ຂ່າວຫຼ້າສຸດ

ລົດແກ້ວ ຄວ້າອັນດັບ 1 ແລ່ນການກຸສົນ ຢູ່ບາງກອກ

539 11 ກ.ລ. 2019 ວົງຈອນກີລາ
ລົດແກ້ວ ຄວ້າອັນດັບ 1 ແລ່ນການກຸສົນ ຢູ່ບາງກອກ

    ລົດ​ແກ້ວ ອິນ​ທະ​ກຸມ­ມານ ນັກ­ກີ­ລາ​ແລ່ນ​ທີມ​ຊາດ​ລາວ ຄວ້າ​ລາ­ງວັນ​ຊະ­ນະ​ເລີດ​ໃນ​ການ​ເຂົ້າ​ຮ່ວມ​ແລ່ນ​ການ​ກຸ­ສົນ ລາຍ­ການ TA Active Run for Heart 2019 ຢູ່​ບາງ­ກອກ ປະ­ເທດ​ໄທ ປະ­ເພດ 10 Km ດ້ວຍ​ເວ­ລາ 41,49 ວິ­ນາ­ທີ ໂດຍ​ເອົາ​ຊະ­ນະ ວໍ​ຣະ​ພັນ ນວນ​ສຣີ ນັກ­ກີ­ລາ​ເຈົ້າ­ພາບ 1 ນາ­ທີ 3 ວິ­ນາ­ທີ ໃນ​ວັນ​ທີ 7 ກໍ­ລະ­ກົດ ຜ່ານ​ມາ.

    ລາຍ­ການ​ດັ່ງ­ກ່າວ ລົດ​ແກ້ວ ເຂົ້າ​ຮ່ວມ​ເປັນ​ຄັ້ງ​ທຳ​ອິດ ແລະ ເປັນ​ຂັນ​ຊະ­ນະ​ເລີດ ລາຍ­ການ​ທີ 6 ຈາກ 7 ລາຍ­ການ​ທີ່​ເຂົ້າ​ຮ່ວມ​ແຂ່ງ­ຂັນ​ໃນ​ປີ 2019 ຂອງ ລົດ​ແກ້ວ ເຊິ່ງ​ລາຍ­ການ One Siam One Run 2019 ຢູ່​ບາງ­ກອກ ວັນ​ທີ 2 ມິ­ຖຸ­ນາ ຜ່ານ​ມາ ກໍ​ເປັນ​ການ​ເຂົ້າ​ຮ່ວມ​ລາຍ­ການ​ດັ່ງ­ກ່າວ ຄັ້ງ​ທຳ​ອິດ ແລະ ສາ­ມາດ​ຄວ້າ​ລາ­ງວັນ​ຊະ­ນະ​ເລີດ 4 ລາຍ­ການ​ຕິດ​ຕິດ­ຕໍ່​ກັນ.

    ປັດ­ຈຸ­ບັນ ລົດ​ແກ້ວ ກຳ­ລັງ​ກະ­ກຽມ​ເຂົ້າ​ຮ່ວມ​ງານ​ແລ່ນ​ການ​ກຸ­ສົນ​ພາຍ​ໃຕ້​ຊື່ ແລ່ນ​ເພື່ອ​ນ້ອງ ເຊິ່ງ​ເປັນ​ລາຍ­ການ​ທີ່​ໄດ້­ຜົນ​ຕອບ-ຮັບ​ດີ​ຈາກ​ສັງ­ຄົມ ເປີດ​ຮັບ​ສະ­ໝັກ​ພຽງ 4 ວັນ ມີ​ຜູ້​ມາ​ສະ­ໝັກ​ຮ່ວມ​ງານ​ຄົບ​ຕາມ​ເປົ້າ​ໝາຍ 600 ຄົນ ສ່ວນ​ທ່ານ​ໃດ​ທີ່​ສະ­ໝັກ​ບໍ່​ທັນ ສາ­ມາດ​ມາ​ຮ່ວມ​ກິດ­ຈະ­ກຳ​ໄດ້ ວັນ​ທີ 28 ກໍ­ລະ­ກົດ 2019 ຢູ່​ສວນ​ເຈົ້າ​ອະ­ນຸ­ວົງ ນະ­ຄອນ­ຫຼວງ​ວຽງ​ຈັນ ເລີ່ມ​ແຕ່​ເວ­ລາ 5:30 ໂມງ​ເປັນ­ຕົ້ນ​ໄປ.

    ລາຍ​ໄດ້​ທັງ​ໝົດ​ຈາກ​ກິດ­ຈະ­ກຳ​ຄັ້ງ​ນີ້ ຈະ​ນຳ­ໄປ​ຊ່ວຍ​ສົມ­ທົບ​ທຶນ​ກໍ່­ສ້າງ​ຫ້ອງ​ຮຽນ ຫ້ອງ​ສະ­ໝຸດ ຫ້ອງ​ນ້ຳ ແລະ ລະ­ບົບ​ນ້ຳ​ສະ­ອາດ (ນ້ຳ​ກິນ-ນ້ຳ​ໃຊ້) ໃຫ້​ໂຮງ­ຮຽນ​ຢູ່​ຫ່າງ​ໄກ​ສອກ­ຫຼີກ ແລະ ຊ່ວຍ​ສົມ ທົບ​ສ້າງ​ຫໍ­ສະ­ໝຸດ​ໃຫ້​ໂຮງ­ຮຽນ​ໃນ​ນະ­ຄອນ­ຫຼວງ​ວຽງ​ຈັນ ເຊິ່ງ​ຜູ້​ທີ່​ສົນ­ໃຈ​ສາ­ມາດ​ຮ່ວມ​ບໍ­ລິ­ຈາກ​ໄດ້​ທີ່ One heart (BCEL One) ເປັນ​ຊ່ອງ​ທາງ​ການ​ບໍ­ລິ­ຈາກ​ທີ່​ໂປ່ງ​ໃສ ສາ­ມາດ​ກວດ​ສອບ​ໄດ້​ທຸກ​ເວ­ລາ ທຸກ​ຂັ້ນ​ຕອນ ຂໍ​ເຊີນ­ຊວນ​ທຸກ​ທ່ານ​ມາ​ຮ່ວມ​ພະ­ລັງ​ຄວາມ​ສາ­ມັກ­ຄີ ສ້າງ​ບຸນ​ກຸ­ສົນ​ຮ່ວມ​ກັນ​ໃນ​ງານ​ຄັ້ງ​ນີ້.

ຂ່າວທີ່ກ່ຽວຂ້ອງ