ການ​ງົດ​ການບິນ​ໂດຍ​ກົງ​ຈາກ​ຣັດ​ເຊຍ ໄປ​ຍັງ​ຈໍ​ເຈຍ ເລີ່ມ​ມີ​ຜົນ​ບັງຄັບ​ໃຊ້

202 10 ກ.ລ. 2019 ຂ່າວຕ່າງປະເທດ
ການ​ງົດ​ການບິນ​ໂດຍ​ກົງ​ຈາກ​ຣັດ​ເຊຍ ໄປ​ຍັງ​ຈໍ​ເຈຍ ເລີ່ມ​ມີ​ຜົນ​ບັງຄັບ​ໃຊ້

     ຄຳ​ສັ່ງ​ຫ້າມ​ຂອງ​ລັດຖະບານ​ຣັດ​ເຊຍ ທີ່​ມີ​ຕໍ່​ບັນດາ​ຖ້ຽວ​ບິນ​ໂດຍ​ກົງ​ໄປ​ຍັງ​ຈໍ​ເຈຍ ໄດ້​ເລີ່ມ​ມີ​ຜົນ​ບັງຄັບ​ໃຊ້​ແລ້ວ​ໃນ​ວັນ​ທີ 8 ກໍລະກົດ​ນີ້ ຄຳ​ສັ່ງ​ຫ້າມ​ບິນ​ດັ່ງກ່າວ ມີ​ຜົນ​ບັງຄັບ​ໃຊ້​ພາຍ​ໃນ​ເດືອນ​ເລັ່ງ​ດ່ວນ​ຂອງ​ການທ່ອງທ່ຽວ (ເດືອນ​ກໍລະກົດ) ຖືກ​ຖື​ວ່າ​ຈະ​ສ້າງ​ຄວາມ​ເສຍ​ຫາຍ​ໃຫ້​ແກ່​ຂະແໜງ​ການທ່ອງທ່ຽວ​ຂອງ​ທັງ​ສອງ​ປະເທດ ໂດຍ​ສະເພາະ​ກໍ​ແມ່ນ​ຈໍ​ເຈຍ ໃນ​ເມື່ອ​ວ່າ​ໃນ​ປີ​ກາຍ ຈໍ​ເຈຍ​ໄດ້​ຕ້ອນຮັບ​ນັກ​ທ່ອງ​ທ່ຽວ 1,3 ເທື່ອ​ຄົນ ຈາກ​ຣັດ​ເຊຍ.

    ໃນ​ວັນ​ທີ 7 ກໍລະກົດ ບໍລິສັດ​ການບິນ​ຕ່າງໆ​ຂອງ​ຈໍ​ເຈຍ ໄດ້ແກ່ Georgian Airways ແລະ  MyWay Airlines ໄດ້​ສິ້ນ​ສຸດ​ການບິນ​ໂດຍ​ກົງ​ໄປ​ຍັງ​ຣັດ​ເຊຍ ໃນ​ຂະນະ​ດຽວ​ກັນ ບໍລິສັດ​ການບິນ  Aeroflot ຂອງ​ຣັດ​ເຊຍ ກໍ​ໄດ້​ປະຕິບັດ​ຖ້ຽວ​ບິນ​ສຸດ​ທ້າຍ​ຂອງ​ຕົນ ໄປ​ຍັງ​ນະຄອນຫຼວງ ຕະ​ບີ​ລີ​ຊີ ຂອງ​ຈໍ​ເຈຍ.

    ກ່ອນ​ໜ້າ​ນັ້ນ ເມື່ອ​ວັນ​ທີ 21 ມິຖຸນາ​ທີ່​ຜ່ານ​ມາ ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ໄດ້​ລົງ​ນາມ​ໃນ​ລັດ​ຖະ​ດຳລັດ ວ່າ​ດ້ວຍ​ການ​ຫ້າມ​ບັນດາ​ບໍລິສັດ​ການບິນ​ຂອງ​ຣັດ​ເຊຍ ບິນ​ໂດຍ​ກົງ​ໄປ​ຍັງ​ຈໍ​ເຈຍ ທາງ​ການ​ຣັດ​ເຊຍ​ໃຫ້​ຮູ້​ວ່າ ຄຳ​ສັ່ງ​ຫ້າມ​ດັ່ງກ່າວ ແມ່ນ​ເພື່ອ​ຮັບປະກັນ​ຄວາມ​ໝັ້ນຄົງ​ແຫ່ງ​ຊາດ​ຣັດ​ເຊຍ ແລະ ປ້ອງ​ກັນ​ປະຊາຊົນ ຈາກ​ການເຄື່ອນໄຫວ​ອາ​ຊະ​ຍາ​ກຳ ແລະ ຝືນ​ກົດໝາຍ.

ຂ່າວທີ່ກ່ຽວຂ້ອງ