ຂ່າວຫຼ້າສຸດ

ໄຂ້ຍຸງລາຍ ມີທ່າອ່ຽງເພີ່ມຂຶ້ນສົ່ງຜົນໃຫ້ມີຜູ້ເສຍຊີວິດ 28 ຄົນ

325 11 ກ.ລ. 2019 ຂ່າວໜ້າ​ໜຶ່ງ
ໄຂ້ຍຸງລາຍ ມີທ່າອ່ຽງເພີ່ມຂຶ້ນສົ່ງຜົນໃຫ້ມີຜູ້ເສຍຊີວິດ 28 ຄົນ

    ພະ­ຍາດ​ໄຂ້­ຍຸງ​ລາຍ​ໃນ​ປີ​ນີ້ ມີ​ທ່າ​ອ່ຽງ​ເພີ່ມ​ຂຶ້ນ ແລະ ໄຂ້­ຍຸງ​ລາຍ​ທີ່​ເກີດ​ຂຶ້ນ​ປີ​ນີ້​ແມ່ນ​ເກີດ​ຈາກ​ໄຂ້­ຍຸງ​ລາຍ​ປະ­ເພດ 2 ແລະ ປະ­ເພດ 4 ສ່ວນ​ປະ­ເພດ 1 ແລະ 3 ແມ່ນ​ເກີດ​ຂຶ້ນ​ບໍ່​ຫຼາຍ ເຊິ່ງ​ເຊື້ອ​ພະ­ຍາດ​ນີ້​ມີ​ລັກ­ສະ­ນະ​ຮ້າຍ​ແຮງ​ກວ່າ​ເກົ່າ ແລະ ທົນ​ທານ​ຕໍ່​ຢາ​ບາງ​ປະ­ເພດ ເຮັດ​ໃຫ້​ກົນ​ໄກ​ເລືອດ​ບໍ່​ກ້າມ​ໄວ ແຕ່​ມັນ​ຈະ​ເຮັດ​ໃຫ້​ອະ​ໄວ​ຍະ​ວະ​ຂອງ​ຮ່າງ­ກາຍ​ຊຸດ­ໂຊມ​ໄວ​ຂຶ້ນ ແລະ ຍັງ​ບໍ່​ມີ​ຢາ​ຊະ­ນິດ​ໃດ ທີ່​ຈະ​ປ້ອງ​ກັນ ແລະ ປິ່ນ­ປົວ​ໄດ້ ເພື່ອ​ຫຼີກ​ລ່ຽງ​ບໍ່​ໃຫ້​ມີ​ອັດ­ຕາ​ການ​ຕາຍ ເມື່ອ​ເປັນ­ໄຂ້​ຄວນ​ໄປ​ພົບ​ແພດ ເພື່ອ​ຮັບ​ການ­ບົ່ງ­ມະ­ຕິ ແລະ ປິ່ນ­ປົວ.

    ອີງ​ຕາມ​ການ​ລາຍ​ງານ​ຂອງ​ກົມ​ຄວບ​ຄຸມ­ພະ​ຍາດ​ຕິດ­ຕໍ່ ກະ­ຊວງ​ສາ­ທາ­ລະ­ນະ​ສຸກ ໃຫ້​ຮູ້­ເມື່ອ​ບໍ່​ດົນ​ມາ​ນີ້​ວ່າ: ນັບ​ແຕ່​ວັນ​ທີ 29 ທັນ­ວາ 2018-8 ກໍ­ລະ­ກົດ 2019 ມີ​ຄົນ​ເຈັບ​ທີ່​ເປັນ­ໄຂ້​ຍຸງ​ລາຍ​ສະ​ສົມ 12.212 ກໍ­ລະ­ນີ ເສຍ​ຊີ­ວິດ 28 ຄົນ ໃນ​ນີ້ ແຂວງ​ຈຳ­ປາ​ສັກ 2.516 ກໍ­ລະ­ນີ ເສຍ​ຊີ­ວິດ 5 ຄົນ ນະ­ຄອນ­ຫຼວງ​ວຽງ​ຈັນ 2.233 ກໍ­ລະ­ນີ ເສຍ​ຊີ­ວິດ 6 ຄົນ ສະ­ຫວັນ​ນະ​ເຂດ 2.078 ກໍ­ລະ­ນີ ເສຍ​ຊີ­ວິດ 10 ຄົນ ສາ­ລະ​ວັນ 1.563 ຄົນ ເສຍ​ຊີ­ວິດ 3 ຄົນ ຄຳ​ມ່ວນ 1.278 ກໍ­ລະ­ນີ ເສຍ​ຊີ­ວິດ 2 ຄົນ ອັດ​ຕະ​ປື 777 ກໍ­ລະ­ນີ ບໍ​ລິ​ຄຳ​ໄຊ 487 ກໍ­ລະ­ນີ ເສຍ​ຊີ­ວິດ 2 ຄົນ ຫຼວງ​ນ້ຳ​ທາ 345 ກໍ­ລະ­ນີ ວຽງ​ຈັນ 327 ກໍ­ລະ­ນີ ເຊ​ກອງ 212 ກໍ­ລະ­ນີ ໄຊ​ຍະ​ບູ​ລີ 211 ກໍ­ລະ­ນີ ຫຼວງ​ພະ​ບາງ 98 ກໍ­ລະ­ນີ ໄຊ​ສົມ­ບູນ 58 ກໍ­ລະ­ນີ ອຸ­ດົມ​ໄຊ 12 ກໍ­ລະ­ນີ ບໍ່​ແກ້ວ 9 ກໍ­ລະ­ນີ ຊຽງ​ຂວາງ 8 ກໍ­ລະ­ນີ ສ່ວນ​ຜົ້ງ​ສາ­ລີ ຫົວ­ພັນ ແມ່ນ​ບໍ່​ພົບ​ກໍ­ລະ­ນີ.

    ເພື່ອ​ປ້ອງ​ກັນ ແລະ ຕ້ານ​ສະ­ກັດ​ກັ້ນ​ພະ­ຍາດ​ນີ້ ກະ­ຊວງ​ສາ­ທາ­ລະ­ນະ​ສຸກ ໄດ້​ຮຽກ­ຮ້ອງ​ໃຫ້​ອຳ­ນາດ​ການ​ປົກ­ຄອງ ປະ­ຊາ­ຊົນ ລວມ​ທັງ​ພະ­ນັກ­ງານ ທະ­ຫານ ຕຳ­ຫຼວດ ຈົ່ງ​ພ້ອມ​ກັນ​ເປັນ​ເຈົ້າ​ການ­ຈັດ­ຕັ້ງ​ປະ­ຕິ­ບັດ​ມາດ​ຕະ­ການ 5ປ ທີ່​ກະ­ຊວງ​ສາ­ທາ­ລະ­ນະ​ສຸ​ກວາງ​ອອກ​ເປັນ​ປະ­ຈຳ ພ້ອມ​ນີ້ ກໍ​ຕ້ອງ​ເອົາ­ໃຈ­ໃສ່​ທຳ­ລາຍ​ແຫຼ່ງ​ເພາະ​ພັນ​ຂອງ​ຍຸງ​ລາຍ ໂດຍ​ປິດ​ພາ­ຊະ­ນະ ແລະ ປ່ຽນ​ນ້ຳ​ໃສ່​ພາ­ຊະ­ນະ​ສອງ​ຄັ້ງ​ຕໍ່​ອາ­ທິດ ປ່ອຍ​ປາ​ຫາງ​ນົກ​ຍຸງ​ໃສ່​ພາ­ຊະ­ນະ​ກັກ​ນ້ຳ ເພື່ອ​ໃຫ້​ກິນ​ໜອນ​ນ້ຳ​ຍຸງ​ລາຍ ປັບ­ປຸງ​ອະ­ນາ­ໄມ​ບໍ­ລິ­ເວນ​ທີ່­ຢູ່​ອາ­ໄສ​ທັງ​ໃນ ແລະ ນອກ​ເຮືອນ​ໃຫ້​ສະ­ອາດ ຖ້າ​ມີ​ໄຂ້​ຄວນ​ໄປ​ພົບ​ແພດ ບໍ່​ຄວນ​ຊື້​ຢາ​ມາ​ປິ່ນ­ປົວ​ເອງ ເພື່ອ​ຫຼີກ​ລ່ຽງ​ອັດ­ຕາ​ການ​ຕາຍ​ຈາກ​ພະ­ຍາດ​ນີ້.

ຂ່າວທີ່ກ່ຽວຂ້ອງ