ເບິ່ງບ້ານເຂົາເອົາບົດຮຽນ 10-07-2019

337 10 ກ.ລ. 2019 ຫົວຂໍ້ຂ່າວອື່ນໆ

    ໃນ​ບົດ​ນີ້ ທ່ານ​ຜູ້​ອ່ານ​ຈະ​ໄດ້​ຮູ້​ກ່ຽວ​ກັບ​ການ​ບໍ­ລິ­ການ​ຂອງ​ໂຊ​ເຟີ​ເພດ​ຍິງ​ໃນ​ຍີ່­ປຸ່ນ ແລະ ເລື່ອງ​ບົດ​ລົງ­ໂທດ​ຕໍ່​ຜູ້​ຮັກ​ຮ່ວມ​ເພດ​ໃນ​ເຄັນ​ຢາ.

    ທີ່ ຍີ່­ປຸ່ນ: ຂ່າວ​ຈາກ​ຍີ່­ປຸ່ນ​ໃນ​ກາງ​ເດືອນ​ມິ­ຖຸ­ນາ​ນີ້ ໃຫ້​ຮູ້​ວ່າ: ການ​ວ່າ​ຈ້າງ​ໂຊ​ເຟີ​ເພດ​ຍິງ​ຢູ່​ຍີ່­ປຸ່ນ​ນັ້ນ ໄດ້​ເພີ່ມ​ຕົວ​ເລກ​ສູງ​ຂຶ້ນ ຍ້ອນ​ດ້ານ​ໜຶ່ງ​ແມ່ນ​ເພື່ອ​ໃຫ້​ໄຂ​ບັນ­ຫາ​ຂາດ­ແຄນ​ແຮງ​ງານ ແລະ ອີກ​ເຫດ­ຜົນ​ໜຶ່ງ​ແມ່ນ​ຍ້ອນ​ວ່າ​ໂຊ​ເຟີ​ເພດ​ຍິງ​ນັ້ນ​ໃຫ້​ບໍ­ລິ­ການ​ດີ ແລະ ລະ­ອຽດ​ກວ່າ​ໂຊ​ເຟີ​ເພດ​ຊາຍ ຍ້ອນ​ແນວ​ນັ້ນ​ເອງ ບັນ­ດາ​ບໍ­ລິ­ສັດ​ຮັບ​ແກ່​ເຄື່ອງ ລົດ​ໂດຍ­ສານ​ແທັກ​ຊີ ຕະ­ຫຼອດ​ຮອດ​ລົດ­ໄຟ ຈຶ່ງ​ໄດ້​ຮັບ​ເອົາ​ໂຊ​ເຟີ​ເພດ​ຍິງ​ເພີ່ມ​ຂຶ້ນ.

    ບັນ­ຫາ​ທ້າ​ທາຍ​ສຳ­ລັບ​ໂຊ​ເຟີ​ເພດ​ຍິງ​ນັ້ນ ແມ່ນ​ການ​ຮັກ­ສາ​ຄວາມ​ສົມ​ດູນ​ລະ­ຫວ່າງ​ວຽກ​ຂັບ​ລົດ​ກັບ​ວຽກ​ເຮືອນ ໂດຍ​ສະ­ເພາະ​ແມ່ນ​ໂຊ​ເຟີ​ທີ່​ມີ​ຖາ­ນະ​ເປັນ​ແມ່ ບໍ­ລິ­ສັດ​ທີ່​ຈິງ​ຈັງ​ຕັ້ງ­ໜ້າ​ໃນ​ການ​ຮັບ​ເອົາ​ໂຊ​ເຟີ​ເພດ​ຍິງ​ໄດ້­ແກ່: ບໍ­ລິ­ສັດ ຊາ​ກາ​ອິ (Sakai) ທີ່​ເຮັດ​ໜ້າ­ທີ່​ບໍ­ລິ­ການ​ແກ່​ເຄື່ອງ ໂດຍ​ໄດ້​ຕັ້ງ​ເປົ້າ​ໝາຍ​ເອົາ​ໄວ້​ວ່າ ຈະ​ເພີ່ມ​ຈຳ­ນວນ​ໂຊ​ເຟີ​ເພດ​ຍິງ​ໃຫ້​ໄດ້​ເຖິງ 200 ຄົນ ພາຍ​ໃນ​ທ້າຍ​ເດືອນ​ມີ­ນາ ປີ 2020 ຈາກ​ຈຳ­ນວນ 30 ຄົນ​ໃນ​ປັດ­ຈຸ­ບັນ ຢູ່​ນະ­ຄອນ­ຫຼວງ​ໂຕ​ກຽວ ບໍ­ລິ­ສັດ​ໃຫ້​ບໍ­ລິ­ການ​ລົດ​ແທັກ​ຊີ​ຊື່ ຣາ​ກຸ​ໂຕະ (Rakuto-taxi inc) ໄດ້​ສ້າງ​ໜ່ວຍ​ບໍ­ລິ­ການ​ລົດ​ແທັກ​ຊີ​ທີ່​ມີ​ໂຊ​ເຟີ​ເພດ​ຍິງ​ລ້ວນໆ ໃນ​ປີ 2013 ແລະ ໃນ​ປັດ­ຈຸ­ບັນ​ມີ​ໂຊ​ເຟີ​ແມ່­ຍິງ ຈຳ­ນວນ 9 ຄົນ.

    ທ່ານ ຢູ​ກະ ຊຸ​ກິ​ຊາ​ກິ ອຳ­ນວຍ​ການ​ບໍ­ລິ­ສັດ​ນີ້ ໄດ້​ເວົ້າ​ກ່ຽວ​ກັບ​ບັນ­ຫາ​ນີ້​ວ່າ: ໃນ​ເບື້ອງ​ຕົ້ນ ພວກ​ໂຊ​ເຟີ​ຜູ້​ຊາຍ​ຫຼາຍ​ຄົນ ມີ​ຄວາມ​ສົງ­ໄສ​ໃນ​ຄວາມ​ສາ­ມາດ​ຂອງ​ໂຊ​ເຟີ​ເພດ​ຍິງ​ວ່າ ຊິ​ເຮັດ​ວຽກ​ນີ້​ໄດ້​ດີ ຫຼື ບໍ່ ແຕ່​ຕໍ່​ມາ​ກໍ​ມີ​ຂໍ້​ພິ­ສູດ​ວ່າ​ໂຊ​ເຟີ​ແມ່­ຍິງ​ນັ້ນ ມີ​ຄວາມ​ລະ­ອຽດ​ລະ​ອໍ​ດີ​ໃນ​ການ​ໃຫ້​ບໍ­ລິ­ການ​ຜູ້­ໂດຍ­ສານ ຄື: ມີ​ຄວາມ​ເອົາ­ໃຈ­ໃສ່​ຫິ້ວ ຫຼື ແກ່​ຫີບ​ເຄື່ອງ­ສົ່ງ​ຜູ້­ໂດຍ­ສານ​ຈົນ​ຮອດ​ຫົວ​ຂັ້ນ­ໄດ​ເຮືອນ ຄວາມ​ສາ­ມາດ​ສະ­ເພາະ​ຕົວ​ຂອງ​ໂຊ​ເຟີ​ແມ່­ຍິງ ໄດ້​ສ້າງ​ຄວາມ​ປະ​ທັບ​ໃຈ​ແກ່​ໂຊ​ເຟີ​ເພດ​ຊາຍ ແລະ ໄດ້​ເຮັດ​ໃຫ້​ບັນ­ຍາ­ກາດ​ໃນ​ໜ່ວຍ​ງານ​ດີ​ຂຶ້ນ.

    ທີ່ ເຄັນ​ຢາ: ໜັງ­ສື­ພິມ​ຜູ້​ແທນ​ປະ­ຊາ­ຊົນ ສະ­ບັບ 585 ປະ­ຈຳ​ທ້າຍ​ເດືອນ​ພຶດ­ສະ­ພາ​ປີ​ນີ້ ໃຫ້​ຮູ້​ວ່າ: ບັນ­ຫາ​ການ​ຮັກ​ຮ່ວມ​ເພດ​ໃນ​ປະ­ເທດ​ເຄັນ​ຢາ (ອາ​ຟຣິ​ກາ) ນັ້ນ ຍັງ​ຖື​ເປັນ​ເລື່ອງ​ຜິດ​ກົດ­ໝາຍ ນັບ​ແຕ່​ທ້າຍ​ສະ­ຕະ­ວັດ​ທີ 19 ເປັນ­ຕົ້ນ​ມາ ໂດຍ​ບໍ່​ມີ​ວີ່​ແວວ​ວ່າ​ຈະ​ມີ​ການ​ປ່ຽນ­ແປງ ທັງໆ​ທີ່​ມີ​ກະ­ແສ​ຄັດ­ຄ້ານ​ຈາກ​ກຸ່ມ​ສິດ­ທິ​ມະ­ນຸດ​ຕະ­ຫຼອດ​ມາ ກົດ­ໝາຍ​ຫ້າມ​ການ​ຮັກ​ຮ່ວມ​ເພດ​ຂອງ​ເຄັນ​ຢາ​ນັ້ນ ເອົາ​ຜິດ​ສະ­ເພາະ​ການ​ຮ່ວມ​ເພດ​ລະ­ຫວ່າງ​ຜູ້​ຊາຍ​ກັບ​ຜູ້​ຊາຍ ແຕ່​ໃນ​ພາກ​ປະ­ຕິ­ບັດ​ຕົວ​ຈິງ​ນັ້ນ ກຸ່ມ​ຍິງ​ຮັກ​ຍິງ ກຸ່ມ​ຮັກ​ບໍ່​ເລືອກ​ເພດ ກຸ່ມ​ຄົນ​ຂ້າມ​ເພດ ກໍ​ລ້ວນ​ແຕ່​ໄດ້​ຮັບ​ຜົນ​ກະ­ທົບ​ຈາກ​ກົດ­ໝາຍ​ສະ­ບັບ​ນີ້​ເຊັ່ນ​ກັນ.

    ໃນ​ປີ 2016 ກຸ່ມ​ປົກ​ປ້ອງ​ສິດ­ທິ​ຂອງ​ຄົນ​ຮັກ​ຮ່ວມ​ເພດ ໄດ້​ຍື່ນ​ໜັງ­ສື​ຮຽກ­ຮ້ອງ​ໃຫ້​ທາງ​ການ​ເຄັນ​ຢາ​ຍົກ­ເລີກ​ກົດ­ໝາຍ​ສະ­ບັບ​ນີ້ ໂດຍ​ອ້າງ​ວ່າ​ມັນ​ເປັນ­ຕົ້ນ​ເຫດ​ຂອງ​ຄວາມ​ລັງ​ກຽດ​ຄຽດ​ຊັງ​ຂອງ​ສັງ­ຄົມ​ຕໍ່​ກຸ່ມ​ຄົນ​ຮັກ​ຮ່ວມ​ເພດ ແລະ ວ່າ​ລັດ­ຖະ­ບານ​ບໍ່​ມີ­ໜ້າ​ທີ່​ມາ​ຂັດ­ຂວາງ ຫຼື ຈຳ­ແນກ​ຄວາມ​ຮັກ ຄວາມ​ສະ­ໜິດ­ສະ­ໜົມ​ຂອງ​ພົນ­ລະ­ເມືອງ ແຕ່​ໃນ​ທີ່​ສຸດ​ສານ​ສູງ​ຂອງ​ເຄັນ​ຢາ ກໍ​ຕັດ­ສິນ​ຮັກ­ສາ​ບົດ​ລົງ­ໂທດ​ຕໍ່​ຜູ້​ຮັກ​ຮ່ວມ​ເພດ​ໄວ້​ຄື­ເກົ່າ ໂດຍ​ອ້າງ​ວ່າ​ມັນ​ສອດ­ຄ່ອງ​ກັບ​ລັດ​ຖະ​ທຳ​ມະ­ນູນ ປີ 2010 ໃນ​ການ​ປົກ​ປ້ອງ​ຄວາມ​ເປັນ​ສ່ວນ​ຕົວ ແລະ ກຽດ​ສັກ​ສີ​ຂອງ​ພົນ­ລະ­ເມືອງ​ຊາວ​ເຄັນ​ຢາ ແລະ ໄດ້​ປະ­ຕິ­ເສດ​ຕໍ່​ຂໍ້​ອ້າງ​ຂອງ​ກຸ່ມ​ປົກ​ປ້ອງ​ສິດ­ທິ​ມະ­ນຸດ​ທີ່​ວ່າ: ການ​ຮັກ​ຮ່ວມ​ເພດ​ນັ້ນ ເປັນ​ພຶດ­ຕິ​ກຳ​ທີ່​ມີ​ມາ​ແຕ່​ກຳ­ເນີດ ກົດ­ໝາຍ​ຫ້າມ​ການ​ຮັກ​ຮ່ວມ​ເພດ​ຂອງ​ເຄັນ​ຢາ ກຳ­ນົດ​ໂທດ​ຈຳ​ຄຸກ​ສູງ​ສຸດ 14 ປີ ຕໍ່​ຜູ້​ກະ­ທຳ​ຜິດ.

ຂ່າວທີ່ກ່ຽວຂ້ອງ