­ຊຸມ​ການ­ຈັດ­ຕັ້ງ​ປະ­ຕິ­ບັດ​ແກ້​ໄຂ​ຄົນ​ຕ່າງ­ປະ­ເທດ ທີ່​ມາ​ເຄື່ອນ​ໄຫວ​ວຽກ​ງານ​ບໍ່​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ​ຢູ່ ນວ ຂຶ້ນ​ວັນ​ທີ 5 ກໍ­ລະ­ກົດ 2019 ເປັນ​ປະ­ທານ​ຂອງ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ມີ​ກອງ​ບັນ­ຊາ​ການ ປກສ ນວ ຫົວ­ໜ້າ​ຫ້ອງ­ການ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ແລະ ຮອງ​ເຈົ້າ­ເມືອງ ຜູ້​ຊີ້​ນຳ​ວຽກ​ງານ​ວັດ­ທະ­ນະ­ທຳ-ສັງ­ຄົມ 9 ເມືອງ ແລະ ພະ­ແນກ­ການ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ລຳ​ພອຍ ສີ​ອັກ​ຄະ​ຈັນ ຫົວ­ໜ້າ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນວ ໄດ້​ຜ່ານ​ບົດ​ສະ­ຫຼຸບ​ການ​ຂຶ້ນ​ທະ­ບຽນ ແລະ ອອກ​ບັດ​ອະ­ນຸ­ຍາດ​ເຄື່ອນ​ໄຫວ​ຊົ່ວ­ຄາວ​ໃຫ້​ຄົນ​ຕ່າງ­ປະ­ເທດ​ທີ່​ມາ​ເຄື່ອນ​ໄຫວ​ບໍ່​ຖືກ­ຕ້ອງ​ຢູ່ ນວ ວ່າ: ຜ່ານ​ມາ​ພະ​ແນກ​ໄດ້​ຈັດ​ຕັ້ງ​ປະ­ຕິ­ບັດ​ຕາມ​ຄຳ​ສັ່ງ​ຂອງ​ນາ­ຍົກ­ລັດ­ຖະ­ມົນ­ຕີ ແລະ ແຈ້ງ​ການ​ຂອງ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ເຊິ່ງ​ການ​ແກ້​ໄຂ​ໄລ­ຍະ​ຜ່ານ​ມາ ໄດ້​ແບ່ງ​ອອກ​ເປັນ 2 ໄລ­ຍະ ຄື: ໄລ­ຍະ​ທີ 1 ແຕ່​ວັນ​ທີ 14 ກໍ­ລະ­ກົດ-12 ກັນ­ຍາ 2016 ແລະ ໄລ­ຍະ​ທີ 2 ແຕ່​ວັນ​ທີ 1 ກັນ­ຍາ-30 ພະ­ຈິກ 2017 ສາ­ມາດ​ຂຶ້ນ​ທະ­ບຽນ ແລະ ອອກ​ບັດ​ອະ­ນຸ­ຍາດ​ເຄື່ອນ​ໄຫວ​ຊົ່ວ­ຄາວ ໃຫ້​ຄົນ​ຕ່າງ­ປະ­ເທດ​ທີ່​ມາ​ເຄື່ອນ​ໄຫວ​ບໍ່​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ​ຢູ່ ນວ ຄື: ຈຳ­ນວນ​ອອກ​ບັດ​ທັງ​ໝົດ 6.671 ຄົນ ຍິງ 4.370 ຄົນ ປັບ​ສະ­ຖາ­ນະ​ພາບ 875 ຄົນ ຊຳ­ລະ​ສະ​ສາງ 5.796 ຄົນ ເຊິ່ງ​ການ​ແບ່ງ​ຕົວ​ເລກ​ໃນ​ການ​ຕິດ­ຕາມ​ເຄື່ອນ​ໄຫວ​ຂອງ​ຄົນ​ຕ່າງ­ປະ­ເທດ ທີ່​ມາ​ເຄື່ອນ​ໄຫວ​ບໍ່​ຖືກ­ຕ້ອງ​ໃຫ້​ບັນ­ດາ​ຂະ­ແໜງ­ການ​ກ່ຽວ­ຂ້ອງ ໃນ​ນີ້ ຜູ້​ອອກ­ແຮງ​ງານ​ທີ່​ມີ​ນາຍ​ຈ້າງ​ມອບ​ໃຫ້​ຂະ­ແໜງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ 3.354 ຄົນ ຜູ້​ເລ້​ລ້ອນ​ຂາຍ­ເຄື່ອງ ເຮັດ​ວຽກ​ແບບ​ບໍ່​ມີ​ນາຍ​ຈ້າງ ມອບ​ໃຫ້​ຂະ­ແໜງ​ປ້ອງ​ກັນ​ຄວາມ​ສະ­ຫງົບ 595 ຄົນ ແລະ ຜູ້​ຄ້າ­ຂາຍ​ລົງ­ທຶນ​ທີ່​ມີ​ຮ້ານ​ຄ້າ ຮ້ານ​ຂາຍ­ເຄື່ອງ ແລະ ອື່ນໆ ມອບ​ໃຫ້​ຂະ­ແໜງ​ອຸດ­ສາ­ຫະ­ກຳ ແລະ ການ​ຄ້າ 2.722 ຄົນ ຜ່ານ​ການ​ຂຶ້ນ​ທະ­ບຽນ ແລະ ອອກ​ບັດ​ອະ­ນຸ­ຍາດ​ເຄື່ອນ​ໄຫວ​ຊົ່ວ­ຄາວ​ໃຫ້​ຄົນ​ຕ່າງ­ປະ­ເທດ ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໄດ້​ລົງ​ຕິດ­ຕາມ​ກວດ­ກາ​ຢູ່​ບັນ­ດາ​ຫົວ­ໜ່ວຍ​ແຮງ​ງານ ເຫັນ​ວ່າ​ຄົນ​ຕ່າງ­ປະ­ເທດ​ເຄື່ອນ​ໄຫວ​ບໍ່​ຖືກ­ຕ້ອງ​ຢູ່​ຕາມ​ຫົວ­ໜ່ວຍ​ແຮງ​ງານ​ມີ​ການ​ຫຼຸດ­ຜ່ອນ​ລົງ ແຕ່​ຍັງ​ພົບ​ເຫັນ​ຢູ່​ບັນ­ດາ​ບໍ­ລິ­ສັດ​ທີ່​ຮັບ​ເໝົາ​ກໍ່­ສ້າງ​ຕຶກ​ອາ­ຄານ​ຕ່າງໆ ຍັງ​ເຫັນ​ຄົນ​ຕ່າງ­ປະ­ເທດ​ລັກ­ລອບ​ເຄື່ອນ​ໄຫວ​ອອກ­ແຮງ​ງານ.

ຂ່າວທີ່ກ່ຽວຂ້ອງ