ຂ່າວຫຼ້າສຸດ

ແມ່­ຍິງ​ເກືອບ 140 ຄົນ ຖືກ​ທຳ­ຮ້າຍ​ຈົນ​ເສຍ​ຊີ­ວິດ​ໃນ​ແຕ່​ລະ​ວັນ

153 11 ກ.ລ. 2019 ຂ່າວຕ່າງປະເທດ
ແມ່­ຍິງ​ເກືອບ 140 ຄົນ ຖືກ​ທຳ­ຮ້າຍ​ຈົນ​ເສຍ​ຊີ­ວິດ​ໃນ​ແຕ່​ລະ​ວັນ

      ບົດ​ລາຍ​ງານ​ຂອງ​ຫ້ອງ­ການ​ສະ­ຫະ​ປະ­ຊາ​ຊາດ ກ່ຽວ​ກັບ​ການ​ຕ້ານ​ຢາ​ເສບ​ຕິດ ແລະ ອາ​ຊະ​ຍາ​ກຳ (UNODC) ທີ່​ໄດ້​ນຳ​ອອກ​ມາ​ເປີດ­ເຜີຍ​ເມື່ອ​ວັນ​ທີ 8 ກໍ­ລະ­ກົດ​ນີ້ ຊີ້​ໃຫ້​ເຫັນ​ວ່າ ໃນ​ປີ 2017 ໃນ​ທົ່ວ​ໂລກ ມີ​ແມ່­ຍິງ​ຖືກ​ເຂັ່ນ­ຂ້າ​ປະ­ມານ 87.000 ຄົນ ຊຶ່ງ​ໃນ​ຈຳ­ນວນ​ນີ້​ມີ​ປະ­ມານ 50.000 ຄົນ ຖືກ​ຜູ້​ເປັນ​ຜົວ ຜົວ​ເກົ່າ ຫຼື​ສະ­ມາ­ຊິກ​ຄົນ​ອື່ນໆ​ຢູ່​ໃນ​ຄອບ­ຄົວ ເປັນ​ຜູ້​ລົງ­ມື​ເຂັ່ນ­ຂ້າ. ເມື່ອ​ໄລ່​ໂດຍ​ສະ­ເລ່ຍ​ແລ້ວ ໃນ​ແຕ່​ລະ​ວັນ ທົ່ວ​ໂລກ​ມີ​ແມ່­ຍິງ​ຖືກ​ເຂັ່ນ­ຂ້າ 137 ຄົນ ໂດຍ​ແມ່ນ​ຜູ້​ເປັນ​ຜົວ ຫຼື​ສະ­ມາ­ຊິກ​ຄົນ​ອື່ນໆ​ຢູ່​ໃນ​ຄອບ­ຄົວ​ຂອງ​ພວກ​ເຂົາ ເປັນ​ຜູ້​ລົງ­ມື​ທຳ­ຮ້າຍ.

     ບົດ​ລາຍ​ງານ​ດັ່ງ­ກ່າວ ກໍ​ຊີ້​ໃຫ້​ເຫັນ​ວ່າ ໃນ​ຊຸມ​ປີ​ທີ່​ຜ່ານ​ມາ  ເກືອ​ບວ່​່າ​ບໍ່​ມີ​ຄວາມ​ກ້າວ­ໜ້າ​ຫຼາຍ​ພໍ​ປານ­ໃດ ໃນ​ການ​ປົກ​ປ້ອງ​ແມ່­ຍິງ ຈາກ​ການ​ໃຊ້​ຄວາມ​ຮຸນ​ແຮງ​ຢູ່​ໃນ​ຄອບ­ຄົວ. ຍິ່ງ​ໄປ​ກວ່າ​ນັ້ນ ຈຳ­ນວນ​ແມ່­ຍິງ​ທີ່​ຖືກ​ທຳ­ຮ້າຍ​ຈົນ​ເສຍ​ຊີ­ວິດ ຍັງ​ເພີ່ມ​ຂຶ້ນ​ຈາກ 48.000 ຄົນ ໃນ​ປີ 2012 ຂຶ້ນ​ມາ​ເປັນ 50.000 ຄົນ ໃນ​ປີ 2017.

    ບົດ​ລາຍ​ງານ​ຂອງ UNODC ໃຫ້​ຮູ້​ວ່າ ທະ­ວີບ­ອາ­ຊີ ເປັນ​ບ່ອນ​ທີ່​ມີ​ແມ່­ຍິງ​ຖືກ​ເຂັ່ນ­ຂ້າ​ຢູ່​ໃນ​ຄອບ­ຄົວ​ຫຼາຍ​ທີ່​ສຸດ ໂດຍ​ມີ 20.000 ກໍ­ລະ­ນີ ໃນ​ປີ 2017. ຖັດ​ລົງ​ມາ​ກໍ​ແມ່ນ​ທະ­ວີບ​ອາ​ຟະ​ຣິກ​ກາ ມີ  19.000 ກໍ­ລະ­ນີ; ທະ­ວີບ​ອາ​ເມ​ຣິ​ກາ ມີ 8.000 ກໍ­ລະ­ນີ; ທະ­ວີບ​ເອີ​ຣົບ ມີ 3.000 ກໍ­ລະ­ນີ ແລະ ທະ­ວີບ ໂອ​ຊີ​ອາ​ນີ ມີ 300 ກໍ­ລະ­ນີ.

     ໃນ​ຂະ­ນະ​ດຽວ​ກັນ ບົດ​ລາຍ​ງານ​ຂອງ​ອົງ­ການ​ແມ່­ຍິງ​ຂອງ​ສະ­ຫະ​ປະ­ຊາ​ຊາດ ກ່ຽວ​ກັບ​ສະ­ພາບ​ຄວາມ​ຮຸນ​ແຮງ​ໃນ​ຄອບ­ຄົວ ແລະ ຄວາມ​ບໍ່​ສະ­ເໝີ­ພາບ​ລະ­ຫວ່າງ​ເພດ ທີ່​ໄດ້​ນຳ​ອອກ​ມາ​ເປີດ­ເຜີຍ​ເມື່ອ​ເດືອນ​ມິ­ຖຸ­ນາ​ທີ່​ຜ່ານ​ມາ ກໍ​ມີ​ຜົນ​ທີ່​ຄ້າຍ­ຄື​ກັນ​ນັ້ນ ໂດຍ​ໃຫ້­ການ​ສະ­ຫຼຸບ​ວ່າ ເຮືອນ​ເປັນ​ໜຶ່ງ​ໃນ​ບັນ­ດາ​ສະ­ຖານ­ທີ່ໆ​ອັນ­ຕະ­ລາຍ​ທີ່​ສຸດ ສຳ­ລັບ​ແມ່­ຍິງ.

ຂ່າວທີ່ກ່ຽວຂ້ອງ