ລ້ຽງນົກກະຈອກເທດ ໃຫ້ກາຍເປັນສັດເສດຖະກິດ

313 11 ກ.ລ. 2019 ຂ່າວໜ້າ​ໜຶ່ງ
ລ້ຽງນົກກະຈອກເທດ ໃຫ້ກາຍເປັນສັດເສດຖະກິດ

    ຫຍ້າ​ອິດ​ສະ­ລະ​ເອວ ເປັນ​ຫຍ້າ​ທີ່​ນຳ​ແນວ​ພັນ​ເຂົ້າ​ມາ​ຈາກ​ປະ­ເທດ​ອິດ​ສະ­ລະ​ເອວ ເຊິ່ງ​ເປັນ​ຫຍ້າ​ທີ່​ມີ​ທາດ​ໂປຣ​ຕີນ​ສູງ ເໝາະ​ສົມ​ແກ່​ການ​ລ້ຽງ­ສັດ​ປະ­ເພດ​ສັດ​ຄ້ຽວ­ເອື້ອງ ແລະ ສັດ​ປີກ ພ້ອມ​ນັ້ນ ຍັງ​ເປັນ​ຫຍ້າ​ທີ່​ປູກ​ງ່າຍ​ບໍ່​ເລືອກ​ປະ­ເພດ​ດິນ ດັ່ງ­ນັ້ນ ທ່ານ ແກ້ວ​ສັນ­ຕິ​ສຸກ ໄຊ​ຄຳ​ວົງ ພະ­ນັກ­ງານ​ສູນ​ຄົ້ນ­ຄວ້າ​ການ​ລ້ຽງ­ສັດ ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ໃຊ້​ເວ­ລາ​ວ່າງ​ມາ​ປູກ​ຫຍ້າ​ດັ່ງ­ກ່າວ​ເພື່ອ​ເປັນ​ອາ­ຫານ​ໃຫ້​ແກ່​ນົກ​ກະ­ຈອກ​ເທດ ເປັດ ແລະ ໄກ່.

    ທ່ານ ແກ້ວ​ສັນ­ຕິ​ສຸກ ໄຊ​ຄຳ​ວົງ ໃຫ້​ສຳ­ພາດ​ວັນ​ທີ 4 ກໍ­ລະ­ກົດ 2019 ວ່າ: ຕົນ​ເປັນ​ບຸກ­ຄົນ​ໜຶ່ງ​ທີ່​ເຮັດ​ວຽກ​ນຳ­ພາ​ກລັດ ໂດຍ​ອີງ­ໃສ່​ຄວາມ​ຮູ້ ແລະ ວິ­ຊາ​ການ​ພື້ນ­ຖານ​ຂອງ​ຕົນ​ເອງ ຈຶ່ງ​ເອົາ​ມາ​ນຳ​ໃຊ້​ເຊິ່ງ​ໄດ້​ປູກ​ຫຍ້າ​ອິດ​ສະ­ລະ​ເອວ​ໃນ​ເນື້ອ­ທີ່ 4 ໄລ່ ຢູ່​ບ້ານ​ໂຄກ​ໃຫຍ່ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ໂດຍ​ເລີ່ມ​ປູກ​ມາ​ແຕ່​ຕົ້ນ​ປີ 2018 ເປັນ­ຕົ້ນ​ມາ ປັດ­ຈຸ­ບັນ ໄດ້​ຂະ­ຫຍາຍ​ເນື້ອ­ທີ່​ປູກ​ໃໝ່​ອອກ​ເພີ່ມ 2 ເຮັກ­ຕາ ຢູ່​ສວນ​ທີ່​ນ້ຳ​ຊວງ ເມືອງ​ນາ​ຊາຍ​ທອງ ເພື່ອ​ສະ­ໜອງ​ອາ­ຫານ​ໃຫ້​ນົກ​ກະ­ຈອກ​ເທດ 70 ໂຕ ນອກ​ນັ້ນ ຍັງ​ໄດ້​ສະ­ໜອງ​ໃຫ້​ເປັດ ແລະ ໄກ່​ຈຳ­ນວນ​ໜຶ່ງ ສ່ວນ​ຫຍ້າ​ທີ່​ເຫຼືອ​ຈາກ​ສັດ​ຂອງ​ຕົນ​ເອງ​ແລ້ວ ກໍ​ຈະ​ເອົາ​ໄປ​ຈຳ­ໜ່າຍ​ໃຫ້​ກັບ​ສັງ­ຄົມ ກໍ​ຄື ຊາວ​ກະ­ສິ­ກອນ​ຜູ້​ທີ່​ມີ​ຄວາມ​ສົນ­ໃຈ​ຢາກ​ເອົາ​ໄປ​ປູກ ຫຼື ເປັນ​ອາ­ຫານ​ໃຫ້​ສັດ​ຢູ່​ພາຍ​ໃນ​ນະ­ຄອນ­ຫຼວງ​ວຽງ​ຈັນ ແລະ ຕ່າງ​ແຂວງ ຕາມ​ການ​ສັ່ງ​ຈອງ​ຂອງ​ລູກ​ຄ້າ ໂດຍ​ສັ່ງ​ຈອງ​ຄັ້ງ​ລະ 200-500 ທ່ອນ ລາ­ຄາ​ຂາຍ​ທ່ອນ​ລະ 500 ກີບ ສະ­ເລ່ຍ​ເດືອນ​ໜຶ່ງ​ມີ​ລາຍ​ຮັບ​ຈາກ​ການ​ຂາຍ​ຫຍ້າ ປະ­ມານ 2-3 ລ້ານ​ກີບ.

    ສຳ­ລັບ​ຫຍ້າ​ອິດ​ສະ­ລະ​ເອວ​ຈະ​ມີ​ອາ­ຍຸ​ປະ­ມານ 45-60 ວັນ ສາ­ມາດ​ຕັດ​ເອົາ​ໄປ​ບົດ​ໃຫ້​ສັດ​ກິນ​ໄດ້ ຈາກ​ນັ້ນ ຈະ​ເອົາ​ຝຸ່ນ​ຂີ້​ເປັດ ຂີ້​ໄກ່​ໃສ່​ປະ­ມານ 1 ເດືອນ ກໍ​ສາ­ມາດ​ຕັດ​ໄດ້ ແລະ ໜູນ​ວຽນ​ໄປ​ເລື້ອຍໆ ສ່ວນ​ການ​ລ້ຽງ​ນົກ​ກະ­ຈອກ​ເທດ​ໄດ້​ເລີ່ມ​ປີ 2016 ເປັນ­ຕົ້ນ​ມາ ເຊິ່ງ​ການ​ລ້ຽງ​ເພື່ອ​ການ​ຄົ້ນ­ຄວ້າ​ເກັບ​ກຳ​ຂໍ້​ມູນ ແລະ ຊອກ​ຫາ​ເຕັກ­ນິກ​ຕ່າງໆ ເພື່ອ​ຮັບ​ໃຊ້​ສັງ­ຄົມ ໝາຍ​ຄວາມ​ວ່າ​ລ້ຽງ​ເພື່ອ​ການ​ພັດ­ທະ­ນາ​ທາງ​ດ້ານ​ເຕັກ­ນິກ ແລະ ການ​ຄົ້ນ­ຄວ້າ​ວິ­ໄຈ ພ້ອມ​ນັ້ນ ຍັງ​ລ້ຽງ​ເນັ້ນ​ໃສ່​ຂາຍ​ແນວ​ພັນ​ໃຫ້​ຜູ້​ທີ່​ສົນ­ໃຈ​ລ້ຽງ​ເອົາ​ໄວ້​ນຳ​ເຮືອນ ຕາມ​ຄວາມ​ເຊື່ອ​ເພື່ອ​ເສີມ​ປາ­ລະ­ມີ ແລະ​ອື່ນໆ ລາ­ຄາ​ຂາຍ 1,6 ລ້ານ​ກີບ​ຕໍ່​ໂຕ (ນົກ​ທີ່​ມີ​ອາ­ຍຸ 2 ເດືອນ).

    ທ່ານ ແກ້ວ​ສັນ­ຕິ​ສຸກ ໄຊ​ຄຳ​ວົງ ຍັງ​ໃຫ້​ຮູ້​ຕື່ມ​ວ່າ: ໃນ​ອະ­ນາ­ຄົດ​ຄວາມ​ຕ້ອງ­ການ​ນົກ​ກະ­ຈອກ​ເທດ​ມີ​ທ່າ​ອ່ຽງ​ເພີ່ມ​ສູງ​ຂຶ້ນ ດັ່ງ­ນັ້ນ ຕົນ​ເອງ​ຈຶ່ງ​ມີ​ແຜນ​ຈະ​ລ້ຽງ​ນົກ​ກະ­ຈອກ​ເທດ​ໃຫ້​ເປັນ​ສັດ​ເສດ­ຖະ­ກິດ ເນື່ອງ​ຈາ​ກວ່າ​ເສດ­ຖະ­ກິດ​ຂອງ​ປະ­ເທດ​ເຮົາ​ມີ​ການ​ຂະ­ຫຍາຍ­ຕົວ ແລະ ເສັ້ນ­ທາງ​ລົດ­ໄຟ​ກໍ​ຈະ​ມາ ເພື່ອ​ຕອບ​ສະ­ໜອງ​ທີ່​ກ່າວ​ມາ​ນັ້ນ ຕົນ​ຈຶ່ງ​ມີ​ແຜນ​ຈະ​ຂະ­ຫຍາຍ​ລ້ຽງ​ນົກ​ກະ­ຈອກ​ເທດ​ເພີ່ມ​ຂຶ້ນ ພ້ອມ​ທັງ​ຂະ­ຫຍາຍ​ເນື້ອ­ທີ່​ປູກ​ຫຍ້າ​ໃຫ້​ໄດ້ 6 ເຮັກ­ຕາ ເພື່ອ​ເປັນ​ອາ­ຫານ​ໃຫ້​ນົກ ແລະ ສັດ​ຕ່າງໆ ເປັນ​ການ​ປະ­ຢັດ​ຕົ້ນ​ທຶນ​ຕື່ມ​ອີກ.

ຂ່າວທີ່ກ່ຽວຂ້ອງ