ຂ່າວຫຼ້າສຸດ

USAID ມອບມຸ້ງເຄືອບຢາ 154.588 ດາງ ໃຫ້ກະຊວງສາທາ

457 10 ກ.ລ. 2019 ຂ່າວໜ້າ​ໜຶ່ງ
USAID ມອບມຸ້ງເຄືອບຢາ 154.588 ດາງ ໃຫ້ກະຊວງສາທາ

    ພິ­ທີ​ມອບ-ຮັບ​ມຸ້ງ​ເຄືອບ​ຢາ​ຍາວ​ນານ ຈາກ​ອົງ­ການ​ພັດ­ທະ­ນາ​ສາ­ກົນ ສ ອາ​ເມ​ຣິ​ກາ (USAID) ໃຫ້​ກະ­ຊວງ​ສາ­ທາ­ລະ­ນະ​ສຸກ ຈັດ​ຂຶ້ນ​ວັນ​ທີ 9 ກໍ­ລະ­ກົດ 2019 ຢູ່​ສູນ​ໄຂ້­ຍຸງ ແມ່​ກາ​ຝາກ ແລະ ແມງ­ໄມ້ ກົມ​ພະ­ຍາດ​ຕິດ­ຕໍ່ ກະ­ຊວງ​ສາ­ທາ­ລະ­ນະ​ສຸກ ເຊິ່ງ​ມອບ​ໂດຍ​ທ່ານ​ນາງ ຣີ​ນາ ບິດ​ເຕີ ເອກ​ອັກ​ຄະ​ລັດ​ຖະ​ທູດ ສ ອາ​ເມ​ຣິ​ກາ ປະ­ຈຳ ສປປ ລາວ ແລະ ຮັບ​ໂດຍ​ທ່ານ ຄຳ​ພອນ ພຸດ​ທະ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ມີ​ຫົວ­ໜ້າ​ສູນ ຕາງ­ໜ້າ​ອົງ­ການ ພ້ອມ​ດ້ວຍ​ພະ­ນັກ­ງານ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ວຽງ​ໄຊ ວະ​ນິ​ສະ​ເວດ ຮັກ­ສາ​ການ​ຫົວ­ໜ້າ​ສູນ​ໄຂ້­ຍຸງ ແມ່​ກາ​ຝາກ ແລະ ແມງ­ໄມ້ ກ່າວ​ວ່າ: ສູນ​ໄຂ້­ຍຸງ ແມ່​ກາ​ຝາກ ແລະ ແມງ­ໄມ້ ມີ​ຕາ​ໜ່າງ​ຄວບ​ຄຸມ​ທົ່ວ​ປະ­ເທດ 18 ແຂວງ 148 ເມືອງ 1.072 ສຸກ­ສາ­ລາ ແລະ 1.156 ບ້ານ ນັບ​ແຕ່​ປີ 2000-2018 ອັດ­ຕາ​ການ​ພົບ​ເຊື້ອ​ປະ­ຈຳ​ປີ ໄດ້​ຫຼຸດ​ລົງ 6 ເທົ່າ ຈາກ 7,68/1.000 ຄົນ ເຫຼືອ 1,51/1.000 ຄົນ ອັດ­ຕາ​ການ​ຕາຍ​ຈາກ 7,16/100.000 ຄົນ ເຫຼືອ 0,1/100.000 ຄົນ ເຊິ່ງ​ໄດ້​ບັນ­ລຸ​ເປົ້າ​ໝາຍ​ສະ­ຫະ​ສະ​ວັດ​ດ້ານ​ພັດ­ທະ­ນາ ນອກ​ນີ້ ຍັງ​ໄດ້​ຮັບ​ການ​ລາຍ​ງານ​ຈາກ​ແຂວງ​ໃຫ້​ຮູ້​ຕື່ມ ແຕ່​ປີ 2000-2018 ຈຳ­ນວນ​ໄຂ້​ມາ­ລາ​ເຣຍ​ທີ່​ຢັ້ງ­ຢືນ ແລະ ສົງ​ໃສ​ຫຼຸດ​ລົງ 99,96% ຈາກ 279.903 ເຫຼືອ 9.038 ກໍ­ລະ­ນີ ສະ­ເພາະ​ປີ 2018 ໄດ້​ກວດ​ເລືອດ​ຊອກ​ຫາ​ມາ­ລາ​ເຣຍ 287.404 ພົບ​ເຊື້ອ 9.038 ກໍ­ລະ­ນີ ເສຍ​ຊີ­ວິດ 6 ກໍ­ລະ­ນີ ນອກ​ນີ້ ຍັງ​ພົບ​ເຊື້ອ​ໄຂ້​ມາ­ລາ​ເຣຍ ໃນ​ປີ 2018 ຫຼຸດ​ລົງ ແຕ່​ໃນ 5 ແຂວງ​ພາກ​ໃຕ້ ຄື: ແຂວງ​ສະ­ຫວັນ​ນະ​ເຂດ ຈຳ­ປາ​ສັກ ສາ­ລະ​ວັນ ເຊ​ກອງ ແລະ ອັດ​ຕະ​ປື ແມ່ນ​ກວມ​ເອົາ 95% ຂອງ​ການ​ພົບ​ເຊື້ອ ທຽບ­ໃສ່​ບັນ­ດາ​ແຂວງ​ທົ່ວ​ປະ­ເທດ.

    ເລີ່ມ​ແຕ່​ປີ 2011 ເປັນ­ຕົ້ນ​ມາ ອົງ­ການ USAID ໄດ້​ໃຫ້­ການ​ຊ່ວຍ­ເຫຼືອ​ຫຼາຍ​ດ້ານ ເຊັ່ນ: ການ​ຕອບ​ໂຕ້​ການ​ລະ­ບາດ ການ​ກໍ່­ສ້າງ​ບຸ​ຄະ­ລາ​ກອນ ການ​ເຝົ້າ​ລະ­ວັງ ແລະ ການ​ຕິດ­ຕາມ​ເຊື້ອ​ຕ້ານ​ຕໍ່​ຢາ ໂດຍ​ຜ່ານ​ອົງ­ການ​ອະ­ນາ­ໄມ​ໂລກ ພ້ອມ​ນີ້ ຍັງ​ໄດ້​ຊ່ວຍ​ປິ່ນ­ປົວ​ພະ­ຍາດ​ໄຂ້​ມາ­ລາ​ເຣຍ ແລະ ເຄື່ອງ​ບົ່ງ­ມະ­ຕິ ອັນ​ພົ້ນ​ເດັ່ນ​ກວ່າ​ໝູ່​ຂອງ​ການ​ຊ່ວຍ­ເຫຼືອ ແມ່ນ​ໄດ້​ມອບ​ມຸ້ງ​ເຄືອບ​ຢາ​ຍາວ​ນານ ແລະ ມຸ້ງ​ອູ່ ປີ 2012-2015-2016-2017-2018 ຈຳ­ນວນ 492.100 ດາງ ສຳ­ລັບ​ປີ 2019 ໄດ້​ມອບ​ມຸ້ງ​ໃຫ້​ພາກ­ສ່ວນ​ກອງ­ທັບ 20.000 ດາງ ແລະ ຄັ້ງ​ນີ້​ແມ່ນ​ຊ່ວຍ­ເຫຼືອ​ມຸ້ງ​ເຄືອບ​ຢາ​ຍາວ​ນານ​ປະ­ເພດ​ຄອບ­ຄົວ 154.588 ດາງ ແລະ ໃນ​ເດືອນ​ພະ­ຈິກ​ທີ່​ຈະ​ມາ​ເຖິງ ຍັງ​ຈະ​ຊ່ວຍ​ມຸ້ງ​ປະ­ເພດ​ດຽວ​ກັນ​ອີກ 20.000 ດາງ ໃຫ້​ພາກ­ສ່ວນ​ກອງ­ທັບ ເຊິ່ງ​ຄາດ​ວ່າ​ປະ­ຊາ­ຊົນ​ໃນ​ເຂດ​ສ່ຽງ​ຈະ​ຖືກ​ປ້ອງ​ກັນ​ປະ­ມານ 1.819.689 ຄົນ.

ຂ່າວທີ່ກ່ຽວຂ້ອງ