ໄດ້ຢ່າງກໍຈະເສຍອີກຢ່າງ

282 10 ກ.ລ. 2019 ຫົວຂໍ້ຂ່າວອື່ນໆ

    ປັດຈຸບັນ​ສັງຄົມ​ເຮົາ​ມີ​ຫຼາຍ​ບໍລິສັດ​ສິນ​ເຊື່ອ​ເກີດ​ຂຶ້ນ ແລະ ຕ່າງ​ກໍ​ແຂ່ງຂັນ​ກັນ​ ມີ​ໂປຣ​ໂມ​ຊັນ​ການ​ຊື້​ຜ່ອນ​ສິນຄ້າ​ທີ່​ມີ​ຄວາມ​ສະດວກ​ສະບາຍ​ຫຼາກ​ຫຼາຍ ​ແບບ​ໄວ້​ໃຫ້​ເລືອກ​ຕາມ​ຄວາມ​ເໝາະ​ສົມ​ກັບ​ສະຖານະ​ພາບ​ທາງ​ການ​ເງິນ​ຂອງ​ແຕ່ລະຄົນ ສ່ວນ​ຮ້ານ​ຄ້າ​ຕ່າງໆ​ກໍ​ມີ​ໂປຣ​ໂມ​ຊັນ​ຄື​ກັນ ​ໃຫ້​ກັບ​ຄົນ​ມີ​ເງິນ​ຫຼາຍ​ທີ່​ສາມາດ​ຊື້​ເງິນສົດ​ໄດ້​ເລີຍ ​ໂດຍ​ບໍ່​ຕ້ອງ​ມາ​ເປັນ​ໜີ້​ໃຫ້​ຫຍຸ້ງຍາກ.

    ຂໍ້​ດີ​ຂອງ​ການ​ຊື້​ສິນຄ້າ​ດ້ວຍ​ເງິນສົດ: ບໍ່​ມີຄ່າ​ໃຊ້​ຈ່າຍ​ອື່ນໆ​ທີ່​ຕາມ​ມາ​ອີກ ​ກໍ​ຄື​ດອກ​ເບ້ຍ ​ເພາະ​ເຮົາ​ຈ່າຍ​ເທື່ອ​ດຽວ​ຈົບ​ໝົດ​ບັນຫາ​ການ​ເປັນ​ໜີ້​ໃນ​ແຕ່​ລະ​ເດືອນ ບໍ່​ມີ​ບັນຫາ​ເວລາ​ເກີນ​ກຳນົດ​ໄລຍະ​ເວລາ​ທີ່​ຕ້ອງ​ຈ່າຍ​ແຕ່​ລະ​ເດືອນ​ແລ້ວ​ຈະ​ຖືກ​ປັບ​ໃໝ ໄດ້​ຮັບ​ສ່ວນ​ຫຼຸດ​ພິເສດ​ຈາກ​ທາງ​ຮ້ານ​ຄ້າ ​ໃນ​ກໍລະນີ​ມີ​ໂປຣ​ໂມ​ຊັນ​ກັບ​ລູກ​ຄ້າ​ທີ່​ຈ່າຍ​ດ້ວຍ​ເງິນສົດ ສາມາດ​ຮູ້​ໄດ້​ວ່າ​ເຮົາ​ມີ​ເງິນ​ເຫຼືອ​ຢູ່​ເທົ່າໃດ ແລະ ບໍ່​ໄດ້​ເປັນ​ໜີ້​ໃຜ​ໃຫ້​ຄິດ​ເຈັບ​ຫົວ​ ເພາະວ່າ​ຫຼັງ​ຈາກ​ຊື້​ສົດ​ເງິນ​ຈະ​ອອກ​ຈາກ​ເຮົາ​ໄປ​ທັນທີ ​ເຮັດ​ໃຫ້​ເຮົາ​ເຫັນ​ໄດ້​ວ່າ​ເຮົາ​ຍັງ​ມີ​ເງິນ​ເຫຼືອ​ເທົ່າໃດ ແລະ ຄວນ​ແບ່ງ​ໃຊ້​ຈ່າຍ​ແບບ​ໃດ​ເພື່ອ​ໃຫ້​ຢູ່​ຫຼອດ.

    ຂໍ້​ເສຍ: ຕ້ອງ​ມີ​ເງິນ​ໃຫ້​ຄົບ​ຕາມ​ຈຳນວນ​ລາຄາ​ສິ່ງ​ທີ່​ເຮົາ​ຕ້ອງການ​ຊື້​ກ່ອນ ​ຈຶ່ງ​ຈະ​ສາມາດ​ຊື້​ໄດ້ ​ເຊິ່ງ​ບາງ​ຄັ້ງ​ກວ່າ​ເຮົາ​ຈະ​ເກັບ​ເງິນ​ໄດ້​ເພື່ອ​ມາ​ຊື້​ສິ່ງ​ທີ່​ຕ້ອງການ ​ກໍ​ຕ້ອງ​ໃຊ້​ເວລາ​ຫຼາຍ​ເດືອນ​ ບາງເທື່ອ​ກໍ​ຫຼາຍ​ປີ​ຖ້າ​ເປັນ​ສິ່ງ​ຂອງ​ທີ່​ລາຄາ​ສູງ​ເຊັ່ນ: ເຮືອນ ລົດ ແລະ ​ຖ້າ​ເປັນ​ຄົນ​ທີ່​ບໍ່​ມັກ ຫຼື ສາມາດ​ທ້ອນ​ເງິນ​ໄດ້​ ກໍ​ຍິ່ງ​ມີ​ຄວາມ​ສ່ຽງ​ວ່າ​ຈະ​ບໍ່​ໄດ້​ສິ່ງ​ຂອງ​ນັ້ນ​ເລີຍ ຫຼັງ​ຈາກ​ຊື້​ສິນຄ້າ​ໄປ​ແລ້ວ​ ເງິນ​ເກັບ​ທີ່​ເຮົາ​ມີ​ຢູ່​ກໍ​ອາດ​ຈະ​ບໍ່​ເຫຼືອ ຫຼື ອາດ​ຈະ​ໝົດ​ທັນທີ ແລະ ຖ້າ​ເກີດ​ກໍລະນີ​ສຸກ​ເສີນ​ທີ່​ເຮົາ​ຕ້ອງການ​ໃຊ້​ເງິນ​ຫຼາຍ ​ກໍ​ອາດ​ມີ​ຜົນ​ໃຫ້​ເຮົາ​ເປັນ​ໜີ້​ໄດ້​ອີກ.

    ຂໍ້​ດີ​ຂອງ​ການ​ຈ່າຍ​ເງິນ​ຜ່ອນ: ບໍ່​ຕ້ອງ​ມີ​ເງິນ​ຫຼາຍ ຫຼື ຄົບ​ຕາມ​ຈຳນວນ​ຂອງ​ລາຄາ​ຂອງ​ສິນຄ້າ ​ກໍ​ສາມາດ​ຊື້​ໄດ້​ພຽງ​ແຕ່​ມີ​ບັດ​ເຄຣ​ດິດ ຫຼື ມີ​ໂປຣ​ໂມ​ຊັນ ​ການ​ຜ່ອນ​ສິ່ງ​ຂອງ​ບາງ​ຢ່າງ​ບໍ່​ຕ້ອງ​ມີ​ເງິນ​ມາ​ຈ່າຍ​ກ່ອນ ​ກໍ​ສາມາດ​ເປັນ​ເຈົ້າ​ຂອງ​ໄດ້​ເລີຍ ຖ້າ​ທ່ານ​ມີ​ເງິນ​ຫຼາຍ​ທີ່​ສາມາດ​ຊື້​ສິນຄ້າ​ລາຄາ​ສູງ ​ແຕ່​ທ່ານ​ສາມາດ​ແບ່ງ​ເງິນ​ນັ້ນ​ສ່ວນ​ໜຶ່ງ​ເພື່ອ​ໄປ​ຜ່ອນ ແລະ ເກັບ​ສ່ວນ​ໜຶ່ງ​ມາ​ເປັນ​ເງິນ​ສຳຮອງ​ໄວ້​ເພື່ອ​ສຸກ​ເສີນ ຫຼື ເອົາ​ເງິນ​ໄປ​ຝາກ​ທະນາຄານ​ເພື່ອ​ກິນ​ດອກ​ເບ້ຍ ຫຼື ນຳ​ເງິນ​ກ້ອນ​ໃຫຍ່​ນັ້ນ​ໄປ​ລົງທຶນ ​ເພື່ອ​ເຮັດ​ທຸລະ​ກິດ​ທີ່​ໄດ້​ກຳໄລ ຫຼື ຫາ​ເງິນ​ເພີ່ມ​ອີກ​ກໍ​ໄດ້ ການ​ຜ່ອນ​ສາມາດ​ແບ່ງ​ຈ່າຍ​ໄດ້​ຫຼາຍ​ເດືອນ​ຫຼາຍ​ປີ​ແບບ​ສະບາຍ ​ສຳລັບ​ຄົນ​ມີ​ເງິນເດືອນ​ປະຈຳ​ຍິ່ງ​ມີ​ຄວາມ​ສະດວກ​ສະບາຍ​ ບາງ​ຄັ້ງ​ສິນຄ້າ​ບາງ​ຢ່າງ​ຍັງ​ມີ​ດອກ​ເບ້ຍ 0% ເຮັດ​ໃຫ້​ເຮົາ​ບໍ່​ໄດ້​ມີ​ພາລະ​ໜັກ​ຫຼາຍ​ໃນ​ຄັ້ງ​ດຽວ​ຄື​ກັບ​ຊື້​ສົດ. ການ​ຜ່ອນ​ຖ້າວ່າ​ເຮົາ​ມີ​ປະຫວັດ​ການ​ຊຳລະ​ເງິນ​ທີ່​ດີ ແລະ ຖືກຕ້ອງ​ຕາມ​ເວລາ ​ເຮັດ​ໃຫ້​ເຮົາ​ໄດ້​ຮັບ​ຄວາມ​ເຊື່ອ​ຖື​ໃຫ້​ຜ່ອນ​ສິ່ງ​ອື່ນໆ​ໄດ້​ອີກ​ຢ່າງ​ງ່າຍດາຍ ​ໂດຍ​ບໍ່​ຕ້ອງ​ມີ​ເອກະສານ​ຫຍຸ້ງຍາກ​ຫຼາຍ​ເທື່ອ.

    ຂໍ້​ເສຍ: ມີຄ່າ​ໃຊ້​ຈ່າຍ​ເພີ່ມ​ຂຶ້ນ​ອີກ​ໃນ​ແຕ່​ລະ​ເດືອນ ​ກໍ​ຄື​ການ​ສ້າງ​ໜີ້​ໃຫ້​ຕົວ​ເອງ​ເພີ່ມ ມີຄ່າ​ດອກ​ເບ້ຍ​ບາງ​ຄັ້ງ​ການ​ເສຍ​ຄ່າ​ດອກ​ເບ້ຍ​ນັ້ນ​ ອາດ​ເທົ່າ​ກັບ​ເຄິ່ງ​ໜຶ່ງ​ຂອງ​ລາຄາ​ສິນຄ້າ ຫຼື ທົບ​ເທົ່າ​ກັບ​ລາຄາ​ສິນຄ້າ​ເລີຍ​ກໍ​ເປັນ​ໄດ້. ບາງ​ເດືອນ​ເງິນ​ບໍ່​ທັນ​ຕາມ​ກຳນົດ​ເວລາ​ທີ່​ຕ້ອງ​ຈ່າຍ​ຜ່ອນ​ ກໍ​ອາດ​ຖືກ​ປັບ​ໃໝ​ເສຍ​ເງິນ​ເພີ່ມ​ອີກ ແລະ ຖ້າ​ບໍ່​ທັນ​ຫຼາຍ​ເດືອນ ​ກໍ​ຈະ​ເຮັດ​ໃຫ້​ຖືກ​ຢຶດ​ສິນຄ້າ​ນັ້ນ​ຄືນ.

    ໃນ​ແງ່​ກົດໝາຍ ການ​ຊື້-ຂາຍ​ສິນຄ້າ​ຈະ​ດ້ວຍ​ເງິນສົດ ຫຼື ຊື້​ຜ່ອນ​ກໍ​ຕາມ ​ລ້ວນ​ແຕ່​ຕິດ​ພັນ​ກັບ​ກົດໝາຍ​ວ່າ​ດ້ວຍ​ຂໍ້​ຜູກ​ພັນ​ໃນ​ສັນຍາ ກົດໝາຍ​ວ່າ​ດ້ວຍ​ກຳມະສິດ ກົດໝາຍ​ວ່າ​ດ້ວຍ​ການ​ຄ້ຳປະກັນ...

ໂດຍ: ມະຕິ​ຊົນ

ຂ່າວທີ່ກ່ຽວຂ້ອງ