ອິນ​ໂດ​ເນ​ເຊຍ ສົ່ງ​ຂີ້​ເຫຍື້ອ​ຄືນ​ໄປ​ຍັງ​ອົດ​ສະ​ຕຣາ​ລີ

82 11 ກ.ລ. 2019 ຂ່າວຕ່າງປະເທດ
ອິນ​ໂດ​ເນ​ເຊຍ ສົ່ງ​ຂີ້​ເຫຍື້ອ​ຄືນ​ໄປ​ຍັງ​ອົດ​ສະ​ຕຣາ​ລີ

     ດ່ານ​ພາ­ສີ​ອາ­ກອນ​ຂອງ​ອິນ​ໂດ​ເນ​ເຊຍ ມີ​ແຈ້ງ​ການ​ອອກ​ມາ​ເມື່ອ​ວັນ​ທີ 9 ກໍ­ລະ­ກົດ​ນີ້​ວ່າ ຈະ​ສົ່ງ​ຕູ້​ຄອນ​ເທນ​ເນີ 8 ຕູ້ ທີ່​ບັນ­ຈຸ​ຂີ້​ເຫຍື້ອ 210 ໂຕນ ຄືນ​ໄປ​ຍັງ​ອົດ​ສະ​ຕຣາ​ລີ ຫຼັງ​ຈາກ​ທີ່​ໄດ້​ກວດ​ພົບ​ວ່າ​ຢູ່​ໃນ​ຕູ້​ຄອນ​ເທນ​ເນີ​ເຫຼົ່າ­ນັ້ນ ມີ​ທັງ​ວັດ​ສະ​ດຸ​ທີ່​ເປັນ​ພິດ ແລະ ຂີ້​ເຫຍື້ອ​ທີ່​ຖ່າຍ​ເທ​ມາ​ຈາກ​ຄອບ­ຄົວ.

    ເຈົ້າ​ໜ້າ­ທີ່​ດ່ານ​ພາ­ສີ​ອາ­ກອນ​ຂອງ​ອິນ​ໂດ​ເນ​ເຊຍ ເວົ້າ​ວ່າ ຕູ້​ຄອນ​ເທນ​ເນີ​ຈຳ­ນວນ​ດັ່ງ­ກ່າວ ຖືກ​ສົ່ງ​ມາ​ຈາກ​ເມືອງ ບຣິ​ສ​ເບນ ທີ່​ຂຶ້ນ​ກັບ​ລັດ ກວິນ​ສ​ແລນ ຂອງ​ອົດ​ສະ​ຕຣາ​ລີ ແລະ ຖືກ​ກັກ​ໄວ້​ທີ່​ທ່າ​ກຳ­ປັ່ນ​ແຫ່ງ​ໜຶ່ງ ໃນ​ນະ­ຄອນ ສຸ​ຣາ​ບາ​ຢາ ຂອງ​ອິນ​ໂດ​ເນ​ເຊຍ ມາ​ຕັ້ງ­ແຕ່​ເດືອນ​ມິ­ຖຸ­ນາ​ທີ່​ຜ່ານ​ມາ.

     ເມື່ອ​ກວດ­ກາ​ເບິ່ງ​ສິ່ງ​ທີ່​ບັນ­ຈຸ​ຢູ່​ໃນ​ຕູ້​ຄອນ​ເທນ​ເນີ​ເຫຼົ່າ­ນັ້ນ ເຈົ້າ​ໜ້າ­ທີ່​ດ່ານ​ພາ­ສີ​ໄດ້​ກວດ​ພົບ​ວ່າ​ມີ​ວັດ​ສະ​ດຸ​ທີ່​ເປັນ​ພິດ ແລະ ສິ່ງ​ທີ່​ຖ່າຍ​ເທ​ມາ​ຈາກ​ຄອບ­ຄົວ ອັນ​ປະ­ກອບ​ມີ​ຝາ­ອັດ​ຂວດ​ຢາງ ຜ້າ​ອະ­ນາ­ໄມ​ດ້ວຍ​ເຈ້ຍ​ທີ່​ຜ່ານ​ການ​ນຳ​ໃຊ້​ແລ້ວ ຂີ້​ເຫຍື້ອ​ເອ​ເລັກ​ໂຕຣ​ນິກ ແລະ ເປືອກ​ຂອງ​ກະ­ປ່ອງ​ບັນ­ຈຸ​ສິນ­ຄ້າ.

     ເມື່ອ​ອາ­ທິດ​ກ່ອນ ອິນ​ໂດ​ເນ​ເຊຍ ກໍ​ໄດ້​ປະ­ກາດ​ສົ່ງ​ຂີ້​ເຫຍື້ອ​ຄືນ​ໄປ​ຍັງ​ຝຣັ່ງ ແລະ ປະ­ເທດ​ພັດ­ທະ­ນາ​ອື່ນໆ ລວມ​ແລ້ວ​ມີ 49 ຕູ້​ຄອນ​ເທນ​ເນີ. ເມື່ອ​ເດືອນ​ພຶດ­ສະ­ພາ​ທີ່​ຜ່ານ​ມາ ມາ​ເລ​ເຊຍ ກໍ​ປະ­ກາດ​ສົ່ງ​ຂີ້​ເຫຍື້ອ​ປະ­ເພດ​ຢາງ ຈຳ­ນວນ 450 ໂຕນ ຄືນ​ໄປ​ຍັງ​ຕົ້ນ​ທາງ ອັນ​ປະ­ກອບ​ມີ​ອົດ​ສະ​ຕຣາ​ລີ ບັງ​ກລາ​ເດ​ສ ກາ​ນາ​ດາ ຈີນ ຍີ່­ປຸ່ນ ອາ​ຣາ​ບີ ຊາ​ອຸ​ດິດ ແລະ  ສ ອາ​ເມ​ຣິ​ກາ. ໃນ​ຂະ­ນະ​ດຽວ​ກັນ ເມື່ອ​ເດືອນ​ມິ­ຖຸ­ນາ​ທີ່​ຜ່ານ​ມາ ຟີ​ລິບ​ປິນ ໄດ້​ສົ່ງ​ຂີ້​ເຫຍື້ອ​ຈຳ­ນວນ 69 ຕູ້​ຄອນ​ເທນ​ເນີ ຄືນ​ໄປ​ຍັງ​ກາ​ນາ​ດາ.

ຂ່າວທີ່ກ່ຽວຂ້ອງ