ຈີນ ສະໜອງເງິນກູ້ ສົ່ງເສີມ SMEs ລາວ

257 11 ກ.ລ. 2019 ຂ່າວໜ້າ​ໜຶ່ງ
ຈີນ ສະໜອງເງິນກູ້ ສົ່ງເສີມ SMEs ລາວ

    ລັດ­ຖະ­ບານ ສປປ ລາວ ແລະ ລັດ­ຖະ­ບານ ສປ ຈີນ ໄດ້​ມອບ​ໃຫ້​ທະ­ນາ­ຄານ​ແຫ່ງ ສປປ ລາວ (ທຫລ) ແລະ ທະ­ນາ­ຄານ​ພັດ­ທະ­ນາ​ແຫ່ງ​ຊາດ​ຈີນ (CDB) ຮ່ວມ​ກັນ​ລົງ​ນາມ​ສັນ­ຍາ​ເງິນ​ກູ້ 300 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 2.616 ຕື້​ກີບ ເພື່ອ​ສົ່ງ­ເສີມ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ຂະ­ໜາດ​ກາງ (SMEs) ຢູ່ ສປປ ລາວ ເຊິ່ງ​ພິ­ທີ​ລົງ​ນາມ​ສັນ­ຍາ​ດັ່ງ­ກ່າວ ຈັດ​ຂຶ້ນ​ວັນ​ທີ 9 ກໍ­ລະ­ກົດ 2019 ຢູ່​ໂຮງ­ແຮມ​ລາວ​ພລາ​ຊາ ລະ­ຫວ່າງ​ທ່ານ​ນາງ ວັດ­ທະ­ນາ ດາ­ລາ​ລອຍ ຮອງ​ຜູ້​ວ່າ­ການ ທຫລ ແລະ ທ່ານ Hong Zhenghua ຫົວ­ໜ້າ​ສາ­ຂາ CDB ແຂວງ​ຢູນ​ນານ ໂດຍ​ມີ​ທ່ານ ສອນ​ໄຊ ສິດ​ພະ​ໄຊ ຜູ້​ວ່າ­ການ ທຫລ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໂດຍ​ເຫັນ​ໄດ້​ຄວາມ​ສຳ­ຄັນ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ນະ­ໂຍ­ບາຍ​ຂອງ​ລັດ­ຖະ­ບານ ໃນ​ການ​ຊຸ້ກ​ຍູ້-ສົ່ງ­ເສີມ​ບົດ­ບາດ​ຂອງ SMEs ໃນ​ການ​ຊຸກ­ຍູ້​ເສດ­ຖະ­ກິດ​ໃຫ້​ມີ​ການ​ພັດ­ທະ­ນາ ແລະ ຂະ­ຫຍາຍ­ຕົວ ໂດຍ​ສະ­ເພາະ ໃນ​ເງື່ອນ­ໄຂ​ຂອງ ສປປ ລາວ ທີ່​ບັນ­ດາ​ຫົວ­ໜ່ວຍ SMEs ມີ​ຄວາມ​ຕ້ອງ­ການ​ແຫຼ່ງ​ທຶນ​ຈຳ­ນວນ​ຫຼວງ­ຫຼາຍ ຕົ້ນ​ປີ 2017 ທຫລ ແລະ CDB ຈຶ່ງ​ປຶກ­ສາ​ຫາ­ລື​ກ່ຽວ​ກັບ​ການ​ສະ­ເໜີ​ໃຫ້​ເງິນ​ກູ້ ເພື່ອ​ສົ່ງ­ເສີມ​ພັດ­ທະ­ນາ SMEs ແກ່ ສປປ ລາວ ໂດຍ​ໄດ້​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ ວ່າ​ດ້ວຍ​ການ​ຮ່ວມ​ມື​ດ້ານ​ການ​ເງິນ ເພື່ອ​ສົ່ງ­ເສີມ SMEs ໃນ ສປປ ລາວ ວົງ​ເງິນ 300 ລ້ານ​ໂດ​ລາ​ສະ­ຫະ­ລັດ ລະ­ຫວ່າງ​ຜູ້​ວ່າ­ການ ທຫລ ກັບ​ປະ­ທານ​ສະ­ພາ​ບໍ­ລິ­ຫານ CDB ໃນ​ໂອ­ກາດ​ທີ່​ຄະ­ນະ​ຜູ້​ແທນ​ຂັ້ນ​ສູງ​ຂອງ ສປ ຈີນ ມາ​ຢ້ຽມ­ຢາມ​ທາງ​ລັດ​ຖະ​ກິດ​ຢູ່ ສປປ ລາວ ໃນ​ເດືອນ​ພະ­ຈິກ 2017.

    ສຳ­ລັບ​ເງິນ​ກູ້​ດັ່ງ­ກ່າວ ຈະ​ແບ່ງ​ການ​ເບີກ​ຖອນ​ເປັນ 3 ງວດ ງວດ​ລະ 100 ລ້ານ​ໂດ​ລາ​ສະ­ຫະ­ລັດ ບົນ​ພື້ນ­ຖານ​ເງື່ອນ­ໄຂ​ສັນ­ຍາ​ເງິນ​ກູ້​ທີ່​ເຫັນ​ດີ​ນຳ​ກັນ ເພື່ອ​ຜັນ​ຂະ­ຫຍາຍ​ເນື້ອ​ໃນ​ຈິດ­ໃຈ​ຂອງ​ບົດ​ບັນ­ທຶກ​ຄວາມ​ເຂົ້າ­ໃຈ​ດັ່ງ­ກ່າວ ທຫລ ແລະ CDB ໄດ້​ປຶກ­ສາ​ຫາ­ລື ແລະ ເຮັດ​ວຽກ​ຮ່ວມ​ກັນ​ຫຼາຍ​ຄັ້ງ ກ່ຽວ​ກັບ​ການ​ຄົ້ນ­ຄວ້າ​ເອ­ກະ­ສານ​ສັນ­ຍາ ຈົນ​ມາ​ເຖິງ​ວັນ​ທີ 9 ກໍ­ລະ­ກົດ 2019 ສອງ​ຝ່າຍ​ຈຶ່ງ​ໄດ້​ເຫັນ​ດີ​ລົງ​ນາມ​ສັນ­ຍາ​ເງິນ​ກູ້​ດັ່ງ­ກ່າວ ພາຍ­ຫຼັງ​ມີ​ການ​ລົງ​ນາມ​ສັນ­ຍາ​ເງິນ​ກູ້ ແລະ ໄດ້​ຮັບ​ການ​ເຫັນ​ດີ​ເບີກ​ຖອນ­ເງິນ​ກູ້​ຈາກ CDB ຄາດ​ວ່າ​ຈະ​ມີ​ກຳ­ລັງ​ແຮງ​ດ້ານ​ແຫຼ່ງ​ທຶນ ສົມ­ທົບ​ກັບ​ແຫຼ່ງ​ທຶນ​ຂອງ​ທະ­ນາ­ຄານ​ທຸ­ລະ​ກິດ​ພາຍ​ໃນ​ປະ­ເທດ ໃນ​ການ​ຊຸກ­ຍູ້​ວຽກ​ງານ​ການ​ເຂົ້າ​ເຖິງ​ແຫຼ່ງ​ທຶນ ແລະ ສ້າງ​ຄວາມ​ເຂັ້ມ­ແຂງ​ໃຫ້ SMEs ຫຼາຍ​ຂຶ້ນ ບັນ­ດາ​ຫົວ­ໜ່ວຍ SMEs ຈະ​ສ້າງ​ຜະ­ລິດ​ຕະ​ພັນ​ໃນ​ການ​ສົ່ງ​ອອກ ລວມ​ທັງ​ສົ່ງ​ອອກ​ໄປ ສປ ຈີນ ແລະ ສົ່ງ­ເສີມ​ປີ​ທ່ອງ​ທ່ຽວ ລາວ-ຈີນ ນອກ​ນີ້ ຍັງ​ຈະ​ປະ­ກອບ­ສ່ວນ​ໃນ​ການ​ປັບ­ປຸງ​ລະ­ບົບ​ທະ­ນາ­ຄານ​ຢູ່ ສປປ ລາວ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ກົນ​ໄກ​ສະ­ໜອງ​ສິນ​ເຊື່ອ​ເພື່ອ SMEs ດີ​ຂຶ້ນ ທັງ​ຈະ​ຊ່ວຍ​ຊຸກ­ຍູ້​ຈັງ­ຫວະ​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ ສປປ ລາວ ຕາມ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ຄັ້ງ​ທີ 8 ຢ່າງ​ມີ​ປະ​ສິດ­ທິ​ຜົນ.

ຂ່າວທີ່ກ່ຽວຂ້ອງ