ເບິ່ງບ້ານເຂົາເອົາບົດຮຽນ 11-07-2019

257 11 ກ.ລ. 2019 ຫົວຂໍ້ຂ່າວອື່ນໆ

    ພົບ​ກັນ​ປະ­ຈຳ​ວັນ​ນີ້ ມີ​ຂ່າວ​ກ່ຽວ​ກັບ​ແຜນ​ໂຍກ​ຍ້າຍ​ນະ­ຄອນ­ຫຼວງ​ຈາ​ກາ​ຕາ ອິນ​ໂດ​ເນ​ເຊຍ ເລື່ອງ​ການ​ຍົກ­ເລີກ​ໂທດ​ປະ­ຫານ​ສຳ­ລັບ​ຜູ້​ຮັກ​ຮ່ວມ​ເພດ​ໃນ​ບຼູ​ໄນ ແລະ ເລື່ອງ​ລະ­ບົບ​ແຍກ​ຂີ້​ເຫຍື້ອ​ທີ່ ສປ ຈີນ.

    ທີ່ ອິນ​ໂດ​ເນ​ເຊຍ: ພາຍ​ໃນ​ປີ 2024 ອິນ​ໂດ​ເນ​ເຊຍ ຈະ​ສຳ­ເລັດ​ໃນ​ການ​ໂຍກ​ຍ້າຍ​ນະ­ຄອນ­ຫຼວງ​ໄປ​ຕັ້ງ​ໃໝ່​ຢູ່​ເກາະ ກາ­ລີ​ມັນ​ຕັນ (ນະ­ຄອນ­ຫຼວງ​ຈາ​ກາ​ຕາ ໃນ​ປັດ­ຈຸ­ບັນ​ຕັ້ງ​ຢູ່​ເກາະ​ຈາ​ວາ) ຂ່າວ​ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 20 ເດືອນ​ມິ­ຖຸ­ນາ​ປີ​ນີ້ ບອກ​ວ່າ: ການ​ກໍ່­ສ້າງ​ນະ­ຄອນ­ຫຼວງ​ຢູ່​ແຫ່ງ​ໃໝ່​ຈະ​ເລີ່ມ​ຂຶ້ນ​ພາຍ​ໃນ​ປີ 2021 ສ່ວນ​ງົບ­ປະ­ມານ​ໃນ​ການ​ກໍ່­ສ້າງ​ນັ້ນ​ຈະ​ຈັດ​ສັນ​ໃຫ້​ສຳ­ເລັດ​ໃນ​ປີ 2020.

    ທ່ານ ບຳ​ບັງ ໂບຼດ​ໂຈ​ເນ​ໂກ​ໂຣ ລັດ­ຖະ­ມົນ­ຕີ​ກະ­ຊວງ​ວາງ​ແຜນ​ພັດ­ທະ­ນາ ໄດ້​ໃຫ້​ຮູ້​ວ່າ: ການ​ກໍ່­ສ້າງ​ນະ­ຄອນ­ຫຼວງ​ຈະ​ເຮັດ​ໄປ​ເປັນ​ແຕ່​ລະ​ບາດ­ກ້າວ ການ​ສັນ​ຫາ​ສະ­ຖານ­ທີ່​ເປັນ​ທີ່​ຕັ້ງ​ນັ້ນ​ໄດ້​ສຳ­ເລັດ​ໄປ​ແລ້ວ 90% ເງື່ອນ­ໄຂ​ການ​ສັນ​ຫາ​ທີ່​ຕັ້ງ​ນະ­ຄອນ­ຫຼວງ​ນີ້ ເນັ້ນ​ການ​ສຶກ​ສາ​ປັດ​ໄຈ​ສຳ­ຄັນ​ດັ່ງ­ນີ້ ຄື: ປະ­ລິ­ມານ​ການ​ສະ​ສົມ​ແຫຼ່ງ​ນ້ຳ ໂຄງ​ລ່າງ ຄວາມ​ສ່ຽງ​ຈາກ​ແຜ່ນ­ດິນ​ໄຫວ ແລະ ໄຟ​ປ່າ ແລະ ສຸດ​ທ້າຍ​ແມ່ນ​ເງື່ອນ­ໄຂ​ດ້ານ​ສັງ­ຄົມ ຜົນ​ການ​ສຶກ​ສາ​ດັ່ງ­ກ່າວ​ຈະ​ຍື່ນ​ເຖິງ​ມື​ປະ­ທາ­ນາ­ທິ­ບໍ­ດີ ໂຈ​ໂກ ວິ​ໂດ​ໂດ ໃນ​ໄວໆ​ນີ້ ເພື່ອ​ໃຫ້​ທ່ານ​ທັນ​ເປີດ­ເຜີຍ​ໃຫ້​ທົ່ວ​ສັງ­ຄົມ​ຊາບ​ພາຍ​ໃນ​ປີ​ນີ້ ກ່ຽວ​ກັບ​ໂຄງ­ການ​ສ້າງ​ນະ­ຄອນ­ຫຼວງ​ໃໝ່.

    ຂ່າວ​ບອກ​ວ່າ: ງົບ­ປະ­ມານ​ທີ່​ຈະ​ໃຊ້​ຈ່າຍ​ໃນ​ການ​ໂຍກ​ຍ້າຍ​ນະ­ຄອນ­ຫຼວງ​ນັ້ນ ອາດ​ສູງ​ເຖິງ 499 ພັນ​ຕື້​ຣູ​ເປຍ (ປະ­ມານ 32,5 ຕື້​ໂດ​ລາ​ສະ­ຫະ­ລັດ) ເຊິ່ງ​ມາ​ຈາກ​ບ້ວງ​ງົບ­ປະ­ມານ​ແຫ່ງ​ລັດ ຈາກ​ລັດ​ວິ​ສາ​ຫະ​ກິດ ແລະ ຈາກ​ພາກ­ສ່ວນ​ເອ­ກະ​ຊົນ ແນວ​ຄິດ​ໃນ​ການ​ໂຍກ​ຍ້າຍ​ນະ­ຄອນ ໄດ້​ຖືກ​ນຳ​ສະ­ເໜີ​ໂດຍ​ທ່ານ​ປະ­ທາ­ນາ­ທິ­ບໍ­ດີ ໂຈ​ໂກ ວິ​ໂດ​ໂດ ເມື່ອ​ປະ­ມານ 3 ເດືອນ​ກ່ອນ​ໜ້າ​ນີ້.

    ທາງ​ການ​ອິນ​ໂດ​ເນ​ເຊຍ ມີ​ຄວາມ​ໝັ້ນ​ໃຈ​ວ່າ ການ​ໂຍກ​ຍ້າຍ​ນະ­ຄອນ­ຫຼວງ​ຈະ​ຊ່ວຍ​ພັດ­ທະ­ນາ​ເສດ­ຖະ­ກິດ ໃນ​ບັນ­ດາ​ເຂດ​ແຄວ້ນ​ຢູ່​ນອກ​ເກາະ​ຈາ​ວາ ທີ່​ມີ​ປະ­ຊາ­ຊົນ​ຢູ່​ຢ່າງ​ໜາ​ແໜ້ນ​ແລ້ວ ນະ­ຄອນ­ຫຼວງ​ຈາ​ກາ​ຕາ ຂອງ​ອິນ​ໂດ​ເນ​ເຊຍ ໃນ​ປັດ­ຈຸ­ບັນ ປະ​ເຊີນ​ກັບ​ບັນ­ຫາ​ລົດ​ຕິດ ແລະ ນ້ຳ​ຖ້ວມ​ຢ່າງ​ຕໍ່​ເນື່ອງ.

    ທີ່ ບຼູ​ໄນ: ຂ່າວ​ຈາກ​ໜັງ­ສື­ພິມ​ຜູ້​ແທນ​ປະ­ຊາ­ຊົນ ສະ­ບັບ​ທີ 580 (ຕົ້ນ​ເດືອນ​ພຶດ­ສະ­ພາ 2019) ໃຫ້​ຮູ້​ວ່າ: ທາງ​ການ​ປະ­ເທດ​ບຼູ​ໄນ ດາ​ຣູ​ຊາ​ລາມ ໄດ້​ປະ­ກາດ​ຍົກ­ເລີກ​ມາດ​ຕະ­ການ​ລົງ­ໂທດ​ສະ­ຖານ​ໜັກ​ຕໍ່​ກຸ່ມ​ຄົນ​ຮັກ​ຮ່ວມ​ເພດ ດ້ວຍ​ວິ­ທີ​ໂຍນ​ກ້ອນ​ຫີນ​ໃສ່​ຜູ້​ກະ­ທຳ​ຜິດ​ຈົນ​ເຖິງ​ແກ່​ຊີ­ວິດ ຄຳ​ສັ່ງ​ຍົກ­ເລີກ​ການ​ລົງ­ໂທດ​ຂັ້ນ​ປະ­ຫານ​ດ້ວຍ​ວິ­ທີ​ດັ່ງ­ກ່າວ ໄດ້​ປະ­ກາດ​ອອກ​ມາ​ໂດຍ​ເຈົ້າ​ຊີ­ວິດ ສຸນ​ຕານ ນັນ​ໂບ​ເກຍ ຂອງ​ບຼູ​ໄນ ດາ​ຣູ​ຊາ​ລາມ.

    ໃນ​ປີ 2014 ປະ­ເທດ​ນີ້​ໄດ້​ປະ­ກາດ​ບັງ­ຄັບ​ໃຊ້​ກົດ­ໝາຍ​ຊາ​ຣີ​ອະ ສົມ­ທົບ​ກັບ​ຈາ​ຣີດ​ປະ­ເພ­ນີ ເຊິ່ງ​ສ່ວນ​ໃຫຍ່​ເປັນ​ການ​ປັບ​ໃໝ​ເງິນ ແລະ ບົດ​ລົງ­ໂທດ​ຈຳ​ຄຸກ​ເປັນ​ເວ­ລາ​ດົນ​ນານ​ຫຼາຍ​ກວ່າ.

    ທີ່ ສປ ຈີນ: ມີ​ຂ່າວ​ວ່າ ໃນ​ເດືອນ​ມິ­ຖຸ­ນາ​ປີ​ນີ້ ທາງ​ການ ສປ ຈີນ ໄດ້​ອອກ​ຄຳ​ສັ່ງ​ໃຫ້​ທຸກໆ​ເມືອງ​ໃນ​ທົ່ວ​ປະ­ເທດ ເລີ່ມ​ສ້າງ​ລະ­ບົບ​ແຍກ​ຂີ້​ເຫຍື້ອ ແລະ ໃຫ້​ສຳ­ເລັດ​ຢ່າງ​ສົມ­ບູນ​ພາຍ​ໃນ​ປີ 2025 ງົບ­ປະ­ມານ​ທີ່​ທາງ​ການ​ຈີນ​ວາງ​ໄວ້ ເພື່ອ​ສ້າງ​ລະ­ບົບ​ແຍກ​ຂີ້​ເຫຍື້ອ​ຂັ້ນ​ສູງ ສປ ຈີນ ມີ​ລົດ​ຂົນ​ຂີ້​ເຫຍື້ອ ຄື: 5.000 ຄັນ ເພື່ອ​ຂົນ​ຂີ້​ເຫຍື້ອ​ຈາກ​ຄົວ​ເຮືອນ ແລະ ອີກ 1.000 ຄັນ ເພື່ອ​ຂົນ​ຂີ້​ເຫຍື້ອ​ປະ­ເພດ​ອັນ­ຕະ­ລາຍ.

ຂ່າວທີ່ກ່ຽວຂ້ອງ