ຂ່າວຫຼ້າສຸດ

ສືບຕໍ່ສ້າງນິຕິກຳດຳລັດ ກ່ຽວກັບວຽກງານຄຸ້ມຄອງໄອຊີທີ ທີ່ຍັງເປັນຊ່ອງວ່າງ

373 11 ກ.ລ. 2019 ຂ່າວໜ້າ​ໜຶ່ງ
ສືບຕໍ່ສ້າງນິຕິກຳດຳລັດ ກ່ຽວກັບວຽກງານຄຸ້ມຄອງໄອຊີທີ ທີ່ຍັງເປັນຊ່ອງວ່າງ

    ຄະ­ນະ​ກຳ­ມະ­ການ​ຄຸ້ມ​ຄອງ​ອິນ​ເຕີ​ເນັດ​ແຫ່ງ​ຊາດ (ຄຄອຊ) ຈັດ​ກອງ​ປະ­ຊຸມ​ສະ­ຫຼຸບ​ວຽກ​ງານ​ການ­ເຄື່ອນ­ໄຫວ ປະ­ຈຳ 6 ເດືອນ​ຕົ້ນ​ປີ ແລະ ທິດ​ທາງ 6 ເດືອນ​ທ້າຍ​ປີ 2019 ຂຶ້ນ​ວັນ​ທີ 9 ກໍ­ລະ­ກົດ 2019 ຢູ່​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໂດຍ​ເປັນ​ປະ­ທານ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ ຄຄອຊ ມີ​ບັນ­ດາ​ຮອງ​ປະ­ທານ ຄຄອຊ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    6 ເດືອນ​ຜ່ານ​ມາ ຄຄອຊ ໄດ້​ເຄື່ອນ​ໄຫວ​ວຽກ​ງານ​ການ​ຄຸ້ມ​ຄອງ​ອິນ​ເຕີ​ເນັດ​ຢູ່ ສປປ ລາວ ຢ່າງ​ເອົາ​ຈິງ​ເອົາ​ຈັງ ອັນ​ພົ້ນ​ເດັ່ນ​ແມ່ນ​ບັນ­ຫາ​ຫາງ​ສຽງ​ຂອງ​ສັງ­ຄົມ ທີ່​ຖືກ​ເຜີຍ­ແຜ່​ທາງ​ອິນ​ເຕີ​ເນັດ ໄດ້​ເຮັດ​ໃຫ້​ເຫັນ​ເຖິງ​ຄວາມ​ສຳ­ຄັນ​ໃນ​ການ​ຄຸ້ມ​ຄອງ​ອິນ​ເຕີ​ເນັດ ເວົ້າ​ສະ­ເພາະ ສື່​ອອນ​ລາຍ​ໄດ້​ຊີ້​ນຳ​ຂະ­ແໜງ­ການ​ກ່ຽວ­ຂ້ອງ ເອົາ­ໃຈ­ໃສ່​ແກ້​ໄຂ​ດ້ວຍ​ຮູບ​ການ​ຕ່າງໆ​ຢ່າງ​ມີ​ປະ​ສິດ­ທິ​ຜົນ ເປັນ­ຕົ້ນ ການ​ສ້າງ ແລະ ນຳ​ໃຊ້​ບັນ­ດາ​ນິ­ຕິ​ກຳ​ທີ່​ກ່ຽວ­ຂ້ອງ​ກັບ​ການ​ຄຸ້ມ​ຄອງ​ອິນ​ເຕີ​ເນັດ ໂດຍ​ສະ­ເພາະ ກົດ­ໝາຍ​ວ່າ​ດ້ວຍ​ການ​ຕ້ານ ແລະ ສະ­ກັດ​ກັ້ນ​ອາ​ຊະ​ຍາ​ກຳ​ທາງ​ຄອມ​ພິວ​ເຕີ ດຳ­ລັດ​ວ່າ​ດ້ວຍ​ການ​ຄຸ້ມ​ຄອງ​ຂໍ້​ມູນ​ຂ່າວ­ສານ​ຜ່ານ​ອິນ​ເຕີ​ເນັດ ທີ່​ຖື​ເປັນ​ປາຍ​ແຫຼມ​ຄົມ ແລະ ຖືກ​ນຳ​ໃຊ້​ເປັນ​ບ່ອນ​ອີງ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຄວບ​ຄຸມ ແລະ ຈຳ­ກັດ​ການ​ນຳ​ໃຊ້​ສື່​ສັງ­ຄົມ​ອອນ​ລາຍ​ໄປ​ໃນ​ທາງ​ທີ່​ຜິດ ພ້ອມ​ນີ້ ຍັງ​ໄດ້​ເຜີຍ­ແຜ່​ກົດ­ໝາຍ​ວ່າ​ດ້ວຍ​ລາຍ​ເຊັນ​ເອ​ເລັກ​ໂຕຣ​ນິກ ປັບ­ປຸງ​ດຳ­ລັດ​ວ່າ​ດ້ວຍ​ລະ­ບົບ​ສາຍ​ສົ່ງ​ໂທລະ​ຄົມ­ມະ­ນາ­ຄົມ ກະ­ກຽມ​ສ້າງ​ແຜນ​ຍຸດ​ທະ​ສາດ​ວຽກ​ງານ​ຄຸ້ມ​ຄອງ​ອິນ​ເຕີ​ເນັດ​ແຫ່ງ​ຊາດ ໄລ­ຍະ 10 ປີ ເຜີຍ­ແຜ່​ຕອບ​ຕ້ານ ແລະ ຕິດ­ຕາມ​ກວດ­ກາ​ບັນ­ຫາ​ຫາງ​ສຽງ​ບໍ່​ດີ​ໃນ​ສັງ­ຄົມ ໂດຍ​ສະ­ເພາະ ຜ່ານ​ສື່​ສັງ­ຄົມ​ອອນ​ລາຍ ວຽກ​ງານ​ການ​ກວດ­ກາ​ນຳ​ໃຊ້​ຄື້ນ​ຄວາມ​ຖີ່ ແລະ ສັນ­ຍານ​ອິນ​ເຕີ​ເນັດ​ທີ່​ບໍ່​ຖືກ​ລະ­ບຽບ ວຽກ​ງານ​ຂຶ້ນ​ທະ­ບຽນ​ຊິມ​ຄາດ ແລະ ວຽກ​ງານ​ຄຸ້ມ​ຄອງ​ລັດ­ຖະ­ບານ​ເອ​ເລັກ​ໂຕຣ​ນິກ ທີ່​ຈະ​ອຳ­ນວຍ​ຄວາມ​ສະ­ດວກ​ໃຫ້­ການ​ເຮັດ​ວຽກ​ເກັບ​ກຳ​ຂໍ້​ມູນ ການ​ຕິດ­ຕໍ່​ສື່­ສານ​ພາຍ​ໃນ​ກົງ­ຈັກ​ລັດ ກໍ​ມີ​ປະ​ສິດ­ທິ​ຜົນ​ກວ່າ​ເກົ່າ.

    ການ​ນຳ​ໃຊ້​ໄອ​ຊີ​ທີ ເຂົ້າ​ໃນ​ວຽກ​ງານ​ການ​ບໍ­ລິ­ຫານ​ລັດ­ຖະ­ບານ ປັດ­ຈຸ­ບັນ ບາງ​ຂະ­ແໜງ­ການ​ໄດ້​ນຳ​ໃຊ້​ຊ່ອງ​ທາງ​ອອນ​ລາຍ ເພື່ອ​ເຮັດ​ໃຫ້​ມີ​ຄວາມ​ສະ­ດວກ ແລະ ທັນ​ສະ­ໄໝ​ຂຶ້ນ​ກວ່າ​ເກົ່າ ເພື່ອ​ກ້າວ​ໄປ​ສູ່​ການ​ສ້າງ​ລັດ­ຖະ­ບານ​ເອ​ເລັກ​ໂຕຣ​ນິກ​ໃນ​ອະ­ນາ­ຄົດ ເປັນ­ຕົ້ນ ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ ໄດ້​ເປັນ​ຫຼັກ​ໃນ​ການ​ສະ­ໜອງ​ລະ­ບົບ​ອີ​ເມວ ລະ­ບົບ​ກອງ​ປະ­ຊຸມ​ທາງ­ໄກ ແລະ ລະ­ບົບ​ເອ­ກະ­ສານ​ເອ​ເລັກ​ໂຕຣ​ນິກ​ໃຫ້​ກະ­ຊວງ​ຕ່າງໆ ສ່ວນ​ວຽກ​ງານ​ຈັດ​ເກັບ​ລາຍ​ຮັບ​ຂອງ​ຂະ­ແໜງ­ການ​ເງິນ ການ​ທະ­ນາ­ຄານ ກໍ​ມີ​ການ​ນຳ​ໃຊ້​ໄອ​ຊີ​ທີ ເພື່ອ​ເຮັດ​ໃຫ້­ການ​ເກັບ​ລາຍ​ຮັບ​ມີ​ຄວາມ​ໂປ່ງ​ໃສ ສະ­ດວກ ວ່ອງ­ໄວ ແລະ ເກັບ​ລາຍ​ຮັບ​ໄດ້​ຫຼາຍ​ຂຶ້ນ.

    ສຳ­ລັບ​ທິດ​ທາງ​ຕໍ່­ໜ້າ ຈະ​ສືບ­ຕໍ່​ສ້າງ​ນິ­ຕິ​ກຳ ແລະ ດຳ­ລັດ​ລຸ່ມ​ກົດ­ໝາຍ​ກ່ຽວ​ກັບ​ວຽກ​ງານ​ຄຸ້ມ​ຄອງ​ໄອ​ຊີ​ທີ ທີ່​ຍັງ​ເປັນ​ຊ່ອງ​ວ່າງ ໂດຍ​ສະ­ເພາະ ນິ­ຕິ​ກຳ​ຄຸ້ມ​ຄອງ​ການ​ຄ້າ­ຂາຍ​ອອນ​ລາຍ ສື່​ສັງ­ຄົມ​ອອນ​ລາຍ ເພື່ອ​ໃຫ້​ກວມ​ເອົາ​ຊ່ອງ​ທາງ ວິ­ທີ​ການ​ໃໝ່​ທີ່​ເກີດ​ຂຶ້ນ ແລະ ຖືກ​ນຳ​ໃຊ້​ຫຼາຍ​ໃນ​ສັງ­ຄົມ​ເປັນ​ແຕ່​ລະ​ໄລ­ຍະ ສືບ­ຕໍ່​ຊຸກ­ຍູ້-ສົ່ງ­ເສີມ​ວຽກ​ງານ​ສ້າງ​ຈິດ​ສຳ­ນຶກ ການ​ເຜີຍ­ແຜ່​ຕອບ​ຕ້ານ​ກວດ­ກາ​ຫາ​ສຽງ​ສັງ­ຄົມ​ຜ່ານ​ສື່​ຕ່າງໆ ສືບ­ຕໍ່​ວຽກ​ງານ​ຖອດ​ຖອນ​ບົດ­ຮຽນ ກໍ່­ສ້າງ​ບຸ​ຄະ­ລາ​ກອນ​ໃຫ້​ມີ​ຄວາມ​ສາ­ມາດ​ສູງ​ຂຶ້ນ ໃນ​ວຽກ​ງານ​ຄຸ້ມ​ຄອງ​ອິນ​ເຕີ​ເນັດ ແລະ ສືບ­ຕໍ່​ຊຸກ­ຍູ້​ໃຫ້​ວຽກ​ງານ​ເຕັກ­ນິກ ທີ່​ຕິດ​ພັນ​ກັບ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ໃຫ້​ປາ­ກົດ​ຜົນ​ເປັນ​ຈິງ.

ຂ່າວທີ່ກ່ຽວຂ້ອງ