ງານວາງສະແດງເຄື່ອງເຮືອນລາວ ຄັ້ງທີ 4 ມີມູນຄ່າການຈໍລະຈອນສິນຄ້າ 20 ຕື້ກີບ

353 10 ກ.ລ. 2019 ຂ່າວໜ້າ​ໜຶ່ງ
ງານວາງສະແດງເຄື່ອງເຮືອນລາວ ຄັ້ງທີ 4 ມີມູນຄ່າການຈໍລະຈອນສິນຄ້າ 20 ຕື້ກີບ

    ງານ​ວາງ­ສະ­ແດງ​ເຄື່ອງ​ເຮືອນ​ລາວ ຄັ້ງ​ທີ 4 ປະ­ຈຳ​ປີ 2019 ໄຂ​ຂຶ້ນ​ເປັນ​ທາງ​ການ ວັນ​ທີ 8 ກໍ­ລະ­ກົດ 2019 ຢູ່​ສູນ​ການ​ຄ້າ ລາວ-ໄອ​ເຕັກ ໂດຍ​ມີ​ທ່ານ ພັນ​ທອງ ພິດ​ທຸມ­ມາ ຮອງ​ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ພ້ອມ​ດ້ວຍ​ຄະ­ນະ​ບໍ­ລິ­ຫານ​ສະ­ມາ­ຄົມ​ເຟີ​ນີ​ເຈີ (ສຟລ) ຫົວ­ໜ່ວຍ​ທຸ­ລະ​ກິດ ຜູ້​ປະ­ກອບ​ການ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ກອງ​ມາ­ລາ ພົມ­ມາ​ໄລ ຮອງ​ປະ­ທານ ສຟລ ປະ­ທານ​ບໍ­ລິ­ສັດ ເຄ​ແອນ​ບີ ເຟີ​ນີ​ເຈີ ກ່າວ​ວ່າ: ເພື່ອ​ເປັນ​ການ​ໂຄ­ສະ­ນາ​ສິນ­ຄ້າ​ເຟີ​ນີ​ເຈີ​ໄມ້​ລາວ ທັງ​ເປັນ​ການ​ແລກ­ປ່ຽນ​ບົດ­ຮຽນ ແລະ ປະ­ສົບ​ການ​ດ້ວຍ​ກັນ​ຂອງ​ນັກ­ທຸ­ລະ­ກິດ ຫົວ­ໜ່ວຍ​ການ​ຜະ­ລິດ​ເຟີ​ນີ​ເຈີ​ຈາກ​ໄມ້​ລາວ​ອອກ​ຮັບ​ໃຊ້​ສັງ­ຄົມ ພ້ອມ​ນີ້ ຍັງ​ເປັນ​ການ­ສະ­ແດງ​ຜົນ­ງານ​ຜະ­ລິດ​ຕະ​ພັນ​ເຟີ​ນີ​ເຈີ​ທີ່​ໄດ້​ໃຊ້​ຫົວ­ຄິດ​ປະ­ດິດ​ສ້າງ ໂດຍ​ໃຊ້​ນາຍ​ຊ່າງ​ທີ່​ມີ​ຄວາມ​ຊຳ­ນິ​ຊຳ­ນານ ຄວາມ​ປາ­ນີດ ສາ­ມາດ​ສ້າງ​ຜະ­ລິດ​ຕະ​ພັນ​ໄດ້​ຫຼາຍ​ຮູບ​ແບບ​ໃຫ້​ຜູ້​ຊົມ­ໃຊ້​ເລືອກ​ຊື້ ແລະ ເລືອກ​ຊົມ ເຊິ່ງ​ງານ​ດັ່ງ­ກ່າວ​ມີ​ຫ້ອງ​ວາງ­ສະ­ແດງ-ຂາຍ​ສິນ­ຄ້າ 148 ຫ້ອງ ຈາກ 67 ຫົວ­ໜ່ວຍ​ທຸ­ລະ​ກິດ ໃນ​ນີ້​ເປັນ​ສິນ­ຄ້າ​ໂອ​ດ໋ອບ 20 ຫົວ­ໜ່ວຍ ແລະ ມາ​ຈາກ​ຕ່າງ​ແຂວງ 13 ຫົວ­ໜ່ວຍ​ທຸ­ລະ​ກິດ 20 ຫ້ອງ​ຈາກ 8 ແຂວງ​ໃນ​ຂອບ​ເຂດ​ທົ່ວ​ປະ­ເທດ ລວມ​ມູນ​ຄ່າ​ການ​ຈໍ​ລະ​ຈອນ ຊື້-ຂາຍ​ສິນ­ຄ້າ ລວມ​ໃນ​ງານ​ປະ­ມານ 20 ຕື້​ກີບ ຄາດ​ວ່າ​ຈະ​ຂາຍ​ໄດ້​ປະ­ມານ 70% ຫຼື ປະ­ມານ 14 ຕື້​ກີບ ເຊິ່ງ​ງານ​ດັ່ງ­ກ່າວ​ຈະ​ດຳ­ເນີນ​ໄປ​ຮອດ​ວັນ​ທີ 14 ກໍ­ລະ­ກົດ 2019.

    ເພື່ອ​ເຮັດ​ໃຫ້​ງານ​ມີ​ຄວາມ​ໝາຍ​ຄວາມ​ສຳ­ຄັນ ແລະ ມີ​ຫຼາຍ​ສີ­ສັນ ສ້າງ​ຄວາມ​ສົນ­ໃຈ​ໃຫ້​ຜູ້​ຊື້-ຂາຍ ສຟລ ແລະ ສູນ​ການ​ຄ້າ ລາວ-ໄອ​ເຕັກ ໄດ້​ຈັດ​ຫຼາຍ​ກິດ­ຈະ­ກຳ​ທີ່​ໜ້າ​ສົນ­ໃຈ ເປັນ­ຕົ້ນ ການ​ເຝິກ­ອົບ­ຮົມ​ຫົວ­ຂໍ້ ການ​ອອກ​ແບບ​ເຟີ​ນີ​ເຈີ​ທັນ​ສະ­ໄໝ ແຂ່ງ​ຮ້ອງ­ເພງ​ເຍົາ­ວະ​ຊົນ​ສຽງ​ດີ ການ­ສະ­ແດງ​ຟົກ​ຊອງ ພ້ອມ​ທັງ​ກິດ­ຈະ­ກຳ​ສົ່ງ­ເສີມ​ການ​ຂາຍ ຫຼຸດ​ລາ­ຄາ​ສິນ­ຄ້າ ເພື່ອ​ຄືນ​ກຳ­ໄລ​ໃຫ້​ລູກ​ຄ້າ ແລະ ການ​ແຈກ​ແຖມ​ຢ່າງ​ຫຼວງ­ຫຼາຍ.

ຂ່າວທີ່ກ່ຽວຂ້ອງ