ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 09-07-2019

465 09 ກ.ລ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ແຜນ​ປັບ­ປຸງ​ພື້ນ­ຖານ​ການ​ກໍ່­ສ້າງ​ໂຄງ​ລ່າງ​ທີ່​ລ້າ​ສະ­ໄໝ​ໃນ ສ ເກົາ­ຫຼີ ຕໍ່​ໃສ່​ເລື່ອງ​ກົດ­ໝາຍ​ຫ້າມ​ນິນ­ທາ​ທີ່​ຟິ​ລິບ​ປິນ ແລະ ປິດ​ທ້າຍ​ກັບ​ຂ່າວ​ຄວາມ​ກັງ­ວົນ​ໃຈ ກ່ຽວ​ກັບ​ການ​ເກີດ​ລູກ​ດ້ວຍ​ການ­ຜ່າ­ຕັດ​ໃນ​ສີ​ລັງ­ກາ.

    ທີ່ ສ ເກົາ­ຫຼີ: ມີ​ຂ່າວ​ໃຫຍ່​ໄຟ​ແຮງ​ໃນ​ເດືອນ​ມິ­ຖຸ­ນາ​ປີ​ນີ້ ທີ່​ບອກ​ວ່າ: ທາງ​ການ ສ ເກົາ­ຫຼີ ມີ​ແຜນ​ປັບ­ປຸງ​ພື້ນ­ຖານ​ໂຄງ​ລ່າງ​ສາ­ທາ­ລະ­ນະ​ທັງ​ໝົດ​ທີ່​ເກົ່າ​ແກ່ ໃຫ້​ໃໝ່​ອ່ຽມ​ທັນ​ສະ­ໄໝ ໂຄງ­ການ​ທີ່​ວ່າ​ນີ້​ຈະ​ເລີ່ມ​ແຕ່​ປີ 2020 ຫາ​ປີ 2023 ໂດຍ​ຈະ​ນຳ​ໃຊ້​ງົບ­ປະ­ມານ​ທັງ​ໝົດ 32 ພັນ​ຕື້​ວອນ (ເທົ່າ​ກັບ 27 ຕື້​ໂດ​ລາ​ສະ­ຫະ­ລັດ).

    ອີງ​ຕາມ​ແຫຼ່ງ​ຂ່າວ​ຈາກ​ກະ­ຊວງ​ການ​ຄ້າ ອຸດ­ສາ­ຫະ­ກຳ ແລະ ພະ­ລັງ­ງານ ການ​ປັບ­ປຸງ​ບູ­ລະ­ນະ​ໂຄງ​ລ່າງ​ສະ­ຖານ­ທີ່​ສາ­ທາ­ລະ­ນະ​ຄັ້ງ​ນີ້ ຈະ​ເນັ້ນ​ການ​ກວດ­ກາ​ລະ­ບົບ​ຄວາມ​ປອດ​ໄພ​ຢ່າງ​ລະ­ອຽດ ແລະ ເລິກ­ເຊິ່ງ ເປົ້າ​ໝາຍ​ທີ່​ຈະ​ໄດ້​ຮັບ​ການ​ປັບ­ປຸງ​ຄືນ​ນັ້ນ​ແມ່ນ​ສິ່ງ​ກໍ່­ສ້າງ​ທີ່​ລ້າ​ສະ­ໄໝ​ທັງ​ໝົດ.

    ທີ່ ຟິ​ລິບ​ປິນ: ໃນ​ປີ 2017 ມີ​ຂ່າວ​ວ່າ: ທາງ​ການ​ຂອງ​ເມືອງ​ໂມ​ເລ​ໂນ ປະ­ເທດ​ຟິ​ລິບ​ປິນ ໄດ້​ອອກ​ກົດ­ໝາຍ​ເອົາ​ໂທດ​ຜູ້​ນິນ­ທາ​ວ່າ​ຂວັນ​ຄົນ​ອື່ນ ດ້ວຍ​ການ​ປັບ​ໃໝ​ເປັນ​ເງິນ 500 ເປ​ໂຊ ຫຼື ກວ່າ 10 ໂດ​ລາ​ສະ­ຫະ­ລັດ​ເລັກ​ໜ້ອຍ ນອກ­ຈາກ​ຖືກ​ປັບ​ໃໝ​ແລ້ວ ຜູ້​ກະ­ທຳ​ຜິດ​ຍັງ​ຕ້ອງ​ໄດ້​ອອກ­ແຮງ​ງານ​ເພື່ອ​ສັງ­ຄົມ ເຊັ່ນ: ໄປ​ເກັບ​ຂີ້​ເຫຍື້ອ​ໃນ​ຕອນ​ບ່າຍ​ຕາມ​ສະ­ຖານ­ທີ່​ສາ­ທາ­ລະ­ນະ.

    ຜົນ​ປາ­ກົດ​ວ່າ​ກົດ­ໝາຍ​ດັ່ງ­ກ່າວ​ມີ​ປະ­ໂຫຍດ​ຫຼາຍ ເພາະ​ສາ­ມາດ​ດັດ​ສັນ­ດານ​ຄົນ​ທີ່​ມັກ​ນິນ­ທາ​ຄົນ​ອື່ນ​ແນວ​ເສຍໆ​ຫາຍໆ ແລະ ທຸກ​ຄົນ​ກໍ​ບໍ່​ຕ້ອງ­ການ​ໄປ​ເກັບ​ຂີ້​ເຫຍື້ອ​ໃນ​ຕອນ​ບ່າຍ​ແດດ​ຮ້ອນໆ ແລະ ບໍ່​ຕ້ອງ­ການ​ໃຫ້​ຖືກ​ເບິ່ງ​ວ່າ​ເປັນ​ຄົນ​ຂີ້­ນິນ​ທາ.

    ຕໍ່​ມາ​ໃນ​ຕົ້ນ​ເດືອນ​ພຶດ­ສະ­ພາ​ປີ​ນີ້ ກໍ​ມີ​ຂ່າວ​ອອກ​ມາ​ຈາກ​ຟິ​ລິບ​ປິນ ຕື່ມ​ວ່າ: ທາງ​ການ­ເມືອງ​ບີ​ນາ​ໂລ​ນານ ກໍ​ໄດ້​ອອກ​ກົດ­ໝາຍ​ທ້ອງ­ຖິ່ນ​ຫ້າມ​ນິນ­ທາ​ເຊັ່ນ​ກັນ ເພື່ອ​ປ້ອງ​ກັນ​ບໍ່​ໃຫ້​ຂ່າວ​ລື​ແຜ່​ລະ­ບາດ​ໃນ​ທົ່ວ​ສັງ­ຄົມ ທີ່​ຈະ​ສົ່ງ​ຜົນ​ກະ­ທົບ​ທາງ​ລົບ​ຕໍ່​ຄວາມ​ເປັນ​ລະ­ບຽບ​ຮຽບ​ຮ້ອຍ ແລະ ຄວາມ​ສະ­ຫງົບ​ສຸກ​ພາຍ​ໃນ​ເມືອງ.

    ກົດ­ໝາຍ​ໄດ້​ກຳ­ນົດ​ໂທດ​ປັບ​ໃໝ​ຕໍ່​ຜູ້​ລະ­ເມີດ ເປັນ​ເງິນ 200 ເປ​ໂຊ (ເກືອບ 4 ໂດ​ລາ​ສະ­ຫະ­ລັດ) ແລະ ຜູ້­ກ່ຽວ​ຍັງ​ຕ້ອງ​ໄດ້​ອອກ​ໄປ​ເກັບ​ຂີ້​ເຫຍື້ອ​ຕາມ​ເສັ້ນ­ທາງ​ເປັນ​ເວ­ລາ 3 ຊົ່ວ­ໂມງ ຖ້າ​ມີ​ການ​ລະ­ເມີດ​ຊ້ຳ ຄ່າ​ປັບ​ໃໝ​ກໍ​ຈະ​ສູງ​ຂຶ້ນ​ຕາມ​ລຳ­ດັບ ແລະ ຊົ່ວ­ໂມງ​ຮັບ​ໃຊ້​ສັງ­ຄົມ (ເກັບ​ຂີ້​ເຫຍື້ອ) ກໍ​ຈະ​ເພີ່ມ​ຂຶ້ນ​ເປັນ 8 ຊົ່ວ­ໂມງ ການ​ນິນ­ທາ​ທີ່​ກຳ­ນົດ​ວ່າ​ເປັນ­ຄວາມ​ຜິດ​ນັ້ນ​ມີ​ຫຼາຍ​ລະ­ດັບ ຄື: ນັບ​ແຕ່​ການ​ນິນ­ທາ​ລັບ­ຫຼັງ​ກ່ຽວ​ກັບ​ຄວາມ​ສຳ­ພັນ ກໍ​ຄື ດ້ານ​ການ​ເງິນ​ຂອງ​ຄົນ​ອື່ນ ເຖິງ​ເລື່ອງ​ທີ່​ກາຍ­ເປັນ​ຂ່າວ​ລື ເຊິ່ງ​ສ້າງ​ຄວາມ​ເສຍ​ຫາຍ​ແກ່​ບຸກ­ຄົນ​ອື່ນໆ.

    ໃນ​ການ​ປະ­ກາດ​ໃຊ້​ກົດ­ໝາຍ​ຫ້າມ​ນິນ­ທາ​ນີ້ ທ່ານ​ເຈົ້າ­ເມືອງ ເມືອງ​ບີ​ນາ​ໂລ​ນານ ໄດ້​ອອກ​ມາ​ຮັບ­ປະ­ກັນ​ວ່າ​ບໍ່​ເປັນ​ການ​ລະ­ເມີດ​ສິດ​ເສລີ­ພາບ ໃນ​ການ​ປາກ​ເວົ້າ​ຂອງ​ຊາວ​ເມືອງ​ແຕ່​ຢ່າງ­ໃດ ກົດ­ໝາຍ​ມີ­ໜ້າ​ທີ່​ພຽງ​ປ້ອງ​ກັນ​ຊາວ​ເມືອງ​ຈາກ​ການ​ຖືກ​ໃສ່​ຮ້າຍ​ປ້າຍ​ສີ ທັງ​ເຮັດ​ໜ້າ­ທີ່​ເຕືອນ​ໃຫ້​ທຸກ​ຄົນ​ມີ​ຄວາມ​ຮັບ­ຜິດ­ຊອບ​ຕໍ່​ທຸກໆ​ຄຳ​ເວົ້າ​ທີ່​ອອກ​ຈາກ​ປາກ​ຂອງ​ຕົນ (ແຫຼ່ງ​ຂ່າວ​ຈາກ​ໜັງ­ສື­ພິມ​ຜູ້​ແທນ​ປະ­ຊາ­ຊົນ).

    ທີ່ ສີ​ລັງ­ກາ: ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 17 ເດືອນ​ມິ­ຖຸ­ນາ​ປີ​ນີ້ ໃຫ້​ຮູ້​ວ່າ: ທ່ານ ວິ­ມານ ວິ​ຣະ​ວັນ​ສາ ສະ­ມາ­ຊິກ​ລັດ​ຖະ​ສະ­ພາ ທັງ​ເປັນ​ຫົວ­ໜ້າ​ພັກ​ແນວ​ໂຮມ​ເສລີ­ພາບ​ແຫ່ງ​ຊາດ​ສີ​ລັງ­ກາ ໄດ້​ຍື່ນ​ໜັງ­ສື​ເຖິງ​ທ່ານ​ປະ­ທາ­ນາ­ທິ­ບໍ­ດີ ເພື່ອ​ໃຫ້​ສ້າງ­ຕັ້ງ​ຄະ­ນະ​ກຳ­ມະ­ການ​ຕິດ­ຕາມ ກວດ­ກາ​ບັນ­ຫາ​ການ​ເກີດ​ລູກ​ດ້ວຍ​ການ­ຜ່າ­ຕັດ ເຊິ່ງ​ກວມ​ເອົາ 39% ຂອງ​ເດັກ​ເກີດ​ໃໝ່​ທັງ​ໝົດ​ໃນ​ແຕ່​ລະ​ປີ ທ່ານ ວິ­ມານ ວິ​ຣະ​ວັນ​ສາ ຕັ້ງ​ຂໍ້​ສົງ­ໄສ​ວ່າ: ການ​ເກີດ​ລູກ​ດ້ວຍ​ການ­ຜ່າ­ຕັດ​ທີ່​ມີ​ຕົວ​ເລກ​ສູງ​ນີ້ ອາດ​ມີ​ເປົ້າ​ໝາຍ​ເພື່ອ​ການ​ຄ້າ​ຫຼາຍ​ກວ່າ ດັ່ງ­ນັ້ນ ຈຶ່ງ​ຕ້ອງ​ມີ​ການ​ຕິດ­ຕາມ​ກວດ​ສອບ​ເພື່ອ​ຄວາມ​ໂປ່ງ​ໃສ​ດ່ວນ.

ຂ່າວທີ່ກ່ຽວຂ້ອງ